ກອງ​ປະຊຸມ​ໃຫຍ່​ສະ​ມາ​ຊິກ​ກໍາມະ​ບານ​ອົງການ​ກວດ​ສອບ​ແຫ່ງ​ລັດ ຄັ້ງ​ທີ II ໄດ້​ເປີດ​ຂຶ້ນ ໃນ​ວັນ​ທີ 11 ມີນາ​ ທີ່​ຫ້ອງ​ປະຊຸມ​ຂອງ​ອົງການ​ດັ່ງ​ກ່າວ. ພາຍ​ໃຕ້​ການ​ເປັນ​ປະທານ​ຂອງ​ສະຫາຍ ນາງ ​ວຽງ​ທອງ ສີ​ພັນ​ດອນ ກໍາ​ມະ​ການ​ສູນ​ກາງ​ພັກ ປະທານ​ອົງການ​ກວດ​ສອບ​ແຫ່ງ​ລັດ.
   ໃນ​ກອງ​ປະຊຸມ, ສະຫາຍ ວິໄລ​ສຸກ  ນະ​ໄພ​ວົງ  ຮັກສາ​ການ​ປະທານ​ສະຫະ​ພັນ​ກໍາ​ມະ​ບານ​ອົງການ​ກວດ​ສອບ ໄດ້​ຂຶ້ນ​ຜ່ານ​ບົດ​ສະຫຼຸບ ໃນ​ໄລຍະ2014-2019 ທີ່​ຜ່ານ​ມາ ຊຶ່ງ​ໄດ້​ຍົກ​ໃຫ້​ເຫັນ​ດ້ານ​ດີ, ດ້ານ​ອ່ອນ, ຂໍ້​ຂາດ​ຕົກ​ບົກ​ຜ່ອງ, ບົດຮຽນ​ທີ່​ຖອດ​ຖອນ​ໄດ້​ ແລະ​ ແຜນການ​ໃນຕໍ່ໜ້າ  ຊຶ່ງ​ໄດ້​ເອົາໃຈໃສ່​ເປັນ​ເຈົ້າ​ການ​ນໍາ​ພາ​ດ້ານ​ການ​ເມືອງ​-​ແນວ​ຄິດ​ເປັນ​ກົກ; ເປັນ​ເຈົ້າ​ການ​ທາງ​ດ້ານ​ການຈັດຕັ້ງ; ເປັນ​ເຈົ້າ​ການ​ປົກ​ປ້ອງ​ສິດ ​ແລະ​ຜົນ​ປະໂຫຍດ​ອັນ​ຊອບ​ທໍາ​ຂອງ​ພະນັກ​ງານ​-​ລັດຖະກອນ; ເປັນ​ເຈົ້າ​ການ​ໃນ​ການ​ກວດ​ສອບ ເພື່ອ​ຕິດຕາມ​ການ​ຄຸ້ມ​ຄອງ​ລັດ​​ຄຸ້ມ​ຄອງ​ເສດຖະກິດ, ແຜນ​ການ​-​ການ​ເງິນ ​ແລະ​ ເງິນຕາ ແລະ  ເປັນ​ເຈົ້າ​ການ​ເຂົ້າຮ່ວມໃນການ ຈັດຕັ້ງ​ປະຕິບັດ​ແນວທາງການ ​ຕ່າງປະເທດ​ຂອງ​ພັກ​-​ລັດ.  