ຫົວ​ຂໍ້ : ຈະ​ລົງ­ທຶນ 900 ຕື້​ກວ່າ​ກີບ ສ້າງ​ໂຮງ­ງານ​ຜະ­ລິດ​ຢາ ຢູ່​ເຂດ​ກວມ​ລວມ​ໄຊ​ເສດ​ຖາ

ເຜີຍ​ແຜ່​ໂດຍ​: ເວ​ລາ: 09/12/2019 22:11:30 ຈຳ​ນວນ​ຜູ້​ເຂົ້າ​ຢ້ຽມ​ຊົມ 539 ຄັ້ງ

 ບໍລິສັດ ໂກ​ເດັນ​ວິດ​ສະ​ດອມ (ລາວ) ຈໍາ​ກັດ ລົງທຶນ 100 ລ້ານ​ໂດ​ລາ ຫຼື 900 ຕື້ກວ່າ​ກີບ ກໍ່ສ້າງ​ໂຮງງານ​ຜະລິດ​ຢາ ຢູ່​ເຂດ​ພັດທະນາ​ກວມ​ລວມ​ໄຊ​ເສດ​ຖາ ນະຄອນຫຼວງ​ວຽງ​ຈັນ ຂະນະ​ທີ່ ລັດຖະມົນຕີ​ກະຊວງ​ສາທາລະນະ​ສຸກ​ ລະບຸຈະ​ເປັນ​ໃບ​ໜ້າ​ໃໝ່ ໃນ​ການ​ປັບປຸງ​ຄຸນ​ນະ​ພາບ ໃນ​ຂະແໜງ​ສາທາ ລະນະ​ສຸກ.

   ພິທີ​ວາງ​ສີ​ລາ​ລືກ​ໂຄງການ​ດັ່ງກ່າວ ໄດ້​ມີ​ຂຶ້ນ​ໃນ​ທ້າຍເດືອນ ​ພະຈິກ​ຜ່ານ​ມາ​ນີ້ ທີ່​ເຂດ​ພັດທະ ນາ​ກວມ​ລວມ​ໄຊ​ເສດ​ຖາ ໂດຍ​ມີ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ, ທ່ານ ບຸນ​ກອງ ສີ​ຫາ​ວົງ ລັດ ຖະມົນຕີ​ກະຊວງ​ສາທາລະນະ ສຸກ ພ້ອມ​ດ້ວຍ​ແຂກ​ຖືກ ​ເຊີນ​ເຂົ້າ​ຮ່ວມ.

   ໃນ​ພິທີ, ທ່ານ ຈາງ​ຊົງ​ຕີ້ ປະທານ​ກຸ່ມ​ບໍລິສັດ ໂກ​ເດັນ​ວິດ​ສະ​ດອມ ຮົງ​ກົງ ກ່າວ​ວ່າ: ບໍລິສັດ​ຜະລິດ​ຢາ​ໂກ​ເດັນ​ວິດ​ສະ​ດອມ (ລາວ) ຈໍາ​ກັດ ເປັນ​ບໍລິສັດ ຮ່ວມ​ທຶນ ລາວ​-​ຈີນ ໂດຍ​ການ​ຮ່ວມ​ມື​ລະຫວ່າງ ບໍລິສັດ​ຜະລິດ​ຢາ​ໂກ​ເດັນ​ວິດ​ສະ​ດອມ ຮົງ​ກົງ ແລະ ກຸ່ມ​ບໍລິສັດ IHC ລາວ, ມີ​ມູນ​ຄ່າ​ການ​ລົງທຶນ ລວມ​ປະມານ 100 ລ້ານ​ໂດ​ລາ ຫຼື 900 ຕື້ກວ່າ​ກີບ, ໃນ​ເນື້ອ​ທີ່ 100.000 ຕາ​ແມັດ, ມູນ​ຄ່າ​ການ​ລົງທຶນ​ໄລຍະ​ທີ 1 ປະມານ 50 ລ້ານ​ໂດ​ລາ ຫຼື 450 ຕື້ກວ່າ​ກີບ ເພື່ອ​ກໍ່ສ້າງ​ອາຄານ ຊຶ່ງ​ໄດ້​ແບ່ງ​ອອກ​ເປັນ​ອາຄານ​ຕ່າງໆ​ຄື: ສູນ​ວິໄຈ ແລະ ພັດທະນາ, ຫໍ​ພັກ, ຫ້ອງ​ອາຫານ ແລະ ພື້ນ​ທີ່​ສໍາ​ລັບ​ຈັດ​ກິດ​ຈະ​ກໍາ, ອາຄານ​ໂຮງງານ​ມາດຕະຖານ GMP 7 ຕຶກ ແລະ ໄດ້​ແບ່ງ​ອອກ​ເປັນ 3 ໄລຍະ​ກໍ່ສ້າງ, ໄລຍະ​ທີ 1 ຄາດ​ວ່າ ຈະ​ສໍາ​ເລັດ​ໃນ​ເດືອນ 6/2020.

