ຫົວ​ຂໍ້ : ລັດຖະມົນຕີກະຊວງ ຍທຂ ເຂົ້າຮ່ວມກອງປະຊຸມປະຈຳປີ ຄັ້ງທີ 82 ຂອງຄະນະກຳມາທິການຂົນສົ່ງທາງບົກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 03/03/2020 09:28:23 ຈຳ​ນວນ​ຜູ້​ເຂົ້າ​ຢ້ຽມ​ຊົມ 599 ຄັ້ງ

  ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ), ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປະ ຈຳປີ ຄັ້ງທີ 82 ຂອງຄະນະກໍາມາທິການຂົນສົ່ງທາງບົກ (Inland Transport Committee “ITC”) ອົງການສະຫະປະຊາຊາດ ປະຈໍາ ເອີຣົບ (UNECE) ທີ່ເຊີແນວ ປະເທດສະວິດ, ໃນລະຫວ່າງວັນທີ 23-29 ກຸມພາ 2020ຜ່ານມານີ້.
  ກອງປະຊຸມຄັ້ງນີ້, ໄດ້ແບ່ງອອກເປັນ 3 ພາກຄື: ພາກທີ 1 ສໍາມະນາຍ່ອຍໃນ 2 ຫົວຂໍ້: ພາຫະນະມືສອງ “ນໍາໃຊ້ແລ້ວ” ແລະ ຄວາມປອດໄພທາງຫຼວງ, ພາກທີ 2: ກອງປະຊຸມລະດັບ ລັດຖະມົນຕີຂອງຄະນະກໍາມາທິການຂົນສົ່ງທາງບົກພາຍ ໃຕ້ຫົວຂໍ້ “ຄວາມທ້າທ້າຍດ້ານສິ່ງແວດລ້ອມຂອງການຂົນສົ່ງແບບຍືນຍົງ” ແລະ ພາກທີ 3: ກອງປະຊຸມສາມັນປະຈໍາປີ.
  ໃນກອງປະຊຸມຍັງໄດ້ພິຈາລະນາຮັບຮອງເອົາຖະແຫຼງການທີ່ມີຊື່ວ່າ: “ເພີ່ມທະວີທາງເລືອກໃນການຂົນສົ່ງແບບຍືນຍົງເພື່ອຮັບມືກັບສິ່ງທ້າທາຍດ້ານສະພາບດິນຟ້າອາກາດ ແລະ ສິ່ງແວດລ້ອມໂລກ ໂດຍ ການຮ່ວມມືກັນ ຈັດຕັ້ງປະຕິ ບັດ” (Enhancing Sustainable Inland Transport Solutions to Global Climate and Environmental Challenges -A United Call to Action-); ອົງການ UNECE ໄດ້ແຈ້ງຂ່າວໃຫ້ ສປປ ລາວ ຊາບວ່າ: “ພາຍຫຼັງ ທີ່ຄະນະຜູ້ແທນກະຊວງ ຍທຂ ໄດ້ພົບປະກັບທ່ານ ນາງ  Olga Algayerova  ເລຂາທິການ ໃຫຍ່  UNECE ແລະ ທ່ານ Jean Todt ທູດພິເສດ  UN ດ້ານຄວາມປອດໄພທາງຫຼວງ ໃນກອງປະຊຸມປີ 2019. ໃນນີ້, ກະຊວງ ຍທຂ ໄດ້ສົ່ງບົດສະເໜີ 3 ໂຄງການ ເພື່ອຂໍທຶນຊ່ວຍ ເຫຼືອຈາກກອງທຶນຄວາມປອດ ໄພ ອົງການ ສປຊ (United Nations Road Safety Fund “UNRSF”). ຜ່ານການພິຈາລະນາ ຂອງ UNRSF ໄດ້ເຫັນດີໃຫ້ທຶນ ຊ່ວຍເຫຼືອ 1 ໂຄງການ ມູນ ຄ່າ 570.000 ໂດ​ລາ ເພື່ອ ປັບປຸງລະບົບການຄຸ້ມຄອງ ການຂັບຂີ່ ຢູ່ ສປປ ລາວ, ຊຶ່ງເປັນໂຄງການທີ່ໄດ້ຄະ ແນນອັນດັບ 1 ຂອງໂລກ ໃນ 10 ໂຄງການ ແລະ ຈະສືບຕໍ່ພິຈາລະນາໃຫ້ການຊ່ວຍເຫຼືອຕື່ມ 2 ໂຄງການທີ່ຍັງເຫຼືອ”.