ສະ ແດງ​ອອກຄື: ມາ​ເຖິງ​ປັດຈຸບັນ, ສະຫະ​ພັນ​ກໍາ​ມະ​ບານ​ຂອງ​ອົງ ການ​ກວດ​ສອບ​ແຫ່ງ​ລັດ, ມີ 11 ໜ່ວຍ​ກໍາ​ມະ​ບານ​ທີ່​ຂຶ້ນ​ກັບ,  ມີ​ສະ​ມາ​ຊິກ​ກໍາ​ມະ​ບານ​ທັງ​ໝົດ 262 ສະຫາຍ,ຍິງ 100 ສະຫາຍ, ມີ​ສະມາຊິກ​ພັກ​ສົມບູນ 115 ສະຫາຍ, ສໍາ ​ຮອງ 18 ສະຫາຍ, ວຸດທິການ​ ສຶກສາປະລິນຍາ​ເອກ 1 ສະ ຫາຍ, ປະ​ລິນ​ຍາ​ໂທ 48 ສະຫາຍ, ປະລິນຍາ​ຕີ 194 ສະຫາຍ​ ແລະ ​ຊັ້ນ​ສູງ 19 ສະ​ຫາຍ ໃນໄລຍະ​ ທີ່​ຜ່ານ​ມາບັນດາ​ສະ​ມາຊິກ​ກໍາ​ມະ​ບານໄດ້​ຮັບ​ການ​ເລື່ອນ​ຊັ້​ນ-​ຂັ້ນຄື: ເລື່ອນ​ຕໍາ​ແໜ່​ງ​ບໍລິຫານ ຈໍາ​ນວນ 190 ເທື່ອ​ສະຫາຍ; ເລື່ອນ​ຊັ້​ນ-​ຂັ້ນ​ເງິນເດືອນ 1.239 ສະຫາຍ; ໄດ້​ຮັບ​ຫຼຽນ​ຕ່າງໆ​ຈາກ​ລັດຖະບານ ເຊັ່ນ: ຫຼຽນ​ໄຊ​ແຮງ​ງານ​ຊັ້ນ 2 ຈໍາ​ນວນ 5 ສະຫາຍ, ຫຼຽນ​ໄຊ​ແຮງ​ງານ​ຊັ້ນ 3 ຈໍາ​ນວນ 4 ສະຫາຍ, ຫຼຽນ​ກາ ຈໍາ​ນວນ 28 ສະຫາຍ, ໄດ້​ຮັບ​ໃບ​ຍ້ອງຍໍ​ຈາກ​ປະທານ​ອົງການ​ກວດ​ສອບ ຈໍາ​ນວນ 247 ສະຫາຍ ແລະ ໄດ້​ຮັບ​ໃບ​ຍ້ອງ​ຍໍ​-​ໃບ​ຊົມເຊີຍ​ອື່ນໆ.  ຄຽງ​ຄູ່​ກັນ​ນັ້ນ,  ກໍ​ໄດ້​ດໍາ​ເນີນ​ການ​ກວດ​ສອບ​ທັງ​ໝົດ ຈໍາ​ນວນ  327 ເປົ້າ​ໝາຍ, ໃນ​ນັ້ນ: ກວດ​ສອບ​ບົດ​ສະຫຼຸບ​ຂາດ​ຕົວ​ການຈັດຕັ້ງ​ປະຕິບັດ​ງົບປະມານ​ແຫ່ງ​ລັດ ຈໍາ​ນວນ 120 ຄັ້ງ, ກວດ​ສອບ​ໂຄງການ​ການ​ເງິນ​ກູ້​ຢືມ ​ແລະ ​ຊ່ວຍເຫຼືອ​ຈາກ​ຕ່າງ​ປະ​ເທດ​ຈໍາ​ນວນ 119 ຄັ້ງ, ກວດ​ສອບ​ທະນາຄານ​ແຫ່ງ​ລັດ ຈໍາ​ນວນ 20 ຄັ້ງ, ກວດ​ສອບ​ວິ​ສາ​ຫະ​ກິດ​ຂອງ​ລັດ ຈໍາ​ນວນ 68 ຄັ້ງ, ກວດ​ສອບ​ເຫັນ​ລາຍ​ຮັບ​ເພີ່ມ ຈໍາ​ນວນ 2.925,99 ຕື້​ກີບ, ລາຍ​ຈ່າຍ​ເພີ່ມ ຈໍາ​ນວນ 6.023,27 ຕື້​ກີບ.
