(ເນື່ອງໃນໂອກາດວັນຊາດ ເກຣັກ ວັນທີ 25 ມີນາ)

ຮຽບຮຽງໂດຍ: ວິໄລພອນ ເພັດໄພບູນ

ຖ້າຫາກກ່າວເຖິງ ສາທາລະນະລັດ ເຮນເລນິກ (Hellenic Republic) ຫຼາຍໆທ່ານອາດຈະບໍ່ຄຸ້ນຫູວ່າເປັນປະເທດໃດ ແຕ່ຖ້າບອກວ່າເປັນປະເທດເກຣັກ (Greece) ເຊື່ອວ່າຫຼາຍທ່ານຕ້ອງຮູ້ຈັກກັນເປັນຢ່າງດີ ເພາະເປັນປະເທດທີີ່ມີປະຫວັດສາດອັນຍາວນານ ມີຕຳນານທີ່ມີຊື່ສຽງຢ່າງຫຼວງຫຼາຍ, ສຳລັບປະເທດເກຣັກ ເປັນປະເທດທີ່ຕັ້ງຢູ່ທາງພາກຕາເວັນອອກສ່ຽງໃຕ້ຂອງທະວີບເອີຣົບ ປະມານ 80% ຂອງປະເທດປະກອບດ້ວຍພູ ແລະ ເນີນພູ ຍ້ອນສາເຫດນີ້ຈຶ່ງເຮັດໃຫ້ເກຣັກເປັນປະເທດໜຶ່ງໃນເອີຣົບທີ່ມີພູຫຼາຍທີ່ສຸດໃນໂລກ ໂດຍສະພາບອາກາດຂອງເກຣັກຈະເປັນອາກາດແບບອົບອຸ່ນຕະຫຼອດປີ ເໝາະແກ່ການທ່ອງທ່ຽວພັກຜ່ອນຢ່ອນອາລົມ ຊຶ່ງເກຣັກມີຫຼາຍສະຖານທີ່ທ່ອງທ່ຽວທີ່ໜ້າສົນໃຈໄດ້ແກ່:

ເກາະຊານໂຕຣິນີ (Santorini) ຕັ້ງຢູ່ທາງພາກເໜືອຂອງເກາະເຄຣເຕ (Crete) ໃນທະເລອີຈຽນ (Aegean) ເປັນເກາະທີ່ມີຊື່ສຽງທາງດ້ານສະຖາປັດຕະຍະກຳທີ່ໂດດເດັ່ນ ກໍຄືຕຶກສີຂາວທີ່ມີຮູບຮ່າງແປກຕາຕັ້ງຮຽງກັນຢູ່ຕາມເນີນພູ ແລະ ໂບດທີ່ມີຍອດໂດມສີຟ້າ ໃນອະດີດເກາະນີ້ເຄີຍເປັນພູເຂົາໄຟທີ່ເກີດການລະເບີດຈົນເຮັດໃຫ້ກາຍເປັນຂຸມປ່ອງພູເຂົາໄຟຂະໜາດໃຫຍ່ ລັກສະນະຂອງເກາະຄ້າຍຄືກັບຮູບດວງຈັນສ້ຽວ ແລະ ກາຍເປັນເກາະຊານໂຕຣິນີໃນປັດຈຸບັນ ນອກຈາກຄວາມສວຍງາມຂອງບ້ານເມືອງສີຂາວອັນເປັນເອກະລັກເທິງເກາະທີ່ຕິດກັບທີວທັດເທິງປາກປ່ອງພູເຂົາໄຟ ແລະ ສີຟ້າຄາມຂອງນ້ຳທະເລແລ້ວ ທີ່ແຫ່ງນີ້ຍັງມີສະຖານທີ່ທ່ອງທ່ຽວອີກຢ່າງຫຼວງຫຼາຍໃຫ້ໄດ້ທ່ຽວຊົມກັນດ້ວຍ.

