ຫົວ​ຂໍ້ : ທ່ານ ສີຈິ້ນຜິງ ເນັ້ນຕ້ອງຮັບປະກັນຄວາມໝັ້ນທ່ຽງດ້ານກະສິກຳ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 02/03/2020 09:43:15 ຈຳ​ນວນ​ຜູ້​ເຂົ້າ​ຢ້ຽມ​ຊົມ 247 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ຫວ່າງ​ບໍ່​ດົນ​ມາ​ນີ້, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ຊີ້​ແຈງ​ວຽກ​ງານ​ໃນ​ກອງ​ປະຊຸມ​ວຽກ​ງານ​ການ​ຜະລິດ​ກະ​ສິ​ກໍາ​ລະດູ​ໃບ​ໄມ້​ປົ່ງ​ທົ່ວ​ປະເທດ ໂດຍ​ກ່າວ​ເນັ້ນ​ວ່າ: ໃນ​ເມື່ອ​ປະ​ເຊີນ​ໜ້າ​ກັບ​ຄວາມ​ສ່ຽງ ແລະ ສິ່ງ​ທ້າ​ທາຍ​ໃນ​ປັດຈຸບັນ, ຍິ່ງ​ຕ້ອງ​ຮັບປະກັນ​ຄວາມ​ໝັ້ນ​ທ່ຽງ​ດ້ານ​ກະ​ສິ​ກໍາ, ຍິ່ງ​ຕ້ອງ​ຮັບປະກັນ​ຄວາມ​ໝັ້ນຄົງ​ດ້ານ​ທັນ​ຍາ​ຫານ ແລະ ອາ​ຫານ​ສໍາ​ຮອງ​ທີ່​ສໍາ​ຄັນ​ຕ່າງໆ ເພື່ອ​ເປັນ​ການ​ຄໍ້າ​ປະກັນ​ທີ່​ແຂງແຮງ​ໃຫ້​ແກ່​ການ​ຕໍ່ຕ້ານ​ການ​ແຜ່​ລະບາດ​ພະຍາດ Covid-19 ແລະ ບັນລຸ​ເປົ້າໝາຍ​ພັດທະນາ​ເສດ​ຖະ​ກິດ​-​ສັງຄົມ ໃນ​ປີ 2020.
  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ໄປ​ຄຽງ​ຄູ່​ກັບ​ການ​ປະຕິບັດ​ມາດ​ຕະການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ ໂດຍ​ແບ່ງ​ຂອບ​ເຂດ ແລະ ລະດັບ, ຕ້ອງ​ອອກແຮງ​ຈັດ​ຕັ້ງ​ປະຕິບັດ​ການ​ຜະລິດ ແລະ ການ​ປູກຝັງ​ໃນ​ລະດູ​ໃບ​ໄມ້​ປົ່ງ, ບໍ່​ໃຫ້້​ພາດ​ໂອກາດ​ທີ່​ດີ​ໃນ​ການ​ປູກຝັງ, ຮັບປະກັນ​ໃຫ້​ໄດ້​ຮັບ ການ​ເກັບ​ກ່ຽວ​ອຸດົມສົມບູນ​ໃນ​ລະດູ​ຮ້ອນ. ຕ້ອງ​ເພີ່ມ​ທະວີ​ການ​ສະໜັບສະໜູນ​ດ້ານ​ນະໂຍບາຍ, ສົ່ງເສີມ​ການ​ຜະລິດ​ທັນ​ຍາ​ຫານ, ເພີ່ມ​ທະວີ​ການ​ກໍ​ສ້າງ​ພື້ນຖານ​ໂຄງ​ລ່າງ​ດ້ານ​ກະ​ສິ​ກໍາ​ແບບ​ທັນ​ສະໄໝ, ຍົກ​ລະດັບ​ການ​ປະດິດ​ສ້າງ​ໃໝ່​ດ້ານ​ເຕັກ​ໂນ​ໂລ​ຊີ​ກະ​ສິ​ກໍາ, ເຮັດ​ວຽກ​ປ້ອງ​ກັນ ແລະ ປາບ​ສັດຕູ​ພືດ, ຄວບ​ຄຸມ​ການລະບາດພະຍາດ​ສັດ​ໃຫ້​ດີ.
