ຫົວ​ຂໍ້ : ກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 26 ຮັບຮອງຂໍ້ລິເລີ່ມຂອງຫວຽດນາມ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 12/03/2020 09:08:00 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1153 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ກອງ​ປະຊຸມ​ຄັ້ງ​ນີ້​ໄດ້​ປຶກສາ​ຫາລື​ຫຼາຍ​ເນື້ອ​ໃນ​ສຳຄັນ, ກວດກາ, ຮັບຮອງ​ເອົາ ແລະ ສືບຕໍ່​ຜັນ​ຂະຫຍາຍ​ໃນ​ປີ​ອາ​ຊຽນ 2020 ໂດຍ​ຫວຽດນາມ ເປັນ​ເຈົ້າພາບ​ຈັດ​ຕັ້ງ.
  ຂ່າວ​ລາຍ​ງານ​ວ່າ: ວັນທີ 10 ມີນາ​ຜ່ານ​ມາ ທີ່ນະຄອນ​ດາ​ນັງ ທາງ​ພາກ​ກາງຫວຽດນາມ, ໄດ້​ເປີດ​ກອງ​ປະ ຊຸມ​ລັດຖະມົນຕີ​ເສດຖະກິດ​ອາ​ຊຽນ ວົງ​ແຄບ ​ຄັ້ງ​ທີ 26 (AEM-26) ໂດຍ​ການ​ເປັນ​ປະທານ​ຂອງ ທ່ານ ເຈິ່ນ​ຕ໊ວນ​ແອັງ ລັດຖະມົນຕີ​ກະຊວງອຸດ​ສາ​ຫະ​ກຳ​-​ການ​ຄ້າຫວຽດນາມ. ກອງ​ປະຊຸມ​ຄັ້ງ​ນີ້​ໄດ້​ປຶກສາ​ຫາລື​ຫຼາຍ​ເນື້ອ​ໃນ​ສຳຄັນ, ກວດກາ, ຮັບຮອງ​ຂໍ້​ລິ​ເລີ່ມ​ຂອງ​ຫວຽດນາມ ປະເທດ​ປະທານ​ໝູນວຽນ​ອາ​ຊຽນ ກ່ຽວ​ກັບກິດ ຈະການ​ບຸລິມະສິດ​ດ້ານ​ການ​ຮ່ວມ​ມື​ເສດຖະກິດ 12 ຂໍ້​ຂອງ ​ອາ​ຊຽນ ແລະ ສືບຕໍ່​ຜັນ​ຂະ ຫຍາຍ​ໃນ​ປີ​ອາ​ຊຽນ 2020 ໂດຍ​ຫວຽດນາມ ເປັນ​ເຈົ້າພາບ ເພື່ອ​ລາຍ​ງານ​ຕໍ່​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 36, ຄາດ​ວ່າ​ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 6 - 9 ເມສາ ປີ 2020.
  ຂ່າວ​ລະບຸ​ວ່າ: ບັນດາ​ບຸລິມະສິດ​ດັ່ງກ່າວບົນ​ພື້ນຖານ​ແມ່ນ​ອີງໃສ່ 3 ການ​ກຳນົດ​ທິດ​ຕົ້ນຕໍ​ຄື: ຊຸກຍູ້​ການ​ຮ່ວມ​ສຳພັນ ແລະ ເຊື່ອມ​ຕໍ່​ເສດຖະກິດ​ພາກ​ພື້ນ​ພາຍ​ໃນ​ກຸ່ມ​ອາ​ຊຽນ; ຍູ້​ແຮງ​ການ​ພົວພັນ​ຄູ່​ຮ່ວມ​ມື​ເພື່ອ​ສັນຕິພາບ ແລະ ການ​ພັດທະນາ​ແບບ​ຍືນ​ຍົງ; ຍົກສູງ​ກຳລັງ​ຄວາມ​ສາມາດ​ໃນການຮັບມື ແລະ ປະສິດ​ທິຜົນການເຄື່ອນ ໄຫວ​ຂອງ​ອາຊຽນ.   ໃນ​ສະພາບ​ໂຣກ​ລະບາດ COVID-19 ພວມ​ຜັນ​ແປ​ຢ່າງ​ສັບສົນ​ນັ້ນ, ຝ່າຍ​ຫວຽດນາມໄດ້​ສະເໜີ​ວ່າ: ອາ​ຊຽນຄວນ​ຮ່ວມ​ມື​ກັນກະທຳ​ເພື່ອ​ແນໃສ່​ຮັກສາ​ລະບົບ​ສະໜອງ​ໃນ​ອາ​ຊຽນ, ສ້າງ​ເງື່ອນໄຂ​ໜູນ​ຊ່ວຍ​ແຫຼ່ງ​ສະໜອງ​ວັດຖຸ​ໃຫ້​ແກ່​ບັນດາ​ວິ​ສາຫະ​ກິດ, ພິເສດ​ແມ່ນ​ບັນດາວິສາຫະ​ກິດ​ຂະໜາດ​ກາງ ແລະ ນ້ອຍ.
  ກ່ອນ​ໜ້າ​ນັ້ນ, ບັນດາ​ຜູ້​ແທນ​ໄດ້​ເຂົ້າ​ຮ່ວມ​ກອງ​ປະຊຸມ​ປຶກສາ​ຫາລື ຂັ້ນ​ລັດຖະມົນຕີ​ເສດຖະກິດ​ອາ​ຊຽນ ວົງ​ແຄບກັບ​ສະພາ​ໃຫ້​ຄຳ​ປຶກສາ​ດຳເນີນ​ທຸລະ​ກິດ​ອາ​ຊຽນ. ບັນດາ​ຜູ້​ແທນ​ລັດຖະມົນຕີ​ເສດຖະກິດ​ບັນດາ​ປະເທດ​ສະມາຊິກ​ອາ​ຊຽນ, ເຈົ້າ​ໜ້າທີ່​ເສດຖະກິດ​ບັນດາ​ປະເທດ ແລະ ນັກ​ຊ່ຽວຊານ​ດ້ານ​ເສດ​ຖະກິດ​ຂອງ​ສະພາ​ໃຫ້​ຄຳ​ປຶກສາ​ດຳເນີນ​ທຸລະ​ກິດ​ອາ​ຊຽນ ທີ່​ເຂົ້າ​ຮ່ວມ​ໄດ້​ຕີ​ລາຄາ​ສູງ​ວຽກ​ງານ​ກະກຽມ​ຂອງ​ປະເທດ​ເຈົ້າພາບ​ຫວຽດນາມ, ປະທານ​ ອາ​ຊຽນ 2020.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110