ຫົວ​ຂໍ້ : ຫວຽດນາມ ເອົາໃຈໃສ່ຊຸກຍູ້ການຮ່ວມມືເສດຖະກິດອາຊຽນ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 02/03/2020 09:41:50 ຈຳ​ນວນ​ຜູ້​ເຂົ້າ​ຢ້ຽມ​ຊົມ 199 ຄັ້ງ

ຮຽບຮຽງ​ໂດຍ: ສີ​ວັນ

  ການ​ຮັບ​ໜ້າທີ່​ບົດບາດ​ເປັນ​ປະທານ​ສະມາຄົມປະ ຊາຊາດ​ອາຊີ​ຕາເວັນ​ອອກ​ສ່ຽງ​ໃຕ້  (ອາ​ຊຽນ) ຂອງ​ຫວຽດນາມ​ໃນ​ປີ 2020 ດ້ວຍ​ຈຸດປະສົງ​ຊຸກຍູ້​ການ​ເຕີບ​ໂຕ​ເສດຖະກິດ, ສະໜັບສະໜູນ​ສັນຕິພາບ​ຢູ່​ພາກ​ພື້ນ ແລະ ພັດທະນາ​ວັດທະນະທຳ ລະຫວ່າງ ບັນດາ​ປະເທດ​ສະມາຊິກ ພາຍ​ໃຕ້​ຫົວຂໍ້; “ຕິດ​ພັນ ແລະ ເປັນ​ເຈົ້າ​ການ​ປັບ​ຕົວ​ໃຫ້​ແທດເໝາະ”. ເປັນຕົ້ນ ແມ່ນ​ການ​ພົວພັນ​ຮ່ວມ​ມື​ດ້ານ​ເສດຖະກິດ, ໜຶ່ງ​ໃນ​ສາມ​ເສົາຄ້ຳ​ຕົ້ນຕໍ​ຂອງ​ການ​ພົວພັນ​ຮ່ວມ​ມື ລະຫວ່າງ ຫວຽດນາມ ແລະ ອາ​ຊຽນ.
  ທ່ານ ເຈິ່ນ​ຕ໊ວນ​ແອງ ລັດຖະມົນຕີ​ກະຊວງ​ອຸດສາ ຫະກຳ ແລະ ການ​ຄ້າ ຫວຽດ ນາມ ກ່າວ​ວ່າ: ນັບ​ແຕ່​ປີ 1995, ຫວຽດນາມ ໄດ້​ເຂົ້າ​ເປັນ​ສະມາຊິກ​ຂອງ​ສະມາຄົມ​ປະຊາຊາດ​ອາຊີ​ຕາເວັນ​ອອກ​ສ່ຽງ​ໃຕ້ (ອາ​ຊຽນ) ຢ່າງ​ເປັນ​ທາງ​ການ. ຫຼັງ​ຈາກ​ນັ້ນ ໄດ້​ເຂົ້າ​ຮ່ວມ​ເຂດ​ການ​ຄ້າຂາຍ​ເສລີ​ຂອງ ອາ​ຊຽນ (AFTA) ໃນ​ປີ 1996, ນີ້​ແມ່ນ​ບັນດາ​ບາດກ້າວ​ທຳອິດ ເພື່ອ​ປະຕິບັດ​ມະຕິ​ຂອງ​ກອງ​ປະຊຸມ​ໃຫຍ່​ຄັ້ງ​ທີ 7 ຂອງ​ພັກ ຕາມ​ທິດ​ສ້າງສາ ແລະ ປະຕິບັດ​ຍຸດທະສາດ​ການ​ຕ່າງປະເທດ ບົນ​ພື້ນຖານ​ຫັນ​ບັນດາ​ການ​ພົວພັນ​ກັບ​ຄູ່​ຮ່ວມ​ມື​ເປັນ​ຫຼາຍ​ຮູບ​ຫຼາຍ​ແບບ ແລະ ຫຼາຍ​ທິດ, ໃນ​ນັ້ນ ຖື​ການ​ຮ່ວມ​ມື​ກ່ຽວ​ກັບ​ເສດຖະກິດ​ແມ່ນ​ພື້ນຖານ​ສຳ​ຄັນ.
