ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ II ຂອງພັກ

ເຜີຍ​ແຜ່​ໂດຍ​: siththiphone rasphone ເວ​ລາ: 02/03/2020 09:52:13 ຈຳ​ນວນ​​ຢ້ຽມ​ຊົມ 474 ຄັ້ງ

   ວັນ​ທີ 3/2/1972 ກ​ອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ II ຂອງ​ພັກ ໄດ້​ເປີດຂຶ້ນ​ທີ່​ຖ້ຳ​ຜາ​ແດງ, ບ້ານ​ລ່ອງ​ກູ້ ເມືອງວຽງ​ໄຊ ແຂວງ​ຫົວ​ພັນ ມີ​ຜູ້​ແທນ​ສົມ​ບູນ​ເຂົ້າ​ຮ່ວມ​ທັງ​ໝົດ 125 ສະ​ຫາຍ. ຕາງ​ໜ້າ​ໃຫ້​ສະ​ມາ​ຊິກ​ພັກ 21.000 ກວ່າ​ສະ​ຫາຍ​ໃນ​ທົ່ວ​ປະ​ເທດ.
   ກອງ​ປະ​ຊຸມ​ໃຫຍ່​ໄດ້​ວາງ​ໜ້າ​ທີ່​ພື້ນ​ຖານ​ຂອງ​ການ​​ປະ​ຕິ​ວັດ​ລາວ, ກຳ​ນົດ​ໜ້​າທີ່​ຂອງ​​ການປະ​ຕິ​ວັດ​ຊາດ ປະ​ຊາ​ທິ​ປະ​ໄຕ ປະ​ຊາ​ຊົນ ແລະ ນະ​ໂຍ​ບາຍ​ໃຫຍ່​ຂອງ​ພັກ​ອອກ ເພື່ອ​ບັນ​ລຸ​ຜົນ​ສຳ​ເລັດ​ຕາມ​ໜ້າ​ທີ່ ແລະ ນະ​ໂນ​ບາຍ​ດັ່ງ​ກ່າວ ກອງ​ປະ​ຊຸມ​ຍັງ​ໄດ້​ວາງ​ໜ້​າ​ທີ່ຫຼັກ​ການ ແລະ ທິດ​ນຳ​ຂອງວຽກ​ງານກໍ່​ສ້າງ​ພັກ ທັງ​ນີ້​ກໍ​ເພື່ອ​ຍົກ​ສູງ​ຄວາມ​ສາ​ມາດ ແລະ ກຳ​ລັງ​ສູ​້​ຮົບ​ຂອງ​ພັກ​ຢ່າງບໍ່​ຢຸດຢັ້ງ, ໂຄງ​ການ ການ​ເມືອງ​ໄດ້​ຊີ້ອອກວ່າ: ໜ້າ​ທີ່​ພື້ນ​ຖານ​ທີ່​ມີ​ຄວາມ​ໝາຍ​ຕັດ​ສິນກວ່າ​ໝູ່​ໃນ​ປັດ​ຈຸ​ບັນ​ນີ້​ແມ່ນ​ເພີ່​ມ​ທະ​ວີ​ການກໍ່​ສ້າງ​ພັກ​ໃຫ້​ແໜ້ນ​ແກ່ນ​ເຂັ້ມ​ແຂງ​ໃນ​ທຸກ​ດ້ານ​ຄື: ດ້ານ​ການ​ເມືອງ​ແນວ​ຄິດ ແລະ ການ​ຈັດ​ຕັ້ງ, ເພີ່​ມ​ທະ​ວີ​ລັກ​ສ​ະ​ນະ​ຊົນ​ຊັ້​ນ​ກຳ​ມະ​ກອນ ແລະ ລັກ​ສະ​ນະ​ນຳ​ໜ້າ​ຕໍ່​ສູ້​ຂອງ​ພັກ​ຢ່າງ​ບໍ່ຢຸດຢັ້ງ, ເຮັດ​ໃຫ້​ພັກ​ມີ​ກຳ​ລັງ​ແຮງ​ຕໍ່​ສູ້ ແລະ ມີ​ຄວາມ​ສາ​ມາດ​ນຳ​ພາ​ທົ່ວ​ປວງ​ຊົນ​ຕໍ່​ສ​ູ້​ກູ້​ຊາດ​ຕ້ານ​ອາ​ເມ​ຣິ​ກາ, ສຳ​ເລັດ​ການ​ປະ​ຕິ​ວັດ​ຊາດ-ປະ​ຊາ​ທິ​ປະ​ໄຕ​ໃນ​ທົ່ວ​ປະ​ເທດ ແລະ ກຽມ​ເງື່ອນ​ໄຂ​ອັນ​ຈຳ​ເປັນ​ທຸກ​ຢ່າງ​ເພື່ອ​ກ້າວ​ຂຶ້ນ​ສັງ​ຄົມ​ນິ​ຍົມ...; ຫຼັກ​ການກໍ່​ສ້າງ​ພັກ​ຄື​ພັກ​ຖື​ເອົາ​ລັດ​ທິ​ມາກ-ເລນິນ, ລັດ​ທິ​ຮັກ​ຊາດ​ອັນ​ແທ້​ຈິງ​ສົມ​​ທົບ​ກັບ​ລັດ​ທິ​ສາ​ກົນ​ກຳ​ມະ​ຊີບ​ເປ​ັນ​ພື້ນ​ຖານ​ແນວ​ຄິດ ແລະ ເປັນ​ເຂັມ​ທິດ​ສຳ​ລັບ​ການ​ເຄື່ອນ​ໄຫວ​ທຸກ​ປະ​ການ...; ພັກ​ຈັດ​ຕັ້ງ​ຕາມຫຼັກ​ການ​ລວມ​ສູນ​ປະ​ຊາ​ທິ​ປະ​ໄຕ, ບຸກ​ຄົນ​ຕ້ອງ​ຂຶ້ນ​ກັບ​ການ​ຈັດ​ຕັ້ງ, ສຽງ​ສ່ວນ​ໜ້ອຍ​ຂຶ້ນ​ກັບ​ສຽງ​ສ່ວນຫຼາຍ, ຂັ້​ນ​ລຸ່ມ​ຂຶ້ນ​ກັບ​ຂັ້ນ​ເທິງ, ທົ່ວ​ພັກ​ຂຶ້ນ​ກັບ​ສູນ​ກາງ​ພັກ, ພັກ​ມີ​ລະ​ບຽບ​ວິ​ໄນ​ອັນ​ເຂັ້ມ​ງວດ, ພັກ​ເປັນກ້ອນ ​ກຳ​ລ​ັງ​ສາ​​ມັກ​ຄີ​ເອ​ກະ​ພາບ​ທາງ​ດ້ານ​ການ​ເມືອງ, ແນວ​ຄິດ, ການ​ຈັດ​ຕັ້ງ ແລະ ການ​ກະ​ທຳ, ບໍ່​ອະ​ນຸ​ຍາດ​ໃຫ້​ມີ​ການ​ກະ​ທ​ຳ​ແບ່ງ​ແຍກພັກ​ພວກ​ໃດໆໝົດ,    ພັກ​ເຄື​່ອນ​ໄຫວຕາມ​ແນວ​ທາງ​ ມະຫາ​ຊົນ, ພົວ​ພັນສະ​ໜິດ​ຕິດ​ແໜ້ນ​ກັບ​ມະ​ຫາ​ຊົນ, ພັກ​ເອົາ​ການ​ຕິ​ຊົມ​ຕົນ​ເອງ ແລະ ຕິ​ຊົມ ​ກັນ​ເປັນ​ກົດ​ເກນ​ຂະ​ຫຍາຍ​ຕົວ ຂອງ​ພັກ, ທິດນ​ຳ​ໃນ​ການກໍ່​ສ້າງ​ຄື​ການກໍ່​ສ້າງ​ຕ້ອງ​ຮັບ​ໃຊ້  ແລະ ຕິດ​ແໜ້ນ​ກັບ​ຂະ​ບວນ​ການ​ຕໍ່​ສູ້​ຂອງ​ການ​ປະ​ຕິ​ວັດ​ຂອງ​ມະ​ຫາ​ຊົນ, ການກໍ່​ສ້າງ​ພັກ​ທາງ​ດ້ານ​ການ​ເມືອງ, ແນວ​ຄິດ ແລະ ການ​ຈັດ​ຕັ້ງ, ການ​ສ້າງ​ພັກ​ຕ້ອງ​ຮັບ​ປະ​ກັນ​ໃນ​ດ້ານ​ປະ​ລິ​ມານ ແລະ ຄຸນ​ນະ​ພາບ​ແຕ່​ຕ້ອງ​ເອົາ​ຄຸນ​ນະ​ພາບ​ເປັນ​ກົກ ເພື່ອ​ຮັບ​ປະ​ກັນ​ລັກ​ສະ​ນະ​ຊົນ​ຊັ້ນ​ກຳ​ມະ​ກອນ ແລະ ລັກ​ສະ​ນະ​ນຳ​ໜ້າ​ຕໍ່​ສູ້​ຂອງ​ພັກ.