   ບໍລິສັດ​ຜະລິດ​ຢາ​ໂກ​ເດັນ​ວິດ​ສະ​ດອມ ຮົງ​ກົງ ໄດ້​ຮ່ວມ​ຮຸ້ນ​ນໍາ​ບໍລິສັດ​ຜະລິດ​ຢາ​ຂອງ ສປ ຈີນ​ອີກ​ຫຼາຍ​ບໍລິສັດ, ປັດຈຸບັນ​ມີ​ຢາ​ຈີນ ທີ່​ໄດ້​ໃບຮັບ​ຮອງ ຫຼາຍ​ກວ່າ 250 ລາຍການ ແລະ ໄດ້​ຮັບ​ການ​ຈົດ​ທະບຽນ ຫຼາຍ​ກວ່າ 100 ລາຍການ ເກືອບ​ຄົບ​ທຸກ​ປະເພດ ທັງ​ຢາເມັດ, ຢາ​ເຄັບ​ຊູນ, ຢາ​ຊະນິດ​ເປັນ​ຝຸ່ນ, ຢາ​ສັກ, ຜະລິດ​ຕະ​ພັນ​ຊີວະ​ພາບ, ຜະລິດ​ຕະ​ພັນ​ອາຫານ​ເສີມ, ອາຫານ​ເພື່ອ​ສຸຂະພາບ ແລະ ອື່ນໆ.

   ບໍລິສັດ​ດັ່ງກ່າວ ມີ​ທີມ​ງານ​ຄົ້ນຄວ້າ ແລະ ພັດທະນາ ທີ່​ເປັນ​ມື​ອາຊີບ ແລະ ມີ​ປະສົບ​ການ, ບໍລິສັດ ໂກ​ເດັນ​ວິດ​ສະ​ດອມ ໃຫ້​ຄວາມ​ສຳຄັນ​ເປັນ​ຢ່າງ​ຍິ່ງ​ໃນ​ການ​ປະກອບສ່ວນ​ໃນ​ຂໍ້​ລິ​ເລີ່ມ "ໜຶ່ງ​ແລວ​ ໜຶ່ງ​ເສັ້ນທາງ" ຂອງ​ປະທານ ສິ​ຈິ້ນ ຜິງ ໂດຍ​ການ​ນໍາ​ໃຊ້ ຂໍ້​ໄດ້​ປຽບ​ທາງ​ດ້ານ​ເຕັກນິກ ແລະ ທຶນຮອນ​ຂອງ​ວິ​ສາ​ຫະ​ກິດ​ເອກະ​ຊົນ​ຈີນ ເພື່ອ​ຮ່ວມ​ກໍ່ສ້າງ ແລະ ພັດທະນາ ຕາມ​ຂໍ້​ລິ​ເລີ່ມ​ດັ່ງກ່າວ ໃນ ສປປ ລາວ.

   ໃນ​ການ​ກໍ່ສ້າງ​ໂຄງການ​ນີ້, ພວກ​ຂ້າພະເຈົ້າ ຈະ​ປະຕິບັດ​ຕາມ​ມາດຕະຖານ​ສາກົນ​ຢ່າງ​ເຂັ້ມ​ງວດ, ຈະ​ເຄົາລົບ​ຮີດຄອງ​ປະເພນີ ແລະ ປະຕິບັດ​ຕາມ​ລະບຽບ​ກົດໝາຍ​ຂອງ ສປປ ລາວ ຢ່າງ​ເຄັ່ງ​ຄັດ.

