ກອງປະຊຸມໃຫຍ່ ຄັ້ງທີ I ຂອງພັກ

ເຜີຍ​ແຜ່​ໂດຍ​: siththiphone rasphone ເວ​ລາ: 28/02/2020 09:11:54 ຈຳ​ນວນ​​ຢ້ຽມ​ຊົມ 619 ຄັ້ງ

   ກອງ​ປະ​ຊຸມ​ໃຫຍ່​ຄັ້ງ​ທີ I ຂອງ​ພັກ​ໄດ້​ເປີດ​ຂຶ້ນ​ວັນ​ທີ 22 ເດືອນ 3 ເຖິງ 14/4/1955. ມີຜູ້ແທນເຂົ້າ​ຮ່ວມ​ຕົວ​ຈິງ 20 ສະ​ຫາຍ. ກອງ​ປະ​ຊຸມ​ໃຫຍ່​ໄດ້​ຕົກລົງ​ສ້າງ​ຕັ້ງ​ພັກ​ການ​ເມືອງ​ຢູ່​ລາວ​ເອີ້ນ​ວ່າ: “ພັກ​ປະ​ຊາ​ຊົນ​ລາວ” ກອງ​ປະ​ຊຸ​ມ​ໄດ້​ຜ່ານ​ໂຄງ​ການ-ການ​ເມືອງ 12 ຂໍ້, ລາຍ​ງານ​ການ​ຈັດ​ຕັ້ງ ແລະ ກົດ​ລະ​ບຽບ​ຂອງ​ພັກ, ຕົກລົງ​ຮັບ​ຮອງ​ທຸງ​ຂອງ​ພັກ, ກອງ​ປະ​ຊຸມ​ໄດ້​ດຳ​ເນີນ​ການ​ເລືອກ​ຕັ້ງ​ຄະ​ນະ​ນຳ​ພາ ຊຶ່ງ​ປະ​ກອບ​ດ້ວຍ 5 ສະ​ຫາຍ: ສະ​ຫາຍ ໄກ​ສອນ ພົມ​ວິ​ຫານ, ສະ​ຫາຍ ໜູ​ຮັກ ພູມ​ສະ​ຫວັນ, ສະ​ຫາຍ ຄຳ​ແສງ ສີ​ວິ​ໄລ, ສະ​ຫາຍ ສີ​ສະ​ຫວາ​ດ ແກ້ວ​ບຸນ​ພັນ ແລະ ສະ​ຫາຍ ບຸນ​ພົມ ມະ​ຫາ​ໄຊ. ສະ​ຫາຍ ໄກ​ສອນ ພົມ​ວິ​ຫານ ໄດ້​ຮັບ​ເລືອກ​ຕັ້ງ​ເປັນ​ເລ​ຂາ​ທິ​ການ​ໃຫຍ່ ທັງ​ເປັນ​ເລ​ຂາ​ຄະ​ນະ​ພັກ​ການ​ທະ​ຫານ ແລະ ກອງ​ປະ​ຊຸມ​ໃຫຍ່​ໄດ້​ມອບ​ສິດ​ໃຫ້​ຄະ​ນະ​ນຳ​ພ​າ​ບົ່ງ​ຕົວ​ເອົາ​ກຳ​ມະ​ການ​ເຂົ້າ​ຕື່ມ​ພາຍຫຼັງ​ກອງ​ປະ​ຊຸມ​ໄດ້​ສຳ​ເລັດ​ລົງ. ກົດ​ລະ​ບຽບ​ພັກ ຊຶ່ງ​ປະ​ກອບ​ມີ 6 ໂລ​ແມງ ແລະ 9 ຂໍ້, ໃນ​ຂໍ້ 5 ກົດລະ ​ບຽບ​ຂອງ​ພັກ​ໄດ້​ກຳ​ນົດສາຍ​ໄຍ​ການ​ຈັດ​ຕັ້ງ​ພັກ ຊຶ່ງ​ປະ​ກອບ​ມີ: ໜ່ວຍ, ອົງ​ຄະ​ນະ​ພັກ​ເມືອງ, ອົງ​ຄະ​ນະ​ພັກ​ເທດ​ສະ​ບານ, ອົງ​ຄະ​ນະ​ພັກ​ແຂວງ, ອົງ​ຄະ​ນະ​ພັກ​ເຂດ ແລະ ສູນ​ກາງ​ພັກ. ພ້ອມ​ທັງ​ກຳ​ນົດ​ໜ້​າ​ທີ່​ຂອງ​ແຕ່​ລະ​ອົງ​ຄະ​ນະ​ພັກ ເພື່ອ​ສືບ​ຕໍ່​ປັບ​ປຸງ​ພາຍ​ໃນ​ພັກ​ມີ​ຄວາມ​ໜັກ​ແໜ້ນ​ຕາມ​ທີ່​ໄດ້​ລະ​ບຸ​ໄວ້​ໃນ​ກົດ​ລະ​ບຽບ​ພັກ​ນັ້​ນ, ວັນ​ທີ 16/4/1955 ຄະ​ນະ​ນຳ​ພາ​ໄດ້ ເປີດກອງ​ປະ​ຊຸມ​ຄົບ​ຄະ​ນະ​ຄັ້ງ​ປະ​ຖົມ​ມະ​ລືກ, ກອງ​ປ​ະ​ຊຸມ​ໄດ້​ປຶກ​ສາ​ຫາ​ລື​ກ່ຽວ​ກັບ​ແຜນ​ການ ແລະ ໂຄງ​ການ​ດຳ​ເນີນ​ງານ​ຂອງ​ຄະ​ນະ, ກອງ​ປະ​ຊຸມ​ໄດ້​ພິ​ຈາ​ລະ​ນາ​ຄືນ​ໃໝ່​ກ່ຽວ​ກັບ​ມາດ​ຖານ​ເງື່ອນ​ໄຂ ແລະ ຫຼັກ​ການ​ພິ​ທີ​ການ​ໃນ​ການ​ຕີ​ລາ​ຄາ​ເລືອກ​ເຟັ້ນ ແລະ ຂະ​ຫຍາຍ​ສະ​ມາ​ຊິກ​ພັກ ແລະ ໄດ້​ເປັນ​ເອກະ​ພາບ​ກັນ​ປັບ​ປຸງ​ຄືນ​ໃໝ່​ຈາກ 12 ມາດ​ຖານ​ເງື່ອນ ​ໄຂ​ໃນ​ເມື່ອ ກ່ອນ​ມາ​ເປັນ 3 ມາດ​ຖານ: 
1. ຕ້ອງ​ມີ​ຊີ​ວະ​ປະ​ຫ​ວັດ​ຈະ​ແຈ້ງ.
