ໜັງສືພິມ ປະຊາຊົນ

ເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນອົງຄະນະພັກເມືອງໄຊຍະບູລີ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 13/03/2020 08:33:27 ຈຳນວນຢ້ຽມຊົມ 1781 ຄັ້ງ

ໃນອາທິດຜ່ານມານີ້ ເມືອງ ໄຊຍະບູລີ ແຂວງໄຊຍະບູລີ ໄດ້ຈັດພິທີເຜີຍແຜ່ຜົນສໍາເລັດກອງປະຊຸມໃຫຍ່ ຄັ້ງທີ IX ຂອງຜູ້ແທນອົງຄະນະພັກ ເມືອງໄຊຍະບູລີຂຶ້ນທີ່ເດີ່ນສະໝາມຫຼວງຂອງແຂວງ ໂດຍການໃຫ້ກຽດເຂົ້າຮ່ວມຂອງສະຫາຍ ບຸນແທນ ທີແກ້ວ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງ ໄຊຍະບູລີ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການຂອງເມືອງ, ພະນັກງານ ວິຊາການ, ອົງການປົກຄອງບ້ານຕະຫຼອດຮອດພໍ່ແມ່ປະຊາຊົນພາຍໃນເມືອງເຂົ້າຮ່ວມ.
ໃນພິທີ ສະຫາຍ ບຸນແທນ ທີແກ້ວ ໄດ້ໃຫ້ກຽດຂຶ້ນກ່າວປາໄສລາຍງານຜົນສຳເລັດຂອງການດຳເນີນກອງປະຊຸມໃຫຍ່ຜູ້ແທນອົງຄະນະພັກເມືອງໄຊຍະບູລີ ຄັ້ງທີ IX ບາງຕອນທ່ານກ່າວວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງໄຊຍະບູລີ ຄັ້ງທີ IX ໄດ້ເປີດຂຶ້ນໃນວັນທີ 5 ມີນາ ແລະ ສໍາເລັດລົງໃນວັນທີ 6 ມີນາຜ່ານມາ ທີ່ຫ້ອງປະຊຸມໃຫຍ່ຂອງເມືອງ ໂດຍມີຜູ້ແທນເຂົ້າຮ່ວມທັງໝົດ 165 ສະຫາຍ ຍິງ 32 ສະຫາຍທີ່ເປັນຕົວແທນ ໃຫ້ສະມາຊິກພັກທັງໝົດ 2.730 ສະຫາຍ ຍິງ 1.100 ສະຫາຍໃນທົ່ວເມືອງ, ກອງປະຊຸມໄດ້ ພ້ອມກັນສະຫຼຸບສັງລວມຄືນຜົນ ງານທີ່ຍາດມາໄດ້ ໃນໄລຍະ 5 ປີຜ່ານມາເຫັນໄດ້ວ່າເມືອງໄຊ ຍະບູລີມີສະຖຽນລະພາບທາງ ດ້ານການເມືອງ, ສັງຄົມມີຄວາມ ສະຫງົບປອດໄພ ເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມມີບາດກ້າວ ແລະ ທ່ວງທ່າຂະຫຍາຍຕົວຂຶ້ນ, ເສດ ຖະກິດຂະຫຍາຍຕົວສະເລ່ຍ 8% ຕໍ່ປີ, ລາຍໄດ້ຕໍ່ຫົວຄົນບັນ ລຸ 19 ລ້ານກວ່າກີບຕໍ່ຄົນຕໍ່ປີ ເທົ່າກັບ 2.490 ໂດລາ, ຜູ້ແທນ ກອງປະຊຸມໄດ້ພ້ອມກັນໃຊ້ສິດ ປະຊາທິປະໄຕຂອງຕົນປ່ອນ ບັດເລືອກເອົາຄະນະບໍລິຫານງານພັກເມືອງຊຸດໃໝ່ມີຜູ້ສະໝັກ 31 ສະຫາຍ ຍິງ 9 ສະຫາຍ ເລືອກເອົາ 27 ສະຫາຍ ຍິງ 8 ສະຫາຍ, ເລືອກຕັ້ງເອົາຄະນະປະຈໍາ 9 ສະຫາຍ ຍິງ 1 ສະຫາຍ, ກອງ ປະຊຸມຄັ້ງປະຖົມມະລືກໄດ້ຕົກ ລົງເປັນເອກະພາບເລືອກເອົາສະຫາຍ ບຸນແທນ ທີແກ້ວ ເປັນເລຂາຄະນະບໍລິຫານງານ ພັກເມືອງ, ສະຫາຍ ຄຳຜາຍ ແກ້ວບົວ ເປັນຮອງເລຂາຄະນະ ບໍລິຫານງານພັກເມືອງ ແລະ ສະຫາຍ ເສນ ພັນລັກ ເປັນຮອງ ເລຂາຄະນະບໍລິຫານງານພັກເມືອງ ທັງເປັນປະທານຄະນະກວດກາພັກເມືອງ, ເລືອກເອົາສະຫາຍ ນາງ ກັນດາວອນ ຄຳຕາ ແລະ ສະຫາຍ ພອນປະດິດ ຈັນທະມາດ ເປັນຮອງປະທານຄະນະກວດກາພັກເມືອງ.
(ຂ່າວ-ພາບ: ສົມພົງ ສີສະຫວັດ)