ຫົວ​ຂໍ້ : ກະຊວງ ຜທ ປາຖະກະຖາວັນສຳຄັນຂອງພັກ-ຂອງຊາດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 18/03/2020 09:19:07 ຈຳ​ນວນ​ຜູ້​ເຂົ້າ​ຢ້ຽມ​ຊົມ 360 ຄັ້ງ

    ກະຊວງ​ແຜນການ ແລະ ການ​ລົງທຶນ (ຜທ) ໄດ້​ຈັດ​ຕັ້ງ​ປາຖະກະຖາ​ວັນ​ສ້າງຕັ້ງ​ພັກ​ປະຊາຊົນ​ ປະຕິວັດ​ລາວ​ຄົບຮອບ 65 ປີ (22/3/1955-22/3/2020), ວັນ​ສະຖາປະນາ ສປປ ລາວ ຄົບຮອບ 45 ປີ, ວັນ​ເກີດ​ປະທານ ໄກສອນ ພົມວິຫານ ຄົບຮອບ 100 ປີ, ວັນ​ສ້າງຕັ້ງ​ແນວ​ລາວ​ສ້າງ​ຊາດ​ຄົບຮອບ 70 ປີ, ວັນ​ສ້າງຕັ້ງ​ຄະນະ​ຊາວ​ໜຸ່ມ ປະຊາຊົນ​ປະ ຕິວັດ​ລາວ​ຄົບຮອບ 65 ປີ ແລະ ວັນ​ສຳຄັນ​ອື່ນໆ  ພ້ອມ​ດຽວ​ກັນ ປີ 2020 ຍັງ​ເປັນ​ປີ​ມ້ວນທ້າຍ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ, ແຜນ​ພັດທະນາ​ເສດ​ຖະ​ກິດ​-​ສັງ ຄົມ​ແຫ່ງ​ຊາດ 5 ປີ​ຄັ້ງ​ທີ VIII.
ພິທີ​ດັ່ງກ່າວ​ຈັດ​ຂຶ້ນ ໃນ​ວັນ​ທີ 17 ມີນາ​ນີ້ ທີ່​ກະຊວງ ຜທ ໂດຍ​ການຂຶ້ນ​ປາຖະກະຖາ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ ຜທ  ໂດຍ​ມີ​ພະນັກງານ, ສະມາຊິກ​ພັກ​ທົ່ວ​ກະຊວງ ຜທ ເຂົ້າ​ຮ່ວມ.
ໃນ​ພິທີ​ທ່ານ ສອນ​ໄຊ ສີ​ພັນ​ດອນ ໄດ້​ຍົກ​ໃຫ້​ເຫັນ​ມູນເຊື້ອ ການ​ນຳພາ​ຂອງ​ພັກ​ໃນ​ພາລະກິດ​ແຫ່ງ​ການ​ຕໍ່ສູ້​ປົດ​ປ່ອຍ​ຊາດ​ໃນ​ເມື່ອ​ກ່ອນ ແລະ ໃນ​ພາລະກິດ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ພາຍ​ໃຕ້​ການ​ນຳພາ​ຂອງ​ພັກ​ເຮົາ, ຖື​ເອົາ​ໂອກາດ​ນີ້​ເປັນ​ການ​ເພີ່ມ​ທະວີ​ການ​ສຶກສາ​ອົບຮົມ​ພະນັກງານ, ສະມາຊິກ​ພັກ, ນັກຮົບ, ລັດຖະກອນ ແລະ ປະຊາຊົນ​ບັນດາເຜົ່າ​ກ່ຽວ​ກັບ​ນ້ຳໃຈ​ຮັກ​ຊາດ, ມູນເຊື້ອ​ສາມັກຄີ​ປອງ​ດອງ​ປະຊາຊົນ​ບັນດາເຜົ່າ ແລະ ຊັ້ນ​ຄົນ, ນ້ຳໃຈ​ຕໍ່ສູ້​ອັນ​ອົງການ​ກ້າຫານ​ຂອງ​ກອງທັບ ແລະ ປະຊາຊົນ​ລາວ​ເຮົາ.
