ຫົວ​ຂໍ້ : ຮອງລັດຖະມົນຕີ ປທສ ຊີ້ນຳວຽກງານ ຢູ່ສະຫວັນນະເຂດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 10/03/2020 08:46:40 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1437 ຄັ້ງ

  ໃນ​ວັນ​ທີ 5 ມີນາຜ່ານ​ມາ ທ່ານ ບຸນ​ສະເຫຼີມ​ໄຊ ເຄນ​ນາ​ວົງ ຮອງ​ລັດຖະມົນຕີ ກະຊວງ​ໄປສະນີ, ໂທລະ​ຄົມມະນາຄົມ ແລະ ການ​ສື່ສານ (ປທສ) ພ້ອມ​ດ້ວຍ​ຄະນະ​ໄດ້​ເດີນ​ທາງ​ໄປ​ເຄື່ອນ​ໄຫວ​ເຮັດ​ວຽກ ແລະ ຊີ້​ນໍາ​ວຽກ​ງານ​ຢູ່​ພະ​ແນກ ປທສ ແຂວງ​ສະຫວັນ​ນະ​ເຂດ.
  ທ່ານ ດາວເຮືອງ ໂພທິ​ລາດ ຮອງ​ຫົວໜ້າ ປທສ ແຂວງ​ສະຫວັນ​ນະ​ເຂດ ໄດ້​ສະຫຼຸບ​ລາຍ​ງານ​ສະພາບ​ໂດຍ​ລວມ​ໃນ​ການຈັດຕັ້ງ​ປະຕິບັດ​ແຜນ​ພັດທະນາ ປະ​ຈໍາ​ປີ 2019 ແລະ ທິດ​ທາງ​ແຜນການ​ປີ 2020 ຊຶ່ງ​ໃນ​ໄລຍະ 1 ປີຜ່ານມາ ​ສາ ມາດ​ຍາດ​ໄດ້​ຜົນ​ສໍາ​ເລັດ​ທີ່​ພົ່ນ​ເດັ່ນ​ຫຼາຍ​ດ້ານ​ເປັນຕົ້ນ ວຽກ​ງານ​ຄຸ້ມ​ຄອງ​ໄປສະນີ, ການ​ຂະຫຍາຍ​ຕາໜ່າງ​ໄປສະນີ, ການ​ພັດທະນາ​ໂຄງ​ລ່າງ​ພື້ນຖານ​ໂທລະ​ຄົມມະນາຄົມ/ICT, ຄວາມ​ປອດ​ໄພ​ດ້ານ​ໂທລະ​ຄົມມະນາຄົມ ແລະ ຂໍ້​ມູນ​ຂ່າວສານ ແລະ ການ​ບໍລິ ຫານ​ລັດ​ດ້ວຍ​ເອ​ເລັກ​ໂຕ​ຣ​ນິກ. ພ້ອມ​ນີ້, ຍັງ​ໄດ້​ລາຍ​ງານ​ບາງ​ບັນຫາ​ທີ່​ຍັງ​ເປັນ​ສິ່ງ​ທ້າ​ທາຍ ເພື່ອ​ສະເໜີ​ຂໍ​ທິດ​ຊີ້​ນຳ.
