ວິທະຍຸກະຈາຍສຽງຫວຽດນາມລາຍງານວ່າ: ໃນສະພາບຫິມະຕົກໜັກສືບຕໍ່ປົກຄຸມຫຼາຍເຂດຂອງ ຍີ່ປຸ່ນ ໃນວັນທີ 25 ມັງກອນ ຜ່ານມາ, ເຮັດໃຫ້ການສັນຈອນໄປມາແອອັດ, ມີເຮືອບິນນັບຮ້ອຍຖ້ຽວຈຳເປັນຕ້ອງຍົກເລີກ ແລະ ການເຄື່ອນໄຫວຂອງລົດໄຟກໍຖືກຕັດຂາດເຊັ່ນດຽວກັນ. ໃນວັນທີ 26 ມັງກອນ, ບັນດາເຂດ ຄື: ໂຮຄຸຣິຄຸ (ທາງພາກກາງ) ແລະ ຄັນໂຕ – ໂຄຊິນ (ທາງພາກຕາເວັນອອກ) ຂອງ ຍີ່ປຸ່ນ ຢັ້ງຢືນວ່າຈະມີປະລິມານຫິມະຕົກເພີ່ມຕື່ມອີກ, ດ້ວຍຄວາມໜາເຖິງ 70 ຫາ 90 ຊັງຕີແມັດ.

ສະມາຄົມວິທະຍຸ ແລະ ໂທລະພາບຍີ່ປຸ່ນ (NHK) ໃຫ້ຮູ້ວ່າ: ມີຜູ້ໂດຍສານປະມານ 3.000 ຄົນ ຖືກຕິດຄ້າງຢູ່ສະຖານີລົດໄຟ, ພາຍຫຼັງທີ່ເກີດຫິມະຕົກ ແລະ ລົມພັດແຮງ, ການບໍລິການຕ່າງໆຈຳເປັນຕ້ອງຢຸດເຄື່ອນໄຫວ. ສຳລັບບັນດາຖ້ຽວບິນຂອງບໍລິສັດສາຍການບິນ ຄື: ຍີ່ປຸ່ນ ແອລາຍ (Japan Airlines) ແລະ ອໍລ ນິປອນ ແອເວ (ANA) ກໍຕ້ອງຍົກເລີກຖ້ຽວບິນກວ່າ 300 ຖ້ຽວ ໃນວັນທີ 25 ມັງກອນ.