ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ IV ຂອງພັກ(ຕໍ່)

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 05/03/2020 08:57:01 ຈຳ​ນວນ​​ຢ້ຽມ​ຊົມ 477 ຄັ້ງ

ກ. ກອງ​ປະຊຸມ​ຄັ້ງ​ນີ້​ໄດ້​ວາງ​ຄາດໝາຍ​ສູ້​ຊົນສຳລັບ​ແຜນການ 5 ປີ ຄັ້ງ​ທີ​ສອງ (1986 -1990) ດັ່ງນີ້:
(1). ແກ້​ໄຂ​ບັນຫາທັນ​ຍາ​ຫານ ແລະ ອາຫານ​ໃຫ້​ໄດ້​ຢ່າງ​ໜັກແໜ້ນບົນ​ພື້ນຖານ​ແຫ່ງ​ການ​ຂະຫຍາຍ​ການ​ກະ​ສິກຳ​ຢ່າງ​ຮອບ​ດ້ານ.
   ໜ້າທີ່​ໃຈກາງ​ຂອງ​ພວກ​ເຮົາ​ໃນ​ໄລຍະ​ນີ້ ແມ່ນ​ສຸມ​ກໍາ​ລັງ​ເຂົ້າໃສ່​ການ​ແກ້​ໄຂ​ບັນຫາ​ທັນ​ຍາ​ຫານ ແລະ ອາຫານໃຫ້​ໄດ້​ຢ່າງ​ໜັກ, ແໜ້ນ, ສູ້​ຊົນຜະ ລິດ​ທັນ​ຍາ​ຫານ​ສະເລ່ຍ 450-500 ກິໂລ​ຕໍ່​ຄົນ​ຕໍ່​ປີ, ທັງໃຫ້ມີ​ ຜະລິດຕະພັນກະສິ​ກໍາ​ທີ່ເປັນ​ ສິນຄ້າ​ຫຼາຍ​ພໍ​ສົມຄວນ ເພື່ອ ເປັນສິນຄ້າ​ຂາ​ອອກ ແລະ ເປັນ ວັດຖຸ​ດິບ​ປ້ອນ​ອຸດ​ສາ​ຫະ​ກໍາ ເບົາ ແລະ ອຸດ​ສາ​ຫະ​ກໍາ​ປຸງ​ແຕ່ງ​ຢູ່​ພາຍ​ໃນ​ປະ​ເທດ. ທຸກ​ ບໍລິເວນ, ທຸກ​ທ້ອງຖິ່ນຕ້ອງ​ສູ້ ຊົນ​ຍົກ​ປະລິມານ​ຜົນ​ຜະລິດ​ທັນ​ຍາ​ຫານ​ຂຶ້ນ​ດ້ວຍ​ການ​ນາໍ​ໃຊ້ບັນດາ​ວິທີ​ການເຕັກນິກ​ຂອງ​ການ​ກະເສດ​ສຸມ ໂດຍ​ສອດຄ່ອງ​ກັບຄວາມ​ສາມາດ ແລະ ຄວາມ​ຮຽກຮ້ອງ​ຕົວ​ຈິງ​ຂອງ​ຕົນ, ຕັ້ງໜ້າ​ຂະຫຍາ​ຍ​ການ​ປູກ​ຕົ້ນໄມ້​ອຸດ​ສາ​ຫະ​ກາໍ​ໄລຍະ​ສັ້ນ, ໄລຍະ​ຍາວ, ຕົ້ນໄມ້ກິນ​ໝາກ, ຕົ້ນໄມ້​ໃຫ້​ນ້ຳ​ມັນ, ຕົ້ນໄມ້​ໃຫ້​ໄຍ, ຕົ້ນໄມ້​ທີ່​ເປັນ​ຢາ ແລະ ອື່ນໆ. ຂະຫຍາຍ​ການ​ລ້ຽງສັດ​ຢູ່​ໃນ​ແຕ່​ລະ​ຄອບຄົວ​ເປັນ​ສຳ​ຄັນ.
(2). ຈໍາກັດ ແລະ ກ້າວ​ໄປ​ເຖິງ​ຢຸດຕິ​ການ​ຖາງ​ປ່າ​ເຮັດ​ໄຮ່​ໂດຍພື້ນ​ຖານ.