  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ໃນ​ສະຖານະ​ການ​ປ້ອງ​ກັນ ແລະ ຄວບ​ຄຸມ​ສະພາບ​ພະຍາດ​ຂອງ​ຈີນ ພວມ​ມີ​ການ​ຂະຫຍາຍຕົວ​ເປັນ​ຢ່າງ​ດີ, ເສດຖະກິດ​ສັງຄົມ​ເລັ່ງ​ລັດ​ຟື້ນ​ຟູ​ການ​ພັດທະນາ, ຂະນະ​ດຽວ​ກັນ, ສະພາບ​ພະຍາດ​ຢູ່​ແຂວງ​ຫູ​ເປີຍ ແລະ ນະຄອນ​ອູ​ຮັ້ນ ຍັງ​ຄົງ​ສັບສົນ​ຢູ່, ບໍ່​ຄວນ​ປະໝາດ​ຄວາມ​ສ່ຽງ​ທີ່​ສະພາບ​ພະຍາດ​ອາດ​ຈະ​ຮ້າຍ​ແຮງ​ຄືນ​ໃນ​ບາງ​ເຂດ​ອື່ນ. ປັດຈຸບັນ, ຈີນ ບໍ່​ພຽງ​ແຕ່​ຕ້ອງ​ສືບຕໍ່​ເພີ່ມ​ທະວີ​ການ​ປ້ອງ​ກັນ ແລະ ຄວບ​ຄຸມພະ​ຍາດ, ຍັງ​ຕ້ອງ​ເລັ່ງ​ລັດ​ກຳ​ແໜ້ນ​ວຽກ​ງານ​ຕ່າງໆ​ກ່ຽວ​ກັບ​ການ​ພັດທະນາ​ເສດຖະກິດ​ສັງ​ຄົມ. ຕ້ອງ​ສືບຕໍ່​ເຕົ້າໂຮມ​ກຳລັງ ແລະ ຊັບພະຍາກອນ ເພື່ອ​ເພີ່ມ​ທະວີ​ການ​ປ້ອງ​ກັນ, ຄວບ​ຄຸມພະ​ຍາດ​ຢູ່​ແຂວງ​ຫູ​ເປີຍ ແລະ ນະຄອນ​ອູ​ຮັ້ນ​ຢ່າງຮອບດ້ານ, ເພີ່ມ​ທະວີ​ມາດ​ຕະການ​ປ້ອງ​ກັນ​ຕໍ່​ກຸ່ມ​ຄົນ​ທີ່​ອ່ອນແອ ທີ່​ຕ້ອງການ​ບໍລິການ​ຕ່າງໆ​ຈາກ​ສູນ​ລ້ຽງ​ຜູ້​ເຖົ້າ, ສູນ​ຊ່ວຍເຫຼືອ, ສູນ​ລ້ຽງ​ເດັກ ແລະ ອົງການ​ປິ່ນປົວ​ພະຍາດ​ໂຣກ​ຈິດ​ເປັນຕົ້ນ ພ້ອມ​ດ້ວຍ​ພະນັກງານ​ທີ່​ເຮັດ​ວຽກ​ຢູ່​ແນວ​ໜ້າການ​ປ້ອງ​ກັນ ແລະ ຄວບ​ຄຸມພະ​ຍາດ.
  ທ່ານ ສີ​ຈິ້ນ​ຜິງ ກ່າວ​ຕື່ມ​ວ່າ: ຕ້ອງ​ຊຸກຍູ້​ການ​ຟື້ນ​ຟູ​ເຮັດ​ວຽກ ແລະ ການ​ຜະລິດ​ຢ່າງ​ໝັ້ນ​ທ່ຽງ​ໜັກແໜ້ນ, ຈັດ​ຕັ້ງ​ປະຕິບັດ​ນະໂຍບາຍ​ຕ່າງໆ​ທີ່​ໃຫ້​ບຸລິມະສິດ​ຕໍ່​ວິ​ສາ​ຫະ​ກິດ; ຕ້ອງ​ສືບຕໍ່​ຮ່ວມ​ມື​ຢ່າງ​ໃກ້ຊິດ​ກັບ​ອົງການ​ອະນາໄມ​ໂລກ, ແລກປ່ຽນ ແລະ ແບ່ງປັນ​ບົດຮຽນ​ປ້ອງ​ກັນ​ພະຍາດ​ກັບ​ປະເທດ​ທີ່​ກ່ຽວຂ້ອງ, ປະສານ​ສົມທົບ​ມາດ​ຕະການ​ຕ່າງໆ, ພ້ອມ​ກັນ​ປົກ​ປັກ​ຮັກສາ​ຄວາມ​ປອດ​ໄພ​ດ້ານ​ສາທາລະນະ​ສຸກ​ຂອງ​ພາກ​ພື້ນ​ກໍ​ຄື​ຂອງ​ໂລກ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110