ວິທະຍຸກະຈາຍສຽງຫວຽດນາມລາຍງານ ເມື່ອວັນທີ 23 ມີນາ ຜ່ານມາ, ກະຊວງຊັບພະຍາກອນ ແລະ ສິ່ງແວດລ້ອມ ຂອງຫວຽດນາມ ໄດ້ສົມທົບກັບຄະນະກຳມະການປະຊາຊົນແຂວງຮວ່າບິງ ຈັດພິທີປຸກລະດົມແຫ່ງຊາດ ເພື່ອຕອບສະໜອງວັນນ້ຳໂລກ (22/3), ວັນອຸຕຸນິຍົມໂລກ (23/3) ແລະ ບັ້ນເຄື່ອນໄຫວມອດໄຟ 1 ຊົ່ວໂມງເພື່ອໜ່ວຍໂລກ ປີ 2023.

ໃນພິທີ, ທ່ານ ຫວໍຕວັນເຍິນ ຮອງລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມໃຫ້ຮູ້ວ່າ: ຫົວຂໍ້ຂອງວັນແຫຼ່ງຊັບພະຍາກອນນ້ຳລະດັບໂລກແມ່ນ “ຊຸກຍູ້ການປ່ຽນແປງ”; ວັນອຸຕິນິຍົມໂລກແມ່ນ “ຂໍ້ມູນກ່ຽວກັບດິນຟ້າອາກາດ ແລະ ຊັບພະຍາກອນນ້ຳ ປະກອບສ່ວນພັດທະນາເສດຖະກິດ-ສັງຄົມແບບຍືນຍົງເພື່ອວັນນີ້ ແລະ ອະນາຄົດ” ແລະ ຫົວຂໍ້ຂອງບັ້ນເຄື່ອນໄຫວມອດໄຟ 1 ຊົ່ວໂມງເພື່ອໜ່ວຍໂລກປີ 2023 ແມ່ນ “ຈຸດເວລາສຳຄັນສຳລັບໜ່ວຍໂລກ”. 3 ຫົວຂໍ້ດັ່ງກ່າວ ມີຄວາມສຳພັນກັນຢ່າງແໜ້ນແຟ້ນທາງດ້ານສິ່ງແວດລ້ອມ - ຊັບພະຍາກອນ - ລະບົບນິເວດ. ໂດຍໄດ້ເນັ້ນໜັກວ່າ ນີ້ແມ່ນຈຸດເວລາຕ້ອງປ່ຽນແປງເພື່ອຮັບປະກັນບັນດາເປົ້າໝາຍຂອງທົ່ວໂລກກ່ຽວກັບດິນຟ້າອາກາດ ແລະ ຊັບພະຍາກອນນ້ຳ, ການປ່ຽນແປງຂອງດິນຟ້າອາກາດ; ຮຽກຮ້ອງໃຫ້ພ້ອມກັນຮ່ວມມືເຄື່ອນໄຫວ, ສະແດງບົດບາດ ແລະ ຄວາມຮັບຜິດຊອບຕໍ່ຜົນກະທົບຈາກໄພທຳມະຊາດ ແລະ ການປ່ຽນແປງຂອງດິນຟ້າອາກາດ.