   ທ່ານ ສອນ​ປະເສີດ ດາລາ​ວົງ ຮອງ​ຫົວໜ້າ​ຫ້ອງການ​ສົ່ງເສີມ ແລະ ຄຸ້ມ​ຄອງ​ເຂດ​ເສດຖະກິດ​ພິເສດ, ກະຊວງ​ແຜນການ​ ແລະ​ ການ​ລົງທຶນ ກ່າວ​ວ່າ: ກິດຈະການ ກ່ຽວ​ກັບ​ການ​ຜະລິດ​ຢາ ແມ່ນ​ກິດຈະການ​ທີ່​ໄດ້​ລະບຸ​ໄວ້​ໃນ​ສັນຍາ ຮ່ວມ​ມື​ພັດທະນາ​ເຂດ​ກວມ​ລວມ​ໄຊ​ເສດ​ຖາ ຊຶ່ງ​ມີ​ເນື້ອທີ່ 1.000 ເຮັກຕາ, ໄດ້​ຍົກ​ລະດັບ​ເປັນ​ເຂດ​ຮ່ວມ​ມື​ລະຫວ່າງ ລັດຖະບານ ສປປ ລາວ ແລະ ລັດຖະບານ ສປ ຈີນ. ເຂດ​ດັ່ງກ່າວ ເປັນ​ການ​ຮ່ວມ​ທຶນ​ລະຫວ່າງ ລັດຖະບານ ສປປ ລາວ ຕາງໜ້າໂດຍອົງການ​ປົກຄອງ​ນະຄອນຫຼວງ​ວຽງ​ຈັນ ແລະ ບໍລິສັດ​ລົງທຶນ​ພັດທະນາ ຕ່າງປະເທດ ແຂວງ​ຢຸນ​ນານ ຈໍາ​ກັດ ຕາງໜ້າ​ໃຫ້​ກັບ​ລັດຖະບານ ສປ ຈີນ ຊຶ່ງ​ເປົ້າ​ໝາຍ​ຂອງ​ການ​ພັດທະນາ ເພື່ອ​ສ້າງ​ໃຫ້​ເປັນ​ເຂດ​ອຸດ​ສາ​ຫະ​ກໍາ​ປຸງ​ແຕ່ງ​ກະ​ສິ​ກໍາ ແລະ ອຸດ​ສາ​ຫະ​ກໍາ​ເພື່ອ​ສົ່ງ​ອອກ, ເຂດ​ການ​ຄ້າ ແລະ ການ​ບໍລິການ ທີ່​ທັນ​ສະ​ໄໝ.
ທ່ານ ບຸນ​ກອງ ສີ​ຫາ​ວົງ ກ່າວ​ວ່າ: ໂຄງການ​ດັ່ງກ່າວ ເປັນ​ການ​ຂະຫຍາຍຕົວ​ດ້ານ​ອຸດ​ສາ​ຫະ​ກໍາ​ການ​ແພດ​ແບບ​ໃໝ່ ເປັນ​ໃບ​ໜ້າ​ອັນ​ໃໝ່ ໃນ​ການ​ປັບປຸງ​ຄຸນ​ນະ​ພາບ ແລະ​ຫັນ​ເປັນ​ທັນ​ສະໄໝ ໃນ​ຂະແໜງ​ສາທາລະນະ​ສຸກ ຊຶ່ງ​ເປັນ​ວຽກ​ໜຶ່ງ​ຂອງ​ຍຸດທະສາດ​ປະຕິ​ຮູບ​ດ້ານ​ສາທາລະນະ​ສຸກ​ຂອງ​ລາວ. ໃນ​ໄລຍະ​ປະຕິບັດ​ໂຄງການ​ກໍ່ສ້າງ​ໂຮງງານ​ຢາ​ແຫ່ງ​ນີ້, ກະຊວງ​ສາທາລະນະ​ສຸກ ໄດ້​ແຕ່ງຕັ້ງ​ຄະ​ນະ​ກໍາ​ມະ​ການ​ຄຸ້ມ​ຄອງ ແລະ ຈັດ​ຕັ້ງ​ປະຕິບັດ​ໂຄງການ​ຢ່າງ​ລະອຽດ ໂດຍ​ທີມ​ງານ​ຝ່າຍ​ລາວ ຈະ​ໄດ້​ເອົາໃຈໃສ່ ໃນ​ການ​ອໍາ​ນວຍ​ຄວາມ​ສະດວກ ແລະ ການ​ປະກອບສ່ວນ​ໃຫ້​ໂຄງການ​ນີ້ ບັນລຸ​ຕາມ​ລະດັບ​ຄາດໝາຍ​ທີ່​ກໍາ​ນົດ​ໄວ້.
( ຂ່າວ: ແສງ​ຈັນ+ຮູບ:ບຸນ​ຕອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110