ທ່ານ ດາລາພອນ ພົນສະຫັວດດີ ຮອງຫົວໜ້າພະແນກກະສິກໍາ ແລະ ປາໄມ້ ແຂວງບໍລິຄຳໄຊ ໄດ້ໃຫ້ສຳພາດຕໍ່ສື່ມວນຊົນທ້ອງຖິ່ນ ໃນວັນທີ 20 ກຸມພານີ້ວ່າ: ແຂວງບໍລິຄຳໄຊ ພວມສຸມໃສ່ການຜະລິດເຂົ້ານາແຊງ, ພືດສະບຽງອາຫານ ໃຫ້ໄດ້ພຽງພໍກັບຄວາມຕ້ອງການບໍລິໂພກພາຍໃນແຂວງແລະສົ່ງອອກຕ່າງແຂວງ ແລະ ຕ່າງປະເທດໃຫ້ຫຼາຍຂຶ້ນ.

ສຳລັບການຜະລິດລະດູແລ້ງ ສົກປີ 2022–2023 ຂອງຊາວກະສິກອນທົ່ວແຂວງໄດ້ກະກຽມປັດໄຈການຜະລິດ ເຊັ່ນ: ກະກຽມແນວພັນເຂົ້າ, ແນວພັນພືດ, ຝຸ່ນ-ປຸ໋ຍ, ອະນາໄມຄອງເໝືອງ, ສ້ອມແປງຈັກສູບນໍ້າ ບ່ອນທີ່ມີເງື່ອນໄຂ ແລະ ຈຳເປັນຊຶ່ງມາຮອດປັດຈຸບັນ ການຕົ້ກກ້າ, ກຽມດິນ ແລະ ການປັກດຳເກືອບຈະສຳເລັດແລ້ວໂດຍສາມາດປະຕິບັດໄດ້ແລ້ວ1.582 ເຮັກຕາ ເທົ່າກັບ 83,66%, ຄາດວ່າຈະໃຫ້ສຳເລັດ 100%ໃນເດືອນກຸມພານີ້.

ສ່ວນການຜະລິດພືດລະດູແລ້ງ ປະຕິບັດໄດ້ 5.966 ເຮັກຕາ ເທົ່າກັບ 51,71% ໃນນັ້ນ ຜະລິດພືດສະບຽບອາຫານ ເປັນຕົ້ນແມ່ນພືດຜັກ, ສາລີຫວານ, ມັນດ້າງ, ມັນເພົາ ແລະ ພືດອື່ນໆ ໄດ້ 2.793 ກວ່າເຮັກຕາ ເທົ່າກັບ 65,40% ແລະ ພືດເປັນສິນຄ້າ ເຊັ່ນ: ພືດຜັກ, ສາລີອາຫານສັດ, ອ້ອຍ, ຢາສູບ, ກ້ວຍ ແລະ ອື່ນໆ ປະຕິບັດໄດ້ 3.172 ກວ່າເຮັກຕາ ເທົ່າກັບ 43,67%.

ທ່ານ ດາລາພອນ ພົນສະຫວັດດີ ຍັງໃຫ້ຮູ້ຕື່ມອີກວ່າ: ນອກຈາກໄດ້ສຸມໃສ່ການຜະລິດລະດູແລ້ງແລ້ວ ຍັງສຸມໃສ່ຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສຸມໃສ່ການຜະລິດພືດຜັກໃນເຮືອນຮົ່ມ ເພື່ອບໍລິໂພກພາຍໃນ ທົດແທນການນໍາເຂົ້າ, ໃນ 7 ເມືອງມີຈຳນວນ 499ເຮືອນຮົ່ມ, ມີ 286 ຄອບຄົວ, ມີເນື້ອທີ່ 5,76 ເຮັກຕາ, ສຸມໃສ່ຜະລິດຕາມມາດຕະຖານກະສິກຳສະອາດໃນສອງມາດຕະຖານ ຄື: ມາດຕະຖານກະສິກຳອິນຊີ ແລະ ມາດຕະຖານກະສິກໍາທີ່ດີ ໃຫ້ເປັນສິນຄ້າຂອງແຂວງທີ່ມີທ່າແຮງມີຕະຫຼາດ(ຫັນປ່ຽນໄປສູ່ສັງຄົມການຜະລິດຢ່າງແຂງແຮງ).

ຂ່າວ: ສີເວດ