ພັກປະຊາຊົນ ປະຕິວັດລາວ ຄືຜູ້ນຳທີ່ສະຫຼາດສ່ອງໃສ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 17/03/2020 09:03:11 ຈຳ​ນວນ​​ຢ້ຽມ​ຊົມ 540 ຄັ້ງ

   ພັກ​ປະຊາຊົນ ປະຕິວັດ​ລາວ ແມ່ນ​ຜູ້​ຈັດ​ຕັ້ງ​ນຳພາ​ທຸກ​ໄຊຊະນະ​ຂອງ​ການ​ປະຕິວັດ​ລາວ, ຜູ້​ທີ່​ໄດ້​ນຳພາ​ປະຊາຊົນ​ລາວ​ບັນດາເຜົ່າ​ຂຽນ​ໜ້າ​ປະ ຫວັດສາດ​ຍຸກ​ໃໝ່​ອັນ​ສະຫວ່າງ​ສະໄຫວ​ຂອງ​ຊາດ​ລາວ​ເຮົາ, ວັນ​ທີ  22 ມີນາ ແມ່ນ​ວັນ​ສ້າງຕັ້ງ​ ພັກ ປະຊາຊົນ ປະຕິວັດ​ລາວ  ຊຶ່ງ​ໃນ​ປີ​ນີ້​ໄດ້​ໝູນວຽນ​ມາ​ບັນຈົບ​ຄົບຮອບ 65 ປີ ພໍດີ ເນື່ອງ​ໃນ​ໂອກາດ​ຂ່ຳນັບ​ຮັບ​ຕ້ອນ​ວັນ​ສຳຄັນ​ດັ່ງກ່າວ ແລະ ຂ່ຳນັບ​ຮັບ​ຕ້ອນ​ກອງ​ປະຊຸມໃຫຍ່ຄັ້ງ​ ທີ V ຂອງ​ອົງຄະ​ນະ​ພັກ​ມະຫາ ວິທະຍາໄລ​ແຫ່ງ​ຊາດ (ມຊ),  ທ່ານ ນາງ ບຸນ​ທັນ ບຸນ​ຍາ​ວົງ ເລຂາ​ໜ່ວຍ​ພັກ  ຜູ້ອຳນວຍການ​ໂຮງຮຽນ​ປະຖົມ​ສົມບູນ​ສາທິດ ໄດ້​ກ່າວ​ສະແດງ​ຄວາມ​ຮູ້ສຶກ​ຜ່ານ​ສື່​ມວນ​ຊົນ​ວ່າ: ກ່ອນ​ອື່ນ​ທ່ານ​ໄດ້​ກ່າວ​ສະແດງ​ຄວາມ​ຮູ້​ບຸນຄຸນ ແລະ ຍ້ອງຍໍ​ສັນລະເສີນ​ຕໍ່​ຄຸນງາມຄວາມດີ​ຂອງ​ພັກ​ທີ່​ໄດ້​ນຳ​ເອົາ​ຄວາມ​ສຸກ​-​ຄວາມ​ຈະເລີນ​ຮຸ່ງເຮືອງ  ແລະ  ແສງສະ ຫວ່າງ​ມາສູ່​ພໍ່​ແມ່​ປະຊາຊົນ​ລາວ​ບັນດາເຜົ່າ  ຖ້າ​ບໍ່​ມີ​ເພິ່ນ​ໃນ​ມື້​ນັ້ນກໍຈະ​ບໍ່​ມີ​ພວກ​ເຮົາ​ດັ່ງ​ທຸກ​ວັນ​ນີ້.
