ໜັງສືພິມ ປະຊາຊົນ

ທ່ານ ຄຳພັນ ພົມມະທັດ ເນັ້ນໃຫ້ ສວສຊ ສ້າງຄວາມ ເປັນເອກະພາບໃນການປະຕິບັດໜ້າທີ່ວຽກງານ

ເຜີຍແຜ່ໂດຍ: siththiphone rasphone ເວລາ: 28/02/2020 09:08:49 ຈຳນວນຢ້ຽມຊົມ 1960 ຄັ້ງ

ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ທັງເປັນຜູ້ຊີ້ນໍາ ສວສຊ ໄດ້ລົງພົບປະກັບຄະນະນໍາຂອງສະຖາບັນວິທະຍາສາດສັງຄົມແຫ່ງຊາດ (ສວສຊ) ໃນວັນທີ 26 ກຸມພາຜ່ານມາ ທີ່ຫ້ອງປະຊຸມຂອງ ສວສຊ.
ໃນພິທີ ທ່ານ ສອນທະນູ ທໍາມະວົງ ປະທານສະຖາບັນວິ ທະຍາສາດສັງຄົມແຫ່ງຊາດໄດ້ ລາຍງານບົດສະຫຼຸບການເຄື່ອນ ໄຫວວຽກງານຂອງ ສວສຊ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ, ບົດຮຽນທີ່ ຖອດຖອນໄດ້ ແລະ ແຜນໃນຕໍ່ ໜ້າ, ສວສຊ ໃນຖານະເປັນເສ ນາທິການໃຫ້ແກ່ພັກ-ລັດຖະບານໃນການຄົ້ນຄວ້າ, ສະໜອງຂໍ້ມູນ ທາງວິທະຍາສາດສັງຄົມ ເພື່ອຮັບໃຊ້ເຂົ້າໃນການວາງແນວທາງນະໂຍບາຍຂອງພັກ, ແຜນຍຸດ ທະສາດ ແລະ ແຜນພັດທະນາ ເສດຖະກິດ-ສັງຄົມ ໃນແຕ່ລະ ໄລຍະ.
ໃນໄລຍະຜ່ານມາໄດ້ມີຜົນສຳເລັດໂຄງການຄົ້ນຄວ້າສໍາເລັດໂຄງການຈໍານວນໜຶ່ງ, ສະພາວິທະຍາສາດຂອງ ສວສຊ ໄດ້ຄົ້ນຄວ້າເລິກເຊິ່ງບັນດາໂຄງການຕ່າງໆ; ການຈັດພິມປຶ້ມທີ່ເປັນຜົນສໍາເລັດຂອງການຄົ້ນຄວ້າກໍໄດ້ດໍາເນີນໄປດ້ວຍຄຸນນະພາບ ຊຶ່ງມີຈໍານວນ 14 ຫົວເລື່ອງ, ປັດຈຸບັນ, ໄດ້ພິມອອກແລ້ວ ຈໍານວນ 6 ຫົວເລື່ອງ.
ໃນໄລຍະ 1 ປີ ທີ່ຜ່ານມາ ສວສຊ ໄດ້ມີການຄົ້ນຄວ້າທັງໝົດ ຈໍານວນ 25 ໂຄງການ, ສະເພາະປີ 2019 ໄດ້ສະໜອງງົບປະມານ ສໍາລັບໂຄງການຄົ້ນຄວ້າວິທະຍາສາດເປັນມູນຄ່າ 726 ລ້ານກວ່າກີບ, ໃນນີ້ບໍ່ໄດ້ລວມມູນຄ່າຂອງການພິມ ແລະ ຍັງໄດ້ເອົາໃຈໃສ່ຕິດຕາມວຽກງານອື່ນໆອີກ.
