ຫົວ​ຂໍ້ : ຍົກສູງຄວາມສາມາດແກ້ງແຍ້ງເຊື່ອມໂຍງ EVFTA

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 06/03/2020 09:52:55 ຈຳ​ນວນ​ຜູ້​ເຂົ້າ​ຢ້ຽມ​ຊົມ 451 ຄັ້ງ

ຮຽບຮຽງ​ໂດຍ: ສີ​ວັນ    

  ສັນຍາ​ການ​ຄ້າ​ເສລີຫວຽດ ນາມ -  ສະຫະພາບ​ເອີ​ຣົບ (EVFTA) ແລະ  ສັນຍາ​ປົກ​ປ້ອງ​ການ​ລົງທຶນ (EVIPA) ລະຫວ່າງ ສະຫະພາບ​ເອີ​ຣົບ ແລະ ຫວຽດນາມ ຊຶ່ງ​ໄດ້​ຮັບ​ການ​ຮັບຮອງ​ເອົາ​ຈາກ​ລັດຖະ​ ສະພາບ​ເອີ​ຣົບ ເມື່ອ​ກາງ​ເດືອນ​ກຸມພາ​ຜ່ານ​ມາ. ສັນຍາ 2 ສະບັບ​ນີ້, ຈະ​ສ້າງ​ບັນດາ​ຂອບ​ເຂດ​ການ​ຮ່ວມ​ມື​ສອງ​ຝ່າຍ​ຢ່າງ​ຍາວ​ນານ ຕາມ​ທິດ​ຄູ່​ຮ່ວມ​ມື​ສະເໝີພາບ ແລະ ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ, ປະກອບ​ສ່ວນ​ເຂົ້າທ່າ​ອ່ຽງ​ລວມ​ກ່ຽວ​ກັບ​ການ​ຊຸກຍູ້​ການ​ຮ່ວມ​ສຳພັນ​ດ້ານ​ເສດຖະກິດ​ສາກົນ ແລະ ພັດທະນາ​ແບບ​ຍືນ​ຍົງ. ນີ້​ແມ່ນ​ກາລະ​ໂອກາດ​ໃຫ້​ແກ່​ປະຊາ​ຄົມ​ວິ​ສາ​ຫະ​ກິດ ຫວຽດນາມ ຍົກ​ສູງ​ກຳລັງ​ຄວາມ​ສາມາດ​ແກ້ງ​ແຍ້ງ​ໃນ​ບັນດາ​ລະບົບ​ມູນ​ຄ່າ​ທົ່ວ​ໂລກ.
  ພາຍຫຼັງ​ສັນຍາ EVFTA ມີ​ຜົນ​ສັກສິດ, ເອີ​ຣົບ ຈະ​ຍົກເລີກ​ພາສີ​ນຳ​ເຂົ້າ 86% ປະເພດ​ພາສີ ແລະ ກວ່າ 99% ປະເພດ​ພາສີ​ຂອງ​ຫວຽດນາມ ໄດ້​ຍົກເລີກ​ພາຍຫຼັງ 7 ປີ. ອີກ 1% ທີ່​ຍັງ​ເຫຼືອ​ຈະ​ໄດ້​ຫັນ​ເປັນ​ເສລີ ຜ່ານ​ໂຄ​ຕ້າ​ພາ​ສີ. ຂະນະ​ດຽວ​ກັນ, ຫວຽດນາມ ໄດ້​ໃຫ້​ຄໍາ​ໝັ້ນ​ສັນຍາ​ຍົກເລີກ 48,5% ປະເພດ​ພາສີ​ໃຫ້​ແກ່​ສິນຄ້າເອີ​ຣົບ. ພາຍຫຼັງ 7 ປີ​ຍົກເລີກ​ປະເພດ​ພາສີ​ເກືອບ 92% ແລະ ປະເພດ​ພາສີ ກວ່າ 98% ພາຍຫຼັງ 10 ປີ. ໃນ​ສະພາບ​ຄວາມ​ເຄັ່ງ​ຕຶງ​ດ້ານ​ການ​ຄ້າ ລະຫວ່າງ ບັນດາ​ປະເທດ​ແມ່ນ​ມີ​ຄວາມ​ສັບສົນ​ທີ່​ສຸດ. ສັນຍາ EVFTA ຈະ​ຊ່ວຍ​ໃຫ້​ບັນດາ​ວິ​ສາ​ຫະ​ກິດ ຫວຽດນາມ ຍູ້​ແຮງ​ການ​ຫັນ​ຕະຫຼາດ ແລະ ຄູ່​ຮ່ວມ​ມື​ເປັນ​ຫຼາຍ​ຮູບ​ຫຼາຍ​ແບບ, ສ້າງ​ຈຸດ​ຢືນ​ຢູ່​ຕະຫຼາດ​ໃຫຍ່​ເອີ​ຣົບ ຢ່າງ​ໝັ້ນຄົງ​ກວ່າ.
