ຫົວ​ຂໍ້ : ມອບເງິນລາງວັນ 800 ລ້ານກວ່າກີບ ໃຫ້ນັກກິລາທີ່ສ້າງຜົນງານຍາດໄດ້ຫຼຽນໃນຊີເກມ 2019

ເຜີຍ​ແຜ່​ໂດຍ​: ທ່ານ ສ.ຜາບມີໄຊ ເວ​ລາ: 02/03/2020 10:24:51 ຈຳ​ນວນ​ຜູ້​ເຂົ້າ​ຢ້ຽມ​ຊົມ 717 ຄັ້ງ

  ພິທີ​ສະຫຼຸບ​ຜົນສຳເລັດ ແລະ ມອບ​ເງິນ​ລາງວັນ ໃຫ້​ແກ່​ຄູ​ເຝິກ ແລະ ນັກ​ກິລາ​ລາວ ທີ່​ຍາດ​ຫຼຽນ​ໃນ​ງານ​ມະ​ຫະ​ກຳ​ກິລາ​ຊີເກມ ຄັ້ງ​ທີ 30 ທີ່ປະເທດ​ຟິ​ລິບ​ປິນ ໃນ​ປີ 2019 ຜ່ານ​ມາ ໄດ້​ຈັດ​ຂຶ້ນ​ເມື່ອ​ບໍ່​ດົນ​ມານີ້ ຢູ່​ຫ້ອງ​ປະຊຸມ ຄະນະ​ກຳມະການ​ໂອ​ແລ​ມ​ປິກ​ແຫ່ງ​ຊາດ​ລາວ (ຄອລ) ໃຫ້​ກຽດ​ເປັນ​ປະທານ ແລະ ມອບ​ເງິນ​ລາງວັນ​ໂດຍ ທ່ານ​ນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິ​ການ ແລະ ກິລາ ປະທານ ຄອລ .
  ທ່ານ ແສງ​ພອນ ພົນ​ອາມາດ ຫົວໜ້າ​ກົມ​ກິລາ​ລະດັບ​ສູງ ກະຊວງ​ສຶກສາ​ທິ​ການ ແລະ ກິລາ ຂຶ້ນ​ລາຍ​ງານ​ວ່າ: ງານ​ມະ​ຫະ​ກຳ​ກິລາ​ຊີເກມ ຄັ້ງ​ທີ 30 ທີ່​ປະເທດ​ຟີ​ລິບ​ປິນ ເປັນ​ເຈົ້າພາບ  ໄດ້​ຈັດ​ຂຶ້ນ​ໃນ​ລະຫວ່າງ​ວັນ​ທີ 30 ພະຈິກ - 12 ທັນວາ 2019  ຊຶ່ງ​ມີ​ການ​ຊີງ​ໄຊ​ກັນ 56 ປະເພດ​ກິລາ ແລະ ຊີງ​ຫຼຽນ​ຄຳ 530 ລາຍການ ສະເພາະ ສປປ ລາວ ໄດ້​ສົ່ງ​ຄະນະ​ນຳ ຄູ​ຝຶກ ແລະ ນັກ​ກິລາ ເຂົ້າ​ຮ່ວມ​ທັງ​ໝົດ 370 ຄົນ​ຈາກ 25 ປະເພດ​ກິລາ ໂດຍ​ວາງ​ເປົ້າ​ໝາຍ​ຍາດ​ໃຫ້​ໄດ້ 2 ຫຼຽນ​ຄຳ.
