ກອງ​ປະຊຸມ​ໃຫຍ່ ​ຄັ້ງ​ທີ VIII ຂອງ​ອົງຄະ​ນະ​ພັກ​ເມືອງ​ຄົງ​ເຊ​ໂດນ ແຂວງ​ສາລະ​ວັນ ໄດ້​ປິດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ​​ຫວ່າງ​ບໍ່​ດົນ​ຜ່ານ​ມາ ພາຍຫຼັງ​ໄດ້​ດໍາ​ເນີນມາ​ເປັນ​ເວລາ 2 ວັນ ທີ່​ຫ້ອງ​ປະຊຸມ​ສະ ໂມສອນ​ເມືອງ ພາຍ​ໃຕ້ການ ​ເປັນ​ປະທານ​ຂອງ ສະຫາຍ ແຫວນ​ເພັດ ລັດດາ​ວົງ ກໍາມະ​ ການ​ພັກ​ແຂວງ ເລຂາພັກເມືອງ ເຈົ້າເມືອງໆ​ຄົງ​ເຊ​ໂດນ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ ສະຫາຍ ສີ​ສຸວັນ ວົງຈອມສີ ກໍາມະການສູນ​ກາງພັກ ເລ ຂາ​ຄະນະ​ບໍລິຫານ​ງານ​ພັກ​ແຂວງ ເຈົ້າແຂວງໆ​ສາລະ​ວັນ, ສະຫາຍ ບຸນ​ທຽມ ແກ້ວ​ໄຊ​ຍະ​ວົງ ຮອງ​ເລຂາ​ພັກ​ແຂວງ ຫົວໜ້າ​ຄະນະ​ຈັດ​ຕັ້ງ​ແຂວງ, ບັນດາ​ສະຫາຍ​ໃນ​ຄະນະ​ປະ ທານ​ກອງ​ປະຊຸມ, ແຂກ​​ຖືກ​ເຊີນ​ຈາກ​ບັນດາ​ເມືອງ ແລະ ສະຫາຍ​ຜູ້​ແທນ​ສົມ​ບູ​ນຈໍາ​ນວນ 120 ສະຫາຍ ແລະ ພາກສ່ວນ​ກ່ຽວຂ້ອງ​ໃນ​ທົ່ວ​ເມືອງ​ເຂົ້າ​ຮ່ວມ.
   ຕະຫຼອດ​ໄລຍະ 5 ປີ ຜ່ານ​ມາ ເສດຖະກິດ​ຂອງ​ເມືອງ ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ໃນ​ລະດັບ​ສະເລ່ຍ 7-8%ຕໍ່​ປີ, ລວມ​ຍອດ​ຜະລິດ​ຕະ​ພັນ 3.250 ຕື້​ກວ່າ​ກີບ, ລາຍ​ໄດ້​ສະເລ່ຍ​ຕໍ່​ຫົວ​ຄົນ​ຕໍ່​ປີ 11 ລ້ານ​ກວ່າ​ກີບ ຫຼື ເທົ່າ​ກັບ 1.334 ໂດ​ລາ​, ດຶງ​ດູດ​ແຫຼ່ງ​ທຶນ​ເພື່ອ​ການ​ພັດທະນາ​ໄດ້ 810 ຕື້​ກີບ ທຽບໃສ່​ແຜນການ​ປະຕິບັດ​ໄດ້ 87%, ສິນຄ້າ​ສົ່ງ​ອອກສາມາດ​ປະຕິບັດ​ໄດ້ 235 ຕື້​ກີບ, ທຽບໃສ່​ແຜນ ປະຕິບັດ​ໄດ້  85%, ສິນ ຄ້າ​ສົ່ງ​ອອກ​ສ່ວນ​ໃຫຍ່​ແມ່ນ ເຂົ້າ, ມັນຕົ້ນ, ກ້ວຍ, ເຫຼົ້າ​ຂາວ, ງົວ, ໝູ ແລະ ອື່ນໆ. ຕະຫຼອດໄລ ຍະ 5 ປີ ຜ່ານມາ ສາມາດ​ຜະ ລິດ​ເຂົ້າ​ໄດ້ 382.292 ໂຕນ, ເນື້ອ ທີ່​ປູກ​ເຂົ້ານາ​ປີ ເພີ່ມ​ຂຶ້ນ​ຈາກ 17.540 ເຮັກຕາ ໃນ​ປີ 2014 ມາ​ເປັນ 17.878 ເຮັກຕາ ໃນ​ປີ 2019, ເນື້ອທີ່​ນາແຊງ 2.950 ເຮັກຕາ, ຜົນ​ຜະລິດ 61.926 ໂຕນ, ສະເລ່ຍ​ໃສ່​ຫົວ​ຄົນ​ໄດ້ 350 ກິໂລ​ຕໍ່​ຄົນ​ຕໍ່​ປີ. ການ​ຜະລິດ​ເປັນ​ສິນຄ້າ ມີ​ທ່ວງ​ທ່າ​ຂະຫຍາຍຕົວ​ຂຶ້ນ​ເລື້ອຍໆ ເປັນຕົ້ນການ​ປູກ​ມັນຕົ້ນ, ມັນ​ດ້າງ, ຖົ່ວດິນ, ສາລີ, ກ້ວຍ ແລະ ອື່ນໆ, ສ່ວນ​ການ​ລ້ຽງສັດ ກໍເພີ່ມ​ຂຶ້ນ​ເປັນ​ກ້າວໆ ອັນ​ໄດ້​ເຮັດ​ໃຫ້​ມີ​ຄອບຄົວ​ຕົວ​ແບບ​ການ​ປູກ​ຝັງ​-​ການ​ລ້ຽງສັດ ເປັນ​ສິນຄ້າຄືື: ປູກ​ເຂົ້າ​ເປັນ​ສິນຄ້າ 8 ຄອບຄົວ, ລ້ຽງສັດ​ເປັນ​ສິນຄ້າ 3 ຄອບຄົວ  ​ຊຶ່ງເປັນ​ເງື່ອນໄຂ​ເຮັດ​ໃຫ້​ປະຊາຊົນ ສາມາດ​ເຂົ້າ​ເຖິງ​ແຫຼ່ງ​ທຶນ ເພື່ອ​ປະກອບ​ເຂົ້າ​ໃນ​ການ​ຜະລິດ​ເປັນ​ສິນຄ້າ​ສ້າງ​ລາຍ​ຮັບ​ເພີ່ມ​ເຮັດ​ໃຫ້​ຊີວິດ​ການ​ເປັນ​ຢູ່​ດີ​ຂຶ້ນ ແລະ ສາມາດ​ລຶບ​ລ້າງ​ຄອບຄົວ​ທຸກ​ຍາກຫຼຸດລົງ​ເທື່ອ​ລະ​ກ້າວ ຍັງ​ເຫຼືອ​ພຽງ 6 ຄອບຄົວ ເທົ່າ​ກັບ 0,4% ຂອງ​ຄອບຄົວ​ທັງ​ໝົດ, ລຶບ​ລ້າງ​ບ້ານ​ທຸກ​ຍາກ (ຕາມ​ດໍາ​ລັດ 309/ນຍ) ໄດ້ 100% ແລະ ປະກາດ​ຮັບຮອງ​ເອົາ​ບ້ານ​ພັດທະນາ 13 ບ້ານ ຄຽງ​ຄູ່​ກັນ​ນັ້ນ​ວຽກ​ງານ​ວັດທະນະ​ທຳ​-​ສັງຄົມ, ວຽກ ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ ກໍໄດ້​ຮັບ​ການ​ພັດທະນາ​ຢ່າງ​ຕໍ່​ເນື່ອງ ແລະ ຂະຫຍາຍຕົວ​ເປັນ​ກ້າວໆ.
   ກອງ​ປະຊຸມ​ໄດ້​ໃຊ້​ສິດ​ປະ ຊາທິປະໄຕ​ປ່ອນ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ພັກ​ເມືອງຊຸດ​ໃໝ່ ຊຶ່ງ​ມີ​ຜູ້​ສະໝັກ​ທັງ​ໝົດ 29 ສະຫາຍ ຍິງ 3 ສະຫາຍ, ເລືອກ​ເອົາ 25 ສະ​ຫາຍ. ຜ່ານ​ການ​ປ່ອນ​ບັດ​ຄັດ​ເລືອກ ແລະ ຕາມ​ການ​ຕົກລົງ​ເປັນ​ເອກະສັນ​ໃນ​ກອງ​ປະຊຸມ​ຄັ້ງ​ປະຖົມ​ມະລືກ ເຫັນ​ດີ​ເລືອກ​ເອົາ​ຄະນະ​ປະຈຳ​ພັກ​ເມືອງ 7 ສະຫາຍ ຍິງ 1 ສະຫາຍ ແລະ ໄດ້​ເລືອກ​ເອົາ ສະຫາຍ ແຫວນເພັດ ລັດດາ​ວົງ ເປັນ​ເລຂາ​ຄະນະ​ບໍລິຫານ​ງານ​ພັກ​ເມືອງ, ສະຫາຍ ກ່ຳ ແສງ​ມະນີ ເປັນ​ຮອງ​ເລຂາ​ພັກ, ສະຫາຍ ວັນນະ​ລອນ ອິນ​ທະ​ພອນ​ເດດ ເປັນ​ຮອງ​ເລຂາ​ພັກ ທັງເປັນ​ປະທານ​ກວດກາ​ພັກ, ເລືອກ​ເອົາ ສະຫາຍ ທອງ​ດີ ສິດ​ທີ​ລາດ ແລະ ສະຫາຍ ແອ່ງ ແສງ​ຈັນ ເປັນ​ຮອງ​ປະທານ​ກວດກາ . ນອກ​ນັ້ນ​ໄດ້​ປ່ອນ​ບັດ​ຄັດ​ເລືອກ​ເອົາ​ຜູ້​ແທນ​ສົມບູນ ຈຳນວນ 22 ສະຫາຍ ແລະ ສຳຮອງ 5 ສະຫາຍ ໄປ​ຮ່ວມ​ກອງ​ປະຊຸມ​ໃຫຍ່ ຄັ້ງ​ທີ IX ຂອງ​ອົງຄະ​ນະ​ພັກ​ແຂວງ​ສາລະ​ວັນ. 
(ຂ່າວ​-​ພາບ: ວິໄລ​ວອນ ສິດທິໄຊ)