ຫົວ​ຂໍ້ : ລັດຖະບານ ເຂັ້ມງວດການປ້ອງກັນພະຍາດ ໂຄວິດ-19

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 10/03/2020 09:02:49 ຈຳ​ນວນ​ຜູ້​ເຂົ້າ​ຢ້ຽມ​ຊົມ 402 ຄັ້ງ

   ລັດຖະບານ ສປປ ລາວ ກໍ​ຄື​ກະຊວງ​ສາທາລະນະ​ສຸກ ໄດ້​​ເຂັ້ມງວດ​ໃນ​ການ​ປ້ອງ​ກັນ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ ຫຼື ໂຄ​ວິດ-19 ເຖິງ​ວ່າ ສປປ ລາວ ຍັງ​ບໍ່​ພົບ​ກໍລະນີ​ຕິດເຊື້ອ​ກໍ​ຕາມ ແຕ່​ພະຍາດ​ດັ່ງກ່າວ​ໄດ້​ແຜ່​ລະບາດ​ກວມ 79 ປະເທດ​ທົ່ວ​ໂລກ (ຂໍ້​ມູນ​ວັນ​ທີ 4 ມີນາ).
   ໃນ​ວັນ​ທີ 6 ມີນາ​ຜ່ານ​ມາ ທີ່​ສໍາ​ນັກ​ງານ​ນາຍົກລັດຖະມົນຕີ ໄດ້​ມີ​ກອງ​ປະຊຸມ ຮັບ​ຟັງ​ການ​ລາຍ​ງານ​ສະພາບ​ການ​ແຜ່​ລະບາດ ແລະ ມາດ​ຕະການ​ໃນ​ການ​ປ້ອງ​ກັນ ແລະ ຄວບ​ຄຸມພະ​ຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​​ສາຍ​ພັນ​ໃໝ່ ຫຼື ໂ​ຄ​ວິດ-19 ໂດຍ​ການ​ເຂົ້າ​ຮ່ວມ​ຂອງ ທ່ານ ສົມ​ດີ ດວງ​ດີຮອງ​ນາຍົກລັດຖະມົນຕີ ລັດ ຖະມົນຕີ​ກະຊວງ​ການ​ເງິນ, ຫົວໜ້າ​ສະເພາະ​ກິດ​ປ້ອງ​ກັນ, ຄວບ​ຄຸມ ແລະ ແກ້​ໄຂ​ການ​ລະບາດ​ຂອງ​ພະຍາດ​ໂຄ​ວິດ-19, ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
  ທ່ານ ພູທອນ ເມືອງ​ປາກ ຮອງ​ລັດຖະມົນຕີ​ກະຊວງ​ສາ ທາລະນະ​ສຸກ ໄດ້​ຕາງໜ້າ​ໃຫ້​ກອງ​ເລຂາ​ຄະນະ​ສະເພາະ​ກິດ ເພື່ອ​ປ້ອງ​ກັນ, ຄວບ​ຄຸມ ແລະ ແກ້​ໄຂ​ພະຍາດ​ໂ​ຄ​ວິດ-19 ລາຍ​ງານ​ວ່າ: ພະຍາດ​ໂ​ຄ​ວິດ-19 ໄດ້​ເກີດ​ຂຶ້ນ​ຢູ່ ສປ ຈີນ ຫຼັງ​ຈາກ​ນັ້ນ​ໄດ້​ມີ​ການ​ລະບາດ​ອອກ​ສູ່​ວົງ​ກວ້າງ​ຢ່າງ​ໄວວາ, ມາ​ຮອດ​ວັນ​ທີ 4 ມີນາ ພະຍາດ​ດັ່ງກ່າວ​ໄດ້​ແຜ່​ລະບາດ​ກວມ​ເອົາ 79 ປະເທດ​ທົ່ວ​ໂລກ, ມີ​ຜູ້​ຕິດເຊື້ອ​ທັງ​ໝົດ 95.308 ກໍລະນີ, ເສຍ​ຊີວິດ 3.285 ກໍລະນີ, ໃນ​ນັ້ນ ຫຼາຍ​ກວ່າ​ໝູ່​ແມ່ນ ສປ ຈີນ ມີ​ຜູ້​ຕິດເຊື້ອ 80.409 ກໍລະນີ, ເສຍ​ຊີວິດ 3.012 ກໍ​ລະ​ນີ.