   ກອງ​ປະ​ຊຸມ​ຄັ້ງ​ນີ້ ໄດ້​ຕົກ​ລົງ​ປ່ຽນ​ຊື່​ພັກ​ປະ​ຊາ​ຊົນ​ລາວ​ມາ​ເປັນ​ພັກ​ປະ​ຊາ​ຊົນ​ປະ​ຕິ​ວັດ​ລາວ. ກອງ​ປະ​ຊຸມ​ໃຫຍ່​ໄດ້​ຮັບ​ຮອງ​ເອົາ​ກົດ​ລະ​ບຽບ (ສະ​ບັບ​ດັດແປງ) ຂອງ​ພັກ, ກອງ​ປະ​ຊຸມ​ໃຫຍ່​ໄດ້​ດຳ​ເນີນ​ການ​ເລືອກ​ຕັ້ງ​ເອົາ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ຊຸດ​ໃໝ່ ຊຶ່ງ​ປະ​ກອບ​ດ້ວຍ​ກຳ​ມະ​ການ​ສົມ​ບູນ 23 ສະ​ຫາຍ ແລະ ກຳ​ມະ​ການ​ສຳ​ຮອງ 6 ສະ​ຫາຍ, ກອງ​ປະ​ຊຸມ​ຄະ​ນະ​ບ​ໍ​ລິ​ຫານ​ງານ​ສູນ​ກາງ​ພັກ​ຄັ້ງປະ​ຖົມ​ມະ​ລືກ​ໄດ້​ເລືອກ​ຕັ້ງ​ກົມ​ການ​ເມືອງ​ສູນ​ກາງ​ພັກ​ປະ​ກອບ​ມີ 7 ສະ​ຫາຍ, ຄະ​ນະເລ​ຂາ​ທິ​ການ​ສູນ​ກາງ​ພັກ 5 ສະ​ຫາຍ ແລະ ເລືອກ​ຕັ້ງ​ສະ​ຫາຍ ໄກ​ສອນ ພົມ​ວິ​ຫານ​ ເປັນ​ເລ​ຂາ​ທິ​ການ​ໃຫ​ຍ່ ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ, ຄະ​ນະ​ບໍ​ລິ​ຫານ​ງານ​ພັກ ໄດ້​ມອບ​ໃຫ້​ສະ​ຫາຍ ສີ​ສົມ​ພອນ ເປັນຫົວ​ໜ້າ​ຄະ​ນະ​ຈັດ​ຕັ້ງ ແລະ ກວດ​ກາ​ພັກ.
   ຜົນ​ສຳ​ເລັດ​ຂອງກອງ​ປະ​ຊຸມ​ໃຫຍ່ ຄັ້ງ​ທີ II ຂອງ​ພັກ​ມີ​ຄວາມ​ໝາຍ​ປະ​ຫ​ວັດ​ສາດ​ອັນ​ໃຫຍ່ຫຼວງ​ຈາກ​ພາກ​ປະຕິ​ບັດ​ຕົວຈິງ​  ພັກ​ໄດ້​ສະຫຼຸບ​ຖອດ​ ຖອນ​ບົດ​ຮຽນ​ອັນ​ປະ​ເສີດ​ໄດ້ ຫຼາຍ​ຢ່າງ,  ຍົກ​ລະ​ດັບ​ຄວາມ​ສາມາດ ​ແຫ່ງ​ການ​ນຳ​ພາ​ຂອງ​ພັກ​ຂຶ້ນ​ຕື່ມ. ກອງ​ປະ​ຊຸມ​ໃຫຍ່​ເປັນເຂດ​ ໝາຍ​ແຫ່ງ​ການ​ເຕີບ​ໃຫຍ່​ຂະ​ ຫຍາຍ​ຕົວ​ຂອງ​ພັກ​ໃນ​ການ​ການກໍ່​ສ້າງ​ພັກ​ແບບ​ໃໝ່​ຂອງ​ເລ​ນິນ. ກອງ​ປະ​ຊຸມ​ໃຫຍ່​ໄດ້​ເວົ້າ​ຂຶ້ນ​ເຖິງ​ຄວາມ​ຕັດ​ສິນ​ໃຈ​ເຮັດ​ສຳ​ເລັດ​ການ​ປະ​ຕິ​ວັດ​ຊາດ ປະ​ຊາ​ທິ​ປະ​ໄຕ ໃນ​ທົ່ວ​ປະ​ເທດ, ກຽມ​ເງື່ອນ​ໄຂ​ອັນ​ຈຳ​ເປັນ​ທຸກ​ຢ່າງ​ເພື່ອ​ກ້າວ​ຂຶ້ນ​ສັງ​ຄົມ​ນິ​ຍົມ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110