ຫົວ​ຂໍ້ : ອິນໂດເນເຊຍ ເພີ່ມງົບເພື່ອກະຕຸ້ນເສດຖະກິດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 18/03/2020 09:25:53 ຈຳ​ນວນ​ຜູ້​ເຂົ້າ​ຢ້ຽມ​ຊົມ 266 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ວັນ​ທີ 14 ມີນາ​ຜ່ານ​ມາ ທ່ານ ນາງ ສີມຸນ​ຢາ​ນີ ອິນ​ທະ​ຣາ​ວາ​ຕີ ລັດຖະມົນຕີ​ກະຊວງ​ການ​ເງິນ​ຂອງ​ອິນ​ໂດ​ເນ​ເຊຍ ໄດ້​ອອກ​ຖະແຫຼງການ​ກ່ຽວ​ກັບ​ມາດ​ຕະການ​ກະ​ຕຸ້ນ​ເສດຖະ​ກິດ ລວມ​ເຖິງ​ການ​ຊ່ວຍເຫຼືອ​ທຸກ​ພາກສ່ວນ​ທີ່​ໄດ້​ຮັບ​ຜົນ​ກະທົບ​ຈາກ​ການ​ແຜ່​ລະບາດ​ຂອງ​ເຊື້ອ​ໄວ​ຣັດ COVID-19.
  ຂ່າວ​ລະບຸ​ວ່າ: ຄະນະ​ລັດຖະມົນຕີ ໄດ້​ມີ​ມະຕິ​ເຫັນ​ດີ​ຈັດ​ສັນ​ງົບປະມານ​ສຸກ​ເສີນ​ເປັນ​ວົງ​ເງິນ 120 ລ້ານໆ​ຣູ​ເປຍ, ກວມ 0,8% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ໃນ​ປັດຈຸບັນ, ແຕ່​ອາດ​ຈະ​ສົ່ງ​ຜົນ​ໃຫ້​ອັດຕາ​ສ່ວນ​ໜີ້​ສາທາລະນະ GDP ຕໍ່​ຫົວ​ຄົນ​ເພີ່ມ​ຈາກ 1,8% ເມື່ອ​ປີ​ທີ່​ຜ່ານ​ມາ, ເປັນ 2,5% ໃນ​ປີ​ນີ້. ທັງ​ນີ້, ແນວທາງ​ການ​ຊ່ວຍເຫຼືອ ລວມ​ເຖິງ​ການ​ຍົກເວັ້ນ​ພາສີ​ໃນ​ໄລຍະ​ໜຶ່ງ​ໃຫ້​ກັບ​ລູກຈ້າງ​ໃນ​ບາງ​ສາຂາ​ຂອງ​ພາກ​ອຸດສາຫະກຳ ແລະ ການ​ຫຼຸດຜ່ອນ​ພາສີ​ໃຫ້​ກັບ​ເຈົ້າ​ຂອງ​ກິດຈະການ, ທ່ານ ນາງ ອິນ​ທະ​ຣາ​ວາ​ຕີ ເຄີຍ​ກ່າວ​ກ່ອນ​ໜ້າ​ນີ້ ໂດຍ​ຄາດ​ຄະເນ​ວ່າ: ທ່າ​ອ່ຽງ​ການ​ຂະຫຍາຍຕົວ​ຂອງ​ເສດຖະກິດ ອິນ​ໂດ​ເນ​ເຊຍ ຊຶ່ງ​ມີ​ມູນ​ຄ່າ​ຫຼາຍ​ທີ່​ສຸດ​ໃນ​ອາຊີ​ຕາເວັນ​ອອກ​ສ່ຽງ​ໃຕ້ ອາດ​ຈະ​ຫຼຸດ​ລົງ​ເຫຼືອ 4,7% ໃນ​ປີ​ນີ້. ຖ້າ​ຫາກ​ເຊື້ອ​ໄວ​ຣັດ COVID-19 ສົ່ງ​ຜົນ​ກະທົບ​ຕໍ່​ເສດຖະກິດ​ຂອງ​ຈີນ ຊຶ່ງ​ເປັນ​ປະເທດ​ທຳອິດ​ທີ່​ໄດ້​ຮັບ​ຜົນ​ກະທົບ ຈາກ​ເຊື້ອ​ໂຣກ​ນີ້ ແລະ ເປັນ​ຕ່ອງ​ໂສ້​ຕໍ່​ເນື່ອງ​ໄປ​ຍັງ​ລະບົບ​ເສດຖະກິດ​ທົ່ວ​ໂລກ. 
  ຂ່າວ​ລະບຸ​ວ່າ: GDP ຂອງ​ອິນ​ໂດ​ເນ​ເຊຍ ຂະຫຍາຍ ຕົວ 5,2% ເມື່ອ​ປີ​ທີ່​ຜ່ານ​ມາ. ຂະນະ​ທີ່ທະນາຄານ​ກາງ ອິນ​ໂດ​ເນ​ເຊຍ ຍັງ​ຄົງ​ມີ​ທ່າ​ອ່ຽງ​ການ​ຂະຫຍາຍຕົວ​ຂອງ GDP ໃນ​ປີ​ນີ້ ປະມານ 5,1% ແຕ່​ສົ່ງ​ສັນຍານ​ວ່າ: ມີ​ທ່າ​ອ່ຽງ​ປັບ​ຫຼຸດ​ລົງເນື່ອງ​ຈາກ​ວິ​ກິດ COVID-19 ໂດຍ​ຄະນະ​ກຳມະ ການ​ກຳນົດ​ນະໂຍບາຍ​ຂອງ​ທະນາຄານ​ກາງ ອິນ​ໂດ​ເນ​ເຊຍ ມີ​ກຳນົດ​ປະຊຸມ​ກັນ​ຄັ້ງ​ຕໍ່​ໄປ​ໃນ ລະຫວ່າງ ວັນ​ທີ 18-19 ມີນາ​ນີ້.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110