ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ III ຂອງພັກ

ເຜີຍ​ແຜ່​ໂດຍ​: siththiphone rasphone ເວ​ລາ: 03/03/2020 10:24:08 ຈຳ​ນວນ​​ຢ້ຽມ​ຊົມ 510 ຄັ້ງ

   ວັ​ນ 27 ເມ​ສາ 1988, ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ III ຂອງ​ພັກ​ປະ​ຊາ​ຊົນ​ປະ​ຕິ​ວັດ​ລາວ ໄດ້​ເປີດຂຶ້ນ​ຢ່າງ​ເປັນ​ທາງ​ການ ທີ່​ນະ​ຄອນຫຼວງວຽງ​ຈັນ. ເຂົ້າ​ຮ່ວມກອງ​ປະ​ຊຸມ​ໃຫຍ່​ຄັ້ງ​ນີ້​ມີ​ຜູ້​ແທນ 228 ສະ​ຫາຍ ທີ່​ເປັນ​​ຕົວ​ແທນ​ໃຫ້​ແກ່​ສະ​ມາ​ຊິກ​ພັກ 35.000 ສະ​ຫາຍ​ໃນ​ທົ່ວ​ປະ​ເທດ; ມີ​ແຂກ​ພາຍ​ໃນ​ປະ​ເທດ 105 ຄົນ, ແຂກ​ຕ່າງ​ປະ​ເທດ 17 ຄະ​ນະ.
   ກອງ​ປະ​ຊຸມ​ໃຫຍ່​ຜ່ານ​ບົດ​ລາຍ​ງານ​ກາ​ນ​ເມືອງ; ຮັບ​ຮອງ​ເອົາ​ກົດ​ລະ​ບຽບ​ປ່ຽນ​ແປງ​ໃໝ່; ດຳ​ເນີນ​ການ​ເລືອກ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ຊຸດ​ໃໝ່​ມີ​ກຳ​ມະ​ການ​ສົມ​ບູນ 49 ສະ​ຫາຍ ແລະ ກຳ​ມະ​ການ​ສຳ​ຮອງ 6 ສະ​ຫາຍ, ກອງ​ປະ​ຊຸ​ມ​ຄັ້ງ​ປະ​ຖົ​ມ ​ມະ​ລືກ​ໄດ້​ເລືອກ​ເອົາ​ກົ​ມ​ການ​ເມືອງ​ສູນ​ກາງ​ພັກ 9 ສະ​ຫາຍ, ກອງ​ປະ​ຊຸມ​ໄດ້​ເລືອກ​ຕັ້ງ​ເອົາ​ສະ​ຫາຍ ໄກ​ສອນ ພົມ​ວິ​ຫານ ເປັນ​ເລ​ຂາ​ທິ​ການ​ໃຫຍ່​​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ເພື່ອ​ສອດ​ຄ່ອງ​ກັບ​ໜ້າ​ທີ່​ການ​ເມືອງ​ສູນ​ກາງ​ພັກ​ໄດ້​​ຕົກ​ລົງ​ແຕ່ງ​ຕັ້ງ​ສະ​ຫາຍ ສະ​ໝານ ວິ​ຍະ​ເກດ ເປັນ​ຫົວ​ໜ້າ​ຄະ​ນະ​ຈັດ​ຕັ້ງ​ສູນ​ກາງ​ພັກ.
   ພາຍຫຼັງ​ຢຶດ​ອຳ​ນາດ​ກ​ານ ປົກ​ຄອງ​ທົ່ວ​ປະ​ເທດ, ພັກ​ປະ​ຊາ​ຊົນ​ປະ​ຕິ​ວັດ​ລາວ​ໄດ້​ກາຍ​ມາເປັນ​ພັກ​ກຳ​ອຳ​ນາດ​ເປ​ັນ​ຜູ້​ຈັດ​ຕັ້ງ​ນຳ​ພາ​ທົ່ວ​ສັງ​ຄົມ ນີ້​ແມ່ນ​ບາດ​ລ້ຽວ​ສຳ​ຄັນ, ເປັນ​ຂີ​ດໝາຍ​ແຫ່ງ​ການ​ເຕີບ​ໃຫຍ່​ຂະ​ຫຍາຍ​ຕົວຂອງ​ພັກ​ເຮົາ, ນັ້ນ​ແມ່ນ ພາ​ລະ​ກຳ​ປະ​ຫວັ​ດ​ສາດ​ຂອງ​ພັກ​ທີ່​ປະ​ເທດ​ຊາດ ແລະ ປະ​ຊາຊົນມອບ​ໝາຍ​ໃຫ້​ເພື່ອ​ສ້າງ​ສາ​ປະ​ເທດ​ລາວ ສັນ​ຕິ​ພາບ, ເອ​ກະ​ລາດ, ປະ​ຊາ​ຊົນ​ທິ​ປະ​ໄຕ, ເອກະ​ພາບ ແລະ ວັດ​ທະ​ນາ​ຖາ​ວອນ.
