ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ V ຂອງພັກປະຊາຊົນ ປະຕິວັດລາວ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 10/03/2020 09:10:30 ຈຳ​ນວນ​​ຢ້ຽມ​ຊົມ 436 ຄັ້ງ

   ວັນ​ທີ 27 ມີນາ 1991, ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງ​ທີ V ຂອງ​ພັກ​ປະຊາຊົນ​ປະຕິວັດ​ລາວ ໄດ້​ເປີດຂຶ້ນ​ຢ່າງ​ເປັນ​ທາງການ​ທີ່​ນະຄອນຫຼວງ​ວຽງ​ຈັນ,  ມີ​ຜູ້​ແທນ​ເຂົ້າ​ຮ່ວມ 367 ສະຫາຍ ຊຶ່ງເປັນ​ຕົວ​ແທນ​ໃຫ້​ສະມາຊິກ​ພັກ ຈໍາ​ນວນ 60 ພັນສະຫາຍ ​ໃນ​ທົ່ວ​ປະເທດ, ກອງ​ປະຊຸມ​ໃຫຍ່​ຄັ້ງ​ນີ້​ຍັງ​ໄດ້​ເຊີນ​ຄະນະ​ຜູ້ແທນ​ພັກ​ຂອງບັນດາ​ປະເທດ​ອ້າຍ​ນ້ອງ​ຈາໍ​ນວນ​ໜຶ່ງ​ອີກ.
   ກອງປະຊຸມ​ໃຫຍ່​ໄດ້​ຟັງ​ລາຍ​ງານ​ການ​ສາໍ​ຫຼວດ​ຂອງ​ຄະນະບໍລິຫານ​ງານ​ສູນ​ກາງ​ພັກ​ ສະໄ​ໝ​ທີ IV ແລະ ໄດ້​ດໍາ​ເນີນ​ການ​ຕິ​ຊົມຕົນ​ເອງ ແລະ ຕິ​ຊົມ​ກັນ​ດ້ວຍ​ຈິດໃຈ​ກົງ​ໄປ​ກົງ​ມາ, ມີ​ລັກສະນະ​ສ້າງສັນ, ກອງ​ປະຊຸມ​ໃຫຍ່​ຕີ​ລາຄາ​ສູງ​ຕໍ່​ຄວາມ​ບາກ​ບັນ​ພະຍາຍາມ​ອັນໃຫຍ່​ຫຼວງ, ຄວາມ​ໜັກ​ແໜ້ນ ແລະ ຫົວຄິດ​ປະດິດ​ສ້າງ​ໃນ​ການຊີ້​ນຳໆ​ພາ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ ສະໄ​ໝ​ທີ IV, ອັນມີ​ສະຫາຍ​ເລຂາທິການ​ໃຫຍ່ ໄກ ສອນ ພົມວິຫານ ເປັນ​ຜູ້​ນາໍ​ໜ້າ. ກອງ​ປະຊຸມ​ໃຫຍ່​ໄດ້​ເລືອກ​ຕັ້ງ​ຄະນະ​ບໍລິຫານ​ງານ​ສູນ​ກາງ​ພັກ ​ສະໄຫມ​ທີ V ປະກອບ​ດ້ວຍ 59 ສະຫາຍ, ໃນ​ນັ້ນ​ກາໍ​ມະ​ການ​ສົມບູນ 55 ສະຫາຍ, ກໍາ​ມະ​ການ​ສາໍ​ຮອງ 4 ສະຫາຍ, ເພດ​ຍິງ 4 ສະຫາຍ, ກອງປະຊຸມ​ຄົບ​ຄະນະ​ຄັ້ງ​ທີ່​ໜຶ່ງ (ສະໄ​ໝ​ທີ V) ໄດ້​ເລືອກ​ຕັ້ງ​ກົມ​ການ ເມືອງ​ສູນ​ກາງ​ພັກ ຊຶ່ງ​ປະກອບ​ດ້ວຍ 11 ສະຫາຍ, ສະຫາຍ ໄກສອນ ພົມວິຫານ ໄດ້​ເລືອກ​ເປັນ​ປະທານ​ຄະນະ​ບໍລິຫານ​ງານ​ສູນ​ກາງ​ພັກ, ກອງ​ປະຊຸມ​ໄດ້​ແຕ່ງຕັ້ງ​ທີ່​ປຶກສາ​ຂອງ​ຄະນະ​ບໍລິຫານ​ງານ​ສູນ​ກາງພັກ 3 ສະຫາຍ, ຄະນະ​ບໍລິຫານ​ສູນ​ກາງ​ໄດ້​ຕົກລົງ​ແຕ່ງຕັ້ງ​ສະຫາຍ ທອງ​ສິງ ທໍາ​ມະ​ວົງ ເປັນ​ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ,
   ກອງ​ປະຊຸມ​ໃຫຍ່ຄັ້ງນີ້ຖື​ ເປັນ​ສາໍ​ຄັນ​ພິເສດ​ຕໍ່ການ​ປ່ຽນ ແປງໃໝ່​ລະບົບ​ການເມືອງ ໂດຍ​ໄດ້​ຊີ້​ແຈງວ່າ​ການ​ປ່ຽນແປງ​ ໃໝ່​ ລະບົບ​ການເມືອງ​ຢູ່​ປະເທດ ​ເຮົາ​ບໍ່​ໝາຍ​ຄວາມ​ວ່າ​ຕ້ອງ​ປ່ຽນ ແປງ​ລະບອບ​ການເມືອງ​ອື່ນ, ແຕ່​ຫາກ​ແມ່ນ​ການ​ບູລະນະ​ການຈັດຕັ້ງ​ຂອງ​ລະບົບ​ການ ເມືອງ​ປະຊາທິປະໄຕ​ປະຊາຊົນ ແລະ ປ່ຽນແປງ​ໃໝ່​ແບບວິທີ​ເຄື່ອນ​ໄຫວ​ຂອງ​ມັນ.
   ບົນ​ພື້ນຖານ​ການກຳນົດ​ພາລະ​ບົດບາດ, ໜ້າທີ່​ຂອງ​ແຕ່​ລະອົງ​ປະກອບ​ໃຫ້​ຈະແຈ້ງ, ພ້ອມ​ນັ້ນ​ກອງ​ປະຊຸມ​ຍັງ​ໄດ້ກຳ ນົດ​ທິດ​ນໍາຂອງ​ການ​ປ່ຽນແປງ​ໃໝ່​ລະບົບ​ການເມືອງ​ຄື: ຮັບ ປະກັນ​ລັກສະ​ນະສືບ​ທອດ ແລະ ຂະຫຍາຍຕົວ, ຕ້ານ​ແນວ​ຄິດ​ຮັກສາ​ເດີມ ແລະ ທ່າອ່ຽງ​ປະຕິເສດ​ຢ່າງ​ສິ້ນ​ເຊີງບັນດາ​ຜົນງານ​ທີ່​ຍາດ​ມາ​ໄດ້, ດາໍ​ເນີນ​ໄປເປັນ​ແຕ່​ລະບາດ​ກ້າວ​ດ້ວຍ​ຄວາມ​ຮອບ​ຄອບ, ໜັກ​ແໜ້ນ, ບໍ່​ສ້າງຄວາມ​ກະທົບກະເທືອນ​ທີ່​ຮ້າຍ​ແຮງ​ດ້ານ​ສັງຄົມ ແລະ ຈິດຕະສາດ, ຮັບປະກັນ​ສະຖຽນ​ລະ​ພາບ​ຂອງ​ປະເທດ​ຊາດ, ດາໍ​ເນີນ​ໄປ​ຢ່າງ​ຄົບຊຸດ ມີ​ການ​ປະສານ​ສົມທົບ​ຢ່າງ​ກົມກຽວ​ລະຫວ່າງ​ການ​ປ່ຽນແປງໃໝ່​ໃນ​ຂົງເຂດ​ຕ່າງໆ​ດ້ວຍ​ກັນ, ເຊີດ​ຊູ​ຄຸນ​ນະ​ພາບ ແລະ ກາໍ​ລັງແຮງ​ໃໝ່​ໃຫ້​ທຸກ​ອົງການ​ຈັດ​ຕັ້ງ.
