ທ່ານ ສີຈິ້ນຜິງ ເນັ້ນຕ້ອງບັນລຸເປົ້າໝາຍຫຼຸດພົ້ນອອກຈາກ ຄວາມທຸກຍາກຕາມກຳນົດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 12/03/2020 08:58:09 ຈຳ​ນວນ​​ຢ້ຽມ​ຊົມ 1127 ຄັ້ງ

 ຮຽບຮຽງ​ໂດຍ: ສີ​ວັນ

  ໃນ​ກອງ​ປະຊຸມ​ສຳ​ມະ​ນາ​ກ່ຽວ​ກັບ​ການ​ສູ້​ຊົນ​ຍາດ​ເອົາ​ໄຊຊະນະ​ໃນ​ບັ້ນ​ລຶບ​ລ້າງ​ຄວາມທຸກ​ຍາກ​ໃນ​ໄລຍະ​ສຸດ​ທ້າຍ ໄດ້​ຈັດ​ຂຶ້ນ​ຢູ່​ນະຄອນຫຼວງ​ປັກ​ກິ່ງ ໃນ​ວັນ​ທີ 6 ມີນາ​ຜ່ານ​ມາ. ທ່ານ ສີ​ຈິ້ນ​ຜິງ ເລຂາທິການ​ໃຫຍ່​ຄະນະ​ກຳມະການ​ສູນ​ກາງ​ພັກ​ກອມ​ມູ​ນິດ​ຈີນ ກ່າວ​ເນັ້ນ​ວ່າ: ປີ 2020, ຕ້ອງ​ໃຫ້​ບັນລຸ​ເປົ້າ​ໝາຍ​ທີ່​ປະຊາກອນ​ຜູ້​ທຸກ​ຍາກ​ໃນ​ຊົນນະບົດ​ສາມາດ​ຫຼຸດ​ພົ້ນ​ອອກ​ຈາກ​ມາດຕະຖານ​ຄວາມທຸກ​ຍາກ​ໃນ​ປັດຈຸບັນ ໃຫ້​ໄດ້​ທັງ​ໝົດ​ຕາມ​ເວລາ​ກຳນົດ ຊຶ່ງ​ເປັນ​ຄຳ​ໝັ້ນ​ສັນຍາ​ອັນ​ໜັກ​ແໜ້ນ​ທີ່​ສູນ​ກາງ​ພັກ​ກອມ​ມູ​ນິດ​ຈີນ ໃຫ້​ໄວ້​ກັບ​ປະຊາຊົນ​ທົ່ວ​ປະເທດ, ຕ້ອງ​ເດັດດ່ຽວ​ຜ່ານ​ຜ່າ​ຜົນ​ກະທົບ​ຈາກ​ສະ ພາບ​ການ​ແຜ່​ລະບາດ​ຂອງ​ພະ ຍາດ COVID - 19, ຍາດ​ເອົາ​ ໄຊຊະນະ​ໃນ​ບັ້ນ​ລຶບ​ລ້າງ​ຄວາມ ທຸກ​ຍາກ​ຢ່າງ​ຮອບ​ດ້ານ.
  ກອງ​ປະຊຸມ​ຄັ້ງ​ນີ້​ເປັນ​ກອງ​ປະຊຸມ​ຂະໜາດ​ໃຫຍ່​ທີ່​ສຸດ​ໃນ​ດ້ານ​ການ​ລຶບ​ລ້າງ​ຄວາມທຸກ​ຍາກ​ນັບ​ແຕ່​ກອງ​ປະຊຸມ​ໃຫຍ່​ຄັ້ງ​ທີ 18 ຂອງ​ພັກ​ກອມ​ມູ​ນິດ​ຈີນ ເປັນຕົ້ນ​ມາ. ນັບ​ແຕ່​ກອງ​ປະຊຸມ​ໃຫຍ່​ຄັ້ງ​ທີ 18 ຂອງ​ພັກ, ປະຊາກອນ​ຜູ້​ທຸກ​ຍາກ​ຂອງ​ຈີນ ໄດ້​ຫຼຸດ​ລົງ​ຈາກ 98,99 ລ້ານ​ຄົນ ເມື່ອ​ທ້າຍ​ປີ 2012 ຍັງ​ເຫຼືອ​ພຽງ 5,51 ລ້ານ​ຄົນ​ໃນ​ທ້າຍ​ປີ 2019, ອັດຕາ​ການ​ເກີດ​ຄວາມທຸກ​ຍາກ​ຈາກ 10,2% ຫຼຸດ​ລົງ​ເຫຼືອ 0,6%, ຄວາມທຸກ​ຍາກ​ໂດຍ​ລວມ​ໃນ​ເຂດ​ແຄວ້​ນ​ທີ່​ກ່ຽວຂ້ອງ​ໄດ້​ຮັບ​ການ​ແກ້​ໄຂ​ໂດຍ​ພື້ນ​ຖານ.
  ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ພາຍຫຼັງ​ສຳເລັດ​ໜ້າທີ່​ລຶບ​ລ້າງ​ຄວາມທຸກ​ຍາກ​ໃນ​ປີ​ນີ້​ແລ້ວ, ຈີນ ຈະ​ສາມາດ​ບັນລຸ​ເປົ້າ​ໝາຍ​ຫຼຸດຜ່ອນ​ຄວາມທຸກ​ຍາກ​ທີ່​ກຳນົດ​ໄວ້​ໃນ​ວາລະ​ການ​ພັດທະນາ​ແບບ​ຍືນ​ຍົງ​ຮອດ​ປີ 2030 ຂອງ​ອົງການ​ສະຫະ​ປະຊາຊາດ​ກ່ອນ​ເວລາ​ກຳນົດ 10 ປີ.  ໃນ​ໂລກ​ນີ້​ບໍ່​ມີ​ປະເທດ​ໃດ​ສາມາດ​ຊ່ວຍ​ປະຊາກອນ​ຜູ້​ທຸກ​ຍາກ​ຈຳນວນ​ຫຼາຍ​ປານ​ນີ້​ໃຫ້​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ໃນ​ເວລາ​ສັ້ນ​ປານ​ນີ້​ໄດ້ ຊຶ່ງ​ມີ​ຄວາມ​ໝາຍ​ສຳຄັນ​ຢ່າງ​ຍິ່ງ​ຕໍ່​ຈີນ​ກໍ​ຄື​ຕໍ່​ໂລກ. ຜົນສຳເລັດ​ຂອງ​ຈີນ ໃນ​ຂົງເຂດ​ລຶບ​ລ້າງ​ຄວາມທຸກ​ຍາກ​ໄດ້​ສ່ອງ​ແສງ​ໃຫ້​ເຫັນ​ເຖິງ​ທ່າແຮງ​ດ້ານ​ການເມືອງ​ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ຈີນ ແລະ ລະບອບ​ສັງຄົມ​ນິຍົມ​ຂອງ​ຈີນ.
  ຕາມ​ແຫຼ່ງ​ຂ່າວ​ຈາກ​ຊີ​ອາ​ໄອ, ໃນ​ໄລຍະ​ສຳຄັນ​ແຫ່ງ​ການ​ຕ້ານ​ກັບ​ການ​ແຜ່​ລະບາດ​ຂອງ​ພະຍາດ​ອັກເສບ​ປອດ COVID - 19, ທ່ານ ສີ​ຈິ້ນ​ຜິງ ໄດ້​ເດີນທາງ​ໄປ​ນະຄອນ​ອູ​ຮັ້ນ ແຂວງ​ຫູ​ເປີຍ ເພື່ອ​ສຳຫຼວດ​ວຽກ​ງານ​ປ້ອງ​ກັນ​ຄວບ​ຄຸມ​ການ​ແຜ່​ລະບາດ​ພະຍາດ COVID - 19. ຢູ່​ສູນ​ບັນຊາ​ການ​ໂຮງໝໍ​ໂຫ​ເຊີນ​ຊ່ານ, ທ່ານ ສີ​ຈິ້ນ​ຜິງ ໄດ້​ໂອ້​ລົມ​ກັບ​ຜູ້ຕາງໜ້າ​ພະນັກງານ​ການ​ແພດ​ທີ່​ພວມ​ເຮັດ​ວຽກ​ຢູ່​ເຂດ​ປິ່ນປົວ​ຄົນ​ເຈັບ​ຜ່ານ​ທາງ​ເຕັກນິກ​ປິ່ນປົວ​ທາງໄກ, ຢື້​ຢາມ​ຖາມ​​ຂ່າວສະພາບ​ການ​ເຮັດ​ວຽກ ແລະ ການ​ຮັບປະກັນ​ດ້ານ​ຕ່າງໆ. ທ່ານ ສີ​ຈິ້ນ​ຜິງ ເວົ້າ​ຕໍ່​ຜູ້ຕາງໜ້າ​ພະນັກງານ​ການ​ແພດ​ວ່າ: “ພວກ​ເຈົ້າ​ໄດ້​ນຸ່ງ​ຊຸດ​ປ້ອງ​ກັນ, ໃສ່​ຜ້າ​ປິດ​ປາກ. ຂ້າພະເຈົ້າ​ບໍ່​ໄດ້​ເຫັນ​ໃບ​ໜ້າ​ພວກ​ເຈົ້າ. ແຕ່​ວ່າ ພວກ​ເຈົ້າ​ແມ່ນ​ຄົນ​ທີ່​ໜ້າ​ຮັກ​ທີ່​ສຸດ​ໃນ​ໃຈ​ຂ້າ​ພະ​ເຈົ້າ. ທ່ານ ສີ​ຈິ້ນ​ຜິງ ຕາງໜ້າ​ສູນ​ກາງ​ພັກ, ສະແດງ​ຄວາມ​ຢື້​ຢາມ​ຖາມ​ຂ່າວ​ທີ່​ຈິງ​ໃຈ ແລະ ຄວາມ​ເຄົາລົບ​ນັບຖື​ທີ່​ສູງ​ສົ່ງຕໍ່​ພວກ​ເຈົ້າ”.

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110