   ສຳລັບ​ຢູ່ ສປປ ລາວ ມີ​ຜູ້​ສົງໄສ​ຕິດເຊື້ອ​ທັງ​ໝົດ 53 ກໍລະນີ, ແຕ່​ຜ່ານ​ການ​ກວດ​ວິເຄາະ​ແລ້ວ ຍັງ​ບໍ່​ພົບ​ກໍລະນີ​ຕິດເຊື້ອ​ແຕ່​ຢ່າງໃດ, ແນວໃດ​ກໍ​ຕາມ ເພື່ອ​ປ້ອງ​ກັນ​ບໍ່​ໃຫ້​ເກີດ​ການ​ຕິ​ດເຊື້ອ ແລະ ລະບາດ​ຢູ່ ສປປ ລາວ, ພາຍ​ໃຕ້​ການ​ຊີ້​ນຳ​ຂອງ​ລັດຖະບານ, ກະຊວງ​ສາທາລະນະ​ສຸກ ໄດ້​ສົມທົບ​ກັບ​ພາກສ່ວນ​ກ່ຽວຂ້ອງ ດຳເນີນ​ມາດ​ຕະການ​ໃນ​ການ​ກະກຽມ​ຄວາມ​ພ້ອມ ເພື່ອ​ປ້ອງ​ກັນ ແລະ ຄວບ​ຄຸມພະ​ຍາດ​ດັ່ງ​ກ່າວ.
   ສຳລັບ​ການ​ເຝົ້າ​ລະວັງ ໄດ້​ຕັ້ງ​ກ້ອງ​ວັດແທກ​ອຸນຫະພູມ (Thermo Scan) ເປັນຕົ້ນ​ຢູ່ດ່ານ​ສາກົນ (ດ່ານ​ຂົວ​ມິດ ຕະພາບ 1 ນະຄອນຫຼວງ​ວຽງ​ຈັນ,   ຂົວ​ມິດຕະພາບ 4  ແຂວງ​ບໍ່​ແກ້ວ,  ດ່ານ​ບໍ່​ເຕ່ນ ແຂວງ​ຫຼວງ​ນໍ້າ​ທາ, ສະໜາມ​ບິນ​ຫຼວງ​ພະ​ບາງ, ສະໜາມ​ບິນ​ສະຫວັນ​ນະ​ເຂດ, ສະໜາມ​ບິນ​ຈໍາ​ປາ​ສັກ ແລະ ສະໜາມ​ບິນ​ວັດ​ໄຕ) ໂດຍ​ມີ​ແພດ​ປະ​ຈໍາ​ຢູ່​ແຕ່​ລະ​ດ່ານ ເພື່ອ​ຕິດຕາມ​ເຝົ້າ​ລະວັງ ຜູ້ໂດຍສານ​ຂາ​ເຂົ້າ ແລະ ພະນັກງານ​ຂອງ​ສາຍ​ການບິນ, ນອກ​ນັ້ນ​ຍັງ​ໄດ້​ປະກອບ​ເຄື່ອງ​ວັດທ​ກ​ອຸນຫະພູມ​ແບບ​ມື​ຖື (Infrared) ຢູ່​ທຸກ​ດ່ານ​ສາກົນ ແລະ ບາງ​ດ່ານ​ທ້ອງຖິ່ນ ເຊັ່ນ: ດ່ານ​ປາກ​ຄາ, ບ້ານ​ມອມ, ພູ​ຫຼັກ​ຄຳ ພ້ອມ​ທັງ​ໄດ້​ອົບຮົມ​ແພດ​ໝໍ​ໄປ​ປະຈຳ​ຢູ່​ດ່ານ​ຕ່າງໆ ເຫຼົ່ານັ້ນ, ນອກຈາກ​ນັ້ນ ກໍ​ຍັງ​ໄດ້​ກະກຽມ​ຫ້ອງ​ແຍກ​ດ່ຽວ​ໄລຍະ​ລໍຖ້າ ສຳ ລັບ​ກໍລະນີ​ສົງ​ໄສ ແລະ ກຽມ​ນຳ​ສົ່ງ​ກໍລະນີ​ສົງໄສ​ໄປ​ໂຮງໝໍ​ທີ່​ກຳນົດ​ໄວ້.
   ທ່ານ ກ່າວ​ອີກ​ວ່າ: ຄະນະ​ສະເພາະ​ກິດ ໄດ້​ເປີດ​ສາຍ​ດ່ວນ​ໝາຍ​ເລກ 166 ແລະ IHR 020 5406 6777 ທີ່​ໃຫ້​ຄຳ​ປຶກສາ​ຕະຫຼອດ 24 ຊົ່ວໂມງ, ຕິດຕາມ​ຢ່າງ​ໃກ້ຊິດ​ກັບ​ທຸກ​ກໍລະນີ​ທີ່​ມີ​ປະຫວັດ​ສຳຜັດ​ກັບ​ຜູ້​ທີ່​ຢັ້ງຢືນ​ການ​ຕິດເຊື້ອ, ລວມ​ທັງ​ຜູ້​ທີ່​ເດີນທາງ​ມາ​ຈາກ​ປະເທດ​ທີ່​ມີ​ການ​ລະບາດ ແລະ ວຽກ​ງານ​ອື່ນໆ​ກໍ​ໄດ້​ເອົາ​ໃຈ​​ໃສ່​ຕິດຕາມ​ຢ່າງ​ໃກ້​ຊິດ.  ( ຂ່າວ: ແສງ​ຈັນ)

 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110