   ກອງ​ປະຊຸມ​ໃຫຍ່​ໄດ້​ຮັບ ຮອງ​ເອົາ​ລາຍ​ງານ​ກ່ຽວ​ກັບ​ການ​ດັດແປງ​ກົດ​ລະບຽບ​ຂອງ​ພັກ ຊຶ່ງ​ກົດ​ລະບຽບ​ສະບັບ​ດັດແປງ​ຂອງ​ພັກ ໄດ້​ຢືນຢັນ​ເຖິງ 5 ຫຼັກການ ແລະ ສາມ​ທິດນຳກ່ຽວ​ກັບ​ການ​ສ້າງ​ພັກເຮົາ​ໃນ​ໄລຍະ​ໃໝ່, ພັກ​ປະຊາຊົນ​ປະຕິວັດ​ລາວ​ເອົາ​ບັນດາ​ຫຼັກມູນ​ທີ່​ມີ​ລັກສະນະ​ທົ່ວ​ໄປ​ຂອງ​ລັດທິ​ມາກ​-​ເລ​ນິນ​ເປັນ​ພື້ນຖານ​ແຫ່ງແນວ​ຄິດ​ທິດ​ສະ​ດີ​ຂອງ​ຕົນ, ນອກຈາກ​ນັ້ນ​ກໍ​ຮັບ​ສິ່ງ​ຍອດ​ຍິ່ງ​ທາງ​ດ້ານ, ສະຕິປັນຍາ​ຂອງ​ມວນ​ມະນຸດ, ໝູນ​ໃຊ້​ທິດ​ສະ​ດີ​ວິທະຍາສາດ ແລະ ບົດຮຽນ​ຂອງ​ປະເທດ​ຕ່າງໆ​ໃຫ້ແທດເໝາະ​ກັບ​ພຶດ​ຕິກາໍ ແລະ ເງື່ອນໄຂ​ຕົວ​ຈິງ​ຂອງ​ປະເທດ​ເຮົາ, ເສີມ​ຂະ ຫຍາ​ຍ​ມູນເຊື້ອ​ຮັກ​ຊາດ ແລະ ນ້ຳ​ໃຈ​ສາມັກຄີ​ປອງ​ດອງ​ຂອງ​ປະຊາຊົນ​ບັນດາເຜົ່າ, ສົມທົບ ລັດທິ​ຮັກ​ຊາດ​ອັນ​ແທ້​ຈິງ​ກັບ​ລັດທິ​ສາກົນ​ອັນ​ຜ່ອງ​ໃສ, ພັກ​ຈັດ​ຕັ້ງ​ຕາມຫຼັກການ​ລວມ​ສູນ​ປະຊາທິປະໄຕ, ນາໍ​ພາ​ເປັນ​ໝູ່​ຄະນະ​ ບຸກ​ຄົນຜິດ​ຊອບ, ພັກ​ມີ​ລະບຽບ​ວິໄນ​ເຂັ້ມ​ງວດ, ພັກ​ຖື​ຄວາມ​ສາມັກຄີ​ອັນ​ໜຶ່ງອັນ​ດຽວ​ເປັນ​ຫຼັກການ​ພື້ນ​ຖານ... ; ຖື​ເອົາ​ການ​ຕິ​ຊົມ​ຕົນ​ເອງ ແລະ ຕິຊົມ​ກັນ​ເປັນ​ກົດເກນ​ແຫ່ງ​ການເຄື່ອນໄຫວ ແລະ ຂະຫຍາຍຕົວ​ຂອງຕົນ; ພັກ​ເຄື່ອນ​ໄຫວ​ຕາມ​ແນວທາງ​ມະຫາຊົນ, ອີງໃສ່​ມະຫາຊົນ ແລະ ຜ່ານ​ຂະບວນ​ການ​ປະ ຕິວັດ​ຂອງ​ມະຫາຊົນ​ເພື່ອ​ກໍ່ສ້າງ ແລະ ຂະ​ຫຍາ​ຍພັກ, ສົມທົບ​ການ​ກໍ່ສ້າງ​ພັກ​ທັງ 3 ດ້ານ​ຄື: ດ້ານການເມືອງ, ແນວ​ຄິດ, ແລະ ການຈັດຕັ້ງ​ໃຫ້​ມີ​ຄວາມ​​​ໜັກ​ແ​ໜ້ນ​ເຂັ້ມແຂງ.
