ຫົວ​ຂໍ້ : ມອບເຂົ້າພັນກວ່າໂຕນ ໃຫ້ຜູ້ປະສົບໄພຢູ່ແຂວງສະຫວັນນະເຂດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 03/03/2020 09:45:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 490 ຄັ້ງ

   ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ໄດ້​ນຳ​ເອົາ​ເຂົ້າ​ຈຳນວນ 1.108 ໂຕນ, ມູນ​ຄ່າ​ເກືອບ 10 ຕື້​ກີບ​ໄປ​ມອບ​ໃຫ້​ຜູ້​ປະສົບ​ໄພພິບັດ​ນ້ຳ​ຖ້ວມ​ໃນ​ປີ 2019 ຢູ່​ແຂວງ​ສະຫວັນ​ນະ​ເຂດ​ພິທີ.
   ພິທີ​ມອບ​-​ຮັບ​ເຂົ້າ​ຊ່ວຍ ເຫຼືອ​ດັ່ງກ່າວ ໄດ້​ຈັດ​ຂຶ້ນ​ໃນ​ທ້າຍ​ອາທິດ​ຜ່ານ​ມາ ທີ່​ແຂວງ​ສະຫວັນ​ນະ​ເຂດ ກ່າວ​ມອບ​ໂດຍ ທ່ານ​ນາງ ໃບ​ຄຳ ຂັດຕິຍະ ແລະ ກ່າວ​ຮັບ​ໂດຍ ທ່ານ ໂພ​ໄຊ ໄຊ​ຍະ​ສອນ, ຈາກ​ນັ້ນ ກໍ​ໄດ້​ມອບ​ຕໍ່ໃຫ້​ບັນດາ​ເມືອງ​ທີ່​ໄດ້​ຮັບ​ຜົນ​ກະທົບ ຈາກ​ໄພພິບັດ​ປີ 2019, ໃນ​ນັ້ນ ປະກອບ​ດ້ວຍ: ເມືອງ​ໄຊ​ບູ​ລີ 85 ໂຕນ, ເມືອງ​ສອງ​ຄອນ 120 ໂຕນ, ເມືອງ​ຈຳ​ພອນ 130 ໂຕນ, ເມືອງ​ຊົນ​ນະ​ບູ​ລີ 80 ໂຕນ, ນະຄອນ​ໄກສອນ​ພົມວິຫານ 52 ໂຕນ (ແຮ​ໄວ້ 32 ໂຕນ), ເມືອງ​ອຸທຸມພອນ 20 ໂຕນ, ເມືອງ​ອາດ​ສະພັງ​ທອງ 20 ໂຕນ, ເມືອງ​ໄຊ​ພູ​ທອງ 20 ໂຕນ, ເມືອງ​ທ່າ​ປາງ​ທອງ 90 ໂຕນ, ເມືອງ​ວິລະ​ບູ​ລີ 110 ໂຕນ, ເມືອງ​ນອງ 110 ໂຕນ, ເມືອງ​ເຊ​ໂປນ 110 ໂຕນ, ເມືອງ​ພີນ 110 ໂຕນ, ເມືອງ​ພະ​ລານ​ໄຊ 20 ໂຕນ ແລະ​ເມືອງ​ອາດ​ສະ​ພອນ 30 ໂຕນ ຊຶ່ງ​ເຂົ້າ​ຈຳນວນ​ດັ່ງກ່າວ ທາງ​ເມືອງ ກໍ່​ຄື​ຫ້ອງການ​ທີ່​ກ່ຽວຂ້ອງ ຈະ​ໄດ້​ພ້ອມ​ກັນ​ແຈກ​ຢາຍ​ໃຫ້​ບັນດາ​ຄອບຄົວ ຜູ້​ທີ່​ໄດ້​ຮັບ​ຜົນ​ກະທົບ ຈາກ​ໄພພິບັດ​ໃນ​ໄລຍະ​ຜ່ານ​ມາ.
   ໂອກາດ​ດັ່ງກ່າວ ທ່ານ ນາງ ໃບ​ຄຳ ຂັດຕິຍະ ໄດ້​ເນັ້ນ​ໜັກ​ໃຫ້​ທຸກ​ພາກສ່ວນ ຈົ່ງ​ພ້ອມ​ກັນ​ເອົາໃຈໃສ່ ຊ່ວຍເຫຼືອ​ພໍ່​ແມ່​ປະຊາຊົນ ກໍ​ຄື​ຄອບຄົວ​ຜູ້​ທີ່​ໄດ້ຜົນ​ກະທົບ ໃນ​ການ ແຈກຢາຍ​ເຂົ້າ​ໃນ​ຄັ້ງ​ນີ້ ໃຫ້​ທົ່ວ​ເຖິງ​ທຸກ​ຄອບຄົວ, ເຖິງ​ແມ່ນ​ວ່າ​ຈະ​ບໍ່​ທ່ວງ​ທັນ​ກັບ​ສະພາບ ແຕ່​ການ​ນຳ​ພັກ​-​ລັດ ກໍ​ເປັນ​ຫ່ວງ ເປັນ​ໄຍ ຕໍ່​ຄອບຄົວ​ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ໄພພິບັດ​ໃນ​ປີ​ທີ່​ຜ່ານ​ມາ.
(ຂ່າວ: ແຂວງ​ສະຫວັນ​ນະ​ເຂດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110