ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ IV ຂອງພັກ (ຕໍ່)

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 06/03/2020 09:10:19 ຈຳ​ນວນ​​ຢ້ຽມ​ຊົມ 472 ຄັ້ງ

(7). ປັບປຸງ ແລະ ເພີ່ມ​ທະວີ​ບົດບາດ​ເປັນ​ເຈົ້າ​ພາ​ທາງ​ຂອງ​ຂົງເຂດ​ເສດຖະກິດ​ຂອງ​ລັດ, ຂະຫຍາຍ​ຂົງເຂດ​ເສດຖະກິດ​ສະຫະ​ກອນ.
   ປັດຈຸ​ບັນ​ຂົງເຂດ​ເສດຖະ ກິດ​ຂອງ​ລັດ ລວມ​ມີ​ທຸກ​ຂະ ແໜງການຂອງ​ເສດຖະກິດ​ແຫ່ງ​ຊາດ, ແຕ່​ການຈັດຕັ້ງ​ປະຕິບັດ ແລະ ຄຸ້ມ​ຄອງ ຂອງ​ບັນດາ​ລັດ​ວິ​ສາ​ຫະ​ກິດ​ຍັງ​ບໍ່​ທັນ​ເຮັດ​ໄດ້​ດີ​ເທົ່າ​ທີ່​ຄວນ. ດ້ວຍ​ເຫດນັ້ນ​ພວກ​ເຮົາ​ຈະ​ຕ້ອງ​ປັບປຸງ​ບັນດາ​ລັດ​ວິ​ສາ​ຫະ​ກິດ​ຢ່າງຮອບດ້ານ​ທັງທາງ​ດ້ານ​ການຈັດຕັ້ງ​ການ ຜະລິດ, ການ​ຄຸ້ມ​ຄອງ​ເສດ ຖະກິດ ແລະ ການແຈກຢາຍຜະ ລິດ​ຕະ​ພັນ ແນໃສ່​ເພີ່ມ​ທະວີ​ບົດບາດ​ເປັນ​ເຈົ້າ​ພາທາງ​ຂອງ​ຂົງເຂດ​ເສດຖະກິດ​ຂອງ​ລັດ​ຕໍ່​ເສດຖະກິດ​ແຫ່ງ​ຊາດ​ທັງໝົດ, ຄຽງ​ຄູ່​ກັບ​ບັນດາ​ວິ​ສາ​ຫະ​ກິດ​ຂອງ​ລັດ, ພວກ​ເຮົາ​ຈະ​ຕ້ອງ​ເອົາໃຈ​ໃສ່​ປັບປຸງ​ສະຫະກອນ​ທີ່​ມີ​ແລ້ວ​ໃນ​ດ້ານ​ຕ່າງໆ, ຂະ ຫຍາຍ​ຫຼາຍຂະແໜງ​ອາຊີບແນ ໃສ່​ຍົກ​ປະສິດ​ທິ​ຜົນ​ທາງ​ເສດ ຖະກິດ ແລະ ຍົກ​ອັດຕາ​ສ່ວນ ​ຜະລິດ​ຕະ​ພັນ​ສິນຄ້າ​ຂອງ​ສະ ຫະກອນໃຫ້​ສູງ​ຂຶ້ນ​ເລື້ອຍໆ ແລະ ດີ​ລື່ນ​ການທຳ​ມາ​ຫາ​ກິນ​ແບບ​ເອກະເທດ​ຢ່າງ​ຂາດ​ຂັ້ນ.
(8). ປັບປຸງ​ລະບົບ​ການ​ຄ້າ​ສັງຄົມ​ນິຍົມ​ຢ່າງຮອບດ້ານ ແລະ ຂະ​ຫຍາ​ຍມັນ​ຢ່າງ​ແຂງ​ແຮງ.