  ສປປ ລາວ ໄດ້ຂຶ້ນປະ ກອບຄຳເຫັນຕໍ່ກອງປະຊຸມຢູ່ ໃນວາລະທີ 3: ການຮ່ວມມື ສາກົນ ເພື່ອຊອກຫາວິທີ ການແກ້ໄຂບັນຫາສິ່ງແວດ ລ້ອມ  ແລະ  ບົດບາດຂອງກຳມາ ທິການຂົນສົ່ງທາງບົກ ໃນລະ ດັບເວທີຂອງອົງການ ສປຊ (Session III: International cooperation for climate and environment solutions and the role of the ITC as the United Nations Platform for Inland Transport) ໂດຍ ການສະເໜີຮ່າງຍຸດທະສາດ ການເຕີບໂຕສີຂຽວ ຂອງ ສປປ ລາວໂດຍລວມ ຊຶ່ງສະຖາບັນ ເຕີບໂຕສີຂຽວສາກົນ (Global Green Growth Institute “GGGI”) ໃຫ້ການຊ່ວຍເຫຼືອ, ໄດ້ລົງເລິກບັນຫາທີ່ພົວພັນກັບຂະແໜງ ຄົມມະນາຄົມ-ຂົນສົ່ງ ທີ່ກະຊວງ  ຍທຂ  ໄດ້ວາງວິໄສ ທັດ 2030 ແລະ ແຜນການ 5 ປີ ມີບັນດາໜ້າວຽກຕົ້ນຕໍດັ່ງນີ້: ສ້າງໂຄງລ່າງພື້ນຖານທີ່ທົນທານຕໍ່ສິ່ງແວດລ້ອມ; ຫຼຸດ ຜ່ອນຜົນກະທົບຕໍ່ສັງຄົມ-ສິ່ງແວດລ້ອມທຳມະຊາດ ທີ່ ເກີດຈາກການກໍ່ສ້າງ, ຫຼຸດ ຜ່ອນມົນລະພິດ ແລະ ອາຍ ພິດເຮືອນແກ້ວ ຈາກການສົ່ງ ເສີມການໃຫ້ນຳໃຊ້ການຂົນ ສົ່ງສາທາລະນະໃນຕົວເມືອງ ແລະ ການນຳໃຊ້ຍານພາຫະ  ນະ ໂດຍນຳໃຊ້ພະລັງງານ ສະອາດເຊັ່ນ: ລົດໄຟຟ້າ; ຫຼຸດຜ່ອນການຈະລາຈອນ ແອອັດ; ສົ່ງເສີມການທ່ອງ ທ່ຽວ ແລະ ການຂົນສົ່ງສະ ອາດ ເຂົ້າໃນການທ່ອງທ່ຽວ ແລະ ສ້າງພື້ນຖານໂຄງລ່າງ ທີ່ປອດໄພ ແລະ ສະດວກສະ ບາຍ ໃຫ້ສັງຄົມ. ຮັບຮອງ ເອົາຖະແຫຼງການ” ເພີ່ມທະ ວີທາງເລືອກໃນການຂົນສົ່ງ ແບບຍືນຍົງ ເພື່ອຮັບມືກັບສິ່ງ ທ້າທາຍດ້ານດິນຟ້າອາກາດ ແລະ ສິ່ງແວດລ້ອມໂລກ ໂດຍ ການຮ່ວມມືກັນຈັດຕັ້ງປະ ຕິບັດ”.
(ຂ່າວ-ພາບ: ຍທຂ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110