   ການ​ຖາງ​ປ່າ​ເຮັດ​ໄຮ່​ແບບ​ຊະຊາຍ​ຍັງ​ມີ​ລັກສະນະແຜ່​ລາມຫຼາຍ ແລະ ເປັນ​ໄພ​ອັນ​ຕະ​ລາຍ​ສໍາ​ລັບ​ປະເທດ​ເຮົາ ໃນ​ໄລຍະ​ນັ້ນ ຍ້ອນ​ຄວາມ​ຈໍາ​ເປັນ​ພາວະ​ວິໄສ​ຂອງ​ການ​ດໍາ​ລົງ​ຊີວິດ​ຂອງ​ປະຊາຊົນ, ດັ່ງນັ້ນ; ອຳນາດ​ການ​ປົກຄອງ​ແຕ່​ລະ​ທ້ອງຖິ່ນ​ຕ້ອງ​ໄດ້​ມີ​ແຜນການ ລະອຽດ​ເພື່ອ​ສ້າງ​ເງື່ອນໄຂ, ແນະ​ນໍາ ແລະ ຊ່ວຍເຫຼືອ​ປະຊາຊົນ​ເຜົ່າຕ່າງໆ​ໃນ​ທຸກ​ດ້ານ​ແນໃສ່​ໃຫ້​ພວກ​ເຂົາ​ທໍາ​ມາ​ຫາ​ກິນ​ແບບ​ຄົງ​ທີ່ ແລະ ມີຊີວິດ​ການ​ເປັນ​ຢູ່​ທີ່​ດີ​ຂຶ້ນ, ຂະແໜງການ​ກະ​ສິ​ກໍາ-​ປ່າໄມ້ ເປັນ​ເຈົ້າການ​ສົມທົບ​ກັບ​ຂະ​ແໜງການ​ຕ່າງໆ​ສ້າງ​ໂຄງການ​ທັນ​ຍາ​ຫານ ແລະ ອາ​ຫານ ໃຫ້​ພຽງພໍ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ປະຊາຊົນ, ກ້າວ ໄປ​ເຖິງ​ການ​ຢຸດຕິ​ການ​ຖາງ​ປ່າ​ເຮັດ​ໄຮ່ ໂດຍ​ມີ​ມາດ​ຕະການ​ອັນ​ລະອຽດ, ຄົບ​ຊຸດ; ວາງ​ແຜນການຂະຫຍາຍ​ປ່າໄມ້​ຢ່າງ ຮອບດ້ານ, ສະກັດ​ກັ້ນການ​ຈູດ​ປ່າ ແລະ ການ​ຖາງ​ປ່າ​ເຮັດ​ໄຮ່​ແບບ​ຊະຊາຍ ໂດຍ​ສະເພາະ​ບໍລິເວນ​ປ່າ​ຍອດ​ຫ້ວຍ; ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາຊົນ ຢູ່​ໃນ​ເຂດ​ພູ​ດອຍ​ໃຫ້​ດີ​ຂຶ້ນ​ທັງ​ຂະຫຍາຍ​ການ​ຜະລິດ​ກະ​ສິກຳ, ຕິດພັນກັບ​ການ​ປູກ​ພືດ​ຕາມ​ລະດູ​ການ ໂດຍ​ນາໍ​ໃຊ້​ເຕັກນິກ​ວິທະຍາສາດ​ເຂົ້າຊ່ວຍ, ທັງ​ຈັດ​ຕັ້ງ​ການ​ຂຸດ​ຄົ້ນ​ຜະລິດ​ຕະ​ພັນ​ໄມ້​ຊະນິດ​ຕ່າງໆ​ທີ່​ໄດ້​ຮັບ ອະນຸຍາດ, ເຮັດ​ໃຫ້ການ​ຂຸດ​ຄົ້ນ​ຕິດ​ພັນ​ກັບ​ການ​ຂົນສົ່ງ ແລະ ການປຸງ​ແຕ່ງ​ ເພື່ອ​ຍົກ​ຄຸນ​ນະ​ພາບ​ຂອງ​ຜະລິດ​ຕະ​ພັນ​ໃຫ້​ສູງ​ຂຶ້ນ, ປະຕິບັດແຜນການ​ຂຸດ​ຄົ້ນ​ໄມ້​ຢ່າງ​ມີ​ຈຸດ​ສຸມ, ປະຕິບັດ​ຢ່າງ​ເຄັ່ງ​ຄັດ​ຂໍ້​ກໍາ​ນົດກ່ຽວ​ກັບ​ການ​ຂຸດ​ຄົ້ນ​ໄມ້ ແລະ ປູກ​ໄມ້​ໃຫ້​ເປັນ​ປ່າ​ຫຼາຍ​ຂຶ້ນ.
(3). ສ້າງ​ໂຄງ​ປະກອບ ກະ​ສິກຳ-​ປ່າ​ໄມ້​-​ອຸດ​ສາ​ຫະ​ກໍາ ທີ່​ສົມເຫດ​ສົມ​ຜົນ​ໃຫ້​ເປັນ​ຕົວ​ເປັນ​ຕົນ​ຂຶ້ນ​ໃນ​ຂັ້ນ​ຕົ້ນ.
   ຍ້ອນ​ກະ​ສິ​ກໍາ-​ປ່າໄມ້ ເປັນ​ທ່າແຮງ​ດ້ານ​ທໍາ​ມະ​ຊາດ​ຂອງ​ປະເທດ​ເຮົາ, ຈຶ່ງ​ມີ​ຄວາມ ຈຳ​ເປັນ​ຕ້ອງ​ໄດ້​ປົກ​ປັກ​ຮັກສາ​ເພື່ອ​ເຮັດ​ໃຫ້ ກະສິ​ກໍາ-​ປ່າໄມ້ ເປັນ​ພື້ນຖານ​ໃຫ້​ແກ່​ການ​ຂະຫຍາຍ​ອຸດ​ສາ​ຫະ​ກຳ​ຢ່າງແທ້​ຈິງ ໃນ​ການ​ສ້າງ​ໂຄງ​ປະກອບກະ​ສິ​ກໍາ-​ປ່າໄມ້ ອຸດ​ສາ​ຫະ​ກໍາທີ່ສົມ​ເຫດ​ສົມ​ຜົນ​ໃຫ້​ເປັນ​ຕົວ​ເປັນ​ຕົນ​ຂຶ້ນ​ແຕ່​ຫົວທີ, ເຮັດ​ໃຫ້​ກະ​ສິກຳ​-ປ່າໄມ້​ກັບ​ອຸດ​ສາ​ຫະ​ກາໍ​ຕິດ​ພັນ​ກັນ​ຢູ່​ໃນ​ແຕ່​ລະ​ທ້ອງ​ຖິ່ນ. ໃນ​ໄລ​ຍະ​ທໍາ​ອິດຂອງ​ສະໄໝ​ຂ້າມ​ຜ່ານ ພວກ​ເຮົາ​ຈະ​ຕ້ອງ​ເອົາໃຈໃສ່​ຂະຫຍາຍ​ບັນດາຂະແໜງການ​ອຸດ​ສາ​ຫະ​ກໍາ​ທີ່​ຮັບ​ໃຊ້​ການ​ຜະລິດ​ດ້ານ ກະ​ສິ​ກໍາ-​ປ່າ ໄມ້, ຄົມມະນາຄົມ​ຂົນສົ່ງ, ການ​ສົ່ງ​ອອກ​ສິນຄ້າ​ປະເພດ​ຕ່າງໆ ເພື່ອເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ.
(4). ດໍາ​ເນີນ​ການ​ແບ່ງ​ເຂດ​ເສດຖະກິດ, ວາງ​ແຜນ​ການ​ກຳ​ນົດ​ກ່ຽວ ກັບ​ການ​ກໍ່ສ້າງ​ຊົນນະບົດ ແລະ ຕົວ​ເມືອງ.
   ພວກ​ເຮົາ​ຕ້ອງ​ຄົ້ນຄວ້າ​ກ່ຽວ​ກັບ​ການ​ແບ່ງ​ເຂດ​ເສດ ຖະກິດ ເພື່ອເປັນ​ພື້ນຖານ​ໃຫ້​ແກ່​ການ​ສ້າງ​ແຜນການ​ພັດທະນາ​ໄລຍະ​ຍາວ ສາໍລັບ​ແຕ່​ລະ​ເຂດ​ແນໃສ່​ເສີມ​ຂະຫຍາຍ​ຄວາມ​ອາດ​ສາມາດ​ບົ່ມ​ຊ້ອນ ທາງ​ດ້ານ​ເສດຖະກິດ​ຂອງ​ແຕ່​ລະ​ທ້ອງຖິ່ນ​ຢ່າງ​ສຸດ​ຂີດ.