   ກ່ຽວ​ກັບ​ການກໍ່​ສ້າງ​ພັກ​ຢູ່​ໃນ​ໄລ​ຍະ​ໃໝ່​ຂອງ​ການ​ປະ​ຕິ​ວັດ, ກອງ​ປະ​ຊຸມ​ໃຫຍ່​ໄດ້​ຢືນ​ຢັນ​ວ່າ: ພັກ​ຕ້ອງ​ສູ້​ຊົນ​ຮັກ​ສາ​ທາດ​ແທ້​ພັກ​ແບບ​ໃໝ່​ຂອງ​ຊົນ​ຊັ້ນ​ກຳ​ມະ​ກອນ​ໄວ້​ຢ່າງ​ໝັ້ນ​ຄົງ, ສົມ​ກຽດ​ເປັນ​ແກ່ນ​ສານ​ການ​ນຳ​ພາ​ຜະ​ເດັດ​ການ​ກຳ​ມະ​ຊີບ, ພັກ​ຕ້ອງ​ເປັນ​ກ້ອນ​ກຳ​ລັງ​ແຫ່ງ​ຄວາມສາ​ມັກ​ຄີ​ເອ​ກະ​ພາບ​ທາງ​ດ້ານ​ມາ​ນະ​ຈິດ ແລະ ການ​ກະ​ທຳ, ຕິດ​ພັນ​ກັບມະ​ຫາ​ຊົນ​ຢ່າງ​ແໜ້ນ​ແຟ້ນ, ມີ​ແນວ​ທ​າງ​ນະ​ໂຍ​ບາຍ​ຖືກ​ຕ້ອງ, ມີ​ການ​ຈັດ​ຕັ້ງ​ປອດ​ໃສເຂັ້ມ​ແຂງ, ມີ​ຖັນ​ແຖວ​ພະ​ນັກ​ງານ​ສະ​ມາ​ຊິກ​ພັກ​ທີ່​ໜັກ​ແໜ້ນ​ທາງ​ດ້ານ​ການ​ເມືອງ, ມີ​ຄວາມ​ສາ​ມາດ​ໃນການ​ຄຸ້ມຄອງ, ຊຳ​ນ​ິ​ຊຳ​ນານ​ໃນ​ ການ​ເຄື່ອນ​ໄຫວ​ຕົວ​ຈິງ..., ພ້ອມນັ້​ນ, ກອງ​ປະ​ຊຸມ​ໃຫຍ່​ຍັງ​ໄດ້​ກຳ​ນົດ 5 ທິ​ດ​ນຳ​ກໍ່​ສ້າງ​ພັກ​ອອກ​ຄື: ຕ້ອງກໍ່​ສ້າງ​ພັກ​ໃຫ້​ໜັກ​ແໜ້ນ​ເຂັ້ມ​ແຂງ​ທັງ​ສາມ​ດ້ານ: ການ​ເມືອງ, ແນວ​ຄິດ ແລະ ການ​ຈັດ​ຕັ້ງ, ການກໍ່ໍ່​ສ້າງ ​ພັກ​ຕ້ອງ​ຕິດ​ພັນ​ຢ່າ​ງ​ສະໜິດ​ແໜ້ນ​ກັບຂະ​ບວນ​ການ​ປະ​ຕິ​​ບັດ​ຂອງ​ມະ​ຫາ​ຊົນ​ໃນ​ການ​ປະ​ຕິ​ວັດ​ໜ້າ​ທີ່ກ​ານ​ເມືອງ​ຂອງ​ພັກ​ແຕ່​ລະ​ໄລ​ຍະ, ການ​ປັບ​ປຸງ ແລະ ຂະ​ຫຍາຍ​ພັກ​ຕ້ອງ​ຕິດ​ພັນ​ກັບ​ການ​ປັບ​ປຸງ​ບູ​ລະ​ນະ​ຂະ​ຫຍາຍ​ກົງ​ຈັກ​ລັດ ແລະ ບັນ​ດາ​ອົງ​ການ​ຈັດ​ຕັ້ງ​ມະ​ຫາ​ຊົນ, ສ້າງ ແລະ ປັບ​ປຸງ​ການ​ຈັດ​ຕັ້ງ​ຂອງ​ພັກ​ຕ້ອງ​ສົມ​ທົບ​ກັບ​ການ​ເຊີດ​ຊູ​ຄຸ​ນ​ນະ​ພາບ​ຂອງ​ພະ​ນັກ​ງານ ແລະ ສະ​ມາ​ຊິກ​ພັກ, ຕ້ອງ​ຮັບ​ເອົາ​ຜູ້​ທີ່​ມີ​ມາດ​ຖານ​ຄົບ​ຖ້ວນ​ເຂົ້າ​ພັກ​ຢ່າງ​ເນື່ອງ​ນິດ ແລະ ຕ້ອງ​ເອົາ​ຜູ້​ທີ່ບໍ່​ມີ​ມາດ​ຖານ​ພຽງ​ພໍ​ອອກ​ຈາກ​ພັກ.
