ຫົວ​ຂໍ້ : ທ່ານ ສີຈິ້ນຜິງ ເນັ້ນໃຫ້ສ້າງຕັ້ງລະບົບຄັງສຳຮອງວັກຊິນແຫ່ງຊາດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 05/03/2020 09:08:20 ຈຳ​ນວນ​ຜູ້​ເຂົ້າ​ຢ້ຽມ​ຊົມ 415 ຄັ້ງ

  ໃນ​ເວລາ​ໄປ​ສຳຫຼວດ​ກວດກາ​ວຽກ​ງານ​ຄົ້ນຄວ້າ​ວິທະຍາສາດ ເພື່ອ​ປ້ອງ​ກັນ ແລະ ຄວບ​ຄຸມພະ​ຍາດ COVID-19 ຢູ່​ນະຄອນຫຼວງ​ປັກ​ກິ່ງ, ໃນ​ວັນ​ທີ 2 ມີນາ​ຜ່ານ​ມາ, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ກ່າວ​ວ່າ: ຢາ​ວັກ​ຊິນ ມີ​ຄວາມ​ສຳຄັນ​ຫຼາຍ​ຕໍ່​ການ​ປ້ອງ​ກັນ ແລະ ຄວບ​ຄຸມພະ​ຍາດ. ຈີນ ຕ້ອງ​ເລັ່ງ​ລັດ​ຊຸກຍູ້​ການ​ຄົ້ນຄວ້າ ແລະ ພັດທະນາ​ວັກ​ຊິນ ຕາມ​ທິດ​ວິທະຍາສາດ​ເຕັກນິກ ທີ່​ມີ​ຢູ່​ແລ້ວ  ພ້ອມ​ທັງ​ຕິດຕາມ​ສະພາບ​ຄວາມ​ຄືບ​ໜ້າດ້ານ​ການ​ຄົ້ນຄວ້າ​ພັດທະນາ​ວັກ​ຊິນ​ຂອງ​ຕ່າງປະເທດ​ຢ່າງ​ໃກ້ຊິດ, ເພີ່ມ​ທະວີ​ການ​ຮ່ວມ​ມື​ກັບ​ຕ່າງປະເທດ ເພື່ອ​ຍາດ​ແຍ່ງ​ການ​ຊຸກຍູ້​ຢາ​ວັກ​ຊິນ ໃຫ້​ໄດ້​ຮັບ​ການ​ທົດ​ລອງ​ນຳ​ໃຊ້​ໃນ​ການ​ປິ່ນປົວ ແລະ ຜະລິດ​ເປັນ​ສິນຄ້າ​ປ້ອນ​ເຂົ້າ​ຕະ​ຫຼາດ. ຕ້ອງ​ສ້າງຕັ້ງ​ລະບົບ​ຄັງ​ສຳຮອງ​ວັກ​ຊິນ​ແຫ່ງ​ຊາດ, ກະກຽມ​ຢ່າງ​ຮອບ​ຄອບ ເພື່ອ​ວຽກ​ງານ​ປ້ອງ​ກັນ ແລະ ຄວບ​ຄຸມພະ​ຍາດ​ທີ່​ອາດ​ຈະ​ສືບຕໍ່​ປະຕິບັດ​ໄປ​ອີກ.
  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ຕ້ອງ​ວາງ​ແຜນ​ວຽກ​ງານ​ຊອກ​ຫາ​ແຫຼ່ງ​ກຳເນີດ​ຂອງ​ເຊື້ອ​ພະຍາດ ກໍ​ຄື​ຊ່ອງ​ທາງ​ການ​ແຜ່​ລະບາດ​ໃຫ້​ເປັນ​ເອກະ​ພາບ​ກັນ, ຊອກ​ໃຫ້​ເຫັນ​ຢ່າງ​ແນ່ນອນ​ວ່າ ເຊື້ອ​ໄວ​ຣັດ ແມ່ນ​ມາ​ຈາກ​ໃສ, ຈະ​ລະບາດ​ໄປ​ບ່ອນ​ໃດ, ຍົກ​ສູງ​ຄວາມ​ຖືກຕ້ອງ​ຊັດ​ເຈນ ແລະ ມີ​ປະສິດທິພາບ​ໃນ​ການ​ຫາ​ເຊື້ອ​ພະ​ຍາດ.
