ຫົວ​ຂໍ້ : ນິວຈິບເຊັງ ຈັດກິດຈະກຳແຂ່ງຂັນກິລາ ແລ່ນ 31 ຂາ

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 02/03/2020 10:22:36 ຈຳ​ນວນ​ຜູ້​ເຂົ້າ​ຢ້ຽມ​ຊົມ 537 ຄັ້ງ

  ບໍລິສັດ ນິວ​ຈິບ​ເຊັງ ຈຳກັດ ຮ່ວມ​ກັບ​ພະ​ແນ​ກ​ສຶກສາ​ທິ​ການ ແລະ ກິລາ ນະຄອນຫຼວງ​ວຽງ​ຈັນ (ນວ) ແລະ   ກົມ​ພະລະ ແລະ ສິລະ​ປະ​ສຶກສາ ກະຊວງ​ສຶກສາ​ທິ​ການ ແລະ ກິລາ (ສສກ) ໄດ້ຈັດ​ງານ​ແຂ່ງຂັນ​ແລ່ນ 31 ຂາ​ສາມັກຄີ ຄັ້ງ​ທີ 5 ປະຈຳ​ສົກຮຽນ 2019-2020 ຫົວຂໍ້ “ພ້ອມ​ກັນ​ກ້າວ​ໄປ​ດ້ວຍ​ໃຈ​ສາມັກຄີ” ຂຶ້ນ​ເມື່ອ​ບໍ່​ດົນ​ຜ່ານ​ມາ​ນີ້ ຢູ່​ເດີນ​ກິລາ​ມະຫາວິທະຍາໄລ​ແຫ່ງ​ຊາດ (ມຊ) ໂດຍ​ມີ ທ່ານ ວິລະ​ວັນ ບຸນ​ສຸ​ໄທ ຫົວໜ້າ​ກົມ​ພະລະ ແລະ ສິລະ​ປະການ​ສຶກສາ ກະຊວງ ສສກ, ທ່ານ ຂັນໄຊ ກຽດ​ສີ​ທະ​ນາ​ກອນ ປະທານ​ກຸ່ມ​ບໍລິສັດ ນິວ​ຈິບ​ເຊັງ ຈຳກັດ, ທ່ານ ສະເໜີ ຈຸນ​ລະ​ມະນີ ຮອງ​ປະທານ​ບໍລິສັດ ນິວ​ຈິບ​ເຊັງ ຈຳກັດ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
  ທ່ານ ວິລະ​ວັນ ບຸນ​ສຸ​ໄທ ຫົວໜ້າ​ກົມ​ພະລະ ແລະ ສິລະ​ປະການ​ສຶກສາ ກ່າວ​ວ່າ: ໂດຍ​ເຫັນ​ໄດ້​ຄວາມ​ສຳຄັນ​ຂອງ​ວຽກ​ງານ​ສຶກສາ​ທິ​ການ ແລະ ກິລາ ບໍລິສັດ ນິວ​ຈິບ​ເຊັງ ຈຳກັດ ຈຶ່ງ​ໄດ້​ຮ່ວມ​ມື​ກັບ​ພວກ​ເຮົາ ເພື່ອ​ນຳ​ເອົາ​ກິລາ​ດັ່ງກ່າວ ເຂົ້າ​ມາ​ຈັດການ​ແຂ່ງຂັນ​ໃນ​ນະຄອນຫຼວງ ເພື່ອ​ສ້າງ​ຈິດ​ສຳນຶກ​ໃຫ້​ນັກຮຽນ​ມີ​ຄວາມ​ສາມັກຄີ ຮູ້ຈັກ​ອະໄພ​ຊ່ວຍເຫຼືອ​ຊຶ່ງ​ກັນ ແລະ ກັນ ພ້ອມ​ທັງ​ມີ​ສຸຂະພາບ​ແຂງແຮງ ແລະ ຫ່າງ​ໄກ​ຈາກ​ສິ່ງ​ເສບ​ຕິດ ຊຶ່ງ​ກິດຈະກຳ​ດັ່ງກ່າວ​ເລີ່ມ​ມາ​ແຕ່​ສົກຮຽນ​ປີ 2015-2016 ເປັນຕົ້ນ​ມາ ໂດຍ​ຄັ້ງ​ທຳອິດ​ມີ​ພຽງ 14 ທີມ ແລະ ມີ​ນັກ​ກິລາ 490 ຄົນ​ເຂົ້າ​ຮ່ວມ ຈາກ​ນັ້ນ​ມາ​ກໍ​ໄດ້​ມີ​ການ​ຂະຫຍາຍຕົວ​ຂຶ້ນ​ມາ​ເລື້ອຍໆ ສະເພາະ​ໃນ​ສົກຮຽນ 2019-2020 ນີ້ ມີ​ທີ​ມ​ໂຮງຮຽນ​ປະຖົມ​ຈາກ 9 ຕົວ​ໃນ ນວ 27 ທີມ ແລະ ມີ​ນັກ​ກິລາ​ທັງ​ໝົດ 945 ຄົນ​ເຂົ້າ​ຮ່ວມ.