   ທິດ​ທາງ​ແຜນການ​ໃນ ຕໍ່ໜ້າ 2020-2024, ສືບຕໍ່​ເພີ່ມ​ທະວີ​ສຶກສາ​ອົບຮົມ​ດ້ານ​ການ​ເມືອງ​-​ແນວ​ຄິດ ໃຫ້​ພະນັກ​ງານ​-​ສະ​ມາ​ຊິກ​ກໍາ​ມະ​ບານ​ດ້ວຍ​ຫຼາຍ​ຮູບ​ການ; ຊຸກຍູ້​ວຽກ​ງານ​ກໍາ​ມະ​ບານ ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການເຄື່ອນໄຫວ​ວິຊາ​ສະເພາະ​ກວດ​ສອບ ໃນ​ການ​ຕິດຕາມ ດໍາ​ເນີນ​ການ​ກວດ​ສອບ ແລະ​ລາຍ​ງານ​ຜົນ​ການ​ກວດ​ສອບ ຕໍ່​ກົມ​ການເມືອງ​ສູນ​ກາງ​ພັກ, ຕໍ່​ສະພາ​ແຫ່ງ​ຊາດ, ລັດຖະບານ​ແລະ​ອໍາ​ນາດ​ການ​ປົກຄອງ ທີ່​ຄຸ້ມ​ຄອງ​ເປົ້າ​ໝາຍ​ຖືກ​ກວດ​ສອບ,ຍູ້​ແຮງ​ການ​ປະກອບສ່ວນ ແລະ ຍົກ​ລະດັບ​ຄວາມ​ສາມາດ​ຂອງ​ສະ​ມາ​ຊິກ​ກໍາ​ມະ​ບານ ໃນ​ການ​ພັດທະນາ, ການ​ສ້າງ​ຂີດ​ຄວາມ​ສາມາດ ໃຫ້​ແກ່​ນັກ​ກວດ​ສອບ, ໂດຍ​ສະເພາະ​ການ​ພັດທະນາ​ສະ​ຖາ​ບັນ​ຝຶກ​ອົບຮົມ​ໃນຕໍ່ໜ້າ ໃຫ້​ມີ​ຄວາມ​ເຂັ້ມແຂງ,ເປັນ​ບ່ອນ​ຜະລິດ​ແລະ​ສ້າງ​ຄົນ​ທີ່​ມີ​ຄຸນ​ນະ​ພາບ​ຢ່າງ​ແທ້​ຈິງ,ຍູ້​ແຮງ​ຍົກ​ລະດັບ​ຢ່າງຮອບດ້ານ​ໃຫ້​ສະ​ມາ​ຊິກ​ກໍາ​ມະ​ບານ ໄດ້​ພັດທະນາ​ຍົກ​ລະດັບ​ທາງ​ດ້ານ​ທິດ​ສະ​ດີ​ການ​ເມືອງ​-​ການ​ປົກຄອງ,ວິຊາ​ສະເພາະ ແລະ​ພາສາ​ຕ່າງປະເທດ ໃນ​ໄລຍະ​ສັ້ນ​-​ຍາວ ຢູ່​ພາຍ​ໃນ​ແລະ​ຕ່າງປະເທດ ແລະ ວຽກ​ງານ​ອື່ນໆ.
   ກອງ​ປະຊຸມ​ຄັ້ງ​ນີ້, ຍັງ​ໄດ້​ມີ​ການ​ປ່ອນ​ບັດ​ເລືອກ​ເອົາ​ຄະນະ​ສະຫະ​ພັນ​ກໍາ​ມະ​ບານ​ອົງການ​ກວດ​ສອບ​ແຫ່ງ​ລັດ ຊຸດ​ໃໝ່, ໄດ້​ເລືອກ​ເອົາ ສະຫາຍ ຕ້ອຍ ພົນ​ທິ​ລາດ ເປັນ​ປະທານ​ສະຫະ​ພັນ​ກໍາ​ມະ​ບານ​ອົງການ​ກວດ​ສອບ​ແຫ່ງ​ລັດ, ສະຫາຍ ວິໄລ​ສຸກ ນະ​ໄພ​ວົງ ເປັນ​ຮອງ​ປະທານ, ເປັນ​ປະທານ​ກວດກາ, ສະຫາຍ ວຽງ​ຄໍາ ສິມ​ມະ​ໄລ​ວົງ ເປັນ​ຮອງ​ປະທານ, ສະຫາຍ​ ບັນລັງ ບຸນ​ທາວົງ ເປັນ​ຮອງ​ປະທານ​ກວດກາ, ກໍາ​ມະ​ການ, ສະຫາຍ ໄຊໂຍ ເຮືອງ​ນິມິດ, ສະຫາຍ​ຕຸ້ຍ ເພັດ​ສະ​ນຸ​ບານ, ສະຫາຍ ນາງ ອາ​ລຸນ​ນີ ໄຊ​ຍະ​ວຸດ, ສະຫາຍ ຈັນທະ​ວິ​ໄຊ ອິນ​ຊີ​ວິລາດ,ສະຫາຍ​ພູ​ລັດຕະນະ ພົມ​ມະຫາ​ໄຊ, ສະຫາຍ ສຸກ​ສະຫວັນ ພະ​ໄຊ​ສົມບັດ ແລະ ສະຫາຍ ຈັນທະ​ຄານ ປິ່ນ​ພະ​ຫຍາ ເປັນ​ກໍາ​ມະ​ການ.
 (ຂ່າວ: ແສງ​ຈັນ)