  ກ່ຽວ​ກັບ​ການ​ພົວພັນ​ຮ່ວມ​ມື ລະຫວ່າງ ຫວຽດນາມ ແລະ ອາ​ຊຽນ ໃນ​ຂະບວນ​ວິວັດ​ການ​ເຊື່ອມ​ໂຍງ​ເຂົ້າ​ກັບ​ສາກົນ​ຂອງ ຫວຽດນາມ, ທ່ານ ເຈິ່ນ​ຕ໊ວນ​ແອງ ກ່າວ​ວ່າ: ດ້ວຍ​ທີ່​ຕັ້ງ​ພູມ​ສາດ​ການເມືອງ​ສຳຄັນ​ທີ່​ສຸດ​ຂອງ​ພາກ​ພື້ນ​ອາຊີ​ຕາເວັນ​ອອກ​ສ່ຽງ​ໃຕ້ ແລະ ບັນດາ​ປະເທດ​ສະມາຊິກ​ອາ​ຊຽນ, ຫວຽດນາມ ຈະ​ເສີມ​ຂະຫຍາຍ​ກຳລັງ​ແຮງ ແລະ ສຽງ​ເວົ້າ​ຂອງ​ຕົນ​ໄດ້​ຢ່າງ​ແນ່ນອນ ຖ້າ​ຫາກ​ພວກ​ເຮົາ​ສ້າງ​ບັນດາ​ຮາກ​ຖານ​ທີ່​ມີ​ຄວາມ​ເຫັນ​ດີ​ເຫັນ​ພ້ອມ ກໍຄື​ຄວາມ​ສາມັກຄີ, ເອກະ​ພາບ. 
  ອາ​ຊຽນ ໄດ້​ກາຍເປັນ​ໜຶ່ງ​ໃນ​ບັນດາ​ຄູ່​ຮ່ວມ​ມື​ດ້ານ​ການ​ຄ້າ​ແຖວ​ໜ້າ​ຂອງ​ໂລກ ຂອງ ຫວຽດນາມ, ໃນ​ບັນດາ​ແງ່​ມູມ​ທັງ​ໝົດ ນັບ​ທັງ​ດ້ານ​ເສດຖະກິດ, ການ​ຄ້າ ແລະ ການ​ລົງທຶນ ເມື່ອ​ພວກ​ເຮົາ​ເຂົ້າ​ຮ່ວມ​ກຸ່ມ​ການ​ຄ້າ​ເສລີ AFTA ໃນ​ປີ 1996, ການ​ຄ້າ​ສອງ​ສົ້ນ​ຂອງ ຫວຽດນາມ ກັບ​ບັນດາ​ປະເທດ​ໃນ​ກຸ່ມ​ບັນລຸ​ປະມານ 5,9 ຕື້​ໂດ​ລາ. ປີ 2018 ໂຕ​ເລກ​ດັ່ງກ່າວ ໄດ້​ເພີ່ມ​ຂຶ້ນ​ 9,5 ເທົ່າ ແລະ ບັນລຸ​ຍອດ​ວົງ​ເງິນ​ການ​ຄ້າ 2 ສົ້ນ ລະຫວ່າງ ຫວຽດນາມ ກັບ ອາ​ຊຽນ ປະມານ 56,3 ຕື້​ໂດ​ລາ. ເມື່ອ​ເຂົ້າ​ຮ່ວມ ແລະ ເຊື່ອມ​ໂຍງ​ເຂົ້າ​ກັບ ອາ​ຊຽນ ສຳລັບ​ເສົາຄ້ຳ​ກ່ຽວ​ກັບ​ເສດຖະກິດ ແມ່ນ​ຖື​ການ​ຄ້າ ແລະ ການ​ລົງທຶນ​ເປັນ​ພື້ນຖານ ໄດ້​ນຳ​ມາ​ຊຶ່ງ​ບັນດາ​ກຳລັງ​ໜູນ​ອັນ​ໃຫຍ່​ຫຼວງ​ໃຫ້​ແກ່​ການ​ເຊື່ອມ​ຕໍ່​ຂອງ​ພວກ​ເຮົາ​ກັບ​ບັນດາ​ປະເທດ​ໃນ ອາ​ຊຽນ ເຫັນ​ວ່າ​ມີ​ຄວາມ​ແໜ້ນ​ແຟ້ນ ແລະ ເຂັ້ມແຂງ​ກວ່າ​ເກົ່າ ຊຶ່ງ​ໄດ້​ຊ່ວຍ​ໃຫ້ ຫວຽດນາມ ສືບຕໍ່​ຍົກ​ສູງ​ທີ່​ຕັ້ງ​ຂອງ​ຕົນ ໃນ​ເວທີ​ສາ​ກົນ. 