  ຂະນະ​ດຽວ​ກັນ, ໃນ​ກອງ ​ປະຊຸມ​ສຳ​ມະ​ນາ​ວຽກງານສາ ທາລະນະ​ສຸກ​ຢູ່​ມະຫາວິທະ ຍາໄລ​ຊິ່ງ​ຮວາ ທ່ານ ສີ​ຈິ້ນຜິງ ກ່າວ​ວ່າ: ຄວາມ​ໝັ້ນຄົງ​ດ້ານ​ສາທາລະນະ​ສຸກ ແມ່ນ​ສິ່ງທ້າ​ ທາຍ​ຮ່ວມ​ກັນ​ຂອງ​ມວນ​ມະ ນຸດ, ບັນດາ​ປະເທດ​ຕ້ອງ​ຮ່ວມ​ມື​ກັນ. ປັດຈຸບັນ, ພະຍາດ COVID-19 ໄດ້​ຈະ​ບາດ​ຢູ່​ຫຼາຍ​ ປະເທດ, ຈີນ ຄວນ​ເພີ່ມ​ທະວີ​ ການ​ແລກປ່ຽນ​ກັບ​ອົງການ​ອະນາໄມ​ໂລກ, ເພີ່ມ​ທະວີ​ການ​ຮ່ວມ​ມື​ໃນ​ການ​ຄົ້ນຄວ້າ​ດ້ານ​ຕ່າງໆເຊັ່ນ: ຊອກ​ຫາ​ແຫຼ່ງ​ກຳເນີດ​ຂອງ​ພະຍາດ, ຢາ​ປົວ​ພະຍາດ, ຢາ​ວັກ​ຊິນ, ກວດ​ເຊື້ອ​ພະຍາດ ແລະ ອື່ນໆ​ກັບ​ບັນດາ​ປະເທດ ໂດຍ​ສະເພາະ​ປະເທດ​ທີ່​ພະຍາດ​ລະບາດ​ຢ່າງ​ໜັກໜ່ວງ, ແບ່ງປັນ​ຂໍ້​ມູນ​ຂ່າວສານ​ໃນ​ການ​ຄົ້ນຄວ້າ, ຮ່ວມ​ກັນ​ຄົ້ນຄວ້າ​ນະໂຍບາຍ​ຮັບ​ມື​ກັບ​ພະຍາດ ເພື່ອ​ປະ ກອບສ່ວນ​ທາງ​ສະຕິປັນຍາ ແລະ​ ກຳລັງ​ແຮງ​ເຂົ້າ​ໃນ​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ຂອງ​ມວນ​ມະ​ນຸດ.
  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ຕ້ອງ​ອອກແຮງ​ຈົນ​ສຸດ​ຄວາມ​ສາມາດ​ກອບ​ກູ້​ຊີວິດ​ຜູ້​ຕິດເຊື້ອ​ພະຍາດ​ໃຫ້​ຫຼາຍ​ກວ່າ​ເກົ່າ, ຖື​ເປັນ​ວຽກ​ຮີບ​ດ່ວນ ແລະ ສຳຄັນ​ທີ່​ສຸດ ໃນ​ປັດ​ຈຸ​ບັນ. ຕ້ອງ​ເລັ່ງ​ລັດ​ການ​ຄົ້ນຄວ້າ​ຢາ​ວັກ​ຊິນ, ການ​ປິ່ນປົວ​ຄວນ​ປະສົມ​ປະສານ​ກັນ ລະຫວ່າງ ຢາພື້ນເມືອງ​ຈີນ ແລະ ຢາ​ຫຼວງ, ເລັ່ງ​ລັດ​ການ​ເຜີຍແຜ່ ແລະ ນຳ​ໃຊ້​ຢາ​ທີ່​ຄົ້ນຄວ້າ​ອອກ​ມາ, ຖືກ​ນຳ​ໃຊ້​ໄດ້ຜົນ​ແລ້ວ. ຂະນະດຽວ​ ກັນ, ຕ້ອງ​ຄັດ​ເລືອກ​ເອົາ​ຢາ ​ທີ່ມີປະສິດ​ທິ​ຜົນ​ອີກ​ຈຳນວນ​ໜຶ່ງ ສະໜອງ​ໃຫ້​ຕາມ​ຄວາມ​ຮຽກຮ້ອງ​ຕ້ອງການ​ໃນ​ການ​ກອບ​ກູ້​ຊີວິດ​ຢູ່​ແນວ​ໜ້າ ແລະ ຊອກ​ຫາ​ວິທີ​ປິ່ນປົວ​ໃໝ່ ເພື່ອ​ປ້ອງ​ກັນ​ຄົນ​ເຈັບ​ທີ່​ມີ​ອາການ​ບໍ່​ຮຸນ​ແຮງ​ບໍ່​ໃຫ້​ກາຍເປັນ​ຄົນ​ເຈັບ​ໜັກ. ຕ້ອງ​ເພີ່ມ​ທະວີ​ການ​ບຳບັດ​ຈິດໃຈ​ໃຫ້​ຜູ້​ຕິດເຊື້ອ​ພະ ຍາດ ແລະ ຄອບ ຄົວ​ຂອງ​ຜູ້​ເສຍ​ຊີວິດ​ຢ່າງ​ຮອບ​ດ້ານ. 