  ຜ່ານ​ການ​ແຂ່ງຂັນ​ຕົວ​ຈິງ​ປະກົດ​ວ່າ: ທີ​ມ​ນັກ​ກິລາ​ລາວ ສາມາດ​ຍາດ​ໄດ້ 1 ຫຼຽນ​ຄຳ, 5 ຫຼຽນ​ເງິນ ແລະ 29 ຫຼຽນ​ທອງ (ຈາກ 14 ປະເພດ​ກິລາ) ຈັດ​ຢູ່​ອັນ​ດັບ​ທີ 10 ຈາກ 11 ປະເທດ​ເຂົ້າ​ຮ່ວມ ໂດຍ​ຫຼຽນ​ຄຳ​ໄດ້​ຈາກ ທ້າວ ສຸ​ກັນ ໄຕ​ປັນຍາ​ວົງ ນັກ​ກິລາ​ຄິກ​ບັອກ​ຊິງ, 5 ຫຼຽນ​ເງິນ​ໄດ້​ຈາກ ຢູ​ໂດ 2 ຫຼຽນ, ມວຍ 1 ຫຼຽນ, ລົດຖີບ 1 ຫຼຽນ ແລະ ເປ​ຕັງ 1 ຫຼຽນ, 29 ຫຼຽນ​ເງິນ​ໄດ້​ຈາກ ຄິກ​ບັອກ​ຊິງ 3 ຫຼຽນ, ຢູ​ໂດ 1 ຫຼຽນ, ເປ​ຕັງ 3 ຫຼຽນ, ມວຍ 2 ຫຼຽນ, ປັນ​ຈັກ​ສີ​ລັດ 3 ຫຼຽນ, ວູ​ຊູ 3 ຫຼຽນ, ມວຍ​ປ້ຳ 3 ຫຼຽນ, ກະຕໍ້ 2 ຫຼຽນ, ເທ​ຄວັນ​ໂດ 2 ຫຼຽນ, ຄາ​ຣາ​ເຕ​ໂດ 2 ຫຼຽນ, ຜ່ານ​ສິ່ງ​ກີດຂວາງ 2 ຫຼຽນ, ແລ່ນ​-​ລານ 1 ຫຼຽນ, ສະນຸກ​ເກີ 1 ຫຼຽນ ແລະ ຊ໊ອບ​ເທັນ​ນິສ 1 ຫຼຽນ.
  ທ່ານ ສິງ​ຄຳ ນາ​ລິນ ຮອງ​ຫົວ ໜ້າ​ກົມ​ກິລາ​ລະດັບ​ສູງ ກ່າວ​ວ່າ: ເພື່ອ​ເປັນ​ການ​ຍ້ອງຍໍ​ສັນລະເສີນ ແລະ ຊົມເຊີຍຕໍ່​ຄູ​ຝຶກ ແລະ ນັກ​ກິລາ ທີ່​ມີ​ຄຸນງາມຄວາມດີ​ໃນ​ການ​ສ້າງ​ຜົນງານ​ອັນ​ດີເດັ່ນ​ມາ​ໃຫ້​ປະເທດ​ຊາດ ໃນ​ການ​ເຂົ້າ​ຮ່ວມ​ການ​ແຂ່ງຂັນ​ງານ​ມະ​ຫະ​ກຳ​ກິລາ​ຊີເກມ ຄັ້ງ​ທີ 30 ທີ່​ສາມາດ​ຍາດ​ໄດ້​ຫຼຽນ​ຄຳ, ຫຼຽນ​ເງິນ ແລະ ຫຼຽນ​ທອງ ດັ່ງນັ້ນ​ລັດຖະບານ​ແຫ່ງ ສປປ ລາວ ໄດ້​ອະນຸມັດ​ເງິນ​ຈຳນວນ 652.980.000 ກີບ ແລະ ບໍລິສັດ ລາວ​ໂທລະ​ຄົມ ມະ​ນາ​ຄົມ ມະຫາຊົນ ຍັງ​ໄດ້​ມອບ​ເງິນ​ສຳລັບ​ຫຼຽນ​ຄຳ 10 ລ້ານ​ກີບ, ຫຼຽນ​ເງິນ 6 ລ້ານ ແລະ ຫຼຽນ​ທອງ 3 ລ້ານ ລວມ​ທັງ​ໝົດ​ເປັນ​ເງິນ 127 ລ້ານ​ກີບ , ບໍລິສັດ​ເບຍ​ລາວ ມອບ​ເງິນ​ລວມ​ທັງ​ໝົດ 49 ລ້ານກີບ ແບ່ງ​ເປັນ ຫຼຽນ​ຄຳ 5 ລ້ານ​ກີບ, ຫຼຽນ​ເງິນ​ຫຼຽນ​ລະ 3 ລ້ານ​ກີບ ແລະ ຫຼຽນ​ທອງ ຫຼຽນ​ລະ 1 ລ້ານ​ກີບ ລວມ​ຈຳນວນ​ເງິນ​ທັງ​ໝົດ 828.980.000 ກີບ.
(ຂ່າວ: ວົງຈອນກິລາ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110