   ພ້ອມ​ກັນ​ກັບ​ການ​ແບ່ງ​ເຂດ​ເສດຖະກິດ​ນັ້ນ ພວກ​ເຮົາ​ຕ້ອງ​ດໍາເນີນ​ການ​ວາງ​ແຜນ​ກໍາ​ນົດ​ກ່ຽວ​ກັບ​ການ​ສ້າງ​ຊົນນະບົດ ແລະ ຕົວເມືອງ, ເອົາໃຈໃສ່​ສ້າງ​ບັນດາ​ໃຈກາງເສດ​ຖະ​ກິດ​-​ວັດ​ທະ​ນະ​ທໍາໃໝ່ຂຶ້ນ​ເທື່ອ​ລະ​ກ້າວ​ຢູ່​ໃນ​ແຕ່​ລະ​ຕາແສງ ພ້ອມ​ກັນ​ນັ້ນ​ພວກ​ເຮົາ​ຕ້ອງເອົາໃຈໃສ່​ສ້າງ​ບັນດາ​ເທດສະບານເມືອງ, ເທດສະບານ​ແຂວງ, ເຮັດໃຫ້​ເປັນໃຈກາງ​ທາງ​ດ້ານ​ການ ເມືອງ, ເສດຖະກິດ, ວັດ​ທະນະ​ ທໍາ-​ສັງຄົມ​ຂອງ​ແຕ່​ລະ​ເມືອງ, ແຕ່​ລະ​ແຂວງ ຫຼື ແຕ່​ລະ​ເຂດ​ ເພື່ອ​ປະຕິບັດວຽກງານອັນ ໃຫຍ່​ ຫຼວງ​ດັ່ງກ່າວ​ໄດ້ພວກເຮົາ​ຕ້ອງ​ປຸກລະດົມ​ຂະບວນ​ການ​ມະຫາ ຊົນ, ເສີມ​ຂະຫຍາຍ​ລັກສະນະ​ປະດິດ​ສ້າງ​ຂອງທ້ອງຖິ່ນ ແລະ ຮາກ​ຖານ, ປະຕິບັດ​ທິດ​ນຳ​ທ່ີ​ວ່າ:  ລັດ ແລະ  ປະຊາ​ຊົນ ພ້ອມ​ກັນ​ເຮັດ, ສູນ​ກາງ ແລະ ທ້ອງຖິ່ນ​ພ້ອມ​ກັນ​ເຮັດ.
(5). ຂະຫຍາຍ​ການ​ຄົມ ມະນາຄົມ​ຂົນສົ່ງ ແລະ ການ​ຕິດຕໍ່​ສື່ສານ.
   ໃນ​ໄລ​ຍະ​ທາໍ​ອິດ​ນີ້ ພວກ​ເຮົາ​ຖື​ເອົາ​ການ​ຂະຫຍາຍ​ການ​ຄົມ​ມະນາ​ຄົມ​ທາງບົກ​ເປັນ​ອັນ​ສາໍ​ຄັນ​ກວ່າ​ໝູ​ ພ້ອມ​ກັນ​ນັ້ນ​ກໍ​ຕ້ອງ​ນາໍ​ໃຊ້​ທຸກຄວາມ​ອາດ​ສາມາດຂອງ​ການ​ຄົມ ມະນາຄົມ​ທາງ​ນ້ຳ​ໃນ​ທົ່ວ​ປະ​ເທດ. ນາໍ​ໃຊ້​ການ​ຄົມມະນາຄົມ​ທາງ​ອາກາດ​ຢ່າງ​ເໝາະ​ສົມ, ມີ​ແຕ່​ປະຕິບັດແນວທາງ​ດັ່ງກ່າວ​ໃຫ້​ສາໍ​ເລັດ​ເທົ່າ​ນັ້ນ ພວກ​ເຮົາ​ຈຶ່ງ​ຈະ​ຂຸດ​ຄົ້ນ​ຄວາມອາດ​ສາມາດ​ບົ່ມ​ຊ້ອນທາງ​ດ້ານ​ເສດ​ຖະ​ກິດ​ອັນ​ອຸດົມ​ຮັ່ງມີຢູ່​ໃນ​ບໍ​ລິ​ເວນ​ຕ່າງໆ​ຂອງ​ປະເທດ​ເຮົາ​ໄດ້, ຈຶ່ງ​ຈະ​ມ້າງ​ເສດ​ຖະ​ກິດ​ທໍາ​ມະ​ຊາດໄດ້, ອັນ​ນັ້ນ​ມັນ​ກໍ​ເປັນ ເງື່ອນໄຂ​ອັນ​ສຳ​ຄັນ​ສໍາ​ລັບ​​ລຶບ​ລ້າງ​ຮ່ອງຮອຍ ກ່ຽວ​ກັບ​ການ​ແບ່ງ​ສິ່ງ​ທີ່​ຕົກ​ຄ້າງ​ມາ​ຈາກ​ລະ ບອບ​ສັກ​ດີ​ນາ, ເພື່ອ​ປັບປຸງ ແລະ ເພີ່ມ​ທະວີ​ສະຕິຊາດ​ໃຫ້​ເປັນ​ເອກະ​ພາບ, ປັບປຸງ​ວຽກ ງານ​ຕິດຕໍ່​ສື່ສານ​ໃຫ້​ດີ​ຂຶ້ນ​ຢ່າງ​ຈະແຈ້ງ,  ຮັບປະກັນ​ການ​ສື່ສານ​ລະຫວ່າງ​ສູນກາງ​ກັບ​ແຂວງ ແລະ ເມືອງ​ຢ່າງ​ທັນ​ການ, ຕອບ​ສະໜອງ​ຄວາມ​ຕ້ອງການທາງ​ດ້ານ​ໄປສະນີ​ຂອງ​ປະຊາ​ຊົນ.