ໃນໂອກາດດັ່ງກ່າວ, ທ່ານ ຄໍາພັນ ພົມມະທັດ ໄດ້ສະແດງຄວາມຊົມເຊີຍຕໍ່ຜົນງານຂອງ ສວສຊ ທີ່ຍາດມາໄດ້ໃນໄລ ຍະຜ່ານມາ ພ້ອມທັງເນັ້ນໃຫ້ ສວສຊ ຕ້ອງເຕົ້າໂຮມຄວາມສາມັກຄີເປັນປຶກແຜ່ນ, ສ້າງຄວາມເປັນເອກະພາບ ໃນການປະຕິບັດໜ້າທີ່ວຽກງານຕ່າງໆ; ສ້າງຄວາມເຂົ້າໃຈຕໍ່ພາ ລະບົດບາດ, ໜ້າທີ່, ຂອບເຂດ ສິດ ໃນການຈັດຕັ້ງ ແລະ ການ ເຄື່ອນໄຫວຂອງສະຖາບັນທີ່ໄດ້ກໍານົດໄວ້ໃນດໍາລັດຂອງນາ ຍົກ ຊຶ່ງພາລະບົດບາດຫຼັກຂອງ ສວສຊ ແມ່ນເປັນເສນາທິການໃຫ້ແກ່ພັກ-ລັດ ໃນການຄົ້ນຄວ້າ ແລະ ສະໜອງຂໍ້ມູນດ້ານວິທະ ຍາສາດສັງຄົມ ເພື່ອຮັບໃຊ້ເຂົ້າໃນການວາງແນວທາງ, ແຜນ ນະໂຍບາຍຂອງພັກ; ປັບ ປຸງລະບອບ, ແບບແຜນການ ເຄື່ອນໄຫວໃຫ້ສອດຄ່ອງຕາມຫຼັກການຈັດຕັ້ງເຄື່ອນໄຫວຄົ້ນ ຄວ້າວິທະຍາສາດຢ່າງປະດິດ ສ້າງ; ສືບຕໍ່ປັບປຸງພາລະບົດ ບາດ, ໜ້າທີ່ຂອງແຕ່ລະກົມ, ຫ້ອງການ, ສະຖາບັນໃຫ້ຈະ ແຈ້ງ ພ້ອມທັງກໍານົດຕໍາແໜ່ງ ງານຕ່າງໆໃຫ້ສອດຄ່ອງ ແລະ ຈັດວາງສັບຊ້ອນບຸກຄະລາ ກອນເຂົ້າໃສ່ແຕ່ລະຕໍາແໜ່ງ ງານຢ່າງເໝາະສົມ; ໃນການກະກຽມກອງປະຊຸມໃຫຍ່ ແຕ່ລະຂັ້ນຂອງສະຖາບັນໃຫ້ຖືເອົາໂອກາດນີ້ເປັນບັ້ນປັບປຸງປົວແປງພາຍໃນຢ່າງເລິກເຊິ່ງ, ສ້າງການຫັນປ່ຽນທີ່ເປັນບາດລ້ຽວໃໝ່ໃຫ້ແກ່ການຈັດຕັ້ງ ແລະ ການເຄື່ອນໄຫວຂອງສະຖາບັນ, ສ່ວນການກະກຽມດ້ານ ບຸກຄະລາກອນ ແຕ່ລະຂັ້ນແມ່ນຕ້ອງໄດ້ດໍາເນີນການສໍາຫຼວດພາຍໃນສະມາຊິກ, ພາຍໃນຄະນະພັກຢ່າງເລິກເຊິ່ງ ເພື່ອຢັ້ງຢືນດ້ານທີ່ຕັ້ງໜ້າ, ດ້ານທີ່ຕ້ອງໄດ້ປັບປຸງແກ້ໄຂກໍຄືການຕໍານິຕິຊົມ, ກໍ່ສ້າງຊຶ່ງກັນແລະ ກັນ.

(ຂ່າວ: ແສງຈັນ)

ຂ່າວທີ່ໄດ້ຮັບຄວາມນິຍົມ