ວິຫານພາເທນອນ (Parthenon) ຕັ້ງຢູ່ນະຄອນຫຼວງເອເທນ ສະຖາປັດຕະຍາກຳເກຣັກບູຮານນີ້ສ້າງຂຶ້ນເພື່ອເປັນສະຖານທີ່ບູຊາເທພີອາທີນ່າ ຫຼື ເທພີແຫ່ງປັນຍາ ເມື່ອສະຕະວັດທີ 5 ໂດຍສ້າງຂຶ້ນຕາມຄຳສັ່ງຂອງເພີຣິໂຄ (Pericles) ຜູ້ນຳແຫ່ງນະຄອນຫຼວງເອເທນໃນສະໄໝນັ້ນ ຄຳວ່າ ພາເທນອນ ແປວ່າ ຫ້ອງແຫ່ງເທພີພອນພົມມະຈາລີ (Hall of the Virgin Goddess) ຊຶ່ງສະໄໝນັ້ນວິຫານພາເທນອນຖືໄດ້ວ່າເປັນໜຶ່ງໃນສິ່ງກໍ່ສ້າງທີ່ຍິ່ງໃຫຍ່ທີ່ສຸດໃນໂລກ.

ພູເມເທີໂອຣາ (Meteora Rocks) ຕັ້ງຢູ່ເມືອງຄາລຳບາກ້າ ເປັນຈຸດໝາຍປາຍທາງຂອງຜູ້ສະແຫວງບຸນທົ່ວໂລກມາຕັ້ງແຕ່ສະໄໝສະຕະວັດທີ 10 ເນື່ອງຈາກເປັນເມືອງທີ່ມີອາຮາມຈຳນວນຫຼາຍກະຈາຍຢູ່ທົ່ວບໍລິເວນ ແລະ ນະຄອນແຫ່ງອາຮາມລອຍຟ້າທີ່ມີຊື່ສຽງໂດ່ງດັງໄປທົ່ວໂລກຢ່າງ ພູເມເທີໂອຣາ ເທິງພູນີ້ມີອາຮາມເກົ່າແກ່ຂອງໂບດນິກາຍອໍທອດດັອກ (Orthodox Church) ທີ່ສ້າງຢູ່ເທິງຜາຫີນສູງຊັນຫຼາຍໜ່ວຍ ມີຄວາມສູງເຖິງ 245 ແມັດຈາກລະດັບນ້ຳທະເລ ເມື່ອກ່ອນອາຮາມເທິງພູນີ້ມີເຖິງ 24 ແຫ່ງ ໂດຍແຕ່ລະອາຮາມຈະມີຄວາມພິເສດແຕກຕ່າງກັນໄປ ແຕ່ປັດຈຸບັນຈະເຫຼືອພຽງ 6 ແຫ່ງເທົ່ານັ້ນ ເນື່ອງຈາກຄວາມສວຍງາມທີ່ແປກຕານີ້ ໃນປີ 1988 ອົງການການສຶກສາ ວິທະຍາສາດ ແລະ ວັດທະນະທຳ (UNESCO) ຈຶ່ງຂຶ້ນທະບຽນໃຫ້ເປັນມໍລະດົກໂລກທາງທຳມະຊາດ ແລະ ວັດທະນະທຳອີກດ້ວຍ.

ເກາະຄໍຟູ (Corfu) ເປັນເກາະນ້ອຍໆ ມີເນື້ອທີ່ພຽງ 593 ກິໂລຕາແມັດ ຕັ້ງຢູ່ນອກແຄມຝັ່ງຕາເວັນຕົກຂອງອັນບາເນຍ (Albania) ແລະ ເກຣັກ ຊຶ່ງມີແຄມຝັ່ງ ແລະ ທັດສະນີຍະພາບພູທີ່ສວຍງາມລວມທັງສະຖາປັດຕະຍາກຳທີ່ເກົ່າແກ່ອີກດ້ວຍ ໂດຍ ເກາະຄໍຟູ ໄດ້ຮັບການຮັບຮອງຈາກອົງການ UNESCO ໃຫ້ເປັນມໍລະດົກໂລກໃນປີ 2007 ຖ້າຫາກທ່ານໃດທີ່ໄດ້ມາຢ້ຽມຢາມເກາະແຫ່ງນີ້ຮັບຮອງວ່າຕ້ອງຫຼົງສະເໜ່ຢ່າງແນ່ນອນ.

