ຫົວ​ຂໍ້ : ນາຍົກລັດຖະມົນຕີ ຢ້ຽມຢາມ ແລະ ໂອ້ລົມ ກອງພົນທະຫານຮາບທີ 2

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 06/03/2020 09:03:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 2964 ຄັ້ງ

   ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ດ້ວຍ​ຄະນະ  ແລະ ການ​ນຳ​ແຂວງ​ໄຊ​ຍະ​ບູ​ລີ ໄດ້​ໄປ​ຢ້ຽມຢາມ ແລະ ໂອ້​ລົມ​ຕໍ່​ນາຍ ແລະ ພົນທະ ຫານ ກອງພົນທະຫານ​ຮາບ​ທີ 2 ທີ່​ຫ້ອງ​ປະຊຸມ​ໃຫຍ່ ຂອງ​ກອງ​ພົນ​ດັ່ງ​ກ່າວ ເມື່ອ​ວັນ​ທີ 4 ມີ​ນາ​ຜ່ານ​ມາ.
   ​ກ່ອນ​ອື່ນ​ທ່ານນາຍົກ ລັດຖະມົນຕີ ໄດ້​ຮັບ​ຟັງ​ການ ​ລາຍ​ງານ​ຫຍໍ້ ສະພາບ​ການ ເຄື່ອນໄຫວ, ຊີ້​ນຳ​-​ບັນຊາ ແລະ ການ​ປະຕິບັດ​ວຽກ​ງານ​ວິຊາ​ສະເພາະ ພາຍ​ໃນ​ກອງ​ພົນທະຫານ​ຮາບ​ທີ 2 ຈາກ​ທ່ານຫົວໜ້າ​ກອງ​ພົນທະຫານ​ຮາບ​ທີ 2. ຫຼັງ​ຈາກ​ນັ້ນ, ທ່ານ​ນາຍົກລັດຖະມົນຕີ ໄດ້​ໃຫ້​ກຽດ​ໂອ້​ລົມ​ຕໍ່​ຜູ້​ເຂົ້າ​ຮ່ວມ ຊຶ່ງ​ທ່ານ​ໄດ້​ຍົກ​ໃຫ້​ເຫັນ​ສະພາບ​ການ​ພົ້ນ​ເດັ່ນ ທີ່​ເກີດ​ຂຶ້ນ​ຢູ່​ພາຍ​ໃນ ແລະ ຕ່າງປະເທດ, ໝາກຜົນ​ອັນ​ພົ້ນ​ເດັ່ນ​ຂອງ​ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ລະບອບ​ໃໝ່ ຕະຫຼອດ​ໄລຍະ45 ປີ​ທີ່​ຜ່ານ​ມາ, ກາລະ​ໂອກາດ ແລະ ສິ່ງ​ທ້າ​ທາຍ ຕໍ່​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ເຮົາ ໃນ​ປະຈຸ​ບັນ ກໍຄື ອະນາຄົດ, ປະຫວັດ ແລະ ສະພາບ​ຈຸດ​ພິເສດ​ຂອງ​ແຂວງ​ໄຊ​ຍະ​ບູ​ລີ, ມູນເຊື້ອ​ອັນ​ ດີງາມ​ຂອງ​ກອງທັບ ໂດຍ​ສະ ເພາະ ກອງ​ພົນທະຫານ​ຮາບ​ທີ 2, ດ້ວຍຄວາມ​ພະຍາຍາມ ແລະ ເອົາໃຈໃສ່ຂອງ​ພັກ​-​ລັດ ຖະບານ ຕໍ່​ການ​ສ້າງ ແລະ ປັບ ປຸງ​ກອງທັບ ໃຫ້​ມີ​ຄວາມ​ເຕີບ ​ໃຫຍ່, ໜັກ​ແໜ້ນ ແລະ ເຂັ້ມ ແຂງ​ຮອບດ້ານ ຢ່າງ​ບໍ່​ຢຸດ​ຢັ້ງ.
