ຫົວ​ຂໍ້ : ຣັດເຊຍ ສະໜັບສະໜູນສະບຽງອາຫານ ເພື່ອຮັບມືກັບການປ່ຽນແປງຂອງດິນຟ້າອາກາດໃນລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 04/03/2020 08:58:37 ຈຳ​ນວນ​ຜູ້​ເຂົ້າ​ຢ້ຽມ​ຊົມ 461 ຄັ້ງ

  ສະບຽງ​ອາຫານທີ່​ຣັດ​ເຊຍ ​ສະໜັບສະໜູນ ສປປ ລາວ ຜ່ານ​ອົງການ​ອະນາໄມ​ໂລກ ໄດ້​ລຳລຽງ​ມາ​ຮອດ ສປປ ລາວ​ແລ້ວ ໂດຍ​ມີ​ເປົ້າ​ໝາຍ​ສະ​ໜັບ ສະ​ໜູນ​ຄວາມ​ໝັ້ນຄົງ​ດ້ານ​ສະ ບຽງ​ອາຫານ​ທີ່​ໄດ້​ຮັບ​ຜົນ​ກະທົບ​ມາ​ຈາກ​ການ​ປ່ຽນແປງ​ຂອງ​ດິນ​ຟ້າ​ອາກາດ​ຕໍ່​ຊຸມ​ຊົນ ​ໃນ​ບັນດາ​ແຂວງ​ພາກ​ເໜືອຂອງ ສປປ ລາວ. 
  ໃນ​ວັນ​ທີ 3 ມີນາ​ນີ້ ທ່ານ ວາ​ລາ​ດີ​ເມຍ ກາ​ນິ​ລີນ ເອກອັກ​ ຄະ​ລັດຖະ​ທູດ​ຣັດ​ເຊຍ​ ປະຈຳ ສປປ ລາວ, ໄດ້​ຮັບ​ສິນຄ້າຢູ່ ສາງ​ຂອງ​ອົງການ​ອາຫານ​ໂລກ (WFP). ໃນ​ຖານະ​ເປັນ​ຄູ່​ຮ່ວມ​ພັດທະນາ​ໃໝ່​ກັບ​ອົງການ​ອາ ຫານ​ໂລກ, ກະຊວງ​ປະ​ເມີນສະ ຖານະ​ການ​ສຸກ​ເສີນ​ຂອງ​ຣັດ​ເຊຍໄດ້​ໃຫ້ການ​ຊ່ວຍເຫຼືອ​ຜ່ານ​ອົງການ​ອາຫານ​ໂລກ ຫຼາຍ​ກວ່າ 1 ລ້ານ​ໂດ​ລາ. ໃນ​ນັ້ນ, ອົງການ​ອາຫານ​ໂລກ​ໄດ້​ນຳ​ໃຊ້​ການ​ຊ່ວຍເຫຼືອ​ດັ່ງກ່າວ​ຈັດ​ຊື້​ນ້ຳມັນ​ພືດ, ປາກະປ໋ອງ ແລະ ວັດ​ສະ​ດຸ​ກໍ່​ສ້າງ  ຊຶ່ງ​ເຄື່ອງ​ຊ່ວຍເຫຼືອ​ເຫຼົ່າ ນີ້​ຈະ​ເປັນ​ປະໂຫຍດ​ໃຫ້ປະ ຊາ​ຊົນ  27.500  ​ກວ່າຄົນ ໃນ​ ບັນດາ​ບ້ານ​ເປົ້າ​ໝາຍ​ທີ່ໄດ້​ຮັບ ​ຜົນກະທົບ​ຈາກ​ໄພ​ນໍ້າ​ຖ້ວມ, ໄພ​ແຫ້ງແລ້ງ ແລະ ການ​ລະ ບາດ​ຂອງ​ສັດຕູ​ພືດ​ໃນ​ສອງ​ປີ​ທີ່​ຜ່ານ​ມາ.
  ອົງການ​ອາຫານ​ໂລກ​ຈະ​ນຳ​ໃຊ້​ເຄື່ອງ​ຊ່ວຍ​ເຫຼືອ​ດັ່ງ​ກ່າວ​ເຂົ້າ​ໃນ​ການ​ກໍ່ສ້າງ, ສ້ອມ ແປງ ແລະ ປັບປຸງ​ພື້ນຖານ​ໂຄງ​ລ່າງ​ຂອງ​ຊຸມ​ຊົນ​ລວມ​ທັງ ໜອງ​ປາ​ຂອງ​ຊຸມ​ຊົນ,  ຄອງ​ຊົນລະປະທານ, ການ​ຄວບ​ຄຸມ​ລະດັບ​ນ້ຳ​ຖ້ວມ ແລະ ປັບປຸງ​ລະບົບ​ຮ່ອງ​ລະ​ບາຍ​ນໍ້າ, ຂົວ ແລະ ທາງ​ເຂົ້າ​ຊຸມ​ຊົນ​ເປັນ​ຕົ້ນ. 