ທ່ານ ບຸ່ຍ​ແທັງ​ເຊີນ ຮອງ​ລັດຖະມົນຕີ​ກະຊວງ​ການ​ຕ່າງປະເທດຫວຽດນາມ ໃຫ້ຮູ້​ ວ່າ: ເພື່ອ​ໃຫ້ EVFTA ໄດ້​ຮັບ ການຜັນ​ຂະຫຍາຍ​ໂດຍ​ໄວ, ບັນດາ​ອົງການ​ກ່ຽວຂ້ອງ​ຄວນ​ສຳເລັດ​ບັນດາ​ລະບຽບ​ການ​ທີ່​ຈຳເປັນ ເພື່ອ​ຍື່ນ​ສະເໜີ​ຕໍ່​ສະພາ​ແຫ່ງ​ຊາດ ພິຈາລະນາ​ໃຫ້​ສັດຕະຍາບັນ​ສັນຍາ 2 ສະບັບ​ດັ່ງ​ກ່າວ. ບັນດາ​ກະຊວງ, ຂະແໜງການ, ທ້ອງຖິ່ນ​ຕ່າງໆ ແລະ ວິ​ສາ​ຫະ​ກິດ ຄວນ​ຮີບ​ຮ້ອນ​ສ້າງ​ແຜນການ​ຜັນ​ຂະຫຍາຍ​ສັນຍາ, ໂຄສະນາ, ເຜີຍແຜ່​ບັນດາ​ຄຳ​ໝັ້ນ​ສັນຍາ, ກຳ​ແໜ້ນ​ບັນດາ​ຂໍ້​ກຳນົດ​ໃໝ່ ເພື່ອ​ສາມາດ​ຍາດ​ແຍ່ງ​ບັນດາ​ກາລະ​ໂອກາດ​ໃຫ້​ດີ ພ້ອມ​ທັງ​ປັບ​ຕົວ​ໃຫ້​ແທດເໝາະ​ກັບ​ບັນດາ​ສິ່ງ​ທ້າ​ທາຍ​ທີ່​ອາດ​ຈະ​ເກີດ​ຂຶ້ນ​ໃນ​ເວລາ​ປະຕິບັດ​ບັນດາ​ສັນ​ຍາ.
ຕາມ​ແຫຼ່ງ​ຂ່າວສານ ຫວຽດ ນາມ, ປັດຈຸບັນ, ບັນດາ​ກະຊວງ, ຂະແໜງການ​ຂອງ​ ຫວຽດນາມ ພວມ​ຕັ້ງໜ້າ ​ກະກຽມ​ຄວາມ​ພ້ອມ​ເມື່ອ​ສັນຍາ EVFTA ມີ​ຜົນ​ສັກສິດຈະ​ນຳ​ເຂົ້າ​ປະຕິ ບັດ​ໂດຍໄວ. ພ້ອມ​ກັບ​ການ ກະກຽມກົນ​ໄກ​ນະໂຍບາຍ​ຈາກ ລັດຖະບານ, ປະຊາ​ຄົມ​ວິ​ສາ​ຫະ​ກິດ​ຫວຽດນາມ ໄດ້​ຂຶ້ນ​ແຜນການ​ເປັນ​ເຈົ້າ​ການ​ຮັບ​ມື​ກັບ​ເງື່ອນໄຂ​ເຊື່ອມ​ໂຍງ​ໃໝ່ ຈາກ EVFTA. ພື້ນຖານ​ເສດຖະກິດ ຫວຽດນາມ ໄດ້​ຮັບ​ການ​ຕີ​ລາຄາ​ວ່າ: ພວມ​ຢືນ​ຢູ່​ຕໍ່ໜ້າ​ກາລະ​ໂອກາດ​ດີ​ສຸດ ເພື່ອ​ຍົກ​ລະດັບ​ໃນ​ບັນດາ​ລະບົບ​ມູນ​ ຄ່າ​ທົ່ວ​ໂລກ ເພາະວ່າ ເມື່ອ​ສັນ ຍາ​ສະບັບ​ນີ້ ມີ​ຜົນ​ສັກສິດຈະ​ຍົກເລີກ​ປະເພດ​ພາສີ​ສິນຄ້າ ກວ່າ 99%. ສິ່ງ​ດັ່ງກ່າວ, ສ້າງ​ຄວາມ​ສະດວກ​ໃຫ້​ແກ່​ບັນດາ​ປະເພດ​ສິນຄ້າ​ຂອງ ຫວຽດນາມ ທີ່​ມີ​ທ່າແຮງ​ສົ່ງ​ອອກ​ໄປ​ຍັງ​ຕະຫຼາດເອີ​ຣົບ. 