ເດວຟິ (Delphi) ສະຖານທີ່ບູຮານສຳຄັນອາຍຸຫຼາຍພັນປີໃນສະໄໝເກຣັກ ຕັ້ງຢູ່ເມືອງເດວຟິ ໃນສະໄໝບູຮານດິວຟິ ເປັນສະຖານທີ່ສຳຄັນທີ່ສຸດໃນສະໄໝເກຣັກບູຮານເຄີຍຖືກນຳໃຊ້ເປັນສະໜາມສຳລັບຫຼິ້ນກິລາ ແລະ ໂຮງໜັງ ໂດຍສະຖານທີ່ນີ້ສ້າງຂຶ້ນເທິງເປີ້ນພູ ເພື່ອໃຫ້ຜູ້ຊົມໄດ້ເຫັນທັດສະນີຍະພາບຂອງວິຫານ ແລະ ທີວທັດທີ່ງົດງາມ ສາມາດຮອງຮັບຜູ້ເຂົ້າມາຢ້ຽມຢາມໄດ້ເຖິງ 5.000 ຄົນ. ເດວຟິ ໄດ້ຮັບຮອງຂຶ້ນທະບຽນເປັນມໍລະດົກໂລກຈາກອົງການ UNESCO ເມື່ອປີ 1987 ແລະ ເປັນສະຖານທີ່ທ່ອງທ່ຽວຍອດນິຍົມຂອງປະເທດເກຣັກທີ່ຫ້າມພາດເມື່ອເດີນທາງໄປເຖິງເກຣັກ.

ຫາດເມຍໂທສ (Myrtos Beach) ຕັ້ງຢູ່ທາງພາກຕາເວັນຕົກສ່ຽງເໜືອຂອງ Kefalonia ຫາດແຫ່ງນີ້ ມີຊື່ສຽງລະດັບໂລກໃນດ້ານຂອງສີນ້ຳທະເລທີ່ສວຍງາມເໝືອນມີມົນສະເໜ່ຕັດກັບສີຂາວສະຫວ່າງຂອງຫີນປູນ ແລະ ຫີນອ່ອນ ອ້ອມຮອບໄປດ້ວຍພູທີ່ສູງຊັນ ແລະ ໜ້າຜາສູງເພີ່ມຄວາມສວຍງາມໃຫ້ຫຼາຍຂຶ້ນໄປອີກດ້ວຍ ຍ້ອນເຫດຜົນທັງໝົດນີ້ເຮັດໃຫ້ ຫາດເມຍໂທສ ໄດ້ຮັບການຈັດອັນດັບໃຫ້ເປັນຫາດຊາຍທີ່ດີທີ່ສຸດໃນເກຣັກຫຼາຍເຖິງ 12 ຄັ້ງ.

ຖ້າຫາກຈະຖາມວ່າ ສະຖານທີ່ໃດສວຍງາມທີ່ສຸດຄົງຈະຕອບໄດ້ຍາກແນ່ນອນ ເພາະບໍ່ວ່າສະຖານທີ່ີໃດໆກໍສວຍງາມໄປໝົດ ຊຶ່ງສາມາດເວົ້າໄດ້ວ່າ ເກຣັກ ເປັນປະເທດທີ່ຖ້າຫາກໄດ້ມາຢ້ຽມຢາມແລ້ວຄຸ້ມຄ່າແນ່ນອນ ທັງອາຣິຍະທຳເກຣັກບູຮານ ບ້ານເມືອງ ແລະ ວິຖີຊີວິດໄປຈົນເຖິງທຳມະຊາດທີ່ສວຍງາມຈົນຍາກທີ່ຈະຢຸດບໍ່ເບິ່ງຄວາມສວຍງາມຂອງທັດສະນີຍະພາບນັ້ນໄດ້.