  ໃນ​ໂອກາດ​ນີ້, ທ່ານ ບຸນ​ສະເຫຼີມ​ໄຊ ເຄນ​ນາ​ວົງ ໄດ້​ສະ ແດງຄວາມ​ຍ້ອງຍໍ​ຊົມເຊີຍຕໍ່​ຜົນງານ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ, ເປັນຕົ້ນ ສະພາບ​ທາງ​ດ້ານ​ການ​ເມືອງ​-​ແນວ​ຄິດ, ການ​ບໍາ​ລຸງ​-​ກໍ່ສ້າງ​ຍົກ​ລະດັບ​ພະນັກ​ງານ​-​ລັດຖະກອນ, ການ​ເຜີຍແຜ່​ແນວທາງ​ນະໂຍບາຍຂອງ​ພັກ​-​ລັດ ລວມ​ທັງ​ນິຕິ​ກຳ​ຕ່າງໆ ກ່ຽວ​ກັບ​ວຽກ​ງານ ປທສ, ການ​ຊຸກຍູ້​ບັນດາ​ຫົວໜ່ວຍ​ທຸລະ​ກິດ ແລະ ຜູ້​ປະກອບ​ການ ໄອ​ຊີ​ທີ ໃຫ້​ສາມາດ​ຂະຫຍາຍ​ຕາໜ່າງ​ການ​ບໍລິການ​ໄປ​ສູ່​ເຂດ​ຊົນນະບົດ ຕາມ​ທິດ​ສາມ​ສ້າງ​ຂອງ​ລັດຖະບານ, ສາມາດ​ສ້າງ​ລາຍ​ຮັບ ແລະ ມອບ​ພັນທະ​ໃຫ້​ລັດ​ໄດ້​ຫຼາຍ​ພໍ​ສົມ​ຄວນ.  ພ້ອມ​ນີ້, ທ່ານ​ຍັງ​ໄດ້​ເນັ້ນ​ໜັກ​ໃຫ້​ພະ​ແນກ ປທສ ແຂວງ ສືບຕໍ່ກຳ​ແໜ້ນ ແລະ ຜັນ​ຂະຫຍາຍ​ວິ​ໄສ​ທັດ ຂອງ​ກະຊວງ ປທສ (2016-2030), ແຜນ​ຍຸດທະສາດ  (2016-2025) ແລະ ແຜນ​ພັດທະນາ 5 ປີ​ຄັ້ງ​ທີ II (2016-2020) ຢ່າງ​ຕັ້ງໜ້າ ແລະ ເຂັ້ມແຂງ, ເອົາໃຈໃສ່ ສຶກສາ​ອົບຮົມການ​ເມືອງ​-​ແນວ​ຄິດ ພະນັກ​ງານ​-​ລັດຖະກອນ ໃຫ້​ມີ​ຄວາມ​ຮັບ​ຮູ້, ເຊື່ອມ​ຊຶມຢ່າງ​ເລິກເຊິ່ງ​ຕໍ່​ແນວທາງ​ນະໂຍບາຍ, ມະຕິ, ຄຳ​ສັ່ງ​ຕ່າງໆ​ຂອງ​ພັກ, ລະບຽບ​ກົດໝາຍຂອງລັດ ແລະ ມີ​ຄວາມ​ຮັບຜິດຊອບ​ສູງ ຕໍ່ໜ້າ​ທີ່​ການເມືອງ ທີ່​ໄດ້​ຮັບ​ມອບ​ໝາຍ, ເອົາໃຈໃສ່ ປັບປຸງ​ກົງຈັກ​ການຈັດຕັ້ງ ໃຫ້​ກະທັດ​ຮັດ, ຖືກຕ້ອງ ແລະ ສອດຄ່ອງ ກັບ​ຄວາມ​ເປັນ​ຈິງ; ແບ່ງ​ງານ, ແບ່ງ​ຄວາມ​ຮັບຜິດຊອບ ລະຫວ່າງ ມາດ​ຖານ​ຕໍາ​ແໜ່​ງ​ງານ​ກັບ​ລະດັບ​ຄວາມ​ຮູ້, ຄວາມ​ສາມາດ ແລະ ຖືກ​ກັບ​ໜ້າທີ່ ວິຊາ​ສະເພາະ​ຂອງ ພະນັກງານ ເພື່ອຕອບ​ສະໜອງ​ຕາມ​ຄວາມ​ຕ້ອງການ​ຂອງວຽກ​ງານ ໃນ​ໄລຍະ​ໃໝ່, ເອົາໃຈໃສ່ປະສານ​ສົມທົບ​ກັບ​ທຸກ​ພາກສ່ວນ​ທີ່​ກ່ຽວຂ້ອງ ຈັດ​ຕັ້ງ​ເຜີຍແຜ່​ນິຕິ​ກໍາ​ຕ່າງໆ​ທັງ​ກົດໝາຍ ແລະ ລຸ່ມ​ກົດໝາຍ ໃຫ້​ສັງຄົມ​ມີ​ຄວາມ​ເຂົ້າໃຈ, ທົ່ວ​ເຖິງ ແລະ ເລິກເຊິ່ງ, ຄຸ້ມ​ຄອງ​ຄື້ນ​ຄວາມ​ຖີ່​ວິທະຍຸ​ສື່ສານ​ໃຫ້​ເຂັ້ມ​ງວດ ໂດຍ​ສະເພາະ​ແມ່ນ​ພື້ນ​ທີ່​ຊາຍ​ແດນ​ຕິດ​ຈອດ​ກັບ​ປະເທດ​ອ້ອມ​ຂ້າງ ບໍ່​ໃຫ້​ມີ​ຄື້ນ​ເຂົ້າ​ມາ​ລົບ​ກວນ, ຊຸກຍູ້​ບັນດາ​ຫົວໜ່ວຍ ບໍລິສັດ​ລັດ​ວິ​ສາ​ຫະ​ກິດ​ດ້ານ​ໂທລະ​ຄົມມະນາຄົມ ຂະຫຍາຍ​ເຄືອ​ຂ່າຍ​ການ​ບໍລິການ​ໃຫ້​ໄດ້​ຢ່າງ​ທົ່ວ​ເຖິງ, ມີ​ຄຸນ​ນະ​ພາບ, ວ່ອງໄວ ແລະ ປອດ​ໄພ ພ້ອມ​ທັງ ແຂ່ງຂັນ​ກັນ​ດໍາ​ເນີນ​ທຸລະ​ກິດ​ຢ່າງ​ຖືກຕ້ອງ​ຕາມ​ລະບຽບ​ກົດໝາຍ, ເສຍ​ພາສີ, ອາກອນ, ຄ່າ​ບໍລິການ ກໍຄືປະກອບ​ສ່ວນ​ມອບ​ພັນທະ​ໃຫ້​ລັດ​ໃຫ້​ໄດ້​ຕາມ​ແຜນການ ຫຼື ລື່ນ​ຄາດໝາຍ​ທີ່​ກໍາ​ນົດ​ໄວ້​ຍິ່ງ​ເປັນ​ການ​ດີ. ສືບຕໍ່​ເອົາໃຈໃສ່ວຽກ​ງານ​ຕິດຕາມ, ກວດກາ ການຈັດຕັ້ງ​ປະຕິບັດ​ໜ້າທີ່​ວຽກ​ງານ ຢ່າງ​ເປັນ​ປົກກະຕິ​ຕໍ່​ເນື່ອງ ເພື່ອ​ກຳ​ໄດ້​ບັນຫາ ແລະ ມີ​ວິທີ​ການ​ແກ້​ໄຂ​ບັນຫາ​ຕ່າງໆ​ໄດ້​ຢ່າງ​ທັນ​ການ ຄຽງ​ຄູ່​ກັບ​ການສ້າງ​ຄວາມ​ຮັບ​ຮູ້ ແລະ ສົ່ງເສີມ ການ​ຫັນ​ເປັນ​ທັນສະໄໝ​ໃນ​ການ​ຊຳລະ​ສະ​ສາງ ແລະ ການ​ເກັບ​ລາຍ​ຮັບ​ເຂົ້າ​ງົບປະມານ ຜ່ານ​ລະບົບ​ໂທລະສັບ​ມື​ຖື (Mobile Money) ຕາມ​ທິດ​ຊີ້​ນໍາ​ຂອງ​ລັດຖະບານ ໃຫ້​ບັນລຸ​ຜົນ​ສໍາ​ເລັດ ແລະ ໄດ້​ຮັບ​ການຈັດຕັ້ງ​ປະຕິບັດ​ໂດຍ​ໄວ.
(ຂ່າວ: ປທສ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110