ຫົວ​ຂໍ້ : ຫວຽດນາມ ພັດທະນາເສດຖະກິດທະເລແບບຍືນຍົງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 17/03/2020 08:47:34 ຈຳ​ນວນ​ຜູ້​ເຂົ້າ​ຢ້ຽມ​ຊົມ 456 ຄັ້ງ

ຮຽບ​ຮຽງ​ໂດຍ: ສີ​ວັນ

  ລັດຖະບານ ຫວຽດນາມ ໄດ້​ປະກາດ​ໃຊ້​ແຜນການ​ສັງ​ລວມ ແລະ ແຜນການ 5 ປີ ກ່ຽວ​ກັບ​ການ​ປະຕິບັດ​ມະຕິ​ເລກ​ທີ 36, ສະບັບ​ອອກ​ວັນ​ທີ 22 ຕຸລາ 2018 ຂອງ​ກອງ​ປະຊຸມ​ຄັ້ງ​ທີ 8 ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດຫວຽດນາມ ຊຸດ​ທີ 12 ກ່ຽວ​ກັບ​ຍຸດທະສາດ​ການ​ພັດທະນາ​ເສດຖະກິດ​ທາງ​ທະເລ ຫວຽດນາມ ແບບ​ຍືນ​ຍົງ​ຮອດ​ປີ 2030, ວິໄສ​ທັດ​ປີ 2045. 
  ແຜນການ​ດ້ວຍ​ບັນດາ​ມາດ​ຕະການ​ລະອຽດ, ຈະ​ຊຸກຍູ້ ຫວຽດນາມ, ປະເທດ​ທີ່​ມີ​ຝັ່ງ​ທະເລ​ຍາວ​ແຕ່​ເໜືອ​ຮອດ​ໃຕ້ 3.260 ກິໂລແມັດ ແລະ ມີ​ເກາະ​ໃຫຍ່​ນ້ອຍ​ຫຼາຍ​ກວ່າ 3.000 ແຫ່ງ, ລວມ​ທັງ 28 ແຂວງ, ນະຄອນ​ແຄມ​ທະເລ, ຈະ​ເສີມ​ຂະຫຍາຍ​ທ່າ​ໄດ້​ປຽບ, ຄວາມ​ສາມາດ​ບົ່ມ​ຊ້ອນ​ຢ່າງ​ໃຫຍ່​ຫຼວງ ໃນ​ການ​ພັດທະນາ​ເສດຖະກິດ​ທາງ​ທະເລ​ແບບ​ຍືນ​ຍົງ.
  ແຜນການ​ສັງ​ລວມ​ທີ່​ລັດຖະບານ​ຫວຽດນາມ​ປະກາດ​ເມື່ອ​ວັນ​ທີ 6 ມີນາ​ຜ່ານ​ມາ, ຮອດ​ປີ 2030, ວິໄສ​ທັດ​ປີ 2045 ໄດ້​ຍົກ​ອອກ 6 ເນື້ອ​ໃນ, ມາດ​ຕະການ​ກ່ຽວ​ກັບ​ການ​ຄຸ້ມ​ຄອງ​ທະເລ ແລະ ມະຫາ​ສະໝຸດ, ການ​ຄຸ້ມ​ຄອງ​ເຂດ​ແຄມ​ຝັ່ງ​ທະເລ; ກ່ຽວ​ກັບ​ການ​ພັດທະ​ນາ​ເສດຖະກິດ​ທາງ​ທະເລ, ເຂດ​ແຄມ​ຝັ່ງ​ທະເລ; ກ່ຽວ​ກັບ​ການ​ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ, ສ້າງ​ວັດທະນະທຳ​ທະເລ, ສັງຄົມ​ສະໜິດ​ຕິດ​ພັນ, ເປັນ​ມິດ​ກັບ​ທະເລ; ກ່ຽວ​ກັບ​ວິທະຍາສາດ, ເຕັກ​ໂນ​ໂລ​ຊີ, ພັດທະນາ​ແຫຼ່ງ​ຊັບພະຍາກອນ​ມະນຸດ​ທະເລ; ກ່ຽວ​ກັບ​ສິ່ງແວດລ້ອມ, ຮັບ​ມື​ກັບ​ໄພ​ທຳ​ມະ​ຊາດ, ການ​ປ່ຽນແປງ​ຂອງ​ດິນ​ຟ້າ​ອາກາດ ແລະ ນ້ຳ​ທະເລ​ຍື່ງ​ຂຶ້ນ​ສູງ; ຮັບ​ປະ​ກັນ​ການ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະຫງົບ, ການ​ຕ່າງປະເທດ ແລະ ການ​ຮ່ວມ​ມື​ສາ​ກົນ.
