ຮົງກົງ ຂາດດູນງົບປະມານຫຼາຍເປັນປະຫວັດສາດ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 02/03/2020 09:39:54 ຈຳ​ນວນ​​ຢ້ຽມ​ຊົມ 291 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ທ້າຍ​ເດືອນ​ກຸມພາ​ຜ່ານ​ມາ, ເຂດ​ບໍລິຫານ​ພິເສດ​ຮົງ​ກົງ ໄດ້​ເປີດເຜີຍ​ງົບປະມານ​ຂາດດູນ​ສູງ​ທີ່​ສຸດ​ເປັນ​ປະ ຫວັດສາດ ໂດຍ​ຈະ​ມອບ​ເງິນ​ໃຫ້​ແກ່​ປະຊາຊົນ ແລະ ຫຼຸດຜ່ອນ​ພາສີ​ໃນ​ພາກ​ທຸລະ​ກິດ ເພື່ອ​ບັນເທົາ​ຜົນ​ກະທົບ​ທາງ​ດ້ານ​ເສດຖະກິດ ຈາກ​ການ​ປະ​ທ້ວງ​ທີ່​ຍືດ​ເຍື້ອ​ເປັນ​ເວລາ​ດົນ​ນານ ແລະ ການ​ລະບາດ​ຂອງ​ເຊື້ອ​ໄວ​ຣັດ COVID-19.
  ທ່ານ ພອນ ຊານ ຜູ້​ບໍລິ  ຫານການ​ເງິນ ເຂດ​ບໍລິຫານ ​ພິເສດ​ຮົງ​ກົງ ໄດ້​ອອກຖະ ແຫຼງການ​ງົບປະມານ​ປີ 2020-2021 ຕໍ່​ສະພາ​ນິຕິບັນຍັດ​ວ່າ: ຂາດດູນ​ງົບປະມານ​ເປັນ​ປີ​ທີ​ສອງ​ຕິດຕໍ່​ກັນ ໃນ​ມູນ​ຄ່າ 139.100 ລ້ານ​ໂດ​ລາ​ຮົງ​ກົງ, ກວມ 4,8% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ເນື່ອງ​ຈາກ​ລາຍ​ໄດ້​ຫຼຸດ​ລົງ ແລະ ຈະ​ອອກ​ມາດ​ຕະການ​ບັນເທົາ ດ້ວຍ​ມູນ​ຄ່າ 120.000 ລ້ານ​ໂດ​ລາ​ຮົງ​ກົງ ປະກອບ​ດ້ວຍ​ການ​ມອບ​ເງິນ​ໃຫ້​ແກ່​ຊາວ​ຮົງ​ກົງ​ທີ່​ມີ​ອາຍຸ 18 ປີ​ຂຶ້ນ​ໄປ ຄົນ​ລະ 10.000 ໂດ​ລາ​ຮົງ​ກົງ, ຫຼຸດຜ່ອນ​ພາສີ​ໃຫ້​ແກ່​ບັນດາ​ພາກ​ທຸລະ​ກິດ ແລະ ໃຫ້ການ​ອຸດ​ໜູນ​ອື່ນໆ. 
  ທ່ານ ຊານ ຢືນຢັນ​ວ່າ: ມາດ​ຕະການ​ເຫຼົ່າ​ນີ້, ຈະ​ບໍ່​ເປັນ​ພາລະ​ທາງ​ການ​ເງິນ​ໃນ​ໄລຍະ​ຍາວ ເພາະ​ຄາດ​ວ່າ: ເມື່ອ​ເຖິງ​ທ້າຍ​ເດືອນ​ມີນາ ປີ 2025, ເງິນ​ທຶນ​ສຳຮອງ​ຈະ​ມີ​ຢູ່​ປະມານ 937.100 ລ້ານ​ໂດ​ລາ​ຮົງ​ກົງ. ສ່ວນ GDP ປີ​ນີ້, ອາດ​ຈະ​ຢູ່​ໃນ​ລະດັບ 1,5%. ໃນ​ປີຜ່ານມາ ແມ່ນ​ຢູ່​ໃນ​ລະດັບ 1,2% ເປັນ​ການ​ຫຼຸດ​ລົງ​ຄັ້ງ​ທຳອິດ​ນັບ​ຕັ້ງແຕ່​ເກີດ​ວິ​ກິດ​ການ​ເງິນ​ໂລກ​ໃນ​ປີ 2009.
  ພ້ອມ​ກັນ​ນັ້ນ, ນັກ​ວິເຄາະ​ຄາດ​ວ່າ: ໂຣກ COVID-19 ຈະ​ເຮັດ​ໃຫ້ GDP ໃນ​ໄຕ​ມາດ​ທຳອິດ​ຂອງ​ເຂດ​ບໍລິຫານ​ພິເສດ​ຮົງ​ກົງ ເສຍ​ຫາຍ​ແຕ່ 1%-2% ແລະ ເສດຖະກິດ​ໃນ​ປີ​ນີ້, ອາດ​ຈະ​ຫຼຸດ​ລົງ​ຫຼາຍ​ກວ່າ​ປີ​ທີ່​ຜ່ານ​ມາ ຊຶ່ງ​ຂຶ້ນ​ຢູ່​ກັບ​ຄວາມ​ຮຸນ​ແຮງ​ຂອງ​ການ​ແຜ່​ລະບາດ​ຂອງ​ພະ​ຍາດ. ງົບປະມານ​ຂາດດູນ ບໍ່​ອາດ​ຈະ​ຊ່ວຍ​ໃຫ້​ເຂດ​​ບໍລິຫານ​ພິເສດ​ຮົງ​ກົງ ຫຼຸດ​ພົ້ນ​ອອກ​ຈາກ​ພາວະ​ເສດຖະກິດ​ຖົດ​ຖອຍ​ໄດ້ ເພາະ​ບັນຍາກາດ​ການ​ບໍລິໂພກ​ທີ່​ຫຼຸດ​ລົງ ຄາດ​ວ່າ: GDP ອາດ​ຈະ​ຫຼຸດ​ລົງ​ເຖິງ 5% ໃນ​ໄຕ​ມາດ​ທໍາ​ອິດ​ຂອງ​ປີ​ນີ້ ແລະ ຫຼຸດ​ລົງ 3% ສໍາ​ລັບ​ໝົດ​ປີ​ນີ້. ຢ່າງໃດ​ກໍ​ຕາມ, ເຂດ​ບໍລິຫານ​​ພິເສດ​ຮົງ​ກົງ ໄດ້​ຈັດ​ງົບປະມານ​ຂາດດູນ​ຄັ້ງ​ທຳອິດ​ໃນ​ຮອບ 15 ປີ ສຳລັບ​ສົກ​ປີ 2019-2020 ໃນ​ມູນ​ຄ່າ 37.800 ລ້ານ​ໂດ​ລາ​ຮົງ​ກົງ, ກວມ 1,3% ຂອງ GDP, ຫຼັງ​ຈາກ​ງົບປະມານ​ຂາດດູນ​ຄັ້ງ​ຫຼັງ​ສຸດ​ໃນ​ປີ 2003-2004, ກວມ 5,3% ຂອງ GDP ຍ້ອນ​ໂຣກ​ທາງ​ເດີນ​ຫາຍໃຈ​ຮຸນ​ແຮງ ຫຼື SARS ລະບາດ​ໜັກ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110