  ພາຍຫຼັງ​ເຊື່ອມ​ໂຍງ​ເຂົ້າ​ກຸ່ມ​ການ​ຄ້າ​ເສລີ AFTA ໃນ​ປີ 1996, ມາ​ຮອດ​ປັດຈຸບັນ ຫວຽດນາມ ໄດ້​ມີ​ສັນຍາ​ການ​ຄ້າ​ເສລີ 16 ສະບັບ ແລະ ໃນ​ຈຳນວນ​ນັ້ນ ມີ​ສັນຍາ​ການ​ຄ້າ​ໃໝ່​ຫຼາຍ​ສະບັບ ຊຶ່ງ​ຫວຽດນາມ ໄດ້​ລົງ​ນາມ​ກັນ​ເກືອບ​ທັງ​ໝົດ​ບັນດາ​ພື້ນຖານ​ເສດຖະກິດ​ໃຫຍ່​ທີ່​ສຸດ​ຂອງ​ໂລກ. ບັນດາ​ໝາກຜົນ​ຄື​ດັ່ງກ່າວ, ການ​ພົວພັນ​ຮ່ວມ​ມື ລະຫວ່າງ ຫວຽດນາມ - ອາ​ຊຽນ ໄດ້​ນໍາ​ເອົາ​ບົດຮຽນ​ຫຼາຍ​ຢ່າງ​ໃຫ້​ແກ່​ການ​ເປີດ​ປະຕູ ແລະ ເຊື່ອມ​ໂຍງ. ທ່ານ ເຈິ່ນ​ຕ໊ວນ​ແອງ ກ່າວ​ຢໍ້າ​ວ່າ: ບົດຮຽນ​ນີ້ ບໍ່​ພຽງ​ແຕ່​ໃນ​ແງ່​ມູມ, ແຕ່​ລະ​ຂົງເຂດ​ເທົ່າ​ນັ້ນ ແຕ່​ຫາກ​ຍັງ​ສັງ​ລວມ​ຄືນໃໝ່​ອີກ​ດ້ວຍ ເຮັດ​ໃຫ້ ຫວຽດນາມ ເຕີບ​ໃຫຍ່, ມີ​ບັນດາ​ການ​ປະກອບສ່ວນ​ຢ່າງ​ຕັ້ງໜ້າ ແລະ ມີ​ຄວາມ​ໝາຍ​ໃຫ້​ແກ່​ການ​ສ້າງ​ໂຄງ​ປະກອບ​ພື້ນຖານ​ເສດຖະກິດ​ຂອງ ຫວຽດນາມ ຄືນ ໃໝ່ ແລະ ສືບຕໍ່​ປ່ຽນແປງ​ໃໝ່​ຮູບ​ການ​ເຕີບ​ໂຕ ກໍຄື​ຕິດ​ພັນ​ກັບ​ການ​ສ້າງ​ລັດ​ແຫ່ງ​ອຳນາດ​ນິຕິບັນຍັດ ບົນ​ພື້ນຖານ​ຂອງ​ພື້ນຖານ​ເສດຖະກິດ​ການ​ຕະຫຼາດ​ຕາມ​ການ​ກຳນົດ​ທິດ​ສັງຄົມ​ນິຍົມ. ບັນດາ​ເປົ້າ​ໝາຍ​ ທັງ​ໝົດ​ນັ້ນ ມີ​ຫຼາຍ​ຮູບ​ຫຼາຍ​ແບບ, ຫຼາຍ​ແງ່​ມູມ. ຢ່າງໃດ​ກໍ​ຕາມ, ເມື່ອ​ສັງ​ລວມ​ແລ້ວ ກໍ​ແມ່ນ​ເປົ້າ​ໝາຍ​ເພື່ອ​ປະຕິບັດ​ຍຸດທະສາດ​ຫັນ​ປະເທດ​ຊາດ​ເປັນ​ປະເທດ​ອຸດສາຫະກຳ ແລະ ທັນ​ສະໄໝ, ຕາມ​ທັດສະນະ​ການ​ພັດທະນາ​ແບບ​ຍືນ​ຍົງ ຊຶ່ງ​ພັກ​ກອມ​ມູ​ນິດ​ຫວຽດນາມ ໄດ້​ວາງ​ອອກ​ບັນດາ​ແຜນ​ນະໂຍບາຍ, ແນວທາງ​ສຳຄັນ ແລະ ລັດ ໄດ້​ປະຕິບັດ​ນະໂຍບາຍ​ໃນ​ໄລຍະ​ຜ່ານ​ມາ. 
  ເມື່ອ​ເວົ້າ​ເຖິງ​ຫົວຂໍ້​ວ່າ​ດ້ວຍ; “ຕິດ​ພັນ ແລະ ເປັນ​ເຈົ້າ​ການ​ປັບ​ຕົວ​ໃຫ້​ແທດເໝາະ”, ທ່ານ​ລັດຖະມົນຕີ​ກະຊວງ​ອຸດ​ສາ​ຫະ​ກຳ ແລະ ການ​ຄ້າ ຫວຽດນາມ ໃຫ້​ຮູ້​ຕື່ມ​ວ່າ: ບັນດາ​ບຸລິມະສິດ​ຂອງ ຫວຽດນາມ ແລະ ກະຊວງ​ອຸດ​ສາ​ຫະ​ກຳ ແລະ ການ​ຄ້າ ຫວຽດນາມ ໃນ​ປີ​ປະທານ ອາ​ຊຽນ 2020 ແມ່ນ: ປະກອບ​ດ້ວຍ 2 ເນື້ອ​ໃນ​ຫຼັກ​ຂອງ​ປີ 2020, ຫວຽດນາມ ກໍມີ​ການ​ກຳນົດ​ທິດ​ບັນດາ​ເປົ້າ​ໝາຍ​ບຸລິມະສິດ - ທັງ​ມີ​ລັກສະນະ​ສືບ​ທອດ​ບັນດາ​ການ​ກໍາ​ນົດ​ທິດ​ບຸລິມະສິດ ໃນ​ໄລຍະ​ພັດທະນາ​ກ່ອນ​ນີ້​ຂອງ ອາ​ຊຽນ ແຕ່​ຍັງ​ສ່ອງ​ແສງ​ໄດ້​ບັນດາ​ທ່າ​ອ່ຽງ​ພັດທະນາ​ລວມ​ຂອງ​ໂລກ​ຢ່າງ​ຄົບ​ຖ້ວນ, ທັງ​ສ່ອງ​ແສງ​ໄດ້​ບັນດາ​ຄວາມ​ຮຽກຮ້ອງ​ຕ້ອງການ​ຂອງ ອາ​ຊຽນ ພາຍ​ໃນ​ກຸ່ມ ກໍຄື​ການ​ພົວພັນ​ກັບ​ບັນດາ​ຄູ່​ຮ່ວມ​ມື. ໃນ​ຖານະ​ເປັນ​ປະທານ ອາ​ຊຽນ ປີ 2020, ຫວຽດນາມ ມີ​ຂໍ້​ລິ​ເລີ່ມ​ປະມານ 16 -17 ຂໍ້ ຈະ​ໄດ້​ຍົກ​ອອກ​ມາ ເພື່ອ​ພ້ອມ​ກັບ​ບັນດາ​ປະເທດ​ສະມາຊິກ​ອາ​ຊຽນ ເຫັນ​ດີ​ເປັນ​ເອກະ​ພາບ ເພື່ອ​ໃຫ້​ພວກ​ເຮົາ​ປະຕິບັດ​ການ​ຜັນ​ຂະຫຍາຍ​ໃນ​ປີ 2020, ຈະ​ເປີດ​ກວ້າງ ແລະ ກວມ​ລວມ​ຕໍ່​ບັນດາ​ຂົງເຂດ​ທັງ​ໝົດ. ໃນ​ນັ້ນ, ມີ​ບັນດາ​ຂົງເຂດ​ກ່ຽວ​ກັບ​ເສດຖະກິດ, ການ​ຄ້າ, ການ​ລົງທຶນ, ເຕັກ​ໂນ​ໂລ​ຊີ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110