ຫົວ​ຂໍ້ : ມອບຫຼຽນກາມິດຕະພາບໃຫ້ແກ່ຜູ້ຕາງໜ້າຂອງອົງການອຸຍນີເຊັບປະຈຳລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 18/03/2020 09:01:36 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1222 ຄັ້ງ

  ລັດຖະບານ ແຫ່ງ ສປປ ລາວ ໄດ້​ປະດັບ​ຫຼຽນ​ກາ​ມິດ ຕະພາບ​ໃຫ້​ແກ່ ທ່ານ ອົກ​ຕາ​ວຽນ ບີ​ໂວນ (Mr. Octavian BIVOL) ຜູ້ຕາງໜ້າ​ຂອງ​ອົງ ການ​ອຸຍ​ນີ​ເຊັບ (UNICEF) ປະຈຳ ສປປ ລາວ ໃນ​ໂອກາດ​ທີ່​ທ່ານ​ສິ້ນ​ສຸດ​ການ​ປະຕິບັດ​ໜ້າທີ່ ຢູ່ ສປປ ລາວ. 
  ພິທີ​ປະດັບ​ຫຼຽນ​ດັ່ງກ່າວ ໄດ້​ຈັດ​ຂຶ້ນ​ໃນ​ວັນ​ທີ 17 ມີນາ​ນີ້ ທີ່​ກະຊວງ​ການ​ຕ່າງປະເທດຕາງໜ້າ​ໃຫ້​ລັດຖະບານ ສປປ ລາວ ປະດັບຫຼຽນ ດັ່ງກ່າວ ໂດຍ ແມ່ນ ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ.
  ທ່ານ ອົກ ຕາ ວຽນ ບີ ໂວ ໄດ້ຖືກແຕ່ງຕັ້ງໃຫ້ມາເປັນຜູ້ຕາງໜ້າອົງການອຸຍນີເຊັບ ປະຈຳ ສປປ ລາວ ຕັ້ງແຕ່ທ້າຍປີ 2017 ຊຶ່ງ ຕະຫຼອດໄລຍະຂອງການປະຕິບັດໜ້າທີ່ ທ່ານໄດ້ປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວຊີ້ນໍາວຽກງານການຊ່ວຍເຫຼືອຂອງອົງການອຸຍນີເຊັບ ຕໍ່ ສປປ ລາວ, ກໍຄືການຊຸກຍູ້ ແລະ ສະໜັບສະໜູນ ລັດຖະບານ ສປປ ລາວ ໃນວຽກງານການພັດທະນາເດັກນ້ອຍ, ການເສີມ ຂະຫຍາຍ ແລະ ປັບປຸງການໃຫ້ບໍລິການ ເພື່ອປ້ອງກັນການແຜ່ລະບາດຂອງເຊື້ອພະຍາດຕິດແປດຕ່າງໆ, ການສົ່ງເສີມໂພຊະນາການເດັກ, ການປັບປຸງການສຶກສາໃນຂັ້ນອະນຸບານ ແລະ ນໍ້າສະອາດ ໃນເຂດຊຸມຊົນ ແລະ ສະຖານທີ່ການສຶກສາຕ່າງໆ ໃນເຂດຫ່າງໄກສອກຫຼີກ, ການຊ່ວຍເຫຼືອສຸກເສີນໃນເວລາເກີດ ແລະ ການຟື້ນຟູພາຍຫຼັງໄພພິບັດ ໂດຍສະເພາະແມ່ນການຊຸກຍູ້ວຽກງານການຈັດຕັ້ງ ປະຕິບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບແມ່ຍິງ ແລະ ເດັກນ້ອຍ. ໃນໄລຍະດຳລົງຕໍາແໜ່ງດັ່ງກ່າວ, ທ່ານສາມາດລະດົມທຶນເຂົ້າ ໃນການຈັດຕັ້ງປະຕິບັດ ວຽກ ງານ ຂອງອົງການ ອຸຍ ນີ ເຊັບ ປະຈຳ ສປປ ລາວ ມີ ມູນ ຄ່າ ເຖິງ 62.880.000 ໂດ ລາ .
  ໃນວັນດຽວກັນນີ້, ທ່ານ ອົກ ຕາ ວຽນ ບີ ໂວນ (Mr. Octa vian BIVOL) ກໍໄດ້ເຂົ້າຢ້ຽມຂາໍ່ນັບອຳລາ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ. ໃນໂອກາດ ນີ້, ທ່ານລັດຖະມົນຕີໄດ້ສະແດງຄວາມຊົມເຊີຍຕໍ່ຜົນສຳເລັດຂອງທ່ານ ອົກ ຕາວຽນ ບີ ໂວນ ທີ່ ມາປະຕິບັດໜ້າທີ່ ຢູ່ ສປປ ລາວ ທີ່ ໄດ້ຕັ້ງໜ້າປະກອບສ່ວນຊຸກຍູ້ເຮັດໃຫ້ການຮ່ວມມືລະຫວ່າງ ສປປ ລາວ ແລະ ອົງການອຸຍນີ ເຊັບ ນັບມື້ນັບຂະຫຍາຍຕົວຢ່າງຕໍ່ເນື່ອງ.
(ຂ່າວ: ກະຊວງ ການ ຕ່າງ ປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110