  ທ່ານ ຫວູ​ຕຽນ​ລົກ ຫົວໜ້າ​ຫ້ອງການ​ການ​ຄ້າ ແລະ ອຸດສາ ຫະກຳ ຫວຽດນາມ ສະເໜີ​ວ່າ: ບັນດາ​ວິ​ສາ​ຫະ​ກິດ​ຕ້ອງ​ກຽມ​ຄວາມ​ພ້ອມ​ເພື່ອ​ຮັບ​ມື​ກັບ​ການ​ແກ້ງ​ແຍ້ງ ແລະ ຕ້ອງ​ມີ​ຄວາມ​ພະຍາຍາມ​ຫຼາຍ​ກວ່າ ເພື່ອ​ຍົກ​ສູງ​ກຳລັງ​ຄວາມ​ສາມາດ​ແກ້ງ​ແຍ້ງ. ຄວາມ​ຈິງ ສະແດງ​ໃຫ້ເຫັນ​ ວ່າ: ປັດຈຸບັນ, ຂົງເຂດ​ໃດ​ພ້ອມ​ແລ້ວ​ຮັບ​ມື​ກັບ​ການ​ແກ້ງ​ແຍ້ງ, ການ​ເປີດ​ປະຕູ, ປະລະ ການ​ອາລັກຂາ ນັບ​ແຕ່​ຫົວທີ ຂົງເຂດ​ນັ້ນ​ພວມ​ມີ​ກຳລັງ​ແຮງ​ແກ້ງ​ແຍ້ງ​ສູງ. ນີ້​ແມ່ນ​ບົດຮຽນ​ຂອງ​ຂະບວນ​ວິວັດ​ການ​ເປີດ​ປະຕູ​ໃນ​ໄລຍະ​ຜ່ານ​ມາ ແລະ ແມ່ນ​ຈິດໃຈ​ໃຫ້​ແກ່​ໄລຍະ​ເຊື່ອມ​ໂຍງ.
ສະຫະພາບ​ເອີ​ຣົບ ແມ່ນ​ຕະຫຼາດ​ທີ່​ປະຕິບັດ​ລະບຽບ​ການ​ຢ່າງ​ເຄັ່ງ​ຄັດ​ໃນ​ການ​ນຳ​ເຂົ້າ​ສິນຄ້າ ດ້ວຍ​ມາດຖານ​ສູງ​ສຸດ​ໃນ​ໂລກ. ສະນັ້ນ, ເພື່ອ​ໃຫ້​ໄດ້​ຊົມໃຊ້​ບັນດາ​ບຸລິມະສິດ​ພາສີ​ເຂົ້າ​ຕະຫຼາດ​ນີ້, ວິ​ສາ​ຫະ​ກິດ ແລະ ຜະລິດ​ຕະ​ພັນ​ຕ້ອງ​ຕອບ​ສະໜອງ​ບັນດາ​ມາດຖານ​ກ່ຽວ​ກັບ​ຄຸນ​ນະ​ພາບ, ຂັ້ນ​ຕອນ​ການ​ຜະລິດ ແລະ ນັບ​ທັງ​ວັດຖຸ​ດິບ​ນໍາ​ເຂົ້າຂອງ​ການ​ຜະ​ລິດ.