   ກອງ​ປະຊຸມ​ໃຫຍ່​ຄັ້ງ​ນີ້​ມີ​ຄວາມ​ສາໍ​ຄັນ​ຕໍ່​ພາລະກິດ​ປ່ຽນແປງໃໝ່​ຂອງ​ປະເທດ​ເຮົາ, ໄດ້​ບັນລຸ​ຄວາມ​ເປັນ​ເອກະສັນ​ໃນ​ລະດັບ​ສູງກ່ຽວ​ກັບ​ການກໍາ​ນົດ​ໄລຍະ  ແລະ  ລັກສະນະ​ຂອງ​ການ​ປະຕິວັດ​ລາວໃນ​ໄລຍະ​ໃໝ່, ໄດ້​ບູລະນະ​ແນວທາງ​ໃໝ່​ຂອງ​ພັກ, ໂດຍ​ສະເພາະ ແມ່ນ​ການ​ປ່ຽນແປງ​ລະບົບ​ການເມືອງ ແລະ ປ່ຽນແປງ​ໃໝ່​ວຽກ​ງານຈັດ​ຕັ້ງ​ຂອງ​ພັກ​ໄດ້​ດາໍ​ເນີນ​ໄປ​ຕາມ 5 ທິດ​ນາໍ ແລະ ຫຼັກການ​ແຫ່ງການ​ປ່ຽນແປງ​ໃໝ່​ຄື​ດັ່ງນີ້:
1). ຖື​ບັນດາ​ຫຼັກ​ມູນ​ທີ່​ມີ​ລັກສະນະ​ທົ່ວ​ໄປ​ຂອງ​ລັດທິ​ມາກ​ - ເລ​ນິນ ​ເປັນ​ພື້ນຖານ​ຄວາມ​ຄິດ​ທິດ​ສະ​ດີ​ຂອງ​ພັກ.
2). ເຊື່ອມ​ຊຶມ ແລະ ປະ ຕິບັດ​ຫຼັກການ​ລວມ​ສູນ​ປະຊາ​ທິ​ປະໄຕ​ຢ່າງ​ຖືກ​ຕ້ອງ.
3). ເພີ່ມ​ທະວີ​ຄວາມ​ສາມັກຄີ​ເປັນ​ເອກະ​ພາບ​ບົນ​ພື້ນຖານແນວທາງ​ແຜນການ ແລະ ຫຼັກການ​ລວມ​ສູນ​ປະ ຊາທິປະໄຕຂອງ​ພັກ.
4). ສ້າງ​ການ​ພົວພັນ​ອັນ​ສະໜິດ​ແໜ້ນ​ແບບ​ກາຍ​ອິນ​ຊີ, ແບບເລືອດ​ກັບ​ເນື້ອ​ລະຫວ່າງ​ພັກ​ກັບ​ປະຊາຊົນ, ສ້າງ​ພັກ​ໃນ​ຂະບວນ​ການຂອງ​ມະຫາຊົນ,
5). ເອົາ​ຄຸນ​ນະ​ພາບ ແລະ ປະສິດ​ທິ​ຜົນ​ເປັນຕົ້ນ​ຕໍ​ໃນ​ການ​ປັບປຸງ​ລະບົບ​ການຈັດຕັ້ງ​ຂອງ​ພັກ​ຂັ້ນ​ຕ່າງໆ.

(ອ່ານ​ຕໍ່​ສະ​ບັບ​ໜ້າ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110