 ການ​ພັດທະນາ​ເສດຖະ ກິດ​ທາງ​ທະເລ, ເຂດ​ແຄມ​ຝັ່ງ​ທະ​ເລ. ມາດ​ຕະການ​ໃຫຍ່​ສຸດ ແມ່ນ​ລົງທຶນ​ພັດທະນາ​ພື້ນຖານ​ໂຄງ​ລ່າງ ແລະ ພື້ນຖານ​ທາງ​ດ້ານ​ວັດຖຸ​ເຕັກນິກ​ຂະແໜງ​ທ່ອງ​ທ່ຽວ​ໃຫ້​ແກ່​ບັນດາ​ບໍ​ລິ ເວນ​ຈຸດ​ສຸມ, ເຂດ​ທີ່​ມີ​ກຳລັງ​ໜູນ​ພັດທະນາ​ການທ່ອງທ່ຽວ​ແຄມ​ຝັ່ງ​ທະເລ, ທະເລ​ໝູ່​ເກາະ; ສ້າງ​ບັນດາ​ເຂດ​ບໍລິການ​ທ່ອງ​ທ່ຽວ​ທີ່​ມີ​ການ​ປະກອບ​ຈາກ​ຫຼາຍ​ພາກ​ສ່ວນ. ຫວຽດນາມ ຈະ​ທົດ​ລອງ​ພັດທະນາ​ບັນດາ​ການ ທ່ອງ​ທ່ຽວ​ໄປ​ຍັງ​ບັນດາ​ເກາະ, ບໍລິເວນ​ທະເລ​ຢູ່​ໄກ​ຝັ່ງ ໂດຍ​ມີ​ການ​ສົມທົບ​ກັບ​ການ​ບໍລິການ​ທາງ​ທະເລ ອື່ນໆ. ພ້ອມ​ທັງ​ສົ່ງເສີມ​ການ​ໂຄສະນາ​ການທ່ອງທ່ຽວ, ສ້າງ​ບັນດາ​ຜະລິດ​ຕະ​ພັນ, ລະບົບ​ຜະລິດ​ຕະ​ພັນ, ເຄື່ອງໝາຍ​ການທ່ອງທ່ຽວ​ທາງ​ທະເລ​ຂັ້ນ​ສູງ​ລະດັບ​ສາກົນ​ເປັນ​ຫຼາຍ​ຮູບ​ຫຼາຍ​ແບບ ເຊື່ອມ​ຕໍ່​ກັບ​ບັນດາ​ການທ່ອງທ່ຽວ​ສາ​ກົນ.
  ຫວຽດນາມ ຈະ​ພັດທະນາ​ລະບົບ​ທ່າ​ກໍາ​ປັ່ນ​ຕາມ​ແຜນຜັງ​ສັງ​ລວມ ແລະ ເປັນ​ເອກະ​ພາບ​ດ້ວຍ​ຂອບ​ຂະໜາດ​ທົ່ວ​ປະເທດ ເພື່ອ​ແນໃສ່​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ​ຫັນ​ປະເທດ​ຊາດ​ເປັນ​ປະເທດ​ອຸດ ສາ​ຫະ​ກຳ ແລະ ທັນ​ສະໄໝ; ສ້າງ​ພື້ນຖານ​ທາງ​ດ້ານ​ວັດຖຸ​ເຕັກນິກ ເພື່ອ​ເຊື່ອມ​ໂຍງ​ຢ່າງ​ວ່ອງໄວ ແລະ ມີ​ກຳລັງ​ແກ້ງ​ແຍ້ງ​ຢ່າງ​ພຽງພໍ ໃນ​ການເຄື່ອນໄຫວ​ຂອງ​ທ່າ​ກໍາ​ປັ່ນ​ກັບ​ບັນດາ​ປະ ເທດ​ໃນ​ພາກ​ພື້ນ ແລະ ໃນ​ໂລກ.
