ຫົວ​ຂໍ້ : ຊາອຸດິດ ອາຣາບີ ຈະເພີ່ມກຳລັງການຜະລິດນ້ຳມັນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 18/03/2020 09:28:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 487 ຄັ້ງ

  ຂ່າວ​ຕ່າງປະເທດ​ລາຍ​ງານຫວ່າງແລ້ວນີ້, ຊາ​ອຸ​ດິ ອາ​ຣາມ​ໂກ ບໍລິສັດ​ນຳ້ມັນ ແລະ ແ​ກັສ​ທຳ​ມະ​ຊາດ​ແຫ່ງ​ຊາດ​ ຂອງ ຊາ​ອຸ​ດິດ ອາ​ຣາ​ບີ ເປີດ ເຜີຍ​ວ່າ: ໄດ້​ຮັບ​ຄໍາ​ສັ່ງ​ຈາກ​ກະຊວງ​ພະລັງງານ​ໃຫ້​ເພີ່ມ​ກຳລັງ​ການ​ຜະລິດ​ນຳ້ມັນ​ຈາກ 12 ລ້ານ​ບາ​ເຣນ​ຕໍ່​ມື້, ຂຶ້ນ​ເປັນ 13 ລ້ານ​ບາ​ເຣນ​ຕໍ່ມື້ ຊຶ່ງ​ຈະ​ເປັນ​ການ​ເພີ່ມ​ຂຶ້ນ​ຄັ້ງ​ທຳອິດ ນັບ​ຕັ້ງແຕ່​ປີ 2009 ເປັນຕົ້ນ​ມາ.
  ທ່ານ ອາ​ມິນ ນາ​ສ​ເຊີ ຫົວ ໜ້າ​ເຈົ້າ​ໜ້າທີ່​ບໍລິຫານ​ຂອງ ຊາ​ອຸ​ດິ ອາ​ຣາມ​ໂກ ໄດ້​ອອກ​ຖະແຫຼງການ​ວ່າ: ບໍລິສັດ​ກໍາ ລັງ​ພະຍາຍາມ​ຈົນ​ສຸດ​ຄວາມ​ສາມາດ ເພື່ອ​ປະຕິບັດ​ຕາມ​ຄຳ​ສັ່ງ​ໂດຍ​ໄວ​ທີ່​ສຸດ​ເທົ່າ​ທີ່​ຈະ​ເປັນ​ໄປ​ໄດ້, ແຕ່​ບໍ່​ໄດ້​ກໍາ​ນົດ​ຂອບ​ເວ​ລາ. ໝາຍ​ຄວາມ​ວ່າ: ບໍລິສັດ​ຈະ​ຕ້ອງ​ເພີ່ມ​ການ​ລົງທຶນ​ອີກ​ມະຫາສານ ເພື່ອ​ເພີ່ມ​ການ​ຜະລິດ​ນຳ້​ມັນ. ຊາ​ອຸດິ ອາ​ຣາມ​ໂກ ເປີດເຜີຍ​ວ່າ: ຈະ​ເພີ່ມ​ກໍາ​ລັງ​ການ​ຜະລິດ​ໃນ​ເດືອນ​ເມສາ 12,3 ລ້ານ​ບາ​ເຣນ​ຕໍ່​ມື້ ຫຼື ເກີນ​ຈາກ​ກຳລັງ​ການ​ຜະລິດ​ສູງ​ສຸດ 300.000 ບາ​ເຣນ​ຕໍ່​ມື້. 
  ກຸ່ມ​ປະເທດ​ຜູ້​ສົ່ງ​ອອກ​ນຳ​ມັນ (ໂອ​ເປັກ) ທີ່​ນຳ​ໂດຍ ຊາ​ອຸ​ດິດ ອາ​ຣາ​ບີ ແລະ ກຸ່ມ​ນອກ​ໂອ​ເປັກ ຊຶ່ງ​ນຳ​ໂດຍ ຣັດ​ເຊຍ ໄດ້​ເຮັດ​ຂໍ້​ຕົກລົງ​ຈຳກັດ​ເພດານ​ການ​ຜະລິດ ຕັ້ງແຕ່​ທ້າຍ​ປີ 2016, ແຕ່​ຂໍ້​ຕົກລົງ​ດັ່ງກ່າວ ສິ້ນ​ສຸດ​ລົງ​ເມື່ອ​ອາທິດ​ທີ່​ຜ່ານ​ມາ. ເມື່ອ​ໂອ​ເປັກ ຕ້ອງການ​ໃຫ້​ຫຼຸດ​ກຳລັງ​ການ​ຜະ​ລິດ​ນຳ້​ມັນ​ລົງ​ອີກ, ແຕ່​ຣັດ​ເຊຍ ມີ​ຄວາມ​ຄິດ​ເຫັນ​ທີ່​ແຕກ​ຕ່າງ​ເຮັດ​ໃຫ້​ໂອ​ເປັກ ປະກາດ​ຍົກເລີກ​ເພດານ​ການ​ຜະລິດ​ທັງ​ໝົດ ແລະ ຣັດ​ເຊຍ ປະກາດ​ຈະ​ເພີ່ມ​ກຳລັງ​ການ​ຜະລິດ​ອີກ 300.000-500.000 ບາ​ເຣນ​ຕໍ່​ມື້, ເຮັດ​ໃຫ້​ລາຄາ​ນຳ້ມັນ​ໂລກ​ຫຼຸດ​ລົງ​ຫຼາຍ ນັບ​ຕັ້ງແຕ່​ຕົ້ນ​ອາທິດ​ທີ່​ຜ່ານ​ມາ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110