ຫົວ​ຂໍ້ : WHO ເນັ້ນ COVID-19 ຍັງບໍ່ທັນກາຍເປັນພະຍາດລະບາດຮ້າຍແຮງ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 28/02/2020 09:16:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 315 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ວັນ​ທີ 24 ກຸມພາ​ຜ່ານ​ມາ, ທ່ານ ເທ​ໂຕ​ຣສ ອາ​ດາ​ນອມ ເກ​ເປ​ຣ​ເຢ​ຊຸສ ຜູ້​ອໍາ​ນວຍ​ການ​ໃຫຍ່​ອົງການ​ອະນາໄມ​ໂລກ (WHO) ກ່າວ​ເນັ້ນ​ວ່າ: ເຖິງ​ແມ່ນ​ວ່າ​ກໍລະນີ​ຕິດພະຍາດ​ອັກເສບ​ປອດ​ຈາກ​ເຊື້ອ​ໄວ​ຣັດ Covid-19 ຢູ່ ອີ​ຕາ​ລີ, ອີ​ຣານ, ສ.ເກົາຫຼີ ແລະ ປະເທດ​ຕ່າງໆ​ທີ່​ເພີ່ມ​ຂຶ້ນ ໄດ້​ເຮັດ​ໃຫ້​ເກີດ​ມີ​ຄວາມ​ເປັນ​ຫ່ວງ​ເປັນ​​ໄຍ​ຫຼາຍ, ແຕ່​ມາ​ຮອດ​ປັດຈຸບັນ ການ​ລະບາດ​ຂອງ​ພະຍາດ​ດັ່ງກ່າວ ຍັງ​ບໍ່​ທັນ​ກາຍເປັນ “ພະຍາດ​ທີ່​ລະບາດ​ຢ່າງ​ຮ້າຍ​ແຮງ”.
  ທ່ານ ເທ​ໂຕ​ຣສ ໄດ້​ກ່າວ​ໃນ​ກອງ​ປະຊຸມ​ຂ່າວ​ປະ​ຈໍາ​ວັນ​ຂອງ​ອົງການ​ອະນາໄມ​ໂລກ ວ່າ: ເວລາ​ອົງການ​ອະນາໄມ​ໂລກ ວິເຄາະ​ຈະ​ໃຊ້​ຄໍາ​ທີ່​ວ່າ “ພະຍາດ​ທີ່​ລະບາດ​ຢ່າງ​ຮ້າຍ​ແຮງ” ຫຼື ບໍ່, ຕ້ອງ​ປະ​ເມີນ​ຕໍ່​ປັດ​ໄຈ​ຕ່າງໆ​ເຊັ່ນ: ບໍລິເວນ​ຂອບ​ເຂດ​ຂອງ​ການ​ແຜ່​ລະບາດ​ພະຍາດ, ຄວາມ​ຮ້າຍ​ແຮງ​ຂອງ​ພະຍາດ​ທີ່​ເກີດ​ຂຶ້ນ, ຜົນ​ກະທົບ​ຕໍ່​ສັງຄົມ ແລະ ອື່ນໆ. ປັດຈຸບັນ, ອົງການ​ອະນາໄມ​ໂລກ ຍັງ​ບໍ່​ທັນ​ໄດ້​ປະກົດ​ເຫັນ​ການ​ແຜ່​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ໄວ​ຣັດ Covid-19 ໃນ​ທົ່ວ​ໂລກ​ແບບ “ຄວບ​ຄຸມ​ບໍ່​ໄດ້” ແລະ ບໍ່​ທັນ​ໄດ້​ສັງເກດ​ເຫັນ​ການ​ເກີດ​ກໍ​ລະ​ນີທີ່​ມີ​ອາການ​ໜັກ ແລະ ກໍລະນີ​ທີ່​ເສຍ​ຊີວິດ​ຢ່າງ​ຫຼວງ​ຫຼາຍ. ປັດຈຸບັນ ຖ້າ​ໃຊ້​ຄໍາ​ວ່າ​ເປັນ “ພະຍາດ​ທີ່​ລະບາດ​ຢ່າງ​ຮ້າຍ​ແຮງ” ແມ່ນ​ບໍ່​ເໝາະ​ກັບ​ຄວາມ​ຈິງ ແລະ ຈະ​ເຮັດ​ໃຫ້​ເກີດ​ມີ​ຄວາມ​ວິຕົກ​ກັງວົນ ຊຶ່ງ​ບໍ່​ມີ​ຜົນ​ດີ​ຈັກຢ່າງ​ຕໍ່​ການ​ປ້ອງ​ກັນ​ບໍ່​ໃຫ້​ແຜ່​ລະບາດ ແລະ ການ​ກອບ​ກູ້​ຊີ​ວິດ.
  ທ່ານ ເທ​ໂຕ​ຣສ ກ່າວ​ຕື່ມ​ອີກ​ວ່າ: ໄລຍະ​ນີ້ ເປັນ​ໄລຍະ​ທີ່​ທຸກ​ປະເທດ, ເຂດ​ຊຸມ​ຊົນ, ຄອບຄົວ ແລະ ບຸກຄົນ​ຕ່າງໆ ຄວນ​ສຸມ​ກໍາ​ລັງ​ໃນ​ການ​ຄວບ​ຄຸມ​ການ​ແຜ່​ລະບາດ​ຂອງ​ພະຍາດ ແລະ ກະກຽມ​ຮັບ​ມື​ກັບ “ພະຍາດ​ທີ່​ລະບາດ​ຢ່າງ​ຮ້າຍ​ແຮງ” ທີ່​ອາດ​ຈະ​ມາ​ເຖິງ​ໃນ​ອະ​ນາ​ຄົດ. ອົງການ​ອະນາໄມ​ໂລກ ຈະ​ສືບຕໍ່​ປະ​ເມີນ​ຄວາມ​ສ່ຽງ, ຕິດຕາມ​ການ​ຂະຫຍາຍຕົວ ແລະ ການ​ປ່ຽນແປງ​ຂອງ​ການ​ແຜ່​ລະບາດ​ພະຍາດ​ດັ່ງ​ກ່າວ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110