  ນອກ​ນັ້ນ ໄລຍະ​ຜ່ານ​ມາ​ກິລາ​ດັ່ງກ່າວ​ ຍັງ​ໄດ້​ມີ​ຂະຫຍາຍ​ອອກ​ໄປ​ຕ່າງ​ແຂວງເຊັ່ນ: ຫຼວງ​ພະ​ບາງ, ​ຄຳ​ມ່ວນ ແລະ ຈຳປາ​ສັກ ໃນ​ສົກຮຽນ 2019-2020 ລວມ​ທັງ​ໝົດ 1.645 ຄົນ ຊຶ່ງ​ໄດ້​ຮັບ​ການ​ສະໜັບສະໜູນ​ທາງ​ດ້ານ​ອຸປະກອນ​ຮັບ​ໃຊ້ ແລະ ຄ່າ​ໃຊ້​ຈ່າຍ​ຕ່າງໆ​ຈາກ ບໍລິສັດ ນິວ​ຈິບ​ເຊັງ ຈຳກັດ ແລະ ຮ້ານ​ສາຂາ​ຮອນ​ດ້າ ພາຍ​ໃນ​ນະຄອນຫຼວງ ແລະ ຕ່າງ​ແຂວງ​ອີກ​ດ້ວຍ.
  ສຳລັບ​ຜົນ​ການ​ແຂ່ງ​ຂັນ​ກິລາ​ຄັ້ງ​ນີ້ ຊະນະ​ເລີດ​ໄດ້ແກ່​ທີ​ມ​ໂຮງຮຽນ ມສ ດອນ​ສະຫວ່າງ ເມືອງ​ຫາດ​ຊາຍ​ຟອງ ສາມາດ​ຮັກສາ​ເວລາ​ໄດ້​ດີ​ທີ່​ສຸດ 9,32 ວິນາທີ ໄດ້​ຮັບ​ຂັນ​ແຊັມ ພ້ອມ​ເງິນ​ລາງວັນ 6 ລ້ານ​ກີບ ອັນ​ດັບ 2 ທີ​ມ​ໂຮງຮຽນ ມສ ຈັນ​ສະຫວ່າງ ຈາກ​ເມືອງ​ສີ​ໂຄດ​ຕະບອງ ໄດ້​ຮັບ​ຂັນ ພ້ອມ​ເງິນ​ລາງວັນ 4 ລ້ານ​ກີບ ແລະ ອັນ​ດັບ 3 ທີ​ມ​ໂຮງຮຽນ ມສ ໄຜ່​ລ້ອມ ຈາກ​ເມືອງ​ໄຊ​ທານີ ໄດ້​ຮັບຂັນ​ພ້ອມ​ເງິນ​ລາງວັນ 3 ລ້ານ​ກີບ. 
(ຂ່າວ: ວົງຈອນກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110