ໜັງສືພິມ ປະຊາຊົນ

ກອງປະຊຸມໃຫຍ່ ຄັ້ງທີ VI ຂອງສະຫະພັນກຳມະບານ ຫສພ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 13/03/2020 08:29:24 ຈຳນວນຢ້ຽມຊົມ 1208 ຄັ້ງ

ຫ້ອງວ່າການສູນກາງພັກ (ຫສພ) ໄດ້ຈັດກອງປະຊຸມໃຫຍ່ຄັ້ງທີ VI ຂອງຄະນະບໍລິຫານງານສະຫະພັນກຳມະບານຫ້ອງວ່າການສູນກາງພັກຂຶ້ນໃນວັນທີ 11 ມີນາ, ທີ່ ຫສພ, ນະຄອນຫຼວງວຽງຈັນໂດຍການເປັນປະທານຂອງທ່ານ ສົມນຶກ ສົມວິຈິດ ປະທານສະຫະພັນກຳມະບານ ຫສພ, ທ່ານ ທອງສະລິດ ມັງໜໍ່ເມກ ຫົວໜ້າ ຫສພ, ມີຜູ້ຕາງໜ້າຈາກ 3 ອົງການຈັດຕັ້ງມະຫາຊົນ, ພ້ອມດ້ວຍສະມາຊິກກຳມະບານ ຫສພ ເຂົ້າຮ່ວມ.
ໃນທີ່ປະຊຸມໄດ້ເຫັນດີເປັນເອກະພາບຮັບຮອງເອົາບົດລາຍງານການເມືອງ, ແຜນຍຸດທະສາດພັດ ທະນາວຽກງານກຳມະບານ ຫສພ 5 ປີ (2020-2024) ແລະ ບົດສຳຫຼວດການນຳພາຂອງຄະນະບໍລິຫານງານສະຫະພັນກຳມະບານຊຸດທີ V ໃນໄລຍະ 5 ປີຜ່ານມາ ແລະ ທິດທາງ, ໜ້າທີ່ໃນ 5 ປີຕໍ່ໜ້າໂດຍ ກຳນົດ 8 ແຜນງານ 28 ໂຄງການເພື່ອສ້າງພື້ນຖານໃຫ້ຄະນະບໍລິຫານງານກຳມະບານ ຫສພ ຊຸດໃໝ່ ນຳພາສະມາຊິກຂອງຕົນສ້າງບາດລ້ຽວຫັນປ່ຽນໃໝ່ທີ່ຕັ້ງໜ້າໃຫ້ແກ່ອົງຄະນະພັກ ຫສພ, ສຸມໃສ່ພັດທະນາວຽກງານກຳມະບານຂອງ ຫສພ ໃຫ້ເຕີບໃຫຍ່ເຂັ້ມແຂງຕາມທິດ “ຍົກສູງບົດບາດ ແລະ ຄວາມສາມາດການເປັນເສນາທິການຂອງສະມາຊິກກຳມະບານ ຫສພ, ເອົາໃຈໃສ່ສ້າງສະຫະພັນກຳມະບານ ຫສພ ໃຫ້ເປັນອົງການເຕົ້າໂຮມຄວາມສາມັກຄີທີ່ໜັກແໜ້ນເຂັ້ມແຂງ, ເປັນຕົວແທນໃນການປົກປ້ອງສິດ ຜົນປະໂຫຍດອັນຊອບທຳ ແລະ ເປັນກຳລັງແຮງສັງລວມທີ່ເດັດດ່ຽວໜຽວແໜ້ນ, ເຮັດສຳເລັດທຸກພາລະ ກິດປະຕິວັດທີ່ໄດ້ຮັບການມອບໝາຍ”.
ໃນທີ່ປະຊຸມໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານສະຫະພັນກຳມະບານຊຸດທີ VI ຊຶ່ງມີຜູ້ສະໝັກທັງໝົດ 17 ທ່ານ, ຍິງ 5 ທ່ານ, ໃນນັ້ນໄດ້ເລືອກເອົາ 13 ທ່ານເພື່ອເປັນແກນນຳໃນການຊີ້ນຳ-ນຳພາສະຫະພັນກຳມະບານ ຫສພ ເພື່ອປະຕິບັດໜ້າທີ່ການເມືອງໃຫ້ໄດ້ຮັບໝາກຜົນ.
(ຂ່າວ-ພາບ: ສຸກສາຄອນ)