ທ່ານ ພັນ​ຄຳ ວິ​ພາ​ວັນ ຮອງ​ປະ​ທານ​ປະ​ເທດ ແລະ ທ່ານ ທອ​ງ​ລຸນ ສີ​ສຸ​ລິດ ນາ​ຍົກ ລັດ​ຖະ​ມົນ​ຕີ ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳ​ນັບຂອງ​ທ່ານ ອູ ຈໍ ຕິນ  ລັດຖະມົນຕີກະຊວງ​ຮ່ວມມື​ ສາກົນ ແຫ່ງ ສາທາລະນະ​ລັດ ສະຫະພາບ ມຽນ​ມາ ເມື່ອ​ວັນ​ທີ 6/3/2020. ສະ​ເພາະ​ທ່ານ ພັນ​ຄຳ ວິ​ພາ​ວັນ ໄດ້​ໃຫ້​ກຽດ​ ຕ້ອນ​ຮັບ​ທີ່​ທຳ​ນຽບ​ປະ​ທານ​ປະ​ເທດ ແລະ ທ່ານ ທອງ​ລຸນ ສີ​ສຸ​ລິດ ໄດ້​ຕ້ອນ​ຮັບ ທີ່ສຳນັກງານ​ນາຍົກ​ລັດ​ຖະ​ມົນ​ຕີ.
   ໃນ​ໂອກາດ​ພົບ​ປະ, ຜູ້​ນຳເຮົາ​ໄດ້​ສະແດງ​ຄວາມຍິນ​ ດີ​ຕ້ອນຮັບ ແລະ ຊົມເຊີຍ​ຕໍ່ ທ່ານ  ອູ  ຈໍ  ຕິນ ພ້ອມ​ດ້ວຍ​ຄະນະ  ທີ່​ເດີນທາງ​ມາ​ເຂົ້າ​ຮ່ວມ​ກອງ​ປະຊຸມ​ຄະນະ​ກຳມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ​-​ມຽນ​ມາ; ມຽນ​ມາ​-​ລາວ ຄັ້ງ​ທີ 12 ຢ່າງ​ເປັນ​ທາງ​ການ ຊຶ່ງ​ເປັນ​ການ​ສືບຕໍ່​ຊຸກຍູ້​ສົ່ງເສີມ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ທີ່​ມີ​ມາ​ແຕ່​ດົນ​ນານ​ແລ້ວ​ ລະຫວ່າງ ສປປ ລາວ ແລະ ສສ ມຽນ​ມາ

   ໃຫ້​ຂະຫຍາຍຕົວ​ຍິ່ງໆ​ຂຶ້ນ  ແລະ  ໃນ​ໂອກາດ ຄົບຮອບ 65 ປີ ແຫ່ງ​ການ​ສ້າງຕັ້ງ​ສາຍ​ພົວພັນ​ການ​ທູດ​ຮ່ວມ​ກັນ ລະຫວ່າງ ສປປ ລາວ ແລະ ສສ ມຽນ​ມາ (12/7/1955-12/07/2020).  ໃນ​ປີ 2020 ນີ້, ສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ​ສອງ​ປະເທດ ໄດ້​ຮັບ​ການ​ສົ່ງເສີມ​ໃຫ້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ ໂດຍ​ສະເພາະ​ແມ່ນ​ການຈັດຕັ້ງ​ຜັນ​ຂະຫຍາຍ​ເນື້ອ​ໃນ​ບົດ​ບັນທຶກ​ກອງ​ປະຊຸມ​ຄະນະ​ກຳມະການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ​-​ມຽນ​ມາ; ມຽນ​ມາ​-​ລາວ ຄັ້ງ​ທີ 11 ທີ່ນະຄອນຫຼວງ​ເນ​ປິ​ດໍ, ສສ ມຽນ​ມາ ແຕ່​ວັນ​ທີ 01-04 ມີນາ 2015, ມີ​ຫຼາຍ​ດ້ານ​ທີ່​ໄດ້​ມີ​ຄວາມ​ຄືບ​ໜ້າ​ຢ່າງ​ເປັນ​ຮູບ​ປະ​ທຳ ແລະ ມີ​ຜົນ ສຳເລັດ ​ໃນ​ການ​ຮ່ວມ​ມື​ຂອງ​ຫຼາຍ​ຂະແໜງການ​ຕ່າງໆເຊັ່ນ: ຂະແໜງການ​ຕ່າງປະເທດ, ການ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ, ການ​ຮ່ວມ​ມື​ດ້ານ​ເສດ​ຖະ​ກິດ​-​ການ​ຄ້າ, ວຽກ​ງານ​ສຶກສາ​ທິ​ການ ແລະ ກິລາ, ວັດທະນະ​ທຳ​-​ສັງຄົມ, ວຽກ​ງານ​ສາດສະໜາ ແລະ ອື່ນໆ.
   ໃນ​ໂອກາດ​ນີ້ ທ່ານ  ອູ ຈໍ ຕິນ    ຕາງໜ້າ​ໃຫ້​​ຄະນະ  ສະແດງ​ຄວາມ​ຂອບໃຈຕໍ່ການ ນຳ​ເຮົາທີ່​ໄດ້​ໃຫ້ການ​ຕ້ອນຮັບ ພ້ອມ​ທັງ​ສະ ແດງ​ຄວາມ​ຂອບໃຈ​ມາ​ຍັງ​ລັດ ຖະບານກໍ​ຄືປະຊາຊົນ​ລາວ ທີ່​ໄດ້​ໃຫ້ການ​ຕ້ອນຮັບ​ຢ່າງອົບ ອຸ່ນ ໃນ​ການ​ເດີນທາງ​ມາ​ຢ້ຽມຢາມ ສປປ ລາວ ແລະ ເຂົ້າ​ຮ່ວມ​ກອງ​ປະຊຸມ​ຄະນະ​ກຳມາ​ທິ​ການ​ຮ່ວມ ວ່າ​ດ້ວຍ​ການ​ຮ່ວມ​ມື​ສອງ​ຝ່າຍ ລາວ​-​ມຽນ​ມາ; ມຽນ​ມາ​-​ລາວ ຄັ້ງ​ທີ 12 ໃນ​ຄັ້ງ​ນີ້ ຈົນ​ໄດ້​ຮັບ​ຜົນສຳເລັດ​ຢ່າງ​ຈົບ​ງາມ.  
 (ຂ່າວ​-​ພາບ: ບຸນ​ຕອມ)