ຂ່າວຕ່າງປະເທດລາຍງານ ເມື່ອວັນທີ 26 ມັງກອນ ຜ່ານມາ, ບໍລິສັດ ເອອອນ (AON) ຊຶ່ງເປັນບໍລິສັດນາຍໜ້າປະກັນໄພ ໄດ້ປະເມີນການວ່າ ໄພພິບັດທາງທຳມະຊາດຕ່າງໆ ຊຶ່ງສ່ວນໃຫຍ່ເກີດຈາກການປ່ຽນແປງສະພາບອາກາດ ກໍ່ໃຫ້ເກີດຄວາມສູນເສຍທາງດ້ານເສດຖະກິດທົ່ວໂລກເຖິງ 313.000 ລ້ານໂດລາ ໃນປີ 2022 ຜ່ານມາ ຊຶ່ງຈຳນວນດັ່ງກ່າວໄດ້ເຮັດປະກັນໄວ້ນ້ອຍກວ່າເຄິ່ງໜຶ່ງ.

ການສູນເສຍຈາກໄພພິບັດທາງທຳມະຊາດທີ່ພາກສ່ວນປະກັນໄພຄວບຄຸມ ຢູ່ທີ່ 132.000 ລ້ານໂດລາ ສົ່ງຜົນໃຫ້ຊ່ອງຫວ່າງການຄຸ້ມຄອງປະກັນໄພທົ່ວໂລກຢູ່ທີ່ 58% ຊຶ່ງເອອອນກ່າວວ່າ ຕ່ຳທີ່ສຸດເປັນປະຫວັດສາດ ໃນຂະນະທີ່ຈຳນວນເຫດໄພພິບັດຕ່າງໆເຊັ່ນ: ອຸທົກກະໄພ ແລະ ເຮີຣິເຄນ ເພີ່ມຂຶ້ນຫຼາຍ ເມື່ອທຽບກັບຄ່າສະເລ່ຍນັບຕັ້ງແຕ່ປີ 2000. ທ່ານ ມິຄານ ລໍຣິນ ຫົວໜ້າຝ່າຍຂໍ້ມູນໄພພິບັດຂອງ ເອອອນ ກ່າວວ່າ: ມັນຂ້ອນຂ້າງຕ່ຳ ເນື່ອງຈາກໄພພິບັດທີ່ສ້າງຄວາມເສຍຫາຍຫຼາຍທີ່ສຸດເກີດຂຶ້ນໃນປະເທດທີ່ມີຕະຫຼາດປະກັນໄພທີ່ເຕີບໂຕບໍ່ວ່າຈະເປັນອາເມຣິກາ ຫຼື ເອີຣົບ ຂະນະທີ່ການສູນເສຍໃນພາກພື້ນທີ່ຄວບຄຸມນ້ອຍກວ່າຢ່າງອາຊີຢູ່ໃນລະດັບຕ່ຳກວ່າຄ່າສະເລ່ຍ. ນອກຈາກນີ້, ບໍລິສັດເອອອນ ຍັງໄດ້ເປີດເຜີຍບົດລາຍງານວ່າ ການສູນເສຍຂອງຜູ້ປະກັນຕົນທົ່ວໂລກປະມານ 75% ເກີດຂຶ້ນໃນອາເມຣິກາ ຈາກເຮີຣິເຄນອຽນທີ່ພັດເຂົ້າລັດຟໍຣິດາ ເມື່ອເດືອນກັນຍາ 2022 ຊຶ່ງສ້າງຄວາມເສຍຫາຍຕໍ່ການປະກັນໄພໃນລະຫວ່າງ 50.000-55.000 ລ້ານໂດລາ ຈາກການສູນເສຍທາງດ້ານເສດຖະກິດທັງໝົດ 95.000 ລ້ານໂດລາ.

ນອກຈາກນີ້, ເອອອນ ຍັງໄດ້ປະເມີນການວ່າ ມີຜູ້ເສຍຊີວິດປະມານ 31.300 ຄົນ ຈາກເຫດໄພພິບັດທາງທຳມະຊາດໃນປີ 2022 ຊຶ່ງປະມານ 2 ໃນ 3 ມີການເຊື່ອມໂຍງກັບຄື່ນຄວາມຮ້ອນຮຸນແຮງໃນເອີຣົບໃນລະຫວ່າງເດືອນມິຖຸນາ-ກໍລະກົດ ຜ່ານມາ.