  ການ​ສະໜັບສະໜູນ​ຈາກ​ປະເທດຣັດ​ເຊຍ​ແມ່ນ​ສ່ວນ ໜຶ່ງ ຂອງ​ການ​ຂະຫຍາຍ​ການ​ພົວ ພັນ​ລະຫວ່າງ ສປປ​ລາວ ແລະ ຣັດ​ເຊຍ. ​ທ່ານເອກ​ອັກຄະ​ລັດ​​ຖ​ະທູດ ວາ​ລາ​ດີ​ເມຍ ກາ​ນິລີນ ໄດ້​ໃຫ້​ຮູ້​ວ່າ:“ ສະຫະພັນຣັດ​ເຊຍ​ໃຫ້​ຄວາມ​ສຳຄັນ​ສູງ ​ໃນ​ການ​ໃຫ້ການ​ຊ່ວຍເຫຼືອ​ດ້ານ​ມະ ນຸດສະທຳ ແລະ ໄພພິບັດໃຫ້​ ແກ່​ບັນດາ​ເຂດ​ທີ່​ປະສົບ​ໄພພິ ບັດ​ໃນ​ໂລກ ໂດຍ​ສະເພາະ ​ໃນ​ປີ 2018 ປະເທດ​ຂອງ​ພວກ​ເຮົາ​ໄດ້​ສະໜອງເຄື່ອງ​ຊ່ວຍເຫຼືອກໍຄື​ປະເພດ​ອາຫານ​ພື້ນຖານ​ຫຼາຍ​ກ່​ວາ 36 ໂຕນ ໃຫ້​ແກ່​ປະຊາຊົນ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ທີ່​ຮ້າຍ​ແຮງ​ຢູ່​ແຂວງ​ອັດ​ຕະ​ປື. ຣັດ​ເຊຍ​ໄດ້​ສ້າງຕັ້ງ​ກົນ​ໄກ​ການ​ຮ່ວມ​ມື​ທີ່ໜ້າ​ເຊື່ອຖື ແລະ ມີ​ປະສິດທິພາບ​ກັບອົງ ການ​ອາຫານ​ໂລກ ເພື່ອ​ແນໃສ່ ສະໜັບສະໜູນ​ໃຫ້​ແກ່​ຊຸມ​ຊົນ​ທີ່​ມີ​ຄວາມ​ຕ້ອງ​ການ. 
  ທ່ານ ຢານ ເດ​ວ​ບາ​ເຣີ ຜູ້ອຳນວຍການ​ໃຫຍ່ ແລະ ຜູ້ຕາງໜ້າ​ຂອງ​ອົງການ​ອາຫານ​ໂລກ ປະຈຳ ສປປ ລາວ.ໄດ້​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການ​ເປັນ​ຄູ່​ຮ່ວມ​ມື​ໃນ​ການ​ສະໜັບສະໜູນ ຊຸມ​ຊົນ​ໃນ ສປປ​ລາວ​ວ່າ: ໂດຍ​ການ​ຮ່ວມ​ມື​ກັບ​ລັດຖະບານ, ອົງການ​ອາຫານ​ໂລກ ໄດ້​ສະໜັບສະໜູນ 650 ກວ່າ​ຊຸມ​ຊົນ​ໃນ​ການ​ກໍ່ສ້າງ​ພື້ນຖານ​ໂຄງ​ລ່າງ​ຢູ່​ບັນດາ​ບ້ານ​ນັບ​ແຕ່​ປີ 2013  ຊຶ່ງ​ປະ​ຊາ​ຊົນ 280.000 ກວ່າຄົນ​ໄດ້​ຮັບ​ຜົນ​ປະໂຫຍດ​ຈາກ​ການ​ຊ່ວຍເຫຼືອ​ເຫຼົ່າ​ນີ້. ທ່ານຍັງ​ສະແດງ​ຄວາມ​ຂອບໃຈຕໍ່​ຣັດ​ເຊຍ ທີ່ສະໜັບສະໜູນ ແລະ ຫວັງ​ເປັນ​ຢ່າງ​ຍິ່ງ​ວ່າການ​ຮ່ວມ​ມື​ນີ້​ຈະ​ຊ່ວຍ​ສ້າງ​ຄວາມ​ເຂັ້ມແຂງ​ໃຫ້​ກັບ​ຊຸມ​ຊົນ​ໃຫ້​ມີ​ຄວາມ​ທົນ​ທານ​ຕໍ່​ການ​ປ່ຽນແປງ​ດິນ​ຟ້າ​ອາ​ກາດ”. 
(ຂ່າວ: ອົງການ​ອາຫານ​ໂລກ​-​ພາບ: ບຸນ​ຕອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110