ຫົວ​ຂໍ້ : WHO ເອົາໃຈໃສ່ຕິດຕາມເຂດທະເລເມດີເຕລາເນຕາເວັນອອກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 06/03/2020 09:49:43 ຈຳ​ນວນ​ຜູ້​ເຂົ້າ​ຢ້ຽມ​ຊົມ 379 ຄັ້ງ

  ຂ່າວສານ​ຊິນ​ຮວາ​ລາຍ​ງານ​ວ່າ: ອົງການ​ອະນາໄມ​ໂລກ (WHO) ໄດ້​ປະກາດ​ບົດ​ລາຍ​ງານ​ປະຈຳ​ວັນ​ກ່ຽວ​ກັບ​ສະພາບ​ພະຍາດ COVID-19 ສະບັບ​ຫຼັງ​ສຸດ ໄດ້​ຊີ້​ໃຫ້​ເຫັນ​ວ່າ: ວັນ​ທີ 3 ມີນາ​ນີ້, ນອກຈາກ​ປະເທດ​ຈີນ ແລ້ວ, ຍັງ​ມີ​ຜູ້​ຕິດເຊື້ອ 10.566 ຄົນ ແລະ ມີ​ຜູ້​ເສຍ​ຊີວິດ 166 ຄົນ​ຢູ່​ໃນ 77 ປະເທດ ແລະ ເຂດ​ແຄວ້​ນ.
  ອົງການ​ອະນາໄມ​ໂລກ ໄດ້​ໃຫ້​ຄວາມ​ເອົາໃຈໃສ່​ຕິດ ຕາມຢ່າງ​ສູງ​ຕໍ່​ສະພາບ​ການ​ເພີ່ມ​ຂຶ້ນ​ຂອງ​ຈຳ ນວນ​ຜູ້​ຕິດເຊື້ອ​ພະຍາດ ຢູ່​ເຂດ​ທະເລ​ເມ​ດີ​​ເຕ​ລາ​ເນ​ຕາເວັນ​ອອກ, ເພື່ອ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ, ເພີ່ມ​ທະວີ​ການ​ປະຕິບັດ​ງານ​ດ້ານ​ສາທາລະນະ​ສຸກ, ມີ​ຄວາມ​ຈຳເປັນ​ຕ້ອງ​ເພີ່ມ​ທະວີ​ການ​ຕິດຕາມ​ກວດກາ ແລະ ຮັບ​ມື​ກັບ​ພະຍາດ​ທັງ​ແບ່ງປັນ​ຂໍ້​ມູນ​ທີ່​ສຳ​ຄັນ.
ໃນ​ມື້​ດຽວ​ກັນ, ທ່ານ ເທ​ໂດຣສ ອາ​ດາ​ນອມ ເກ​ເບ​ຣ​ເຢ​ຊຸສ ຜູ້ອຳນວຍການ​ໃຫຍ່​ອົງການ​ອະນາໄມ​ໂລກ ໄດ້​ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ວ່າ: ເນື່ອງ​ຈາກ​ຄວາມ​ຕ້ອງການ​ເພີ່ມ​ຂຶ້ນ, ການ​ກັກ​ກັນ ແລະ ນຳ​ໃຊ້​ຢ່າງ​ບໍ່​ຖືກຕ້ອງ ຫຼື ສາເຫດ​ອື່ນໆ, ເຮັດ​ໃຫ້​ອຸປະກອນ​ປ້ອງ​ກັນ​ພະຍາດ​ໃນ​ທົ່ວ​ໂລກ​ຂາດແຄນ, ມີ​ພະ ນັກ​ງານ​ແພດ​ໝໍ​ຢູ່​ແນວ​ໜ້າ​ຢ່າງ​ຫຼວງຫຼາຍ ບໍ່​ມີ​ອຸປະກອນ​ປ້ອງ​ກັນ​ພະຍາດ​ພຽງພໍ ຊຶ່ງ​ເປັນ​ອຸປະສັກ​ຕໍ່​ຄວາມ​ສາມາດ​ໃນ​ການ​ຮັບ​ມື​ກັບ​ພະຍາດ​ຂອງ​ຫຼາຍ​ປະ​ເທດ. ທ່ານ ເທ​ໂດ​ຣສ ຮຽກຮ້ອງ​ບັນດາ​ລັດຖະບານ  ແລະ​ ວິ​ສາ​ຫະ​ກິດ​ທີ່​ກ່ຽວຂ້ອງ​ຈົ່ງ​ເລັ່ງ​ລັດ​ເພີ່ມ​ທະວີ​ການ​ຜະລິດເຮັດ​ໃຫ້​ປະລິມານ​ການ​ສະໜອງ​ອຸປະກອນ​ປ້ອງ​ກັນ​ພະຍາດ​ໃນ​ທົ່ວ​ໂລກ​ເພີ່ມ​ຂຶ້ນ 40%. ນອກຈາກ​ນີ້, ອົງການ​ອະນາໄມ​ໂລກ ພວມ​ຮ່ວມ​ມື​ກັບ​ປະເທດ ແລະ ວິ​ສາ​ຫະ​ກິດ​ທີ່​ກ່ຽວຂ້ອງ ເພື່ອ​ເພີ່ມ​ທະວີ​ການ​ຜະລິດ​ອຸປະກອນ, ຮັບປະກັນ​ການ​ສະໜອງ​ອຸປະກອນ​ປ້ອງ​ກັນ​ພະຍາດ​ໃຫ້​ປະເທດ ແລະ ເຂດ​ແຄວ້ນ ທີ່​ໄດ້​ຮັບ​ຜົນ​ກະທົບ​ຈາກ​ພະຍາດ COVID-19 ຢ່າງ​ຮ້າຍ​ແຮງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110