ປຸກລະດົມ​ນ້ຳໃຈ​ຮັກ​ຊາດ, ຮັກ​ລະບອບ​ໃໝ່, ເປັນ​ເຈົ້າ​ຕົນ​ເອງ, ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ, ເຊີດ​ຊູ​ບົດບາດ​ການ​ນຳພາ​ຂອງ​ພັກ​ໄປ​ພ້ອມ​ກັບ​ການ​ປຸກລະດົມ​ແຂ່ງຂັນ “ຮັກ​ຊາດ ແລະ ພັດທະນາ” ໂດຍ​ຕິດ​ພັນ​ກັບ​ການ​ຍູ້​ແຮງ​ຂະບວນ​ການ​ຕ່າງໆ​ເພື່ອ​ສືບຕໍ່​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ, ແຜນ​ພັດທະນາ​ເສດ​ຖະ​ກິດ​-​ສັງຄົມ​ແຫ່ງ​ຊາດ 5 ປີ​ຄັ້ງ​ທີ VIII ໃຫ້​ສຳເລັດ​ຕາມ​ຄາດ​ໝາຍ.
ທ່ານ​ໄດ້​ກ່າວ​ໃຫ້​ຮູ້​ຕື່ມ​ອີກ​ວ່າ: ຖື​ເອົາ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ​ເປັນ​ການ​ປັບປຸງ​ກໍ່ສ້າງ​ພັກ​ໃນ​ທຸກ​ດ້ານ​ດ້ວຍ​ມາດ​ຕະການ​ສືບຕໍ່​ດຳເນີນ​ຊີວິດ​ການເມືອງ​ປັບປຸງ​ປົວແປງ​ພາຍ​ໃນ​ພັກ ໃຫ້​ເລິກເຊິ່ງ, ເຮັດ​ໃຫ້​ພັກ​ມີ​ຄວາມ​ປອດ​ໃສ, ເຂັ້ມແຂງ ແລະ ໜັກ​ແໜ້ນ, ເພີ່ມ​ຄວາມ​ສາມາດ​ນຳພາ ແລະ ລັກສະນະ​ນຳ​ໜ້າ​ຂອງ​ພັກ​ໃຫ້​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ, ພ້ອມ​ກັນ​ນັ້ນ​ກໍ​ເປັນ​ເຈົ້າ​ການ​ຍົກ​ສູງ​ສະຕິ​ລະວັງ​ຕົວ​ຕໍ່​ການ​ມ້າງເພ​ຂອງ​ອິດ​ທິ​ກຳລັງ​ປໍ​ລະ​ປັກ, ຕີ​ຖອຍ​ບັນດາ​ປະກົດ​ການ​ຫຍໍ້ທໍ້​ຕ່າງໆ​ໃນ​ສັງຄົມ, ຮັບປະກັນ​ສະຖຽນ​ລະ​ພາບ​ທາງ​ດ້ານ​ການເມືອງ​ຢ່າງ​ໜັກ​ແໜ້ນ ແລະ ມີ​ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ, ຄວາມ​​ສະຫງົບສຸກ​ຂອງ​ປະຊາ​ຊົນ.
ສືບຕໍ່​ບຸກ​ທະລຸ​ທາງ​ດ້ານ​ແນວ​ຄິດ​ຈິນຕະນາການ, ສ້າງ​ໃຫ້​ມີ​ການ​ຫັນປ່ຽນ​ຢ່າງ​ແຂງແຮງ, ເລິກເຊິ່ງ ແລະ ຮອບດ້ານ, ສ້າງ​ຄວາມ​ຮັບ​ຮູ້​ແນວ​ຄິດ ແລະ ການ​ກະທຳ, ສົ່ງເສີມ​ດ້ານ​ດີ, ແກ້​ໄຂ​ບັນດາ​ຂໍ້ຄົງຄ້າງ ແລະ ສິ່ງ​ທ້າ​ທາຍ​ຕ່າງໆ​ທີ່​ເກີດ​ຂຶ້ນ, ສ້າງ​ຄວາມ​ເຊື່ອ​ໝັ້ນ​ຂອງ​ພະນັກງານ ແລະ ປະຊາຊົນ​ບັນດາເຜົ່າ ຕໍ່​ການ​ນຳພາ​ຂອງ​ພັກ, ການ​ຄຸ້ມ​ຄອງ​ຂອງ​ລັດ, ເພີ່ມ​ທະວີ​ຄວາມ​ຮັບຜິດຊອບ​ປະກອບສ່ວນ​ເຂົ້າ​ໃນ​ພາລະ ກິດ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ເພື່ອ​ນຳ​ເອົາ​ປະເທດ​ກ້າວ​ຂຶ້ນ​ສູ່​ຄວາມ​ວັດທະນາ​ຖາ​ວອນ.
(ຂ່າວ​-​ພາບ : ສຸກ​ສາຄອນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110