ຫົວ​ຂໍ້ : ອາຊຽນ-ຣັດເຊຍ ສືບຕໍ່ເຮັດໃຫ້ການພົວພັນຄູ່ຮ່ວມມືຍຸດທະສາດເລິກເຊິ່ງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 17/03/2020 08:49:45 ຈຳ​ນວນ​ຜູ້​ເຂົ້າ​ຢ້ຽມ​ຊົມ 632 ຄັ້ງ

  ວິທະຍຸ​ກະຈາຍສຽງ​ຫວຽດນາມ​ລາຍ​ງານ​ວ່າ: ອາທິດ​ຜ່ານ​ມາ, ສຳນັກງານ​ຄະນະ​ເລຂາ​ອາ​ຊຽນ​ຢູ່​ນະຄອນຫຼວງ​ຈາ​ກາ​ຕາ ປະເທດ​ອິນ​ໂດ​ເນ​ເຊຍ, ຄະນະ​ກຳມະການ​ຮ່ວມ​ມື​ລວມ​ອາ​ຊຽນ - ຣັດ​ເຊຍ (ARJCC) ໄດ້​ຈັດ​ກອງ​ປະຊຸມ​ປະຈຳ​ປີ​ຂັ້ນ​ເອກ​ອັກ​ຄະ​ລັດ​ຖະ​ທູດ​ຄັ້ງ​ທີ 18 ເພື່ອ​ແນໃສ່​ສຳຫຼວດ​ກວດຄືນ​ ແລະ ແລກປ່ຽນ​ບັນດາ​ມາດ​ຕະການ​ຊຸກຍູ້​ການ​ຜັນ​ຂະຫຍາຍ​ບັນດາ​ໂຄງການ ແລະ ການເຄື່ອນໄຫວ​ຮ່ວມ​ມື​ສອງ​ຝ່າຍ
  ຂ່າວ​ລະບຸ​ວ່າ: ກອງ​ປະຊຸມ, ສອງ​ຝ່າຍ​ໄດ້​ຕີ​ລາຄາ​ສູງ​ຕໍ່​ບັນດາ​ໝາກຜົນ​ການ​ຮ່ວມ​ມື​ຢ່າງ​ຕັ້ງໜ້າ ຊຶ່ງ​ບັນລຸ​ໄດ້​ໃນ​ບັນດາ​ຂົງເຂດ​ການເມືອງ - ຄວາມ​ໝັ້ນຄົງ, ເສດຖະກິດ ແລະ ວັດທະນະທຳ - ສັງ​ຄົມ. ໃນ​ຊຸມ​ປີ​ມໍ່ໆ​ມາ​ນີ້, ການ​ຄ້າສອງສົ້ນ​ລະຫວ່າງ​ອາ​ຊຽນ ​ແລະ​​ຣັດເຊຍ​ໄດ້​ເພີ່ມ​ຂຶ້ນ​ຢ່າງ​ວ່ອງ​ໄວ ໂດຍ​ສະເພາະ​ປີ 2018, ບັນລຸ​ໄດ້ 19,8 ຕື້​ໂດ​ລາ, ເພີ່ມ​ຂຶ້ນ​ເກືອບ 8% ເມື່ອ​ທຽບໃສ່ ປີ 2017.
  ຣັດ​ເຊຍ ຢັ້ງຢືນ​ວ່າ: ອາ ຊຽນ  ແມ່ນ​ໜຶ່ງ​ໃນ​ບັນດາ​ບຸລິມະ ສິດ​ແຖວ​ໜ້າ​ໃນ​ນະໂຍບາຍ​ການ​ຕ່າງປະເທດ​ຂອງ​ຣັດ​ເຊຍ. ຣັດ​ເຊຍ ໃຫ້​ຄຳ​ໝັ້ນ​ສັນຍາ​ວ່າ: ຈະ​ສະໜັບສະໜູນ​ບົດບາດ​ເປັນໃຈ​ກາງຂອງ​ອາ​ຊຽນ ໃນ​ການ​ປະກອບສ່ວນ​ຮັກສາ​ສັນຕິພາບ ແລະ ສະຖຽນ​ລະ​ພາບ​ໃນ​ພາກ​ພື້ນ, ຕັ້ງໜ້າ​ເຂົ້າ​ຮ່ວມ​ບັນດາ​ກົນ​ໄກ​ພາກ​ພື້ນ​ໂດຍ ອາ​ຊຽນ ນຳ​ພາ.
  ໃນ​ໄລຍະ​ຈະ​ມາ​ເຖິງ, ບັນດາ​ປະເທດ ອາ​ຊຽນ ແລະ ຣັດ​ເຊຍ ເຫັນ​ດີ​ເປັນ​ເອກະ​ພາບ​ສືບຕໍ່​ເຮັດ​ໃຫ້ການ​ພົວພັນ​ຄູ່​ຮ່ວມ​ມື​ຍຸດທະສາດ ລະຫວ່າງ ອາ​ຊຽນ - ຣັດ​ເຊຍ ເລິກເຊິ່ງ​ກວ່າ​ເກົ່າ, ເອົາໃຈໃສ່​ ເປັນ​ພິເສດ ເຖິງ​ບັນດາ​ຂົງເຂດ​ທີ່​ຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈ. ອາ​ຊຽນ ແລະ ຣັດ​ເຊຍ ເຫັນ​ດີ​ເປັນ​ເອກະ​ພາບ​ນຳ​ກັນ ຈະ​ຊຸກຍູ້​ການ​ລົງ​ນາມ​ບົດ​ບັນທຶກ​ຊ່ວຍ​ຈຳ​ກ່ຽວ​ກັບ​ການ​ຮ່ວມ​ມື​ໃນ​ຂົງເຂດ​ຄຸ້ມ​ຄອງ​ໄພ​ທຳ​ມະ​ຊາດ ປີ 2020.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110