ຫົວ​ຂໍ້ : ບູນກາຣີ ພົບກັບບັນຫາການຫຼຸດລົງຂອງປະຊາກອນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 03/03/2020 09:37:29 ຈຳ​ນວນ​ຜູ້​ເຂົ້າ​ຢ້ຽມ​ຊົມ 161 ຄັ້ງ

(ເນື່ອງ​ໃນ​ໂອກາດ​ວັນຊາດ ສ.ບູນ​ກາ​ຣີ 3 ມີນາ 2020)

   ຮຽບຮຽງ: ລຸ້ງ​ດາວ ບຸນ​ມີ

  ສາທາລະນະ​ລັດ ບູນ​ກາ​ຣີ ຕັ້ງ​ຢູ່​ທາງ​ທິດຕາເວັນອອກ​ສ່ຽງ​ໃຕ້​ຂອງ​ທະວີບ​ເອີ​ຣົບ, ທາງ​ທິດຕາເວັນອອກ​ຂອງ​ເຂດ​ສະ​ມຸດ​ບອນ​ຂານ, ມີ​ຊາຍ​ແດນ​ຕິດ​ກັບ 5 ປະເທດ​ເຊັ່ນ: ຕິດ​ກັບ ປະເທດ​ຣູ​ມາ​ນີ ທາງ​ດ້ານ​ເໜືອ, ຕິດ​ກັບ​ແຊກ​ບີ ແລະ ມາ​ເຊ​ໂດ​ນີ ທາງ​ດ້ານ​ຕາເວັນຕົກ, ຕິດ​ກັບ​ປະເທດເກຣັກ ແລະ ຕວກ​ກີ​ທາງ​ດ້ານ​ໃຕ້, ສ່ວນ​ດ້ານ​ຕາເວັນ​ອອກ ຕິດ​ກັບ​ທະເລ​ດຳ. ສະພາບ​ພູມ​ປະເທດ​ສ່ວນ​ໃຫຍ່​ເປັນ​ພູ ແລະ ມີ​ບ່ອນ​ຮາບ​ຕໍ່າ​ຢູ່​ທາງ​ຕອນ​ເໜືອ ແລະ ຕາເວັນ​ອອກ​ສ່ຽງ​ໃຕ້​ຂອງ​ປະ​ເທດ. ມີ​ສະພາບ​ອາກາດ​ເຢັນ​ຊຸ່ມ​ໃນ​ລະດູ​ໜາວ ແລະ ລະດູ​ຮ້ອນ​ແມ່ນ​ອາກາດ​ຮ້ອນ​ແຮງ, ມີ​ເນື້ອທີ່​ທັງ​ໝົດ 110.993,6 ກິໂລ​ຕາ​ແມັດ,  ນະຄອນຫຼວງ​ຂອງ​ປະເທດ​ແມ່ນ ໂຊ​ເຟຍ.     
  ບູນ​ກາ​ຣີ ແມ່ນ​ປະເທດ​ເສດຖະກິດ​ການ​ຕະຫຼາດ​ແບບ​ເສລີ, ເປັນ​ປະເທດ​ເສດຖະກິດ​ຈະເລີນ​ໃໝ່. ທະນາຄານ​ໂລກ​ໄດ້​ຈັດ​ໃຫ້ ບູນ​ກາ​ຣີ ເປັນ​ປະເທດ​ທີ່​ມີ​ລາຍ​ໄດ້​ສູງ​ກວ່າ​ປານ​ກາງ. ເຖິງ​ວ່າ​ເສດຖະກິດ​ໃນ​ໄລຍະ​ບໍ່​ເທົ່າໃດ​ປີ​ມາ​ນີ້​ມີ​ການ​ຂະຫຍາຍຕົວ​ໄວ, ແຕ່​ກໍຍັງ​ຖືກ​ຈັດ​ຢູ່​ໃນ​ບັນດາ​ປະເທດ​ລາຍ​ຮັບ​ຕ່ຳ ໃນ​ປະເທດ​ສະມາຊິກ​ສະຫະພາບ​ເອີ​ຣົບ. ເປັນ​ປະເທດ​ໃນ​ເອີ​ຣົບ​ຕາເວັນ​ອອກ ທີ່​ມີ​ປະສິດທິພາບ​ທາງ​ເສດຖະກິດ​ທີ່​ມີຄ່າ​ຈ້າງ​ແຮງ​ງານ​ຖືກ, ປະຊາ ກອນ​ມີ​ການ​ສຶກສາ​ສູງ ແລະ ເວົ້າ​ໄດ້​ຫຼາຍ​ພາສາ, ປະກອບ​ກັບ​ມີ​ອານາເຂດ​ຕິດຕໍ່​ກັບ​ຫຼາຍ​ປະເທດ​ເຊັ່ນ: ຣູ​ມາ​ນີ, ແຊັກ​ບີ, ມອນ​ເຕ​ເນ​ໂກຣ, ມາ​ເຊ​ໂດ​ນີ, ເກຣັກ ແລະ ຕວກ​ກີ. ບຸນ​ກາ ຣີ ຈຶ່ງ​ສາມາດ​ເປັນ​ປະຕູ​ການ​ຄ້າ​ສູ່​ປະເທດ​ອື່ນໆ ໃນ​ເຂດ​ສະ​ມຸດ​ບອນ​ຂານ ໂດຍ​ສະເພາະ ປະເທດ​ທີ່​ບໍ່​ມີ​ທາງ​ອອກ​ສູ່​ທະເລ​ເຊັ່ນ: ມາ​ເຊ​ໂດ​ນີ, ແຊັກ​ບີ ແລະ ມອນ​ເຕ​ເນ​ໂກ​ຣ. ນອກຈາກ​ນີ້, ບູນ​ກາ​ຣີ ຍັງ​ມີ​ຊັບພະຍາກອນ​ເປັນ​ຈຳນວນ​ຫຼວງຫຼາຍ​ເຊັ່ນ: ບ໊ອກ​ໄຊ, ທອງແດງ, ກົ່ວ, ຖ່ານ​ຫີນ, ແຮ່​ເຫຼັກ, ໂຄ​ຣ​ນຽມ, ແມັງ​ກາ ​ແ​ນັສ, ທອງແດງ ແລະ ໄມ້  ຊຶ່ງ​ຖ້າ​ໄດ້​ຮັບ​ການ​ພັດທະນາ  ແລະ ນຳ​ມາ​ໃຊ້​ຈະ​ເປັນ​ປະໂຫຍດຕໍ່​ອຸດສາຫະກຳ​ດີ​ທີ່​ສຸດ.
  ພາກ​ທຸລະ​ກິດ​ທີ່​ເປັນ​ສ່ວນ​ສຳຄັນ​ໃນ​ເສດຖະກິດ​ຂອງ​ປະເທດ​ແມ່ນ ຂະແໜງການ​ບໍລິການ​ເຊັ່ນ: ການ​ຂົນສົ່ງ, ການ​ເງິນ, ທຸລະ​ກິດ​ເອກະ​ຊົນ​ກວມ​ເອົາ 67,7% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ ຫຼື GDP. ສ່ວນ​ຂະແໜງ​ອຸດ​ສາ​ຫະ​ກໍາ: ທຸລະ​ກິດ​ບໍ່​ແຮ່, ການ​ຜະລິດ​ພະລັງງານ, ການ​ກໍ່ສ້າງ​ກວມ​ເອົາ 28% ຂອງ GDP. ຂະແໜງ​ກະ​ສິ​ກໍາ: ການ​ປະມົງ, ກະສິກຳ ກວມ​ເອົາ 4,3% ຂອງ GDP. ແຕ່​ບັນ​ຫາ​ສໍາ​ຄັນ​ທີ່​ອາດ​ຈະ​ສົ່ງ​ຜົນ​ກະທົບ​ຕໍ່​ການ​ຂະຫຍາຍຕົວ​ຂອງ​ເສດຖະກິດບູນ​ກາ​ຣີ ໃນ​ອະນາຄົດ ໂດຍ​ສະເພາະ ການ​ຫຼຸດ​ລົງ​ຂອງ​ປະຊາກອນ ເນື່ອງ​ຈາກ​ຈຳນວນ​ເດັກ​ເກີດ​ໃໝ່​ຂອງ ບູນ​ກາ​ຣີ ມີ​ທ່າ​ອ່ຽງ​ຫຼຸດ​ລົງ​ຢ່າງ​ຕໍ່​ເນື່ອງ. ໃນ​ປີ 1990, ຈຳນວນ​ເດັກ​ເກີດ​ໃໝ່ 105.180 ຄົນ, ປີ 2005 ຈຳນວນ​ເດັກ​ເກີດ​ໃໝ່ 71.075 ຄົນ ແລະ ໃນ​ປີ 2017 ຈຳນວນ​ເດັກ​ເກີດ​ໃໝ່ 63.955 ຄົນ. ແຕ່​ສິ່ງ​ນີ້​ອາດ​ຈະ​ບໍ່ຮຸນ​ແຮງ ຖ້າ​ທຽບໃສ່​ໃນ​ອະນາຄົດ​ທີ່​ກໍາ​ລັງ​ຈະ​ເກີດ​ຂຶ້ນ. ອົງການ​ສະຫະ​ປະຊາຊາດ​ຄາດ​ຄະເນ​ວ່າ: ພາຍ​ໃນ​ປີ 2050 ຈຳນວນ​ປະຊາກອນ ບູນ​ກາ​ຣີ ຈະ​ຫຼຸດ​ລົງ​ຕື່ມ​ອີກ​ເປັນ 5,4 ລ້ານ​ຄົນ. ຮອດ​ປີ 2100, ໂຕ​ເລກ​ດັ່ງກ່າວ​ຈະ​ຫຼຸດ​ລົງ​ເຫຼືອ​ພຽງ 3,5 ລ້ານ​ຄົນ. ບັນຫາ​ດັ່ງກ່າວ ແມ່ນ​ເກີດ​ຂຶ້ນ​ໃນລະຫວ່າງ ປີ 1990 ທີ່​ປະເທດ​ປະສົບ​ກັບ​ວິ​ກິດ​ການ​ດ້ານ​ເສດ​ຖະ​ກິດ. ຍ້ອນ​ວ່າ​ປະຊາຊົນ​ໃນ​ເອີ​ຣົບ ມີ​ການ​ເຄື່ອນ​ຍ້າຍ​ປະຊາກອນ​ໄດ້​ງ່າຍ​ສຳລັບ​ຜູ້​ທີ່​ຕ້ອງການ​ຢາກ​ຈະ​ອົບພະຍົບ​ອອກ​ຈາກ​ປະເທດ ແລະ ມີ​ປະຊາກອນ​ອົບພະຍົບ​ອອກ​ຈາກ​ປະເທດ​ພາຍຫຼັງ​ເກີດ​ວິ​ກິດ​ເສດຖະກິດ​ເຖິງ 1 ລ້ານ​ຄົນ. 
  ນອກຈາກ​ນີ້, ບູນ​ກາ​ຣີ ຍັງ​ມີ​ອັດຕາ​ການ​ເກີດ​ຕໍ່າ ໂດຍ​ສະເລ່ຍ​ແລ້ວ​ຈະ​ມີ​ອັດຕາ​ການ​ເກີດ 1,43 ຄົນ​ຕໍ່​ແມ່ຍິງ 1 ຄົນ ຊຶ່ງ​ຖື​ວ່າ​ມີ​ອັດຕາ​ການ​ເກີດ​ທີ່​ຕໍ່າ​ກວ່າ​ປະເທດ​ອື່ນໆ​ໃນ​ເອີ​ຣົບ. ໃນ​ຂະນະ​ດຽວ​ກັນ ບູນກາ ​ຣີ ກໍ​ປະສົບ​ກັບ​ບັນຫາ​ການ​ຂາດເຂີນ​ບຸກ​ຄະລາ​ກອນ ທີ່ເຮັດ​ ວຽກ​ດ້ານ​ການ​ແພດ, ເຮັດ​ໃຫ້​ປະຊາກອນ​ຕ້ອງ​ເດີນທາງ​ໄປ​ປິ່ນປົວ​ຢູ່​ຕ່າງປະເທດ ແລະ ການ​ຫຼຸດ​ລົງ​ຂອງ​ປະຊາກອນ ກໍ​ກຳລັງ​ສ້າງ​ບັນຫາ​ໃຫ້​ກັບ​ພາກ​ທຸລະ​ກິດ ເນື່ອງ​ຈາກ​ຂາດ​ແຮງ​ງານ​ທີ່​ມີ​ທັກ​ສະ​ເຮັດ​ໃຫ້​ລັດຖະບານ​ຕ້ອງ​ອອກ​ມາດ​ຕະ ການ​ດຶງ​ດູດ​ແຮງ​ງານ​ຕ່າງ​ຊາດ​ໃຫ້​ເຂົ້າ​ມາ​ປະເທດ​ຫຼາຍ​ຂຶ້ນ ເຊັ່ນ​ດຽວ​ກັບ​ຍີ່ປຸ່ນ, ກາ​ນາ​ດາ ແລະ ອີກ​ຫຼາຍ​ປະເທດ ທີ່​ໃຊ້​ວິທີ​ນີ້ ເພື່ອ​ແກ້​ບັນຫາ​ການ​ຫຼຸດ​ລົງ​ຂອງ​ປະຊາກອນ ໃນ​ປະ​ເທດ.
  ສປປ ລາວ ແລະ ສ.ບູນ​ກາ​ຣີ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 14 ຕຸລາ ປີ 1962.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110