   ທ່ານ  ນາງ ບຸນ​ທັນ ບຸນ​ຍາ​ວົງ ໄດ້​ກ່າວ​ເນັ້ນ​ຕື່ມ​ອີກ​ວ່າ: ໜ່ວຍ​ພັກໂຮງຮຽນ​ປະຖົມ​ສົມບູນ​ສາທິດເປັນໜ່ວຍພັກ​ ໜຶ່ງ​ທີ່​ຂຶ້ນ​ກັບ​ຄະນະ​ພັກ​ຮາກ​ຖານ​ສຶກສາ​ສາດ ມຊ ມີ​ສະມາ ຊິກ​ພັກ​ທັງ​ໝົດ 20 ສະຫາຍ, ຍິງ 18 ສະຫາຍ, ບຳນານ 7 ສະຫາຍ, ມີ​ຄູ​ທັງ​ໝົດ 24 ຄົນ, ຍິງ 20 ຄົນ, ໃນ​ນັ້ນ​ມີ​ຄູ​ອາສາ 3 ຄົນ, ຍິງ 2 ຄົນ, ນັກຮຽນທັງໝົດ 798 ຄົນ, ຍິງ 388 ຄົນ, ໜ່ວຍ​ພັກ​ພວກ​ເຮົາ​ໄດ້​ເອົາໃຈໃສ່​ຊີ້​ນຳ​ຢ່າງ​ໃກ້​ຊິດ​ຈາກ​ຂັ້ນ​ເທິງ​ໂດຍ​ສະເພາະ​ວຽກ​ງານ​ສ້າງ​ຂະບວນ​ການ​ອອກແຮງ​ງານ​ອະ​ນາ​ໄມ​ຮ່ອງນ້ຳ   ແລະ  ນຳພານັກຮຽນ ​ເກັບ​ຂີ້​ເຫຍື້ອບໍລິເວນ​ເດີ່ນໂຮງ ຮຽນ​ທຸກໆວັນ​ສຸກ ແລະ ​ຝຶກແອບ​ສິລະ​ປະ​ໄປ​ແຂ່ງຂັນ​ຂັ້ນ​ເຂດ, ຂັ້ນ​ເມືອງ​ໄດ້​ຊະນະ​ເລີດ​ຟ້ອນ​ລວມ​ໝູ່​ຍິງ​-​ຊາຍ, ແຂ່ງຂັນກິ ລາ​ເຕະບານ​ໄດ້ຊະນະ​ເລີດ​ຂັ້ນ​ເຂດ​ດົງ​ໂດກ, ໃນ​ວັນ​ທີ 3 ມີນາ​ ຜ່ານ​ມາ​ໄດ້​ຈັດ​ພິທີ​ຮັບ​ເອົາ​ມະຫາຊົນ​ກ້າວໜ້າ​ເຂົ້າ​ເປັນ​ສະມາຊິກ​ເຍົາວະ​ຊົນທັນ ວາ ​ຈຳນວນ  90 ​ຄົນ ຍິງ 55  ຄົນ, ໜ່ວຍ​ພັກ​ພວກ​ເຮົາ​ມີ​ຄວາມ​ສາມັກຄີ​ແໜ້ນ​ແຟ້ນ ແລະ ມີ​ຄວາມ​ຮັບຜິດຊອບ​ສູງ​ຕໍ່ໜ້າ​ທີ່​ວຽກ​ງານ​ວິຊາ​ສະເພາະ​ທີ່​ການຈັດຕັ້ງ​ຂັ້ນ​ເທິງ​ມອບ​ໝາຍ​ໃຫ້ເປັນ​ແບບຢ່າງ​ທີ່​ດີ​ໃຫ້ແກ່​ ມະຫາຊົນ, ມີ​ແບບແຜນການ ​ດຳລົງ​ຊີວິດ​ແບບ​ພໍ​ພຽງ,  ສະມາ ຊິກ​ທຸກ​ສະຫາຍ​ກໍໄດ້​ເອົາໃຈ ໃສ່​ຢ່າງ​ຕັ້ງໜ້າ​ປະຕິບັດ​ກົດລະ ບຽບ​ຂອງ​ພັກ, ກົດໝາຍ​ຂອງ​ລັດຕ້ານ​ແນວ​ຄິດ​ເອກະ​ຊົນຈຳ ແນກ​ມິດ​ສັດຕູ​ຈະແຈ້ງ, ເອົາ ໃຈໃສ່​ຂະຫຍາຍ​ສະມາຊິກ​ພັກ​ໄດ້​ເປັນ​ຢ່າງ​ດີ.
   ເນື່ອງ​ໃນ​ໂອກາດວັນ ​ສ້າງ ຕັ້ງ​ພັກ ປະຊາຊົນປະຕິວັດລາວ ທີ່​ຈະ​ໝູນວຽນ​ຄົບຮອບ 65 ປີ ຂ້າພະເຈົ້າ  ຂໍ​ຕາງໜ້າໃຫ້ພະນັກ ງານ​ຄູ​-​ອາຈານ ແລະ ນັກຮຽນ ໝົດ​ທຸກ​ຄົນ  ຂໍ​ອວຍ​ພອນ​ໄຊ​ອັນ​ປະເສີດ​ໃຫ້ແກ່​ທ່ານ​ຜູ້ນຳ​ພັກ​-​ລັດ ມີ​ສຸຂະພາບ​ເຂັ້ມ​ແຂງ​-​ແຂງແຮງ ຊີ້​ນຳໆພາ​ປວງ​ຊົນ​ລາວ​ທັງ​ຊາດ​ໃຫ້ມີ​ຄວາມ​ຈະເລີນ​ກ້າວໜ້າ​ຕະຫຼອດ​ໄປ.

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110