2. ຕັ້ງ​ໜ້າ​ຫ້າວ​ຫັນ​ເຮັດ​ວຽກ​ງານ ໄດ້​ຜ່ານ​ການ​ຝຶກ​ຝົນ ຫຼໍ່ຫຼອມ​ສາໍ່​ໃດ​ສາໍ່​ໜຶ່ງ​ໃນ​ຂະ​ບວນ​ການ​ຕໍ່​ສູ້​ປະ​ຕິ​ວັດ;
3. ຕ້ອງ​ແມ່ນ​ກຳ​ເນີດ​ໃນ​ຊົນ​ຊັ້​ນ​ອອກ​ແຮງ​ງານ​ເປັນ​ຕົ້ນ​ຕໍ​ພ້ອມ​ກັນ​ນັ້​ນ​ຕ້ອງ​ເອົາ​ໃຈ​ໃສ່​ບຸກ​ຄົນ ​ນັກ​ຮຽນ​ຮູ້​ປະ​ຕິ​ວັດ, ນາຍ​ທຶນ​ນ້ອຍ, ນັກ​ຮຽນ, ນອກ​ຈາກນັ້ນ​ຕ້ອງ​ເອົາ​ໃຈ​ໃສ່​ບຸກຄົນ​ ທີ່​ຮັກ​ຊາດ, ສັດ​ຊື່​ເດັດ​ດ່ຽວ ແລະ ໄດ້​ປະ​ກອບ​ສ່ວນ​ໃນ ​ການ​ຕໍ່ຕ້ານ​ມາຫຼາຍ​ປີ ແລະ ຢູ່​ໃນ​ຊັ້ນ​ຄົນອື່ນໆ...ກອງ​ປະ​ຊຸມ​ຍັງ​ໄດ້​ຕົກ​ລົງ​ຄັດ​ເລືອກ ແລະ ບົ່ງ​ຕົວ​ກຳ​ມະ​ການ​ຕື່ມ 3 ສະ​ຫາຍ​ຄື: ສະ​ຫາຍ ສຸ​ພາ​ນຸ​ວົງ, ສະ​ຫາຍ ພູ​ມີ ວົງ​ວິ​ຈິດ ແລະ ສະ​ຫາຍ ພູນ​ສີ​ປະ​ເສີດ. ພາຍຫຼັງ​ຄະ​ນະ​ນຳ​ພາ ໄດ້​ຊີ້​ນຳ-ນຳ​ພາ​ວຽກ​ງານ​ປັບ​ປຸງ​ບູ​ລະ​ນະ​ການ​ຈັດ​ຕັ້ງ ແລະ ຂະ​ຫຍາຍ​ພັກ ຈຶ່ງ​ໄດ້​ເຮັດ​ໃຫ້​ກຳ​ລັງ​ປະ​ຕິ​ວັດ​ມີ​ການ​ເຕີບ​ໃຫຍ່​ຂະ​ຫຍາຍ​ຕົວ​ຂຶ້ນ​ຢ່າງບໍ່​ຢຸດຢັ້ງ​ໄດ້​ເຮັດ​ໃຫ້​ທ່າ​ຂອງ​ການ​ຕໍ່​ຕ້ານ​ກັບ​ຈັກ​ກະ​ພັດ​ລ່າ​ເມືອງ​ຂຶ້ນ​ແບບໃໝ່ຜູ້​ຮຸກ​ຮານ ແລະ ລູກ​ແຫຼ້ງ​ຕີນ​ມື​ຂອງ​ພວກ​ເຂົາ​ໄດ້​ຮັບ​ໄຊ​ຊະ​ນະ​ເປັນ​ກ້​າວໆ. ການ​ກຳ​ເນີດ​ເກີດ​ຂຶ້ນ​ຂອງ​ພັກ​ປະ​ຊາ​ຊົນ​ລາວໃນ​ວັນ​ທີ 22/3/1955 ແມ່ນ​ບາດ​ລ້ຽວ​ສຳ​ຄັນ​ໃນ​ປະ​ຫວັດ​ສາດ​ຂອງ​ການ​ປະ​ຕິ​ວັດ​ລາວ, ພັກ​ປະ​ຊາ​ຊ​ົນ​ລາວ​ເປັນ​ຜູ້​ນຳ​ພາ​ໂດຍ​ກົງໃນ​ຂະ​ບວນ​ການ​ຕໍ່​ສ​ູ້​ຕ້ານ​ກັບ​ຈັກ​ກະ​ພັດ​ລ່າ​ເມືອງ​ຂຶ້ນ​ແບບໃໝ​່ຜູ້​ຮຸກ​ຮານ ເພື່ອ​ປົດ​ປ່ອຍປະ​ເທດ​ຊາດ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110