ຫົວ​ຂໍ້ : ດານັງ ເປັນແຫຼ່ງທ່ອງທ່ຽວໄດ້ຮັບຄວາມນິຍົມປອດໄພຂອງໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 05/03/2020 09:09:34 ຈຳ​ນວນ​ຜູ້​ເຂົ້າ​ຢ້ຽມ​ຊົມ 437 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ເວັບ​ໄຊ Trip Advisor ຊຶ່ງ​ເປັນ​ເວັບ​ໄຊ​ຕີ​ລາຄາ​ການທ່ອງທ່ຽວ​ທີ່​ມີ​ອິດ​ທິ​ພົນ​ຊື່​ສຽງ​ໃນ​ໂລກປະກາດ​ວ່າ:  ນະຄອນ​ດາ​ນັງ ທາງ​ພາກ​ກາງ ສສ ຫວຽດນາມ ໄດ້​ຮັບ​ການ​ຄັດ​ເລືອກ ແມ່ນ 1 ໃນ 10 ສະຖານທີ່​ທ່ອງ​ທ່ຽວ​ທີ່​ໄດ້​ຮັບ​ຄວາມ​ນິຍົມ​ຊົມ​ຊອບ​ທີ່​ສຸດ​ໃນ​ໂລກ.
  ຂ່າວ​ລະບຸ​ວ່າ: ນະຄອນ​ດາ​ນັງ ໄດ້​ຖືກ​ຈັດ​ຢູ່​ອັນ​ດັບ​ທີ 7 ໃນ​ບັນຊີ​ລາຍ​ຊື່​ສະຖານທີ່​ທ່ອງ​ທ່ຽວ 25 ແຫ່ງ​ທີ່​ໄດ້​ຮັບ​ຄວາມ​ນິຍົມ​ຊົມ​ຊອບ​ທີ່​ສຸດ​ໃນ​ໂລກ. ຍ້ອນ​ວ່າ ນະຄອນ​ດາ​ນັງ ມີ​ທັດສະນີ​ຍະ​ພາບ​ທຳ​ມະ​ຊາດ​ທີ່​ພົ້ນ​ເດັ່ນ, ອາຫານ​ການ​ກິນ​ພິເສດ, ລະບົບ​ເຂດ​ທ່ອງ​ທ່ຽວ​ພັກຜ່ອນ​ບຳລຸງ​ສຸຂະພາບ​ທີ່​ມີ​ຄຸນ​ນະ​ພາບ, ຊາວ​ທ້ອງຖິ່ນ​ຮັກແພງ​ແຂກ​ຄົນ ແລະ ສະໜິດ​ສະ​ໜົມ.
  ທ່ານ ນາງ ເຈືອງ ​ທິ​ຮົ່ງ​ແຮັງ ຫົວໜ້າ​ພະ​ແນ​ກ​ທ່ອງ​ທ່ຽວ ນະຄອນ​ດາ​ນັງ ໃຫ້​ຮູ້​ວ່າ: ຂະແໜງ​ທ່ອງ​ທ່ຽວ​ນະຄອນ ພວມ​ຕັ້ງໜ້າ​ກໍ່ສ້າງ​ແຜນການ​ໂຄສະນາ​ແນະນຳ​ນະຄອນ​ດາ​ນັງ ແມ່ນ​ສະຖານທີ່​ທ່ອງ​ທ່ຽວ​ທີ່​ມີ​ຄວາມ​ນິຍົມ​ຊົມ​ຊອບ ແລະ ປອດ​ໄພ​ໃຫ້​ແກ່​ແຂກ​ທ່ອງ​ທ່ຽວ ທັງ​ຢູ່​ພາຍ​ໃນ ແລະ ຕ່າງ​ປະ​ເທດ. 
  ທ່ານ ນາງ ເຈືອງ​ ທິ​ຮົ່ງ​ແຮັງ ກ່າວ​ຕື່ມ​ວ່າ: ນະຄອນ​ດາ​ນັງ ຈະ​ຈັດ​ຕັ້ງ​ກິດ​ຈະ​ກໍາ​ກະຕຸກ​ຊຸກຍູ້​ການທ່ອງທ່ຽວ​ໃນ​ຂອບ​ເຂດ​ທົ່ວ​ນະ​ຄອນ. ການ​ກະຕຸກ​ຊຸກຍູ້​ການທ່ອງທ່ຽວ​ຂອງ​ພວກ​ຂ້າພະເຈົ້າ​ບໍ່​ແມ່ນ​ການ​ຫຼຸດ​ລາຄາ​ການ​ບໍລິການ ຊຶ່ງ​ພວກ​ຂ້າພະເຈົ້າ​ຈະ​ກະຕຸກ​ຊຸກຍູ້​ການທ່ອງທ່ຽວ​ຕາມ​ທິດ ສ້າງ​ຜະລິດ​ຕະ​ພັນ​ການທ່ອງທ່ຽວ​ໃໝ່, ເພີ່ມ​ທະວີ​ການ​ບໍລິການ, ຫຼັງ​ຈາກ​ນັ້ນ​ຈຶ່ງ​ຫຼຸດ​ລາ​ຄາ. ເພື່ອ​ປະຕິບັດ​ໄດ້​ເລື່ອງ​ນີ້ ພວກ​ຂ້າພະເຈົ້າ​ຕ້ອງ​ມີ​ການ​ເຂົ້າ​ຮ່ວມ​ຂອງ​ບັນດາ​ບໍລິສັດ​ການບິນ, ບັນດາ​ສະຖານທີ່​ທ່ອງ​ທ່ຽວ​ໃຫຍ່, ບັນດາ​ບໍລິສັດ​ການທ່ອງທ່ຽວ ກໍຄື​ບັນດາ​ຮາກ​ຖານ​ດຳເນີນ​ທຸລະ​ກິດ ແລະ ຮັບ​ໃຊ້​ແຂກ​ທ່ອງ​ທ່ຽວ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110