ຫົວ​ຂໍ້ : ຫວຽດນາມ ຍູ້ແຮງການປ້ອງກັນ COVID-19

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 28/02/2020 09:18:19 ຈຳ​ນວນ​ຜູ້​ເຂົ້າ​ຢ້ຽມ​ຊົມ 298 ຄັ້ງ

  ວິທະຍຸ​ກະຈາຍສຽງຫວຽດນາມ​ລາຍ​ງານ​ວ່າ: ທ່ານນາຍົກລັດຖະມົນຕີ​ຫວຽດນາມ ໄດ້​ມີ​ຄຳ​ສັ່ງຮຽກຮ້ອງ​ໃຫ້​ບັນດາ​ກະຊວງ, ຂະແໜງການ, ຄະນະ​ກຳມະການ​ປະຊາຊົນ​ບັນດາ​ແຂວງ, ນະຄອນ​ທີ່​ຂຶ້ນ​ກັບ​ສູນ​ກາງ ຈົ່ງ​ສືບຕໍ່​ເຊື່ອມ​ຊຶມ​ເນື້ອ​ໃນ​ຈິດໃຈ “ຕ້ານ​ໂຣກ​ລະບາດ​ຄື​ຕ້ານ​ສັດຕູ” ຢ່າງ​ເລິກ​ເຊິ່ງ.
  ຂ່າວ​ລະບຸ​ວ່າ: ວັນ​ທີ 25 ກຸມພາ​ຜ່ານ​ມາ, ທ່ານ ຫ​ງວຽນ​ຊວັນ​ຟຸກ ນາຍົກລັດຖະມົນຕີ​ຫວຽດນາມ ໄດ້​ອອກ​ຄຳ​ສັ່ງ​ກ່ຽວ​ກັບ​ເລື່ອງ​ຍູ້​ແຮງ​ການ​ປ້ອງ​ກັນ, ຕ້ານ​ໂຣກ​ລະບາດ Covid-19 ໃນ​ສະພາບ​ໂຣກ​ລະບາດ ມີ​ການ​ຜັນ​ແປ​ໃໝ່​ສັບ​ສົນ​ຫຼາຍ​ຢ່າງ, ຍາກ​ທີ່​ຈະ​ຄາດ​ຄະເນ​ໄດ້​ຢູ່ ສ.ເກົາຫຼີ, ຍີ່ປຸ່ນ, ອີ​ຕາ​ລີ, ອີ​ຣານ ແລະ ບາງ​ປະເທດ​ອື່ນໆ.
  ຄຳ​ສັ່ງ​ດັ່ງກ່າວ, ໄດ້ຮຽກຮ້ອງ​ໃຫ້​ບັນດາ​ກະຊວງ, ຂະແໜງການ, ຄະນະ​ກຳມະການ​ປະຊາຊົນ​ບັນດາ​ແຂວງ, ນະຄອນ​ທີ່​ຂຶ້ນ​ກັບ​ສູນ​ກາງ ຈົ່ງ​ສືບຕໍ່​ເຊື່ອມ​ຊຶມ​ເນື້ອ​ໃນ​ຈິດໃຈ “ຕ້ານ​ໂຣກ​ລະບາດ​ຄື​ຕ້ານ​ສັດຕູ” ຢ່າງ​ເລິກເຊິ່ງ, ຍົກ​ສູງ​ສະຕິ​ລະວັງ​ຕົວ, ປະຕິບັດ​ບັນດາ​ມາດ​ຕະການ​ປ້ອງ​ກັນ, ຕ້ານ​ໂຣກ​ລະບາດ​ຢ່າງ​ເຂັ້ມ​ງວດ;  ປະຕິບັດ​ບັນດາ​ມາດ​ຕະການ​ກ່ຽວ​ກັບ​ການ​ຄຸ້ມ​ຄອງ, ຄວບ​ຄຸມ​ການ​ປ້ອງ​ກັນ, ຕ້ານ​ໂຣກ​ລະບາດ​ໃນ​ບັນດາ​ການເຄື່ອນໄຫວ​ທາງ​ການບິນ, ທ່ອງ​ທ່ຽວ, ຂົນສົ່ງ​ສິນຄ້າ​ຜ່ານ​ຊາຍ​ແດນ. ຄຳ​ສັ່ງ​ດັ່ງກ່າວ ຮຽກຮ້ອງ​ໃຫ້​ກະຊວງ​ການ​ຕ່າງປະເທດ ຢຸດຕິ​ການ​ເຂົ້າ​ເມືອງ​ສຳລັບ​ບັນດາ​ຜູ້​ທີ່​ມາ​ຈາກ ຫຼື ໄປ​ຜ່ານ​ບັນດາ​ເຂດ​ເກີດ​ໂຣກ​ລະບາດ; ບັນດາ​ເປົ້າ​ໝາຍ​ເຂົ້າ​ເມືອງ ເພື່ອ​ຈຸດປະສົງ​ທາງ​ລັດ​ຖະ​ການ​ໃນ​ກໍລະນີ​ພິເສດ ຕ້ອງ​ໄດ້​ແຈ້ງ​ໃຫ້​ຂະແໜງ​ສາທາລະນະ​ສຸກ​ຮັບ​ຮູ້ ແລະ ປະຕິບັດ​ການ​ແຍກ​ຕົວ​ເປັນ​ເວລາ 14 ວັນ​ຕາມ​ຂໍ້​ກຳ​ນົດ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110