ວິທະຍຸກະຈາຍສຽງຫວຽດນາມລາຍງານວ່າ: ວັນທີ 25 ມັງກອນ ຜ່ານມາ, ຢູ່ນະຄອນຫຼວງພະນົມເປັນ, ທ່ານ ວົງໄຊ ວິສຸທ ລັດຖະມົນຕີຜູ້ປະຈຳການກະຊວງເສດຖະກິດ ແລະ ການເງິນ ກຳປູເຈຍ ໃຫ້ຮູ້ວ່າ: ຕາມການຕີລາຄາຫຼ້າສຸດ ແລະ ໄດ້ຮັບການອະນຸມັດຜ່ານຢ່າງເປັນທາງການໃນປີນີ້, ລະດັບການເຕີບໂຕຂອງພື້ນຖານເສດຖະກິດ ກຳປູເຈຍ ຄາດຄະເນວ່າຈະຢູ່ໃນລະດັບ 5,6%, ຕ່ຳກວ່າການຄາດຄະເນກ່ອນໜ້ານັ້ນ ແມ່ນ 6,6%.

ຂ່າວລະບຸວ່າ: ທ່ານ ວົງໄຊ ວິສຸທ ໃຫ້ຮູ້ວ່າ: ລະດັບເຕີບໂຕເສດຖະກິດຂອງ ກຳປູເຈຍ ໃນປີ 2023 ເມື່ອທຽບໃສ່ກັບປີ 2022 ແມ່ນເພີ່ມຂຶ້ນເລັກໜ້ອຍ, ຍ້ອນຂົງເຂດກະສິກຳ ໄດ້ຮັບການຟື້ນຟູດ້ວຍລະດັບການເຕີບໂຕປະມານ 1,1%. ຄວາມມຸ່ງຫວັງໃຫຍ່ຫຼວງທີ່ສຸດແມ່ນຂະແໜງການທ່ອງທ່ຽວ ເພາະວ່າຂະແໜງການນີ້ຢູ່ສອງປະເທດບ້ານໃກ້ເຮືອນຄຽງຂອງ ກຳປູເຈຍ ຄື: ໄທ ແລະ ຫວຽດນາມ ກຳລັງພັດທະນາຢ່າງແຂງແຮງ.

ກ່ອນໜ້ານັ້ນ, ທະນາຄານໂລກ ຄາດຄະເນວ່າ: ພື້ນຖານເສດຖະກິດຂອງ ກຳປູເຈຍ ກຳລັງຟື້ນຕົວໄດ້ດີ ແລະ ຄາດວ່າລະດັບການເຕີບໂຕຈະບັນລຸ 5,2% ໃນປີ 2023.