ກອງປະຊຸມໃຫຍ່ອົງຄະນະພັກເມືອງ ໄຊຍະບູລີ

   ກອງ​ປະຊຸມ​ໃຫຍ່​ຄັ້ງ​ທີ IX ຂອງ​ອົງຄະ​ນະ​ພັກ ເມືອງ ໄຊ​ຍະ​ບູ​ລີ, ແຂວງ ໄຊ​ຍະ​ບູ​ລີ ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ໃນ​​ວັນ​ທີ 5 ມີນາ​ນີ້, ທີ່​ຫ້ອງ​ປະຊຸມ​ໃຫຍ່​ຂອງ​ເມືອງ, ໂດຍ​ການ​ເປັນ​ປະທານ​ຂອງ ສະຫາຍ ບຸນ​ແທນ ທິ​ແກ້ວ ກໍາ​ມະ​ການ​ພັກ​ແຂວງ ເລຂາ​ຄະນະ​ບໍລິຫານ​ງານ​ພັກ​ເມືອງ ເຈົ້າເມືອງໄຊ​ຍະ​ບູ​ລີ, ເຂົ້າ​ຮ່ວມ​ເປັນ​ກຽດ​ມີ ສະຫາຍ ພົງ​ສະຫວັນ ສິດ​ທະ​ວົງ ກໍາ​ມະ​ການ​ສູນ​ກາງ​ພັກ, ເລຂາ​ຄະນະ​ບໍລິຫານ​ງານ​ພັກ​ແຂວງ, ເຈົ້າແຂວງ ໄຊ​ຍະ​ບູ​ລີ, ໃນ​ນັ້ນ​ຜູ້​ແທນ​ສົມບູນ​ທີ່​ມາ​ຈາກ​ຄະນະ​ພັກ​ຮາກ​ຖານ ແລະ ໜ່ວຍ​ພັກ​ທົ່ວ​ເມືອງ 165 ສະຫາຍ  ຍິງ 32 ສະຫາຍ, ທີ່​ເປັນ​ຕົວ​ແທນ​ໃຫ້​ແກ່​ສະມາຊິກ​ພັກ​ທັງ​ໝົດ 2.730 ສະຫາຍ.
   ກອງ​ປະຊຸມ​ຄັ້ງ​ນີ້​ບັນດາ​ຜູ້​ແທນ​ແມ່ນ​ຈະ​ໄດ້​ພ້ອມ​ກັນ​ທົບ​ທວນ​ຕີ​ລາ​ຄືນ​ຜົນງານ ແລະ ໄຊຊະນະ​ທີ່​ຍາດ​ມາ​ໄດ້, ຈຸດ​ອ່ອນ​ຂໍ້ຄົງຄ້າງ ແລະ ສະຫຼຸບ​ຖອດ​ຖອນ​ບົດຮຽນ​ໃນ​ການຈັດຕັ້ງ​ປະຕິບັດ​ແນວທາງ​ນະໂຍບາຍ​ຂອງ​ພັກ ແລະ ມະຕິ​ຜູ້​ແທນ​ອົງຄະ​ນະ​ພັກ​ຄັ້ງ​ທີ VIII ໃນ 5 ປີຜ່ານມາ ແລະ ພ້ອມ​ກັນ​ກຳນົດ​ທິດ​ທາງ​ຄາດໝາຍ​ຍຸດທະສາດ​ແຕ່​ລະ​ດ້ານ​ໃນ​ການ​ປົກ​ປັກ​ຮັກສາ ແລະ ພັດທະນາ​ເມືອງໄຊ​ຍະ​ບູ​ລີ ໃນ​ອີກ 5 ປີ​ຕໍ່​ໜ້າ. ຈາກ​ການ​ຊີ້​ນໍາໆ​ພາ​ຂອງ​ອົງຄະ​ນະ​ພັກເມືອງໄຊ​ຍະ​ບູ​ລີ ໃນ​ໄລຍະ 5 ປີຜ່ານມາ ໂດຍ​ລວມ​ແມ່ນ​ສາມາດ​ຮັກສາ​ໄດ້​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ຄວາມ​ສະຫງົບ ແລະ ມີ​ຄວາມ​ເປັນ​ລະບຽບ​ຮຽບຮ້ອຍ​ໂດຍ​ພື້ນຖານ, ເສດຖະກິດ, ວັດທະນະ​ທຳ​-​ສັງຄົມ​ໄດ້​ຮັບ​ການ​ພັດທະນາ​ຢ່າງ​ຕໍ່​ເນື່ອງ, ການ​ຜະລິດ ແລະ ຊີວິດ​ການ​ ເປັນ​ຢູ່​ຂອງ​ປະຊາຊົນ​ບັນດາ ເຜົ່າ​ໄດ້​ຮັບ​ການ​ຊຸກຍູ້​ສົ່ງເສີມ​ນັບ​ມື້​ດີ​ຂຶ້ນ, ການ​ຂະຫຍາຍ ຕົວເສດຖະກິດ​ຢູ່​ໃນ​ລະດັບ 8%, ລາຍ​ໄດ້​ທັງ​ໝົດ​ບັນລຸ 1.517,58 ຕື້​ກີບ, ສະເລ່ຍ​ຕໍ່​ຫົວ​ຄົນ ເທົ່າ​ກັບ 19,9 ລ້ານ​ກີບ ຫຼື ເທົ່າ​ກັບ 2.490 ໂດ​ລາ​ຕໍ່​ຄົນ​ຕໍ່​ປີ, ທຽບໃສ່​ປີ 2014 ເພີ່ມ​ຂຶ້ນ 8,7 ລ້ານ​ກີບ​ຕໍ່​ຄົນ​ຕໍ່​ປີ.
   ກອງ​ປະຊຸມ​ຍັງ​ຈະ​ໄດ້​ຮັບ​ຟັງ​ການ​ໂອ້​ລົມ​ຂອງ ສະຫາຍ ເລຂາ​ພັກ​ແຂວງ ແລະ ຈະ​ໄດ້​ດຳເນີນ​ໄປ​ເປັນ​ເວລາ 2 ວັນ​ຈຶ່ງ​ຈະ​ສຳ​ເລັດ.                              
 (ຂ່າວ+ພາບ: ອຸ່ນ​ເຮືອນ ໂພທິ​ລັກ)