   ການ​ຄ້າ​ເປັນ​ຕ່ອງ​ໂສ້​ຕົ້ນຕໍ​ທີ່​ມີ​ຄວາມສຳ​ຄັນ​ທີ່​ສຸດ ເພື່ອ​ດັດ​ສ້າງພາກສ່ວນ​ເສດຖະກິດ​ເອກະ​ຊົນ​ເທື່ອ​ລະ​ກ້າວ, ສົມທົບ​ກະ​ສິ​ກາໍ​ກັບ​ອຸດສາ​ຫະກຳ, ເຮັດ​ໃຫ້​ຊົນນະບົດ​ກັບ​ຕົວ​ເມືອງ​ເຊື່ອມ​ຕໍ່​ກັນ ປະຕິບັດພັນທະ​ພາບ​ກໍາ​ມະ​ກອນ​-​ຊາວນາ​ທາງ​ດ້ານ​ເສດຖະກິດ, ທັງ​ນີ້​ກໍ​ເພື່ອ​ແນໃສ່​ຊຸກຍູ້​ເສດຖະກິດ​ແຫ່ງ​ຊາດ​ໃຫ້​ຂະຫຍາຍຕົວ, ສືບຕໍ່​ເປີດ​ກວ້າງ​ຮູບການ​ຫຸ້ນ​ສ່ວນ​ລະຫວ່າງ​ລັດ​ກັບ​ເອກະ​ຊົນ​ທາງ​ດ້ານ​ການ​ຄ້າ​ລວມ​ທັງການ​ຄ້າ​ພາຍ​ໃນ ແລະ ຕ່າງ​ປະ​ເທດ. ພ້ອມ​ກັນ​ນັ້ນ​ກໍຕ້ອງ​ວາງ​ມາດ ຕະການ​ຄຸ້ມ​ຄອງ​ຕະຫຼາດ​ອອກ​ໃຫ້​ເໝາະ​ສົມ, ຕ້ານ​ການ​ສວຍ​ໂອກາດ, ການ​ແຊກ​ຄຸມ ແລະ ປ່ັນ​ປ່ວນ​ຕະຫຼາດ​ຂອງ​ພໍ່ຄ້າ​ເອກະ​ຊົນ.
(9). ອອກແຮງ​ງານ​ປັບ​ປຸງ​ການ​ເງິນ ແລະ ເງິນຕາ​ໃຫ້​ສະຫງົບປົກ​ກະ​ຕິ.
   ການ​ເງິນ ແລະ ເງິນຕາ​ມີ​ບົດ​ບາດ​ສໍາ​ຄັນ​ທີ່​ສຸດ​ຕໍ່​ການ​ປະຕິບັດແນວທາງ​ຂອງ​ພັກ ແລະ ແຜນການ​ພັດທະນາ​ເສດ​ຖະ​ກິດ​-​ສັງຄົມແຫ່ງ​ຊາດ, ດັ່ງນັ້ນ, ພວກ​ເຮົາ​ຕ້ອງ​ນໍາ​ໃຊ້​ເຄື່ອງມື​ທາງ​ການ​ເງິນ, ເງິນຕາ​ເພື່ອ​ສ້າງ​ເງື່ອນໄຂ​ໃຫ້​ບັນດາ​ຂະແໜງການ, ທ້ອງຖິ່ນ ແລະ ຮາກຖານ​ຕ່າງໆເຄື່ອນ​ໄຫວ​ຕາມ​ແຜນການ​ຂະຫຍາຍ​ເສດ​ຖະ​ກິດ​-​ສັງຄົມຂອງ​ລັດ, ກ່ອນ​ອື່ນ​ໝົດ​ຕ້ອງ​ແນໃສ່​ຂະຫຍາຍ​ການ​ຜະລິດ, ເຮັດ​ໃຫ້ໂຄງ​ປະກອບ​ເສດຖະກິດ​ໃໝ່​ເປັນ​ຕົວ​ເປັນ​ຕົນ​ຂຶ້ນ​ເທື່ອ​ລະ​ກ້າວ, ເພີ່ມຍອດ​ຜະລິດ​ຕະ​ພັນ​ສັງຄົມ ແລະ ລາຍ​ຮັບ​ແຫ່ງ​ຊາດ​ຂຶ້ນ​ໃຫ້​ໄວ, ພ້ອມກັນ​ນັ້ນ​ກໍ​ຮັບປະກັນ​ຄວາມ​ຮຽກຮ້ອງ​ຕ້ອງການ​ຂອງ​ການ​ປະຕິບັດ​ໜ້າທີ່​ປົກປັກ​ຮັກສາ​ປະເທດ​ຊາດ ແລະ ຍົກ​ລະດັບ​ຊີວິດ​ການ​ເປັນ​ຢູ່​ຂອງ ປະຊາຊົນ​ໃຫ້​ສູງ​ຂຶ້ນ. ເພື່ອ​ເຮັດ​ໃຫ້ການ​ເງິນ, ເງິນຕາ​ມີ​ຄວາມ​ສະຫງົບປົກກະຕິ​ນັ້ນຕ້ອງ​ສູ້​ຊົນ​ເຮັດ​ໃຫ້​ລາຍ​ຈ່າຍ​ດຸ່ນ​ດ່ຽງ​ກັບ​ລາຍ​ຮັບ, ເຮັດໃຫ້ການ​ພົວພັນ​ລະຫວ່າງ​ເງິນ​ກັບ​ສິນຄ້າ​ດຸ່ນ​ດ່ຽງ​ກັນ, ເຮັດ​ໃຫ້ການ​ສະ​ສົມ​ກັບ​ການ​ຊົມໃຊ້​ມີອັດຕາ​ສ່ວນ​ອັນ​ສົມ​ເຫດ​ສົມ​ຜົນ  ແລະ ຕ້ອງ​ມີ​ມາດຕະ​ການ​ເພີ່ມ​ຄວາມ​ໄວ​ຂອງ​ການ​ໝູນ​ເງິນ, ເຮັດ​ໃຫ້​ຄຸນຄ່າ​ຂອງ​ເງິນ​ກີບ ແລະ ລາ​ຄາ​ໝັ້ນ​ທ່ຽງ​ເທື່ອ​ລະ​ກ້າວ.
(10). ເປີດ​ກວ້າງ​ການ​ພົວພັນ​ທາງ​ດ້ານ​ເສດຖະກິດ​ກັບ​ຕ່າງ​ປະເທດ.
  ການ​ຊ່ວຍເຫຼືອ ແລະ ການ​ຮ່ວມ​ມື​ຮອບດ້ານ​ກັບ​ບັນດາ​ປະເທດ​ສັງຄົມ​ນິຍົມອ້າຍນ້ອງ ເປັນ​ເງື່ອນໄຂ​ທີ່​ຂາດ​ບໍ່​ໄດ້ສາໍ​ລັບ​ໃຫ້​ປະເທດ​ດ້ອຍ​ພັດທະນາ​ເໝືອນ​ດັ່ງ​ປະເທດ​ເຮົາ​ສາມາດ​ກ້າວ​ຂຶ້ນ​ສັງຄົມ​ນິຍົມ​ໂດຍ​ກົງ ໂດຍ​ບໍ່​ຜ່ານ​ທຶນ​ນິຍົມ. ຍ້ອນ​ແນວ​ນັ້ນ​ພັກ​ເຮົາ​ຈຶ່ງ​ໄດ້​ຢືນຢັນ​ວ່າ​ອີງໃສ່​ລະບົບ​ສັງຄົມ​ນິຍົມ​ຢ່າງ​ຂາດ​ຂັ້ນ ກ່ອນ​ອື່ນ​ໝົດແມ່ນ​ ສະຫະ​ພາບ​ໂຊ​ວຽດ​ທີ່​ຍິ່ງ​ໃຫຍ່, ກໍ່ສ້າງ​ການ​ພົວພັນ​ແບບ​ພິເສດ ແລະ ການ​ຮ່ວມ​ມື​ຮອບດ້ານ​ກັບ​ຫວຽດນາມ ແລະ ກຳ​ປູ​ເຈຍ​ອ້າຍ​ນ້ອງ. ພວກ​ເຮົາ​ຈະ​ຕ້ອງ​ຍົກ​ປະສິດ​ທິ​ຜົນ​ແຫ່ງ​ການ​ນາໍ​ໃຊ້​ການ​ຊ່ວຍເຫຼືອ ແລະ ການ​ຮ່ວມ​ມື​ທາງ​ດ້ານ​ເສດຖະກິດ​ກັບ​ຕ່າງປະເທດ​ໃຫ້​ສູງ​ຂຶ້ນຢ່າງ​ເດັ່ນ​ຊັດ, ຄວນ​ຊອກ​ຄົ້ນ​ຫາ​ຮູບ​ການ​ຮ່ວມ​ມື​ກັບ​ບັນດາ​ປະເທດອ້າຍ​ນ້ອງ​ທີ່​ສອດຄ່ອງ​ກັບ​ເງື່ອນໄຂ ແລະ ລະດັບ​ຂອງ​ພວກ​ເຮົາ.