  ຫວຽດນາມ ຈະ​ສຸມ​ໃສ່​ພັດທະນາ​ການ​ລ້ຽງ​-​ປູກ​ສິນ​ທະເລ​ຢູ່​ທະເລ, ເຂດ​ແຄມ​ຝັ່ງ​ທະເລ​ຕາມ​ທິດ​ຜະລິດ​ເປັນ​ສິນຄ້າ, ທັນ​ສະໄໝ, ໝູນ​ໃຊ້​ເຕັກ​ໂນ​ໂລ​ຊີ​ສູງ, ຍູ້​ແຮງ​ການ​ພັດທະນາ​ບັນດາ​ອາຊີບ​ຫາ​ສິນ​ທະເລ​ຢູ່​ໄກ​ຝັ່ງ​ຕາມ​ທິດ​ອຸດສາຫະກຳ, ຕິດ​ພັນ​ກັບ​ການ​ຂຸດ​ຄົ້ນ​ແບບ​ຍືນ​ຍົງ, ການ​ຮັກສາ ແລະ ພັດທະນາ​ແຫຼ່ງ​ຜົນ​ປະໂຫຍດ​ຊັບພະຍາກອນ​ນ້ຳ. ຫວຽດນາມ ໄດ້​ກໍ່ສ້າງ ແລະ ນຳ​ໃຊ້​ບັນດາ​ຮູບ​ແບບ​ການ​ຈັດຕັ້ງການ​​ຜະລິດ​ໃນ​ການ​ລ້ຽງ ແລະ ​ປູກ​ສິນ​ທະເລ​ໃຫ້​ເໝາະ​ສົມ.
  ຍົກ​ສູງ​ຊີວິດ​ການ​ເປັນ​ຢູ່​ໃຫ້​ປະຊາຊົນ, ສ້າງ​ວັດທະນະທຳ​ທະ​ເລ. ຫວຽດນາມ ຈະ​ເພີ່ມ​ເຕີມ ແລະ ສ້າງ​ພື້ນຖານ​ໂຄງ​ລ່າງ​ເສດຖະກິດ - ສັງຄົມ​ໃຫ້​ຄົບ​ຖ້ວນ ເພື່ອ​ຮັບປະກັນ​ຊີວິດ​ການ​ເປັນ​ຢູ່​ໃຫ້​ແກ່​ປະຊາຊົນ​ຢູ່​ບັນດາ​ເຂດ​ທະເລ, ໝູ່​ເກາະ, ສ້າງ​ປັບປຸງ ແລະ ພັດທະນາ​ບັນດາ​ລະບອບ​ລະບຽບ​ການ​ທາງ​ດ້ານ​ວັດທະນະທຳ​ໃຫ້​ແກ່​ວົງ​ຄະນາ​ຍາດ​ພົນລະເມືອງ​ເຂດ​ທະເລ ແລະ ແຄມ​ຝັ່ງ​ທະເລ​ໃຫ້​ສົມບູນ​ແບບ, ຮັກສາ, ຟື້ນ​ຟູ ແລະ ພັດທະນາ​ບັນດາ​ງານ​ບຸນ, ເຂດ​ປູຊະນີຍະສະຖານ​ປະຫວັດສາດ, ວັດທະນະທຳ; ອະນຸລັກ​ຮັກສາ​ວັດທະນະທຳ, ສະຖາປັດຕະຍະກຳ ແລະ ມໍລະດົກ​ທຳ​ມະ​ຊາດ, ຮັກສາ, ພັດທະນາ​ບັນດາ​ສູນວັດທະນະ ທຳ​ທີ່​ເປັນ​ເອກະລັກ​ສະເພາະ​ຢູ່​ບັນດາ​ແຂວງ, ນະຄອນ​ຕິດ​ກັບ​ທະເລ​ທີ່​ຂຶ້ນ​ກັບ​ສູນ​ກາງ. ຜັນ​ຂະຫຍາຍ​ການ​ປະຕິບັດ​ວຽກ​ງານ​ການ​ສຶກສາ, ຍົກ​ສູງ​ສະຕິ​ຄວາມ​ຮັບ​ຮູ້, ຄວາມ​ຮູ້, ຄວາມ​ເຂົ້າໃຈ​ກ່ຽວ​ກັບ​ທະເລ, ມະຫາ​ສະໝຸດ, ຄວາມ​ສາມາດ​ຄົງ​ຕົວ, ປັບ​ຕົວ​ໃຫ້​ແທດເໝາະ​ກັບ​ການ​ປ່ຽນແປງ​ຂອງ​ດິນ​ຟ້າ​ອາກາດ, ນ້ຳ​ທະເລ​ຍື່ງ​ຂຶ້ນ​ສູງ, ການ​ປ້ອງ​ກັນ, ຫຼີກ​ລ່ຽງ​ໄພ​ທຳ​ມະ​ຊາດ​ໃຫ້​ແກ່​ນັກຮຽນ, ນັກ​ສຶກສາ​ທຸກ​ຂັ້ນ.
  ຍູ້​ແຮງ​ການ​ຄົ້ນຄວ້າ​ວິທະ ຍາສາດ​ເຕັກ​ໂນ​ໂລ​ຊີ​ທາງ​ທະ​ເລ. ກ່ຽວ​ກັບ​ດ້ານ​ວິທະຍາສາດ, ເຕັກ​ໂນ​ໂລ​ຊີ, ການ​ພັດທະນາ​ແຫຼ່ງ​ຊັບພະຍາກອນ​ມະນຸດ​ທາງ​ທະເລ, ລັດຖະບານ ຫວຽດ ນາມ ໄດ້​ຮຽກຮ້ອງ​ໃຫ້​ມີ​ການ​ປ່ຽນແປງ​ໃໝ່, ມີ​ຫົວຄິດ​ປະດິດ​ສ້າງ, ໝູນ​ໃຊ້​ບັນດາ​ຜົນງານ​ທາງ​ດ້ານ​ວິທະຍາສາດ, ເຕັກ​ໂນ​ໂລ​ຊີ​ກ້າວໜ້າ ແລະ ຍູ້​ແຮງ​ການ​ຄົ້ນຄວ້າ​ວິທະຍາສາດ, ເຕັກ​ໂນ​ໂລ​ຊີ​ທາງ​ທະເລ​ຕິດ​ພັນ​ກັບ​ການ​ສຳຫຼວດ​ທະເລ​ໂດຍ​ພື້ນ​ຖານ. ສ້າງຕັ້ງ​ບັນດາ​ສູນ​ຄົ້ນຄວ້າ​ວິທະຍາສາດ, ໝູນ​ ໃຊ້​ເຕັກ​ໂນ​ໂລ​ຊີ​ກ້າວໜ້າ, ດີເດັ່ນ​ຄື: ເຕັກ​ໂນ​ໂລ​ຊີ ຊີວະ​ວິທະຍາ ​ທາງ​ທະເລ, ເຕັກ​ໂນ​ໂລ​ຊີ​ອະວະ​ກາດ​ໃນ​ການ​ຕິດຕາມ​ກວດກາ​ທະເລ, ບຳລຸງ​ສ້າງ​ແຫຼ່ງ ຊັບພະຍາກອນ​ມະນຸດທາງ ​ທະເລ​ທີ່​ມີ​ຄຸນ​ນະ​ພາບ​ສູງ, ຍູ້​ແຮງ​ການ​ຮ່ວມ​ມື, ຍາດ​ແຍ່ງ​ການ​ໜູນ​ຊ່ວຍ​ຂອງ​ບັນດາ​ຄູ່​ຮ່ວມ​ມື, ບັນດາ​ອົງການ​ຈັດ​ຕັ້ງ​ສາກົນ ແລະ ພາກ​ພື້ນ ເພື່ອ​ຄົ້ນຄວ້າ​ວິທະຍາສາດ ແລະ ໝູນ​ໃຊ້​ເຕັກ​ໂນ​ໂລ​ຊີ​ທັນ​ສະໄໝ ເຂົ້າ​ໃນ​ບັນດາ​ຂະແໜງ​ເສດຖະ ກິດ​ທະເລ, ປົກ​ປັກ​ຮັກສາ​ສິ່ງ ແວດລ້ອມ, ປ້ອງ​ກັນ, ຕ້ານ​ໄພ​ທຳ​ມະ​ຊາດ ແລະ ປັບ​ຕົວ​ໃຫ້​ແທດເໝາະ​ກັບ​ການ​ປ່ຽນແປງ​ຂອງ​ດິນ​ຟ້າ​ອາກາດ, ນ້ຳ​ທະເລ​ຍື່ງ​ຂຶ້ນ​ສູງ.