   ຈາກ​ທິດ​ທາງ​ລວມ ແລະ ທິດ​ນຳ​ໃນ​ວຽກ​ງານກໍ່​ສ້າງ​ພັກ​ທາງດ້ານ​ການ​ຈັດ​ຕັ້ງ​ໃນ​ເວ​ລານີ້​ແມ່ນ​ສຸ​ມ​ໃສ່​ກໍ່​ສ້າງ​ໜ່ວຍ​ພັກ ແລະ ຄ​ະ​ນະ​ພັກ​ຮາກ​ຖານ​ເຂັ້ມ​ແຂງ​ດ້ວຍ​ວິ​ທີ​ຫັ​ນ​ລົງ​ຮາກ​ຖານ​ຢ່າງ​ແຂງ​ແຮງ​ສຸມ​ໃສ່​ປັບ​ປຸງ​ບູ​ລະ​ນະ​ຂັ້ນ​ເມືອງ ຊຶ່ງ​ເປັນ​ຂັ້ນ​ໜຶ່ງ​ທີ່​ສຳ​ຄັນ​ໃນ​ການ​ປະ​ຕິ​ບັດ​ແນວ​ທາງ​ແຜນ​ນະ​ໂຍ​ບາຍ​ຂອງ​ພັກ, ກໍ່​ສ້າງ​ຂັ້​ນ​ເມືອງບໍ່​ພຽງ​ແຕ່​ໃຫ້​ຂັ້ນ​ເມືອງ​ກາຍ​ເປັນ​ຫົວ​ໜ່ວຍບໍ​ລິ​ຫານ ຫົວ​ໜ່ວຍ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະ​ຫງົ​ບ​ເທົ່າ​ນັ້ນ​ຍັງ​ຕ້ອງ​ໃຫ້​ກາຍ​ເປັນ​ຫ​ົວ​ໜ່ວຍ​ເສດຖະ​ກິດ-ວັດທະ​ນະ​ທຳ, ສັງ​ຄົມ; ພ້ອມນັ້ນ​ປັບ​ປຸງ​ບູ​ລະ​ນະ​ອົງ​ການ​ຊ່ວຍ​ວຽກ​ຂອງ​ຄະ​ນະ​ພັກ​ໃຫ້​ເຂັ້ມ​ແຂງ​ສາ​ມາດ​ດຳ​ລົງ​ບົດ​ບາດ​ເປັນ​ເສ​ນາ​ທິ​ການ​ຊ່ວຍ​ວຽກ​ຂອງ​ຄະ​ນະ​ພັກ​ໃຫ້​ເຂັ້ມ​ແຂງ. ວັນ​ທີ 25/4/1984 ກອງ​ປະ​ຊຸມ​ຈັດ​ຕັ້ງ​ທົ່ວ​ປະ​ເທດ ຄັ້ງ​ທີ 6 ໄດ້​​ຈັດຂຶ້ນ ຢູ່​ນະ​ຄອນຫຼວງວຽງ​ຈັນ, ກອງ​ປະ​ຊຸມ​ໄດ້​ກຳ​ນົດ​ທິດ​ທາງວຽກ​ງານກໍ່​ສ້າງ​ພັກ​ດ້ານ​ການ​ຈັດ​ຕັ້ງ​ອອກ. ກ່ອນ​ອື່ນ​ໝົດ​ອອກ​ແຮງ​ປັບ​ປຸງ​ການ​ຈັດ​ຕັ້ງ​ຮາກ​ຖານ​ພັກ, ຍົກ​ສູງ​ຄຸນ​ພາບ​ສະ​ມາ​ຊິກ​ພັກ ແລະ ວຽກ​ງານ​ຂະ​ຫຍາຍ​ພັກ ໂດຍ​ສະ​ເພາະ​ແມ່ນ​ຕ້ອງກໍ່​ສ້າງ ແລະ ປັບ​ປຸງ​ໜ່ວກ​ພັກ, ຄະ​ນະ​ພັກ​ຮາກ​ຖານ​ໃຫ້​ເຂັ້ມ​ແ​ຂງ​ຮອບ​ດ້ານ, ສຳ​ລັບ​ໜ່ວຍ​ພັກ​ຢູ່​ຊົນ​ນະ​ບົດ​ຕ້ອງ​ຮູ້​ນຳ​ພາ​ຮອບ​ດ້ານ ແລະ ອື່ນໆ.
