ຫົວ​ຂໍ້ : ກອງປະຊຸມປຶກສາຫາລືລວມ ອາຊຽນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 10/03/2020 15:23:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 217 ຄັ້ງ

  ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ກອງ​ປະຊຸມ​ປຶກສາ​ຫາລື​ລວມອາ​ຊຽນ (JCM) ໄດ້​ດໍາ​ເນີນ​ຢູ່​ນະຄອນ ​ດາ​ນັງ ສສ ຫວຽດນາມ, ໃນ​ທ້າຍ​ອາທິດ​ຜ່ານ​ມາ ພາຍ​ໃຕ້​ການ​ເປັນ​ປະທານ​ຂອງ​ທ່ານ ຫ​ງວຽນ ​ກວ໊ກ​ ຢຸງ ຮອງ​ລັດຖະມົນຕີ​ການ​ຕ່າງປະເທດ ຫວຽດນາມ.
  ຂ່າວ​ລະບຸ​ວ່າ: ເພື່ອ​ສືບຕໍ່​ບັນດາ​ການເຄື່ອນໄຫວ​ກະກຽມ​ໃຫ້​ແກ່​ກອງ​ປະຊຸມ​ສຸດ​ຍອດ ອາ​ຊຽນ ຄັ້ງ​ທີ 36 ຊຶ່ງ​ຄາດຈະ​​ຈັດ​ຂຶ້ນ​ໃນ​ເດືອນ​ເມສາ​ປີ​ນີ້. ກອງ​ປະຊຸມ​ປຶກສາ​ຫາລື​ລວມ ອາ​ຊຽນ (JCM) ໄດ້​ດໍາ​ເນີນ ຂຶ້ນ ພາຍ​ໃຕ້​ການ​ເປັນ​ປະທານ​ຂອງ​ທ່ານ ຫ​ງວຽນ​ກວ໊ກ​ຢຸງ ຮອງ​ລັດຖະມົນຕີ​ການ​ຕ່າງປະເທດ ຫວຽດນາມ, ຫົວໜ້າ​ເຈົ້າ​ໜ້າທີ່​ອາວຸໂສ (SOM) ຫວຽດນາມ ດ້ວຍ​ການ​ເຂົ້າ​ຮ່ວມ​ຂອງ​ບັນດາ​ເຈົ້າ​ໜ້າທີ່​ອາວຸໂສ​ຂອງ​ບັນດາ​ເສົາ​ຄໍ້າ ປະຊາ​ຄົມ ອາ​ຊຽນ; ຫົວໜ້າ​ຄະນະ​ຜູ້ຕາງໜ້າ​ປະ​ຈໍາ​ບັນດາ​ປະເທດ ອາ​ຊຽນ ແລະ ຄະນະ​ເລຂາ ອາ​ຊຽນ.
  ໃນ​ວາ​ລະ​ດໍາ​ເນີນ​ກອງ​ປະຊຸມ, ທ່ານ ຫ​ງວຽນ​ກວ໊ກ​ຢຸງ ໄດ້​ແຈ້ງ​ໃຫ້​ຊາບ​ກ່ຽວ​ກັບ​ການ​ຄາດ​ຄະເນ​ລາຍການ​ເຄື່ອນ​ໄຫວ ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 36. ໃນ​ນັ້ນ ມີ​ວາລະ​ປະຊຸມ​ພິເສດ​ຂອງ​ການ​ນໍາອາ​ຊຽນ ກ່ຽວ​ກັບ​ຄວາມ​ສະເໝີ ພາບ  ລະຫວ່າງ ຍິງ - ຊາຍ ແລະ ເພີ່ມ​ສິດ​ອໍາ​ນາດ​ໃຫ້​ແກ່​ແມ່  ຍິງ; ຍົກ​ສູງ​ຄຸນ​ນະ​ພາບ​ການ​ ເຈລະຈາ ລະຫວ່າງ ການ​ນໍາ ​ກອງ​ປະຊຸມ​ສະມັດຊາ​ໃຫຍ່ລັດ​ຖະ​ສະພາ ອາ​ຊຽນ (AIPA). 
  ເນື່ອງ​ໃນ​ໂອກາດ​ນີ້, ທ່ານ ຫ​ງວຽນ​ກວ໊ກ​ຢຸງ ໄດ້​ແຈ້ງ​ໃຫ້​ຊາບ​ລາຍ​ລະອຽດ​ກ່ຽວ​ກັບ​ຂັ້ນ​ຕອນ​ການ​ຜັນ​ຂະຫຍາຍ​ກໍ​ຄື​ບັນດາ​ໝາກຜົນ ຊຶ່ງ​ຄາດ​ວ່າ: ຈະ​ບັນລຸ​ໄດ້​ຈາກ​ບັນດາ​ຂໍ້​ລິ​ເລີ່ມ​ຂອງ ຫວຽດນາມ ປີ 2020. ທ່ານ ໄດ້​ເນັ້ນ​ໜັກ​ເຖິງ​ຄວາມ​ສໍາ​ຄັນ​ຂອງ​ການ​ເພີ່ມ​ທະວີ ລະຫວ່າງ 3 ເສົາ​ຄໍ້າ​ໃຫຍ່ ຂອງ​ປະຊາ​ຄົມ ແລະ ວິທີ​ການ​ສໍາ​ຜັດ​ແບບ​ກວມ​ລວມ ໃນ​ການ​ຜັນ​ຂະຫຍາຍ​ບັນ​ດາ​ຄໍາ​ໝັ້ນ​ສັນຍາ ແລະ ແຜນການ​ຮ່ວມ​ມື​ຂອງ ອາ​ຊຽນ ໃນ​ການ​ກໍ່ສ້າງ​ປະຊາ​ຄົມ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110