ໜັງສືພິມ ປະຊາຊົນ

ລວມຍອດຜະລິດຕະພັນພາຍໃນເມືອງນອງ ບັນລຸ 203,08 ຕື້ກີບ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 06/03/2020 09:08:11 ຈຳນວນຢ້ຽມຊົມ 1016 ຄັ້ງ

   ກອງປະຊຸມໃຫຍ່ອົງຄະນະພັກເມືອງນອງ ແຂວງສະ ຫວັນນະເຂດ ຄັ້ງທີ XI ໄດ້ປິດລົງໃນທ້າຍເດືອນກຸມພາຜ່ານມາ ຢູ່ທີ່ສະໂມສອນຂອງ ເມືອງ ດັ່ງກ່າວ. ໂດຍການເປັນປະທານ ຂອງສະຫາຍ ຄໍາເຜີຍ ຜັນທະຈອນ ຮອງເລຂາພັກແຂວງ ປະທານສະພາປະ ຊາຊົນແຂວງສະຫວັນນະເຂດ, ສະຫາຍ ລຳແກ້ວ ແສງໜູທອງ ວ່າການເລຂາພັກເມືອງ ເຈົ້າ ເມືອງໆນອງໄດ້ໃຫ້ຮູ້ວ່າ: ໃນຊຸມປີຜ່ານມາ, ການຈັດຕັ້ງປະຕິບັດມະຕິ, ຄໍາສັ່ງຕ່າງໆຂອງພັກ ກໍຄືມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກເມືອງນອງ ໄດ້ມີຂໍ້ສະດວກ ແລະ ສິ່ງເອື້ອອຳນວຍຫຼາຍດ້ານເຮັດໃຫ້ປະຊາຊົນມີຄວາມເຊື່ອໝັ້ນຕໍ່ການນຳພາຂອງພັກ, ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ ຄຽງຄູ່ກັນນັ້ນ ກໍຍັງມີສິ່ງທ້າ ທາຍທົດສອບຫຼາຍປະການເປັນຕົ້ນແມ່ນບັນຫາຄວາມຫຍຸ້ງຍາກທາງດ້ານເສດຖະກິດ, ບັນຫາໄພທໍາມະຊາດ, ປະກົດການຫຍໍ້ທໍ້ຕ່າງໆຍັງເກີດຂຶ້ນ ຊຶ່ງມັນໄດ້ສ້າງຄວາມຫຍຸ້ງຍາກບໍ່ໜ້ອຍຕໍ່ການພັດທະນາເສດຖະກິດ-ສັງຄົມໃນທົ່ວເມືອງ ໂດຍພາຍໃຕ້ການຊີ້ນໍາໆພາຢ່າງໃກ້ຊິດຂອງອົງຄະນະພັກແຂວງ, ດ້ວຍຄວາມຮັບຜິດ ຊອບສູງຕໍ່ໜ້າທີ່ການເມືອງຂອງ ອົງຄະນະພັກເມືອງ ຈົນສາມາດຜ່ານຜ່າຄວາມຫຍຸ້ງຍາກດັ່ງ ກ່າວມາໄດ້ເຮັດໃຫ້ເສດຖະກິດຂອງເມືອງມີການຂະຫຍາຍ ຕົວສະເລ່ຍ 6,2% ຕໍ່ປີ, ລວມຍອດຜະລິດຕະພັນພາຍໃນບັນລຸໄດ້ 203,08 ຕື້ກີບ, ເພີ່ມຂຶ້ນ 72,24 ຕື້ກີບ, ປະ ຕິບັດໄດ້ 90,22% ຂອງແຜນ ການ, ສະເລ່ຍລາຍຮັບໃສ່ພົນ ລະ ເມືອງ 6.260.000 ກີບ/ຄົນ/ປີ, ເທົ່າກັບ 745 ໂດລາ/ຄົນ/ປີ, ເພີ່ມຂຶ້ນ 149 ໂດລາ. ການຜະລິດກະສິກໍາແມ່ນໄດ້ຫັນໄປຕາມທິດຍືນຍົງ ແລະ ຜະລິດເປັນສິນຄ້າເປັນຕົ້ນແມ່ນຜະ ລິດເຂົ້ານາປີ ແລະ ການປູກເຂົ້າແບບປະສົມປະສານໄດ້ 8.759,45 ໂຕນ/ປີ, ປະຕິບັດໄດ້ລື່ນແຜນການ. ຊີວິດການເປັນຢູ່ຂອງພະນັກງານ ແລະ ພໍ່ແມ່ປະຊາຊົນບັນດາເຜົ່າໄດ້ຮັບການແກ້ໄຂດີຂຶ້ນ ແລະ ພັດ ທະນາເປັນກ້າວໆ, ຈຳນວນບ້ານພົ້ນທຸກຕາມດຳລັດ 309/ນຍ, ກວມ 55,07% ບ້ານທຸກຍັງເຫຼືອ 44,93% ແລະ ຄອບ ຄົວພົ້ນທຸກກວມ 76,03%, ຄອບຄົວທຸກ ຍັງເຫຼືອ 23,97%, ສ້າງໄດ້ບ້ານ ພັດທະນາຮອບ ດ້ານຕາມທິດ 3 ສ້າງ ມີ 4 ບ້ານ, ພົ້ນເດັ່ນການນໍາພັກ-ລັດໄດ້ຫັນພະນັກງານຫຼັກແຫຼ່ງຂອງແຂວງ ແລະ ເມືອງລົງຊຸກຍູ້ ແລະ ນຳ ພາອົງການປົກຄອງບ້ານ ແລະ ພໍ່ແມ່ປະຊາຊົນຢູ່ຈຸດສຸມຕັງອາໄລ-ລະແບງສຸມໃສ່ການສ້າງຄອບຄົວ ແລະສ້າງບ້ານໃຫ້ພົ້ນທຸກຕາມທິດ 3 ສ້າງ ເຮັດໃຫ້ຊີ ວິດການເປັນຢູ່ຂອງປະຊາຊົນໃນຈຸດສຸມດັ່ງກ່າວມີການຫັນ ປ່ຽນດີຂຶ້ນ.
   ໃນກອງປະຊຸມ ຍັງໄດ້ມີການໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ໂດຍມີຜູ້ສະໝັກທັງໝົດ 27 ສະຫາຍ, ເລືອກເອົາ 23 ສະ ຫາຍ ໂດຍເຫັນດີເປັນເອກະພາບເລືອກເອົາສະຫາຍ ລໍາ ແກ້ວ ແສງໜູທອງ ເປັນເລຂາຄະນະບໍລິຫານງານພັກເມືອງ, ສະຫາຍ ສຸກສາຄອນ ໂພທິ ລາດ ເປັນຮອງເລຂາ, ສະ ຫາຍ ຜາສຸກ ບຸດທະວົງ ເປັນຮອງເລຂາ ທັງເປັນປະທານກວດກາພັກ, ລວມມີກໍາມະການປະຈໍາເມືອງ 7 ສະຫາຍ, ກໍາມະການພັກເມືອງ 16 ສະຫາຍ.
     (ຂ່າວ: ຕຸກໆ)