   ພວກ​ເຮົາ​ກຽມພ້ອມ​ເປີດ​ກວ້າງ​ການ​ຮ່ວມ​ມື​ທາງ​ດ້ານ​ເສດ​ຖະກິດ​ອັນ​ເປັນ​ປົກກະຕິ​ກັບ​ປະເທດ​ຕ່າງໆ, ກ່ອນ​ອື່ນ ໝົດ​ແມ່ນ​ການ​ພົວພັນ​ຄ້າຂາຍ​ກັບ​ປະເທດ​ໄທ ແລະ ປະເທດ​ອື່ນໆ​ໃນ​ອາຊີ​ອາຄະເນ​ບົນພື້ນ ຖານ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ, ເຄົາລົບ​ເອກະລາດ ແລະ ອະທິປະ​ໄຕ​ຂອງ​ກັນ.
(11). ກໍ່ສ້າງ​ລະບົບ​ກົດ ໝາຍ​ໃຫ້​ເປັນ​ຕົວ​ເປັນ​ຕົນ​ຂຶ້ນ.
   ການ​ກໍ່ສ້າງ​ລະບົບກົດ ໝາຍ​ໄດ້​ກາຍເປັນ​ຄວາມຮຽກ ຮ້ອງ​ຕ້ອງການ​ອັນ​ຮີບດ່ວນ ​ອັນໜຶ່ງ​ຂອງ​ການ​ຄຸ້ມ​ຄອງ​ປະ ເທດ​ຊາດ. ພວກ​ເຮົາຈະ​ຕ້ອງ​ປະກາດ​ໃຊ້​ລັດ​ຖະ​ທໍາ​ມະນູນ, ຖັດ​ຈາກ​ນັ້ນ​ຈະ​ຕ້ອງ​ຄົ້ນຄວ້າ ແລະ ປະກາດ​ໃຊ້​ຂໍ້​ກໍາ​ນົດ, ກົດ​ບັນ​ຍັດ​ຈໍາ​ນວນ​ໜຶ່ງ​ທີ່​ສໍາ​ຄັນ ໂດຍ​ສະເພາະ​ແມ່ນ​ກ່ຽວ​ກັບ​ການ​ຄຸ້ມ​ຄອງ​ລັດ ແລະ ຄຸ້ມ​ຄອງ​ເສດ​ຖະ​ກິດ. ຕ້ອງສືບຕໍ່​ສ້າງ ແລະ ບູລະນະ​ບັນ​ດາ​ອົງການ​ກົດ​ໝາຍ​ຂອງ​ລັດ ກ່ອນ​ອື່ນ ໝົດ​ແມ່ນ​ລະບົບ​ສານ ແລະ ຄະ​ນະ​ກໍາມະການ​ກວດກາ​ປະ ຊາຊົນ​ນັບແຕ່​ຂັ້ນ​ສູນ​ກາງ​ລົງ​ຮອດ​ຂັ້ນ​ເມືອງ, ຄົ້ນຄວ້າ​ກ່ຽວ​ກັບ​ການ​ສ້າງ​ໂຮງຮຽນ​ກົດໝາຍ​ຊັ້ນ​ສູງ ແນໃສ່​ສ້າງ​ພະນັກງານ​ໃຫ້​ແກ່​ຂະແໜງການ​ກົດໝາຍ, ຄຽງ​ຄູ່​ກັບ​ການ​ສ້າງ​ລະບົບ​ກົດໝາຍ​ຂອງ​ລັດ​ຕ້ອງ​ເພີ່ມ​ທະວີ ການ​ໂຄສະນາ ແລະ ສຶກສາ​ອົບ ຮົມ​ກ່ຽວ​ກັບ​ສະຕິ​ຕໍ່​ລະບຽບ​ກົດ ໝາຍ, ເຮັດ​ໃຫ້​ປະຊາຊົນ ແລະ ລັດຖະກອນ​ມີ​ສະຕິ​ຕໍ່​ລະບຽບ​ກົດຫມາຍ​ສັງຄົມ​ເທື່ອ​ລະ​ກ້າວ​ ເພື່ອ​ໃຫ້​ເຂົາ​ດໍາ​ລົງ​ຊີວິດ ແລະ ເຮັດ​ວຽກ​ຕາມ​ກົດໝາຍ​ຂອງ​ລັດ​ດ້ວຍ​ຄວາມ​ຕື່ນ​ຕົວ.

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110