(6). ນາໍ​ໃຊ້​ຄວາມ​ກ້າວ ໜ້າ​ທາງ​ດ້ານ​ວິທະຍາ​ສາດ​-​ເຕັກນິກ, ຈັດ​ຕັ້ງ​ວຽກ​ງານ​ສໍາ​ຫຼວດ​ພື້ນ​ຖານ.
   ປະເທດ​ເຮົາ​ເປັນ​ປະເທດ​ທີ່​ດ້ອຍ​ພັດທະນາ, ແຕ່​ຊ້ຳ​ພັດ​ຢູ່​ໃນຍຸກສະໄໝແຫ່ງ​ການ​ຂະຫຍາຍຕົວ​ຢ່າງ​ໄວວາ​ຂອງ​ວິທະຍາ​ສາດ​-​ເຕັກນິກ. ດັ່ງນັ້ນ ພວກ​ເຮົາ​ຈະ​ຕ້ອງ​ວາງ​ແຜນ​ນະໂຍບາຍ​ກ່ຽວ​ກັບ​ການນຳ ໃຊ້​ຄວາມ​ກ້າວໜ້າ​ທາງ​ດ້ານ​ວິທະຍາ​ສາດ​-​ເຕັກນິກ ໃຫ້​ແທດເໝາະກັບ​ເງື່ອນໄຂ ແລະ ຄວາມ​ອາດ​ສາມາດ​ຂອງ​ຕົນ ເພື່ອ​ໃຫ້​ມີ​ປະສິດທິ​ຜົນ​ທາງ​ດ້ານ​ເສດຖະກິດ​ຢ່າງ​ແທ້​ຈິງ. ພວກ​ເຮົາ​ຕ້ອງ​ຕິດຕາມ​ຢ່າງ ໃກ້​ຊິດ​ກວ່າເກົ່າ​ກ່ຽວ​ກັບ​ຜົນ​ສໍາ​ເລັດ​ໃນ​ຂົງເຂດ​ວິທະຍາ​ສາດ​ນາໍ​ໃຊ້, ເປັນຕົ້ນ​ໃນ​ບັນດາ​ຂະແໜງການ​ຊີວະ​ສາດ, ຈຸນ​ລະ​ຊີວະ​ສາດ, ເຄ​ມີສາດ ແລະ ອື່ນໆ. ຄົ້ນຄວ້າ​ກ່ຽວ​ກັບ​ການ​ໝູນ​ໃຊ້​ບັນດາ​ຜົນ​ສໍາ​ເລັດ ເຫຼົ່ານັ້ນ​ເຂົ້າ​ໃນ​ຂະແໜງການ​ກະ​ສິກຳາ, ປ່າໄມ້, ອຸດ​ສາ​ຫະ​ກາໍ​ປຸງແຕ່ງ​ຜະລິດ​ຕະ​ພັນ​ກະ​ສິ​ກໍາ -ປ່າ​ໄມ້ ແລະ  ຂະແໜງການ​ຜະລິດ​ອື່ນໆ. ​ຄຽງ​ຄູ່ກັບ​ການ​ນາໍ​ໃຊ້​ຄວາມ​ກ້າວໜ້າ​ທາງ​ດ້ານ​ວິທະຍາ​ສາດ​-​ເຕັກນິກ ຈະ​ຕ້ອງ​ບູລະນະ​ອົງການ​ຈັດ​ຕັ້ງ​ທີ່​ເຮັດ​ວຽກ​ງານ​ສາໍ​ຫຼວດ​ພື້ນຖານ, ຈະ​ຕ້ອງ​ຜັນ​ຂະຫຍາຍ​ການ​ສໍາ​ຫຼວດ​ຊັບພະຍາກອນ​ປ່າໄມ້ ແລະ ການ​ສາໍ​ຫຼວດ​ຊອກ​ບໍ່​ແຮ່​ໃຫ້​ດີ​ຂຶ້ນ​ກວ່າ​ເກົ່າ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110