  ທ່ານ ນາງ ຫ​ງວຽນ​ທິ​ຮວຽນ ຜູ້ອຳນວຍການ ບໍລິສັດ​ຜະລິດ ແລະ ສົ່ງ​ອອກ​ເປືອກ​ແຄ ຫວຽດນາມ​ໃຫ້​ຮູ້​ວ່າ:ຄວາມ ​ຈິງ​ການ​ຜະລິດ ແລະ ສົ່ງ​ອອກ​ຜະລິດ​ຕະ​ພັນ​ເປຶອກ​ແຄ ເຂົ້າ​ຕະຫຼາດເອີ​ຣົບ ໃນ​ຫຼາຍ​ປີຜ່ານມາ ວິ​ສາ​ຫະ​ກິດ ພ້ອມ​ໃຫ້ການ​ເຄື່ອນ​ໄຫວ​ສົ່ງ​ອອກ​ດ້ວຍ​ມູນ​ຄ່າ​ໃຫຍ່​ເຂົ້າ​ຕະຫຼາດ​ນີ້ ເພື່ອ​ຮັບ​ເອົາ​ກາລະ​ໂອກາດ​ຫຼຸດຜ່ອນ​ພາສີ​ນຳ​ເຂົ້າ​ຈາກ 14% ລົງ​ເຫຼືອ 0% ເມື່ອ​ສັນຍາ EVFTA ມີ​ຜົນ​ສັກ​ສິດ. ຕະຫຼາດ​ເອີ​ຣົບ ແມ່ນ​ຕະຫຼາດ​ຈຸດ​ສຸມ​ຂອງ​ພວກ​ຂ້າ​ພະ​ເຈົ້າ. ນັບ​ແຕ່​ປີ 2013 ໂດຍ​ກຳ​ໄດ້​ທ່າ​ອ່ຽງ​ຂອງ​ຕະ ຫຼາດ​ສາກົນ ເວົ້າ​ລວມ ແລະ ຕະຫຼາດ​ເອີ​ຣົບ ເວົ້າ​ສະເພາະ ພວກ​ຂ້າພະເຈົ້າ​ໄດ້​ສ້າງ​ລະບົບ​ມູນ​ຄ່າ, ຮັບປະກັນ​ບັນດາ​ຂັ້ນ​ຕອນ​ການ​ຜະລິດຈາກ​ເຂດ​ວັດຖຸ​ດິບຕະຫຼອດ​ຮອດ​ການ​ຜະລິດ​ໃນ​ໂຮງງານ, ຮັບປະກັນ​ຫຼັກ​ອະນາໄມ​ຄວາມ​ປອດ​ໄພ​ດ້ານ​ສະບຽງ​ອາ​ຫານ.
  ເພື່ອ​ເຊື່ອມ​ໂຍງ EVFTA ສຳເລັດ​ຜົນ, ວິ​ສາ​ຫະ​ກິດ ຫວຽດນາມ ຕ້ອງ​ມີ​ພື້ນຖານ​ກຳລັງ​ຄວາມ​ສາມາດ​ແກ້ງ​ແຍ້ງ​ແບບ​ຍືນ​ຍົງ. ສະນັ້ນ, ວິ​ສາ​ຫະ​ກິດ ຄວນ​ພະຍາຍາມ​ຍົກ​ສູງ​ພື້ນຖານ​ກຳລັງ​ຄວາມ​ສາມາດ​ແກ້ງ​ແຍ້ງ​ຂອງ​ຕົນ​ກ່ຽວ​ກັບ​ຮູບ​ແບບ​ການ​ດຳເນີນ​ທຸລະ​ກິດ, ກ່ຽວ​ກັບ​ຍຸດທະສາດ, ການ​ຄຸ້ມ​ຄອງ, ຊັບພະຍາກອນ​ມະນຸດ, ຄຸນ​ນະ​ພາບ​ສິນຄ້າ ແລະ ການ​ບໍລິການ​ຕາມ​ມາດຖານ​ຂອງ​ເອີ​ຣົບ. ພ້ອມ​ກັນ​ນັ້ນ ຊອກ​ຮູ້​ກ່ຽວ​ກັບ​ບັນດາ​ສັນຍາ, ສິ່ງ​ທ້າ​ທາຍ, ກາລະ​ໂອກາດ​ກ່ຽວຂ້ອງ​ເຖິງ​ຂະແໜງ ແລະ ຂົງເຂດ​ຂອງ​ຕົນ​ເພື່ອ​ກຳນົດ​ຍຸດທະສາດ​ດຳເນີນ​ທຸລະ​ກິດ​ຄືນ​ໃໝ່. ພ້ອມ​ທັງ ແມ່ນ​ສ້າງ​ໂຄງ​ປະກອບ​ບັນດາ​ຕະຫຼາດ, ຄູ່​ຄ້າ, ແຫຼ່ງ​ສະໜອງ​ຄືນໃໝ່ ເພື່ອ​ຍາດ​ແຍ່ງ​ບັນດາ​ກາລະ​ໂອກາດ ໃນ​ການ​ປະຕິບັດ​ສັນຍາ​ຢ່າງ​ມີ​ປະສິດ​ທິ​ຜົນ​ສູງ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110