ຫົວ​ຂໍ້ : ແຕ່ງຕັ້ງຄະນະບໍລິຫານງານສະຫະພັນໝາກເສິກ ນວ ຊຸດໃໝ່

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 18/03/2020 09:15:18 ຈຳ​ນວນ​ຜູ້​ເຂົ້າ​ຢ້ຽມ​ຊົມ 916 ຄັ້ງ

  ພິທີ​ປະກາດ​ແຕ່ງຕັ້ງ​ຄະນະ​ບໍລິຫານ​ງານສະຫະພັນ​ໝາກເສິກ​ນະຄອນຫຼວງ​ວຽງ​ຈັນ (ນວ) ຊຸດໃໝ່ ຈັດ​ຂຶ້ນ​ເມື່ອ​ບໍ່​ດົນ​​ມານີ້​ ຢູ່​ຫ້ອງການ​ພະ​ແນ​ກ​ສຶກສາ​ທິ​ການ ແລະ ກິລາ ນວ ບ້ານ​ບຶງ​ຂະ​ຫຍອງ ເມືອງ​ສີ​ສັດຕະ​ນາກ ຊຶ່ງ​ມີ​ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນ​ກ​ສຶກສາ​ທິ​ການ ແລະ ກິລາ ນວ, ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວໜ້າ​ຂະແໜງ​ກິລາ​ລະດັບ​ສູງ ແລະ ທ່ານ ຄຳ​ພັນ ພັນທຸ​ລັກ  ຫົວໜ້າ​ສ່ວຍ​ສາ​ອາກອນ ນວ ທັງ​ເປັນ​ປະທານ​ສະຫະພັນ​ໝາກ ເສິກ ນວ ຊຸດ​ໃໝ່ ພ້ອມ​ດ້ວຍ​ຄະນະ​ ບໍລິຫານ​ງານ​ສະຫະພັນ  ແລະ  ພະນັກ ງານ​ທີ່​ກ່ຽວຂ້ອງ​ເຂົ້າ​ຮ່ວມ.
  ໂອກາດ​ນີ້ ທ່ານ ຄຳ​ພັນ ພັນທຸ​ລັກ ກ່າວ​ວ່າ: ຮູ້ສຶກ​ເປັນ​ກຽດ​ຢ່າງ​ສູງ​ທີ່​ໄດ້​ຮັບ​ໜ້າທີ່​ ທີ່​ມີ​ກຽດ​ອັນ​ສະຫງ່າ​ຄັ້ງ​ນີ້ ເພື່ອ​ເຮັດ​ໃຫ້​ຄວາມ​ໄວ້​ເນື້ອ​ເຊື່ອ​ໃຈ​ຂອງ​ທ່ານ​ເຈົ້າ​ຄອງ ນວ ເພື່ອ​ເປັນ​ການ​ກະກຽມ​ຄວາມ​ພ້ອມ​ເຂົ້າ​ຮ່ວມ​ສ້າງ​ຜົນງານ​ໃນ​ງານ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ XI . ຄະນະ​ບໍລິຫານ​ງານ​ຊຸດ​ໃໝ່ ຈະ​ພະຍາຍາມ​ສູ້​ຊົນ​ເຮັດ​ໃຫ້​ໄດ້​ດີ​ຢ່າງ​ສຸດ​ຄວາມ​ສາມາດ ເພື່ອ​ນຳພາ​ຄູ​ຝຶກ ແລະ ນັກ​ກິລາ​ເຂົ້າ​ຮ່ວມ​ສ້າງ​ຜົນງານ​ຮັກສາ​ມູນເຊື້ອ​ໃຫ້​ໄດ້ 5 ຫຼຽນ​ຄຳ ເພື່ອ​ຮັບປະກັນ​ໃຫ້​ໄດ້​ຄື​ແນວ​ນັ້ນ ສະຫະພັນ​ໄດ້​ມີ​ການ​ປຸກລະດົມ​ຂົນຂວາຍ​ການ​ຊ່ວຍ ເຫຼືອຂອງບັນດາ​ພາກສ່ວນ​ບໍລິສັດ​ຫ້າງ​ຮ້ານ​ຈຳນວນ​ໜຶ່ງ ເພື່ອ​ມາ​ເປັນ​ນະໂຍບາຍ​ພິເສດ​ຊຸກຍູ້​ນັກ​ກິລາ ພ້ອມ​ທັງ​ຈັດ​ຝຶກອົບຮົມ​ສ້າງ​ຄວາມຮູ້​ຄວາມ​ສາມາດ​ໃຫ້​ນັກ​ກິລາ 8 ຄົນ ຍິງ 4 ຄົນ ສາມາດ​ພັດທະນາ​ຕົນ​ເອງ​ຢ່າງ​ມີ​ຄວາມ​ເຂັ້ມແຂງ ແລະ ມີຄວາມ​ພ້ອມ​ຮອບດ້ານ. ນອກ​ນັ້ນ ​ໄດ້​ມີ​ການ​ລົງ​ຕິດຕາມ​ຢ້ຽມຢາມ​ຢ່າງ​ໃກ້​​ຊິດ ເພື່ອ​ເປັນ​ກຳລັງ​ໃຈ​ໃຫ້​ນັກ​ກິລາ​ໃນ​ເວລາ​ຝຶກ​ຊ້ອມ.
  ສຳລັບ​ນັກ​ກິລາ​ໝາກເສິກ ນວ ຊຸດ​ນີ້​ລ້ວນ​ແຕ່​ເປັນ​ນັກ​ກິລາ​ຊຸດ​ເກົ່າ​ທີ່​ເຄີຍ​ສ້າງ​ຜົນງານ​ຍາດ​ໄດ້ 5 ຫຼຽນ​ຄຳ 3 ຫຼຽນ​ເງິນ ແລະ 2 ຫຼຽນ​ທອງ ໃຫ້​ທີ​ມ ນັກ​ກິລາ ນວ ໃນ​ອຸດົມ​ໄຊ​ເກມ ປີ 2014 ທຸກ​ຄົນ​ເກັບ​ຕົວ​ຝຶກຊ້ອມ​ຢູ່​ທີ່​ໂຮງຮຽນ​ມັດທະຍົມ​ສຶກສາ​ສົມບູນ​ອາ​ນຸ​ວົງ ເລີ່ມ​ຝຶກແອບ​ມາ​ແຕ່​ເດືອນ​ພະຈິກ  2019  ໂດຍ​ຝຶກຊ້ອມ​ສະ ເພາະ​ແຕ່​ຕອນ​ແລງ ເນື່ອງ​ຈາກ​ນັກ​ກິລາ​ສ່ວນ​ໃຫຍ່​ເປັນ​ພະນັກງານ ແລະ ນັກ​ຮຽນ​-​ນັກ​ສຶກສາ ເລີ່ມ​ເວລາ 17:30-20:30 ໂມງ.
(ຂ່າວ: ວົງ​ຈອນ​ກິລາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110