   ການ​ສ້າງ​ພັກ​ສ້າງ​ພະ​ນັກ​ງານ​ໄດ້​ຮັບ​ຄວາ​ມ​ເອົາ​ໃຈ​ໃສ່​ຈາກ​ຄະ​ນະ​ພັກ​ຂັ້ນ​ຕ່າງໆ​ເປັນ​ຢ່າງ​ດີ, ມາ​ເຖິງ​ທ້າຍ​ປີ 1985 ຈຳ​ນວນ​ສະ​ມາ​ຊິກ​ພັກ​ທົ່ວ​ປະ​ເທດມ​ີ​ເຖິງ 45.000 ສະ​ຫາຍ (ເພີ່ມ​ຂຶ້ນ​ເປັນ​ເກື​ອບ 2 ເທື່ອ​ທຽບ​ໃສ່​ປີ 1967). ໄປ​ພ້ອມ​ກັບ​ການ​ຂະ​ຫຍາຍ​ພັກ, ພັກ​ເຮົາ​ຍັງ​ໄດ້​ເອົາ​ໃຈ​ໃສ່​ບຳ​ລຸງ​ສ້າງ ແລະ ເສີມ​ຂະ​ຫຍາຍ​ບົດ​​ບາດຂອງ​ພະ​ນັກ​ງານ​ທີ່​ຜ່ານ​ການ​ທົດ​ສອບ​ໃນ​ ການ​ຕໍ່​ສູ​້ ແລະ ໃນ​ຂະ​ບວນ​ວຽກ​ງານ​ຕົວ​ຈິງ, ເສີມ​ຂະ​ຫຍາຍ​ບົດ​ບາດ​ຂອງ​ພະ​ນັກ​ງານ​ທີ່​ມາ​ຈາກກຳ​ມະ​ກອນ-ຊາວ​ນາ, ຖື​ເປັນ​ສຳ​ຄັນ​ການ​ເປີດກວ້າງພະ​ ນັກ​ງານ​ປັນ​ຍາ​ຊົນ​ ຊົນ​ເຜົ່າ ແລະ ເພດ​ຍິງ​  ພ້ອມ​ກັນ​ນັ້​ນ​ກໍ​ ກ້ານຳໃຊ້​ຂ້າ​ຣາ​ຊະ​ການ​ຂອງ​ລະ​ບອບ​ເກົ່າ. ກອງ​ປະ​ຊຸມ​ຄະ​ນະ​ບໍ​ລິ​ຫານ​ງານ​ສູງ​ກາງ​ພັກ ຄັ້ງ​ທີ 9 ສະ​ໄໝ​ທີ III (ທັນ​ວາ 1985) ໄດ້​ຕີ​ລາ​ຄາ​ກ່ຽວ​ກັບ​ວຽກ​ງານ​ດັ່ງ​ກ່າວ​ວ່າ: ຄຽງ​ຄູ່​ກັບ​ການ​ຍົກ​ລະ​ດັບ ແລະ ຄວາມ​ສາ​ມາດ​ໃນ​ການ​ນຳ​ພາ​ຈຳ​ນວນ​ສະ​ມາ​ຊິກ​ພັກ​ໄດ້​ເພີ່ມ​ຂຶ້ນ​ໄວ​ພໍ​ສົມ​ຄວນ, ກ່ອນ​ການ​ປົດ​ປ່ອຍ​ທົ່ວ​ປະ​ເທດ​ມີ​ພະ​ນັກ​ງານ​ນຳ​ພາ​ແຕ​່​ຂັ້ນ​ເມືອງ​ຂຶ້ນ​​ໄປພຽງ​ແຕ່ 2.000 ກວ່າ​ຄົນ, ປັດ​ຈຸ​ບັນ​ມີ​ ເຖິງ 10.000 ຄົນ. ສະ​ເພາະ​ພະ​ນັກ​ງານ​ຊັ້ນ​ກາງ ແລະ ຊັ້​ນ​ສູງ​ໄດ້​ເພີ່ມ​ຂຶ້​ນ​ທົບ 5 ເທົ່າ.
   ລວມ​ຄວາມ​ວ່າ​ໃນ​ບາດ​ກ້າວ​ເດີນ​ທ​ຳ​ອິດ​ແຫ່ງ​ການກໍ່​ສ້າງ​ລະ​ບອບ​ໃໝ່ ເຖິງວ່າ​ຈະ​ປະ​ເຊີນ​ກັບ​ຄວາມ​ຫຍຸ້ງ​ຍາກຫຼາຍ​ປະ​ການ​ທີ່​ສັດ​ຕູກໍ່​ຂຶ້ນ​ທີ່​ເກີດ​ມາ​ຈາກ​ຈຸດ​ເລີ່ມ​ຕົ້ນ​ຂອງ​ປະ​ເທດ​ຍັງ​ຕາໍ່​ເກີນ​ໄປ ແລະ ສະ​ພາບການຫຼາຍ​ດ້ານ​ຍັງ​ບໍ່​ທັນ​ໝັ້ນ​ທ່ຽງ ພ້ອມ​ທັງ​ບໍ່​ທັນ​ມ​ີ​ກົນ​ໄກ​ຄຸ້ມ​ຄອງ​ເສດ​ຖະ​ກິດ​ທີ່​ຄົບ​ຊຸດ ແລະ ສອດ​ຄ່ອງ​ກໍ​ຕາມ, ແຕ່​ຍ້ອນ​ມີ​ຄວາມ​ສາ​ມັກ​ຄີ​ຕັດ​ສິນ​ໃຈ​ບຸກ​ບືນ​ກ້າວ​ຂຶ້ນ​ຂອງ​ພະ​ນັກ​ງານ ແລະ ປະ​ຊາ​ຊົນ​ທັງ​ຊາດ. ມີ​ການ​ຊ່ວຍ​ເຫຼືອ​ອັນ​ໃຫຍ່ຫຼວງ​ຂອງ​ສາ​ກົນ ແລະ ຕົ້ນ​ຕໍ​ແມ່ນ​ຍ້ອນ​ມີ​ການ​ນຳ​ພາ​ອັນ​ຖືກ​ຕ້ອງ ແລະ ປະ​ດິດ​ສ້າງ​ຂອງ​ຄະ​ນະ​ພັກ​ຂັ້ນ​ຕ່າງ​ໆ ກ່ອນ​ອື່ນ​ແມ່ນ​ສະ​ຫາຍ ໄກ​ສອນ ພົ​ມ​ວິ​ຫານ ທີ່​ເຄົາ​ລົບ​ຮັກ ແລະ ຂອງ​ສູນ​ກາງ​ພັກ, ສະ​ນັ້ນ​ຈຶ່ງ​ສາ​ມາດ​ປົກ​ປັກ​ຮັກ​ສາ​ເອກ​ະ​ລາດ, ອະ​ທິ​ປະ​ໄຕ ແລະ ປົກ​ປັກ​ຮັກ​ສາ​ລະ​ບອບ​ໃໝ່​ໄວ້​ໄດ້​ຢ່າງ​ໝັ້ນ​ຄົງ. ປະ​ເທດ​ຊາດ​ມີ​ຄວາມ​ສະ​ຫງົບ ແລະ ຄວາມ​ເປັນ​ລະ​ບຽບ​ຮຽບ​ຮ້ອຍ​ເທື່ອ​ລະ​ກ້າວ. ສາ​ມາດ​ປະ​ຕິ​ບັດ​ບັນ​ດາ​ຈຸດ​ໝາຍ​ຂອງ​ແຜນ​ການ​ພັດ​ທະ​ນາ​ເສດ​ຖະ​ກິດ-ສັ​ງ​ຄົມ 5 ປີ ແຫ່ງ​ລັດ ຄັ້ງ​ທີ I ສຳ​ເລັດ​ໂດຍ​ພື້ນ​ຖານ, ອັນ​ໄດ້​ປະ​ກອບ​ສ່ວນ​ສ້າງ​ປະ​ຖົມ​ປັດ​ໄຈ ແລະ ເງື່ອນ​ໄຂ​ສະ​ດວກ​ໃຫ້​ການ​ສືບ​ຕໍ່​ກ້າວ​ຂຶ້ນ​ຂອງ​ປະ​ເທດ​ຊາດ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110