   ໃນ​ໂອກາດ​ດຽວ​ກັນ, ​ນາຍົກລັດຖະມົນຕີ ໄດ້​ມີ​ຄຳ​ ເຫັນ​ເນັ້ນ​ໜັກ ໃຫ້​ນາຍ ແລະ ພົນທະຫານ ທົ່ວ​ກອງພົນ ທະຫານ​ຮາບ​ທີ 2 ສືບຕໍ່ເອົາ ໃຈໃສ່​ຕື່ມ​ບາງ​ດ້ານ ເປັນ ຕົ້ນ ສືບ​ຕໍ່​ຮໍ່າ​ຮຽນ​ນຳ້ໃຈ​ວິລະ​ຊົນ, ນຳ້ໃຈ​ພິລະ​ອາດ​ຫານ, ມູນເຊື້ອ​ ຂອງ​ກອງທັບ, ເຊື່ອມ​ຊຶມ​ແນວ ທາງ​ຂອງ​ພັກ, ແຜນ​ພັດທະນາ​ເສດ​ຖະ​ກິດ​-​ສັງຄົມຂອງລັດ; ເອົາໃຈໃສ່​ຝຶກແອບ​ວິຊາສະ ເພາະ ໃຫ້​ມີ​ຄວາມ​ຊຳນິ​ຊຳ ນານ, ມີ​ຄວາມ​ພ້ອມ ຢູ່​ສະເໝີ ໂດຍ​ສະເພາະ ສິນລະປະ​ຍຸດ​-​ຍຸດທະວິທີ; ເຂັ້ມ​ງວດ ໃນ​ການ​ປະຕິບັດ​ລະບຽບ​ວິໄນ, ຕ້ອງ​ລົງ​ເຮັດ​ວຽກ​ຮາກ​ຖານ, ເຂົ້າ​ຮ່ວມ​ຂະບວນ​ການ​ພັດທະນາ​ຂອງ​ປະຊາຊົນ ໃຫ້​ເລິກເຊິ່ງ​ເຖິງ​ຖອງ, ກຳ​ຮາກ​ຖານ ໃຫ້​ໄດ້​ຢ່າງຮອບດ້ານ, ມີ​ຄວາມ​ສາມັກຄີ​ເປັນ​ປຶກ​ແຜ່ນ, ເປັນ​ນຳ້​ໜຶ່ງ​ໃຈ​ດຽວ​ກັນ, ຊ່ວຍເຫຼືອ​ຊຶ່ງ​ກັນ ແລະ ກັນ, ປະຕິບັດ​ຫຼັກການ​ເຮັດ​ວຽກ​ແບບ​ລວມ​ສູນ​ປະຊາທິປະໄຕ ຂັ້ນ​ລຸ່ມ​ຕ້ອງ​ປະຕິບັດ​ຕາມ​ມະຕິ​ຄຳ​ສັ່ງ​ຂອງ​ຂັ້ນ​ເທິງ, ມີ​ການ​ປຶກສາ​ຫາລື​ກັນ, ແບ່ງ​ງານ, ແບ່ງ​ຄວາມຮັບ ຜິດຊອບ, ເຮັດ​ຫຼ້ອນ​ໜ້າທີ່, ເປັນ ​ແບບຢ່າງ​ໃຫ້​ຂັ້ນ​ລຸ່ມ, ເປັນ​ແບບຢ່າງ​ໃຫ້​ປະຊາຊົນຢ່າງ​ແທ້​ຈິງ. ພ້ອມ​ກັນ​ນັ້ນ, ຍັງ​ໄດ້​ຊີ້​ນຳ​ແຂວງ ໃຫ້​ເອົາໃຈ​ໃສ່​ນໍາ​ໃຊ້​ທ່າແຮງ​ຂອງ​ແຂວງ​ໄຊ​ຍະ​ບູ​ລີ ທີ່​ເປັນ​ແຂວງ​ມີ​ຊາຍ​ແດນ​ຕິດ​ຈອດ​ກັບ​ປະເທດ​ໃກ້​ຄຽງ ໃຫ້​ເກີດ​​ຜົນ​ປະໂຫຍດ​ສູງ​ສຸດ ໂດຍ​ມີ​ການ​ສ້າງ​ແຜນ ໃຫ້​ແທດ​ກັບ​ຕົວ​ຈິງ, ເອົາໃຈໃສ່​ພັດທະນາ​ວຽກ​ງານ​ການທ່ອງທ່ຽວ, ຮັກສາ​ຮີດຄອງ​ປະເພນີ ແລະ ປົກ​ປັກ​ຮັກສາ​ປ່າ​ໄມ້​-​ສັດ​ນຳ້​ສັດປ່າ ໃຫ້​ຍືນ​ຍົງ, ເອົາໃຈໃສ່​ແກ້​ໄຂ​ປະກົດ​ການ​ຫຍໍ້ທໍ້​ໃນ​ສັງຄົມ ມີ​ສະຕິ​ລະວັງ​ຕົວ​ຕໍ່​ກົນອຸບາຍ​ມ້າງເພ​ຂອງ​ຄົນ​ບໍ່​ຫວັງ​ດີ, ການ​ນໍາ​ໃຊ້​ສື່​ອອນ​ລາຍ​ຕ່າງໆ​ໃຫ້​ເກີດ​ປະໂຫຍດ ແລະ ຖືກຕ້ອງ, ຕ້ອງ​ມີ​ນໍ້າ​ໃຈ​ຮັກ​ຊາດ ແລະ ຮັບ​ໃຊ້​ປະຊາຊົນ​ຢ່າງ​ແທ້​ຈິງ.
   ໃນ​ຕອນ​ທ້າຍ, ​ນາຍົກ ລັດຖະມົນຕີ ຍັງ​ໄດ້​ມອບ​ເງິນ​ຈຳນວນ​ໜຶ່ງ​ໃຫ້​ກອງ​ພົນທະ ຫານ​ຮາບ​ທີ 2 ຕື່ມ​ອີກ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ບໍລິຫານ ຂອງ​ກອງ​ພົນ.
(ຂ່າວ​-​ພາບ: ອາ​ນິຄົມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110