  ກ່ຽວ​ກັບ​ສິ່ງແວດລ້ອມ, ຮັບ​ມື​ກັບ​ໄພ​ທຳ​ມະ​ຊາດ,ການປ່ຽນແປງ​ຂອງ​ດິນ​ຟ້າ​ອາກາດ ແລະ ນ້ຳ​ທະເລ​ຍື່ງຂຶ້ນ​ສູງ, ຫວຽດນາມ ຈະ​ສືບຕໍ່​ກວດກາ​ຄືນໃໝ່, ສ້າງ ແລະ ຜັນ​ຂະຫຍາຍ ​ການ​ປະຕິບັດ​ບັນດາ​ແຜນ​ຮ່າງ, ໂຄງການ, ໜ້າທີ່​ຢູ່​ໃນ​ໂຄງການ​ຈຸດ​ ສຸມ​ໃນ​ການ​ສຳຫຼວດ​ຊັບພະຍາກອນ, ສິ່ງແວດລ້ອມ​ທາງ​ທະເລ ແລະ ທະເລ, ໝູ່​ເກາະ ໂດຍ​ພື້ນຖານ​ຢ່າງ​ມີ​ປະສິດ​ທິ​ຜົນ. ປະຕິບັດ​ການ​ປະມວນ, ຫັນ​ຂໍ້​ມູນ​ກ່ຽວ​ກັບ​ທະເລ ແລະ ທະເລ​ໝູ່​ເກາະ​ຂອງ​ບັນດາ​ກະຊວງ, ຂະແໜງການ,  ທ້ອງຖິ່ນ​ກັບ​ຖານ​ຂໍ້​ມູນ​ທະເລ​ແຫ່ງ​ຊາດ​ເປັນ​ດີ​ຈີ​ຕອນ. ຜັນ​ຂະຫຍາຍ, ປະຕິບັດ​ການ​ວາງ​ແຜນຜັງ​ບັນດາ​ເຂດ​ເສດຖະກິດ, ເຂດ​ອຸດສາຫະກຳ, ກຸ່ມ​ອຸດສາຫະກຳ ແລະ ເຂດ​ຕົວ​ເມືອງ​ທີ່ຢູ່​ແຄມ​ທະເລ ທີ່​ມີ​ສິດ​ອຳນາດ​ໄດ້​ອະນຸມັດ​ຜ່ານ, ຮັບປະກັນ​ຕາມ​ທິດ​ຍືນ​ຍົງ, ອີງ ໃສ່​ລະບົບ​ຊີວະ​ພາບ, ປັບ​ຕົວ​ໃຫ້​ແທດເໝາະ​ກັບ​ການ​ປ່ຽນແປງ​ຂອງ​ດິນ​ຟ້າ​ອາກາດ, ນ້ຳ​ທະເລ​ຍື່ງ​ຂຶ້ນ​ສູງ​ແບບ​ອັດ​ສະ​ລິ​ຍະ, ຕອບ​ສະໜອງ​ຕາມ​ບັນດາ​ຂໍ້​ກຳ ນົດ​ຂອງ​ກົດໝາຍ​ກ່ຽວ​ກັບ​ການ​ປົກ​ປັກ​ຮັກສາ​ສິ່ງ​ແວດ​ລ້ອມ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110