  ຕາມ​ແຫຼ່ງ​ຂ່າວ​ຈາກ​ຊີ​ອາ​ໄອ, ຈີນ ແມ່ນ​ປະເທດ​ໃຫຍ່​ທີ່​ມີ​ປະຊາກອນ 1,4  ຕື້​ຄົນ, ການ​ປ້ອງ​ກັນ ແລະ ແກ້​ໄຂ​ສະພາບ​ພະຍາດ​ຮ້າຍ​ແຮງ ແລະ ຄວາມ​ສ່ຽງ​ດ້ານ​ສາທາລະນະ​ສຸກ​ທີ່​ໜັກໜ່ວງ ແລະ ສຸກ​ເສີນ ແມ່ນ​ວຽກ​ງານ​ສຳຄັນ​ສະເໝີ​ຕົ້ນ​ສະເໝີ​ປາຍ​ທີ່​ໂຍະຍານ​ບໍ່​ໄດ້. ຕ້ອງ​ປັບປຸງ​ບູລະນະ​ເຄືອ​ຂ່າ​ຍ​ເຝົ້າ​ຕິດຕາມ​ສະພາບ​ພະຍາດ​ຮ້າຍ​ແຮງ​ແຫ່ງ​ຊາດ, ປັບປຸງ​ລະບົບ​ກົດໝາຍ ແລະ ກົດ​ລະບຽບ​ໃຫ້​ສົມ​ບູນ, ເພີ່ມ​ທະວີ​ການ​ຄົ້ນຄວ້າ​ເຕັກນິກ​ທີ່​ກ້າວໜ້າ ແລະ ບຳລຸງ​ສ້າງ​ຜູ້​ມີ​ຄວາມ​ຮູ້​ຄວາມ​ສາມາດ​ໃນ​ເຕັກນິກ​ຂັ້ນ​ສຸດ​ຍອດ, ຍົກ​ສູງ​ຄວາມ​ສາມາດ ແລະ ລະດັບ​ຮັບ​ມື​ກັບ​ເຫດການ​ສາທາລະນະ​ສຸກ​ທີ່​ຮ້າຍ​ແຮງ ແລະ ສຸກ​ເສີນ​ໂດຍ​ໄວ. 
  ໃນ​ສະຖານະ​ການ​ທີ່​ພະ ຍາດ​ລະບາດ​ຮ້າຍ​ແຮງ, ທ່ານ ສີ​ຈິ້ນ​ຜິງ  ກ່າວ​ເນັ້ນ​ວ່າ: ຈີນ ຕ້ອງ​ເອົາ​ຊະນະ​ບັ້ນ​ປ້ອງ​ກັນ ແລະ ຄວບ​ຄຸມພະ​ຍາດ​ຄັ້ງ​ນີ້, ສາມາດ​ກຳ​ໄດ້​ເຕັກນິກ​ວິທະຍາ ສາດ​ສຳຄັນ​ທີ່​ເປັນ​ຊັບ​ສິນ​ທາງ​ປັນຍາ​ຂອງ​ຕົນ ໃຫ້​ຫຼາຍ​ກວ່າ​ເກົ່າ, ຄົ້ນຄວ້າ​ຜະລິດ​ຕະ​ພັນ​ທີ່​ດີເດັ່ນ​ຫຼາຍ​ກວ່າ​ເກົ່າ ເພື່ອ​ປະກອບສ່ວນ​ຫຼາຍ​ກວ່າ​ເກົ່າ ເຂົ້າ​ໃນ​ການ​ຮັກສາ​ຄວາມ​ປອດ​ໄພ​ດ້ານ​ຊີວິດ ແລະ ສຸຂະພາບ​ຮ່າງກາຍ​ຂອງ​ປະຊາຊົນ, ຮັກສາ​ຄວາມ​ໝັ້ນຄົງ​ດ້ານ​ຍຸດທະສາດ​ຂອງ​ປະເທດ​ຊາດ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110